Read idege 1 EGO OGBEGBE 11 Bible Online

1 EGO OGBEGBE 11 - idege bible

1 EGO OGBEGBE 11

¹Ụka ọhẹ lẹ, ala Isirẹlụ wuu à kele ka ẹga nya iDevid i-iHebirọn lẹ, ị byoo yẹkẹẹ, “Ahị wuu ri angịnyị nyang lẹ.

²Bwu ẹkpẹ-ẹkpẹ, ụka ká ịSọlụ dọmwụ ri adịrahụ nyahị ri lẹ, ahụ à kaa ji ịlahị kpa ala Isirẹlụ ka ẹwụ lẹ. Amkpaa tị myị ọnụ hang nyọka kpẹhị rịrị angịnyị nyamwụ bala ọ-ka ri adịrahụ nyaa.”

³Lẹẹlẹ, ụka ká alegbeju nya ala Isirẹlụ wuu wẹ ẹga nya iDevidi Adịrahụ i-iHebirọn, ọ nwa iro taa ụ-ụwa. Ọọwa, ị ya ida hwọọ lẹ, ọ ri adịrahụ nya Isirẹlụ jaabwọ ká Amkpaa myị ọnụ bwula ịSamwẹlụ lẹlẹ.

⁴Ọọwa, iDevidi Adịrahụ bala ala Isirẹlụ à kele kaka mwẹla ta epweji nya iJerusalẹm lẹlẹ. Ụka ọwẹ lẹ, ị wụrụ ụwa iJebusi. Ala iJebusi kị ri angị kụ ụwa nya ọgbanyẹ-ọgbanyẹ kụ ụ-ụwa lụka ọọwa wẹẹ.

⁵Ala iJebusi byi iDevidi yẹkẹẹ, “Á ka jụ wẹ epweji ọlẹ ka.” IDevidi tị nu ịSayọn epweji ọ-chị àjẹ ju nyaa. Bwu ụka ọwẹ lẹ, ịị wụrụ ụwa Epweji nya iDevidi lẹlẹ.

⁶IDevidi lẹẹ byi angịnyị nyamwụ yẹkẹẹ, “Ọngịnyị nya ọgbanyẹ-ọgbanyẹ ọlẹ kọ ka jụ ọla iJebusi ọhẹ nwụ myị à ka ri olegbeju nya angịdẹwụ nyahị lẹ!” IJowabụ ọlẹ ká ẹnyị nya ịnamwụ ri iSeruya-à kụ ịlahị nya ẹwụ ọọwa lẹ, ọ ri olegbeju lẹlẹ.

⁷Ajị nyọlẹ ká iDevidi hu epweji ọ-chị àjẹ ju ọwẹ nya ẹpwa nyamwụ lẹ, ị wụrụ ụwa Epweji nya iDevidi lẹlẹ.

⁸Ọ dọmwụ nyọka nwụ epweji ọwẹ bwu ẹga kị chị ikpirigidi kaka yi ugulọ nya epweji koye nya ọmwẹnụ-ụtụrụ nya ikiti. IJowabụ à ma ẹga ohihi nya epweji ọwẹ nwụ lẹ.

⁹IDevidi juwa nwa ẹ-ẹpwụ nya ọngịrị ọlala kịlahị-ịlahị, chajị Amkpaa Agụgụ hụ tọọ.

¹⁰Ẹnyị nya angịdẹwụ ịtụka nya iDevidi a lẹẹ lẹ. Ịwa bala ala Isirẹlụ ihihi wuu à dọọ ụbwọ nyọka ri adịrahụ lẹ. Jaabwọ ká Amkpaa myị ọnụ lẹ, ị họ ká ọpyị-adịrahụ nyamwụ yeji giri-giri.

¹¹Ẹnyị nya ọngọ ọhọhẹ nyaa ri ịJachobiyam ọlẹ kọ bwu ọgańg nya ịHachịmọn. Ọwa-à ri olegbeju ẹ-ẹpwụ nya ịbagọ ịta lẹ. Ọ kpa ụwangga-ụwangga nyamwụ mwẹla ta angị ohu ịta (300), nwaa wuu wuu ẹ-ẹpwụ nya ẹwụ ookpokpo.

¹²Ọngọ oheeye olehe ẹ-ẹpwụ nya angị ịta ri Eliyesa ọnyị nya iDodo ọla ogang nya Ahohi.

¹³Ọ juwa ta iDevidi juwa dẹwụ tụ ala iFilisitiya pyịpyị ẹ-ẹga Ọchịpwụrụ bwu ọla ịDamim. Ẹ-ẹrụ nya ịbali ị juwa da ẹwụ ọọwa ụka ká ala Isirẹlụ rụnyẹ rụ lẹ.

¹⁴Ọwa bala iDevidi tị godayị kpọọ ẹ-ẹpwarịrị nya ẹrụ ọọwa gbee kị kụrụ ala iFilisitiya ịịwa. Amkpaa ya ọkụrụ-kụrụ ọtụka haa.

¹⁵Ẹnẹhẹ juwa ká angị ịta ẹ-ẹpwụ nya ịbagọ angị iwo ịta nya angịdẹwụ nya iDevidi kele ka ụgbụ nya Adulam ẹga ká iDevidi ji. Ụka ọọwa, angịdẹwụ nya ala iFilisitiya ịhyẹ chịkụ ọ-Ọkpọọ nya iRefayim.

¹⁶Ụka ọọwa, iDevidi ayịdang juwa ẹ-ẹga ọkpịbaa i-ikiti ọhẹ, ala iFilisitiya tị ye epweji nya ịBẹtịlẹhẹm juju kpụ ị kụ ụwa.

¹⁷IDevidi juwa wu iwoo nya ẹpwa lẹ, ọ yẹkẹẹ, “Ang pyii ká ọngọhẹ ka jẹ-ẹ̀ ya ang chị enyi ọnwanwa bwu ịwẹẹlụ ọlọnụ-ogirigba nya ịBẹtịlẹhẹm kpa wam-m̄ nwa. Ịnọ, anyị ọọ hám há!”

¹⁸Ọọwa, angịdẹwụ ịtụka angị ịta ịịwa-à be bwụụụ bwu ẹpwụ nya angịdẹwụ nya ala iFilisitiya kaka chị enyi bwu ịwẹẹlụ ọlọnụ-ogirigba nya ịBẹtịlẹhẹm kpa nyà wẹ iDevidi lẹlẹ. Ọ́ tị myị kpọọ ka ọnụ ka. Ọkọkọ nya ọọwa, ọ yọọ hụrụ lala iya ọkịlaakịla ha Amkpaa lẹ,

¹⁹ọ yẹkẹẹ, “Ịgọgọ ẹnẹnẹhẹ! Ḿ ka byị ẹjẹ-ẹ̀ kpa enyi ọwẹ ka ọnụ koo. Ọ lam lala ịwọ nya alẹng ịwẹ kị ya ịlaa ga ha igu ene kịị chọọ kpa nyà.” Lẹẹlẹ, ọ́ myị nwọọ ka. Ẹla-ogu ịlẹ ká angịdẹwụ ịtụka angị ịta ju ugbodu họ à wẹ lẹlẹ.

²⁰Abichayị ọnyịnịna nya iJowabụ à ri olegbeju ọ-kụ ịlahị nya ịbagọ angị iwo ịta nya iDevidi lẹ. Ọ kpa ụwangga-ụwangga nyamwụ mwẹla ta angị ohu ịta (300), nwaa wuu ẹ-ẹpwụ nya ẹwụ ọlụka ookpokpo. Ọkụrụ-kụrụ nyamwụ ọwẹ du kọ lehe lala angịdẹwụ ịtụka angị ịta ịwẹ ịnyịnyị.

²¹Ọwa-à lehe gụ ẹ-ẹpwụ nya angị iwo ịta ịịwa wuu lẹ. Ọwa-à ri olegbeju ọ-kụ ịlahị nyaa lẹ, ọ́ tị lehe lala angịdẹwụ ịtụka angị ịta myị ka.

²²IBenaya ọnyị nya iJehoyada ọla ịKabisiilu ri ọngọdẹwụ olehe ọkịla ọlẹ kọ họ ẹla-ogu lụmẹ-lụmẹ. Ọ nwụ angịdẹwụ ịlahịchịng nya ala iMowabụ angị imiiye. Ụka ọhẹ juwa kọ ku ugẹbẹ chàchachaacha ka ju ka ụjẹ ẹnụ ká Ohe juwa do ekpawẹ ihule-hule. Ọ nwụ ugẹbẹ ọọwa.

²³Ọ nwụ ogirima nya ala Ijipiti ọhẹ ká uhye ọlala nyamwụ ri apate irwiye ba ẹhya. Ọ kpa ukpilo nya ụwangga ọhẹ. Ịnọ, eku-okoji kem iBenaya-à kpa lẹ, ọ tị mịla ogirima ọọwa nmoo, noo ụwangga lẹ, ọ kpa ụwangga ọọwa nwọọ lẹlẹ.

²⁴Ẹla-ogu ịlẹ ká iBenaya họ du kọ lehe lala ịbagọ angị iwo ịta-à wẹ lẹlẹ.

²⁵Ọwa ayịdang lẹ, ihi ọlala kụ gịlọ-gịlọ gụ ịnya ịbagọ angị iwo ịta, ọ́ tị lehe lala angịdẹwụ ịtụka angị ịta myị ka. IDevidi hwoo ri olegbeju nya angịgboo gbe.

²⁶Angịkịla ẹ-ẹpwụ nya angịdẹwụ ịtụka nya iDevid ri: Asahẹlụ ọnyịnịna nya iJowabụ bala Elihanan ọnyị nya iDodo ọla ịBẹtịlẹhẹm

²⁷bala ịChamotu ọla ịHarodu bala ịHẹlẹsị ọla iPelọn

²⁸bala Ira ọnyị nya Ịkẹchị ọla iTekowa bala Abiyesẹẹ ọla Anatotu. Angịkịla nyaa ri

²⁹ISibẹkayị ọla iHucha bala Ilayị ọla Ahohi

³⁰bala ịMaharayị ọla iNetofa bala ịHẹlẹdị ọnyị nya ịBaana ọla iNetofa

³¹bala Itayị ọnyị nya iRibayị bwu iGibiya ụ-ụwa i-iBenjamịn bala iBenaya ọla iPiratọn. Angịkịla nyaa ri

³²IHurayị bwu ọkpọọ ịla ịGaachị Abiyẹlụ ọla Araba

³³bala Asimavẹtị ọla ịBahurum bala Eliyahaba ọla ịChaalịbọn

³⁴bala anyị alẹng nya ịHachẹm ọla iGisọn bala iJonatan ọnyị nya ịChagee ọla ịHararị. Angịkịla nyaa ri

³⁵Ahiyam ọnyị nya ịSakaa ọla ịHararị bala Elifalụ ọnyị nya Uu

³⁶bala ịHẹfẹẹ ọla ịMakera bala Ahija ọla iPelọn

³⁷bala iHesiro ọla ịKaamẹlụ bala ịNaarayị ọnyị nya Esibayị. Angịkịla nyaa ri

³⁸iJuwẹlụ ọnyịnịna nya ịNatan bala iMibiha ọnyị nya ịHagiri

³⁹bala ịSẹlẹkị ọla Amọn bala ịNaharayị ọla iBiyerotu ọlẹ kọ ri ọngọ kaa kpa ang-abwọ nya ẹwụ nya iJowabụ

⁴⁰bala Ira bala ịGarẹba kị ri ala ịJatii. Angịkịla nyaa ri

⁴¹Uriya ọla iHiiti bala ịSabadị ọnyị nya Ahịlayị

⁴²bala Adịna ọnyị nya iChisa ọla iRubẹn, ọlẹ kọ ri olegbeju i-imwawụ nya iRubẹn. Ọ kpa angị iwo ịta kụ ịlahị. Angịkịla nyaa ri

⁴³ịHanan ọnyị nya ịMaaka bala iJochafatị ọla iMitina

⁴⁴bala Usiya ọla Achịtarotu bala ịChama bala iJeyẹlụ kị ri anyị nya iHotam ọla Aroyẹẹ

⁴⁵bala iJedẹlụ ọnyị nya iChimri bala iJoha ọnyịnamwụ ọla iTiisi. Angịkịla nyaa ri

⁴⁶Eliyẹlụ ọla ịMahava bala iJeribayị bala iJochaviya anyị nya Elinaam bala iTimaa ọla iMowabụ

⁴⁷bala Eliyẹlụ bala Obẹdị bala iJaasiyẹlụ ọla iSoba.