Read idege 1 EGO OGBEGBE 10 Bible Online

1 EGO OGBEGBE 10 - idege bible

1 EGO OGBEGBE 10

¹Ụka ọọwa, ala iFilisitiya dẹwụ ta ala Isirẹlụ ọ-Ọgbọdọ nya iGilibowa. Ị nwụ ala Isirẹlụ lụmẹ-lụmẹ ụ-ụwa. Angị ihihi nyaa tụ ịSọlụ Adịrahụ bala anyị alẹng nyamwụ rụnyẹ rụ.

²Ala iFilisitiya ku ịSọlụ bala anyị alẹng nyamwụ ka wu. Ọọwa, ị nwụ iJonatan bala Abinadabụ bala ịMalikichuwa anyị alẹng angị ịta nya ịSọlụ ọ-ọgba-ọgba lẹlẹ.

³Ụka ọọwa, ẹwụ chabwọ ju ịSọlụ lọngịrị-ọngịrị. Angị kpa ịcha-à chọọ ịcha kẹ̀ng lẹ, ang à họọ aboji-aboji lẹlẹ.

⁴Ọọwa, ịSọlụ à byi ọngọ kpa ang-abwọ nya ẹwụ nyamwụ yẹkẹẹ, “Gba oge nyang ká nwụm mẹ, ó-ri ịnyị ka, ala iFilisitiya ị-jẹ Ohe-ka ịwẹ ka wẹ ka nwụm lịlaa, ịị hu ẹpẹpẹ jum.” Ma, ọngọ kpa ang-abwọ nya ẹwụ nyamwụ ju uhi ọtụka-ọtụka lẹ, ọ́ myị họ ịnyị ka. Ọọwa, ịSọlụ à gbile oge nya ịlọmwụ lẹ, ọ tụhi ịlọmwụ keji milọọ lẹlẹ.

⁵Ụka ká ọlẹng ọwẹ yẹ ká ịSọlụ gbu lẹ, ọ tị̀tị tụhi ịlọmwụ mịla oge nya ịlọmwụ lẹ, ọ gbu ta ịSọlụ jẹ lẹlẹ.

⁶Lẹẹlẹ, ịSọlụ bala anyị alẹng nyamwụ angị ịta gbu lawụlẹ, la ọnyị nyamwụ ọhẹ hi ka ri adịrahụ ka.

⁷Ala Isirẹlụ ịlẹ kị kụ ọ-Ọkpọọ nya iJesiryẹlụ wo jaabwọ ká angịdẹwụ nya ala Isirẹlụ rụnyẹ rụ bala nyori nyị nwụ ịSọlụ bala anyị alẹng nyamwụ. Ọọwa, ị nyẹẹkpẹ da epweji nyaa, rụnyẹ rụ lẹlẹ. Lẹ, ala iFilisitiya à kele ka ye ụwa kụ lẹlẹ.

⁸Ụka ká ahị ọọnamwụ pyẹ, ala iFilisitiya kele kị ka go ang nya angịlẹ kị nwụ kpa rụ. Ị yẹ egu nya ịSọlụ bala ịnya anyị alẹng nyamwụ chị ụ-ụwa ọ-Ọgbọdọ nya iGilibowa.

⁹Ọọwa, ị chị ịSọlụ egbeju bala o-go ang-abwọ nya ẹwụ nyamwụ hyoo lẹlẹ. Ị yaa du angịhyẹ ẹrụ tụ ọpyị nya ala iFilisitiya wuu da juwa ya ẹla nya igu nya ịSọlụ anyị e-ebe nya ijiga nyaa bala o-ya je angịnyị nyaa.

¹⁰Ị kpa ang-abwọ nya ẹwụ nyamwụ kaka nọ u-ube nya ojiga nyaa ọhẹ lẹ, ị ya egbeju nyamwụ pịlẹ ang u-ube nya ịDagọn ojiga nyaa lẹlẹ.

¹¹Ụka ká ala ịJabẹchị ọla iGiliyadị wo ụma nya ang ọlẹ ká ala iFilisitiya họ ẹ-ẹga nya ịSọlụ,

¹²alẹng i-ju ugbodu nya alụwa à kele kaka go egu nya ịSọlụ bala ịnya anyị alẹng nyamwụ kpa rụ ba ịlaa ka ịJabẹchị lẹlẹ. Ị jwaa eji ọ-ọmwụ nya ùgboji nya ooku lẹ ị hụ limyi ẹnụtụrụ irwiye gbẹgbịlẹ lẹlẹ.

¹³ỊSọlụ gbu, chajị ọ́ họ kpẹẹkpẹẹ ẹ-ẹga nya Amkpaa ka. Ọ bịrị ehile nya Amkpaa, juwa kaa tịtọ ẹla wo bwu ẹga nya alegu,

¹⁴ọkọkọ nyọka wo ẹla bwu ẹga nya Amkpaa. Ịnyị, Amkpaa-à nwọọ, yẹ ọpyị-adịrahụ nyamwụ ụbwọ ha iDevidi ọnyị nya iJesi lẹlẹ.