Read idege 2 ỊDỊRỊHỤ 9 Bible Online

2 ỊDỊRỊHỤ 9 - idege bible

2 ỊDỊRỊHỤ 9

¹Ụka ọhẹ lẹ, Ịlayịcha ọlọmwụ à wụrụ ọngọhẹ bwu ẹpwụ nya alọmwụ anjwo byọọ yẹkẹẹ, “Nwụlanọ, ká hu ang kele ka epweji nya iRamotu-igiliyadị wẹẹ. Aa kpa ekpem nya ida nya olivu ọlẹ ba ịlọng mẹ.

²Ụka ka pwụ ụwa lẹ, a tịtọ nya iJehu ọlẹ ká adamwụ ochiche ri iJehochafatị, ká adamwụ-ọgbahị ri iNimchi mẹ. Aa wụrwọọ ka ube ọlẹpwụ hi aliko nyamwụ,

³ká ya ida nya olive ọlẹ hwọọ e-egbeju, ka byọọ ịịlẹ mẹ, ‘Amkpaa hung adịrahụ nya ala Isirẹlụ lẹ.’ Á họ ịnyị kpá lẹ, à wụrụ ụgbẹyị, ká chị agaga rụ bwu ụwa kpa ọhịhị nyang be mẹ.”

⁴Ọọwa, onjwo ọlọmwụ ọwẹ à wuleji kele ka iRamotu-igiliyadị lẹlẹ.

⁵Ụka kọ pwụ ụwa, ọ yẹ ká alegbeju nya angịdẹwụ juwa ẹ-ẹga ookpokpo juwa la imiti. Ọọwa, ọ yẹkẹẹ, “Ọlegbeju ee, ị dum ẹrụ tọng.” IJehu tọọ wo yẹkẹẹ, “Ooowo lẹpwụ nyahị ị tị́ dung ẹrụ tọ?” Ọọwa, ọ wọọ yẹkẹẹ, “Ahụ kpanga ịnyị, ayịbahị.”

⁶Ọọwa, iJehu à wuleji lẹ, ọwa bala onjwo ọlọmwụ ọwẹ à bajẹ ka ẹpwang lẹlẹ. Ọlọmwụ ọwẹ ya ida hụ iJehu e-egbeju lẹ, ọ byoo yẹkẹẹ, “Amkpaa Ohe Oluhye nya ala Isirẹlụ ya dodehe yẹkẹẹ, ‘M̀ chụng ká ka ri adịrahụ nya ala Isirẹlụ lẹ.

⁷À ka ta ugbiyegu nya Ehabụ ayịbang ayịreji. Ịịwẹ m̄ ka bwu byi uri nya alọmwụ nyam bala anchẹ nyam ịkịla ịlẹ wuu ká iJesebẹlụ nwụ lẹlẹ.

⁸Ọng myị ọng kọ ri alugbiyegu nya Ehabụ wuu ka gbu—ọlẹng ọnyị myị ọnyị tụ ọnyọhị tụ ọnyị ọlọpyị lawụlẹ-awụlẹ wuu.

⁹M̀ ka ta ugbiyegu nya Ehabụ ayịreji jaabwọ kam họ ugbiyegu nya iJerobowam ọnyị nya iNebatị bala ugbiyegu nya ịBaacha ọnyị nya Ahija.

¹⁰IJesebẹlụ lẹ, ibwu à ka ryọọ e-epweji nya iJesiryẹlụ lẹ. Ị́ ka jwọọ eji ka.’ ” Ụka ká ọlọmwụ ya ẹlẹwẹ kpá lẹ, ọ wụrụ ụgbẹyị lẹ, ọ kpehe rụnyẹ rụ lẹlẹ.

¹¹Ụka ka iJehu kpehe tịrẹkpẹ ka ẹga nya alegbeju nya angịdẹwụ aanamwụ, ọngọhẹ nyaa tọọ wo yẹkẹẹ, “Okpunyi tị́ ji pyii-ī? Ẹla-ịyẹ ọlọmwụ ọlụla ọlaanyị à tị́ kpa wẹ ẹga nyang ene-è?” IJehu wẹ byaa yẹkẹẹ, “Ẹ̀hẹ́ẹ̄hẹ́ẹ̀! Anụ tị́ jẹ ụma nya ọngịnyị ọlịịwẹ jaabwọ kọọ ya ẹla lala ọlụla lẹ.”

¹²Ọọwa, ị wẹ byoo yẹkẹẹ, “Eheehe, áhị jẹ koo. Ya jehi jaabwọ kọ bying mẹ.” Ọọwa, iJehu à tịrọnụ ya jaa jaabwọ ká ọlẹng ọwẹ byọọ wuu bala nyori bwula ehile ọlẹ ká Amkpaa da lẹ, nyị ya ida hụ ọwa nyọka ri adịrahụ nya ala Isirẹlụ lẹlẹ.

¹³Ahyaahị lẹ, alegbeju ịkịla ịwẹ a chị agaga pwọ ịwụrụ nyaa pyaa maa chị ẹga ká iJehu dayị rịrị u-uhye nya apatẹ ịlẹ kị chị ka ẹpwang lẹ, ị chị ẹkụrwẹ bala o-juwa da iwuru dọ̀ọọ yẹkẹẹ, “IJehu ri adịrahụ lẹ oo! IJehu ri adịrahụ lẹ oo!” lẹlẹ.

¹⁴Ọọwa, iJehu à me obyi ju iJoram Adịrahụ lẹlẹ. IJoram bala angịdẹwụ wuu lẹẹ kụ ịRamotu-igiliyadị juwa mwẹla ta angịdẹwụ nya ịHasẹlụ Adịrahụ nya ala iSiriya nyọka chị Isirẹlụ da.

¹⁵IJoram Adịrahụ tị lẹẹ nyà juwa i-iJesiryẹlụ gbe ụka kọ ka hagụ bwu ẹpwụ nya ang ọlẹ kị họọ bwu ọgbẹwụ. Ọọwa, iJehu à byi alegbeju nya angịdẹwụ ịkịla aanamwụ ịlẹ kị juwa tọọ yẹkẹẹ, “Anụ myị ọnụ kam ka ri adịrahụ-ụ̀ wẹ lẹlẹ, ānụ myị ká ọngọngọhẹ ā kpehe bwu ịRamotu ẹgẹlẹ kele kpa oja nya ẹla ọlẹ kaka mịla eji i-iJesiryẹlụ kokoo.”

¹⁶Ọọwa, iJehu à gba kụ ang ọrụnyẹ nyamwụ lẹ, ọ hu ang kele ka iJesiryẹlụ lẹlẹ. IJoram Adịrahụ nụwa bẹẹ labẹ ịlẹ kị chọọ bwu ẹwụ wẹẹ, Ahasiya Adịrahụ nya ala iJuda kele kaka wụlọọ yẹ ụka ọọwa.

¹⁷Ụka ká ọngọgbeji ọhẹ kọ juwa u-ube-oluhye i-iJesiryẹlụ chẹhị kaka yẹ iJehu bala angịdẹwụ nyamwụ, ọ dakọ byi iJoram yẹkẹẹ, “M̀ chẹhị yẹ alẹwụ kị lalẹẹ warị!” Ọọwa, iJoram à wẹ yẹkẹẹ, “Du ọngọ kụ ụnyịrẹ ọhẹ kele ka taa kọ wo bwu ẹga nyaa wẹẹ, ẹlẹhẹ ịnyị le?”

¹⁸Ọọwa, ọngọ kụ ụnyịrẹ ọwẹ a kele ka tọ iJehu lẹ, ọ byọọ yẹkẹẹ, “Adịrahụ ya am nyị wẹ kaka tọng wo wẹẹ okpunyi ahụ nyaa tị́ wẹẹ kpa warị pyii.” IJehu a byọọ yẹkẹẹ, “Okpunyi ọlanyị tị́ ene? Kam̀ ká ji ẹkpẹ nyam ta angịdẹwụ nyam lẹẹlẹẹ!” Ọngọgbeji à be ẹkọ ya je adịrahụ yẹkẹẹ, “Ọlẹrụ pwụ ụwa lẹ, ọ́ tị nyà tịrẹkpẹ kokoo.”

¹⁹Adịrahụ du ọlẹrụ ọkịla lụnyịrẹ kele. Ọ byi iJehu ịnyịnyị yẹkẹẹ, “Adịrahụ ya am nyị wẹ kaka tọng wo wẹẹ okpunyi ahụ nyaa tị́ wẹẹ kpa warị pyii.” IJehu wọọ ịnyịnyị yẹkẹẹ, “Okpunyi ọlanyị tị́ ene? Kam̀ ká jo ẹkpẹ nyam ta angịdẹwụ nyam lẹẹlẹẹ!”

²⁰Ọngọgbeji myịmyị ya jẹ adịrahụ yẹkẹẹ, “Agaba Idu ee, ọlẹrụ pwụ ụwa lẹ, ọ́ tị nyà tịrẹkpẹ kaka ịnyịnyị lẹ! Ọngọ kpaa kụ ịlahị lalẹẹ kụ ang ọrụnyẹ lọngịrị-ọngịrị lala ọlụla. Ọ́ ka dayi la o-ri iJehu ọnyị nya iNimchi kokoo.”

²¹Ọọwa, iJoram Adịrahụ à yẹkẹẹ, “Nwụla ang ọrụnyẹ nyam nọ páaa wẹẹ!” Ụka kị họ ịnyị lẹ, iJoram bala Ahasiya Adịrahụ nya ala iJuda-à hu ang kele nyọka tọ iJehu lẹlẹ. Ọngọngọọng nyaa kụ ang ọrụnyẹ nya ịlọmwụ. Ịwa bala iJehu anyị meme lawụlẹ ọ-ọpyị ọlẹ kọ ri nya iNebotu ọla iJesiryẹlụ ene.

²²Ọọwa iJoram Adịrahụ à tọ iJehu wo yẹkẹẹ, “Okpunyi ā tị́ kpa warị pyii-ī?” IJehu wọọ yẹkẹẹ, “Okpunyi tị́ ka ji ányị ká ụhwa bala ijiga ọkpụkpụ ịlẹ wuu ká iJesebẹlụ ịnang tụụhị ụbwọ ba-á kpụba ka-à?”

²³Ọọwa, iJoram à ji ang ọrụnyẹ nyamwụ kpata lẹ, ọ rụnyẹ rụ juwa dakọ byi Ahasiya yẹkẹẹ, “Ahasiya ee, ọpịrị-ha ịnyị! Ọpịrị-ha ịnyị!”

²⁴Ọọwa, iJehu à gbile uda nyamwụ chakuu jaabwọ ká ọngịrị nyamwụ la ka ba lẹ, ọ ya ịcha chị iJoram Adịrahụ abẹkpẹ lẹlẹ. Ịcha ọọwa dụrwọọ pyịịị kaka gwọọ ọ-ọkịlẹtụ lẹ, ọ rị yịngaa ju ka ẹpwụ nya ang ọrụnyẹ nyamwụ lẹ, ọ gbu lẹlẹ.

²⁵Ọọwa, iJehu à byi iBidika olegbeju ọlẹ kọ ri ugbọpwụ nyamwụ yẹkẹẹ, “Hu ogu nyamwụ da ka ọpyị nya iNebotu mẹ. À tị́ kpịtịya wẹẹ. Ugbeene kam̀ bala ahụ lẹẹ kụ ang ọrụnyẹ tụ ịkịka nya Ehabụ adịda nya iJoram ọwẹ, Amkpaa ya ẹla tụ Ehabụ pyịpyị yẹkẹẹ,

²⁶‘Ọwẹ kam yẹ myị̀myịịmyị jaabwọ kị nwụ iNebotu bala anyị alẹng nyamwụ ịnịyẹ-ẹ̀ wẹẹ, ẹgẹwẹ-ẹgẹwẹ m̄ tị̀tị̀ ka họọ kwiwa lẹ.’ Lẹẹlẹ, hu ogu nya iJoram da ka ẹpwụ nya ọpyị nya iNebotu ajị nya ẹla ọlẹ ká Amkpaa ya ọ-ka họ jịra mẹ.”

²⁷Ụka ka Ahasiya Adịrahụ nya ala iJuda yẹ ẹlẹwẹ, ọ du hụrwa lụnyẹ tụ ụgbẹyị da yahị da ka ịBẹtị-ịhagan. IJehu tị yụnyẹ ká chọọ juwa dakọ byi angịnyị nyamwụ yẹkẹẹ, “Anụ nwọọ ịnyịnyị!” Ọọwa, ị da ịcha chọọ ụka kọ juwa ụ-ụgbẹyị nya iGuu ọlẹ kọ ba Ibiliyam ba lẹlẹ. Ahasiya tị kpa agbụrụ-agbụrụ maga gbee kọ jẹ lalaala kaka pwụ iMegido ene kọọ gbu.

²⁸Alegbeju ịtụkụ yoo kpa ogu nyamwụ ẹ-ẹpwụ nya ang ọrụnyẹ kele ka iJerusalẹm lẹ, ị jwọọ eji e-Epweji nya iDevidi lẹlẹ.

²⁹Ahasiya dọmwụ nyọka ri adịrahụ i-iJuda lụka ká iJoram ọnyị nya Ehabụ lẹẹ ri adịrahụ nya Isirẹlụ lala ẹka iwo kụrụ ookpokpo.

³⁰Ụka ọọwa, iJehu hu ang kele ka epweji nya iJesiryẹlụ. IJesebẹlụ wo ya iJehu nyị juwa kele, ọ gu ichigiri ju ahị gbịlẹ-gbịlẹ bala o-gu inyi nyamwụ lẹ, ọ juwa yọyị bwu iwondo kpehe lẹlẹ.

³¹Ahyaahị ka iJehu ju kele ka ogirigba nya ẹpwa nya adịrahụ lẹ, iJesebẹlụ à tọọ wo yẹkẹẹ, “Okpunyi ā tị́ kpa warị pyi-ī? Ọdatị nyang ahụ bala iSimri[4] ọngọ nwụ ayịbamwụ adịrahụ nya ala Isirẹlụ à tị́ lee ri-īì?”

³²Ọọwa, iJehu hu ẹhị hwaa kele ka yọọ i-iwondo lẹ, ọ dakọ towo yẹkẹẹ, “Oowo à tị ji oye nyam? Oowo tị́?” Ọọwa, alẹng angị imiiye lee angị ịta kị ri alụkụrwọ ịlẹpwa nya adịrahụ a chẹhị bwu iwondo ka odehe lẹlẹ.

³³Ọọwa, iJehu à byaa yẹkẹẹ, “Anụ chọọ abwọ da wẹ eji lẹẹlẹẹ!” Ọọwa, ị chọọ abwọ da ka eji lẹ, ịwọ nyamwụ à da pwụra-pwụra hụ ugulọ bala anyịrẹ lẹlẹ. IJehu kụ anyịrẹ bala ang ịrụnyẹ nyamwụ bwu uhye nya ogu nyamwụ.

³⁴Ọọwa, iJehu à rụ ka ẹpwang kaka ri ang lẹlẹ. Ụka kọ họ kpa, ọ byi angịhyẹ yẹkẹẹ, “Anụ hu ogu nyamwụ kpa kaka ju eji mẹ. Ọ ri ọngịnyị onyobyi kpá odu ịnyị-ị̄, ọnyị nya adịrahụ[5] ọ ri lẹ.”

³⁵Ụka kị tị kele nyọka hwoo kpa kaka ju eji, ị́ yẹ ẹga nya ịnyịrọ nyamwụ ọhẹ-lọhẹ da ogo nya egbeju nyamwụ bala abwọ bala apatẹ nyamwụ kaka.

³⁶Ụka kị nyà kaka tịrọnụ je iJehu lẹ, ọ yẹkẹẹ, “Ịnyịlẹẹhị ịnyị, ẹlẹwẹ ri ọ-họ jịra nya ẹla ọlẹ ká Amkpaa ya bwula Ịlayịja ọnchẹ nyamwụ ọla iTichibe ugbeene lẹẹ yẹkẹẹ, ‘Ẹ-ẹgẹhẹ nya iJesiryẹlụ ibwu à ka ri ogu nya iJesebẹlụ lẹ.

³⁷Ẹga nya ịnyịrọ nyamwụ ka chị páta-pata tụ ẹgẹgẹẹga da lala ịmyị nya iyo ileji. Ọngọngọhẹ-ẹ́ ka jọọ ogu kpong-kpong ka.’ ”