Read idege 1 EGO OGBEGBE 12 Bible Online

1 EGO OGBEGBE 12 - idege bible

1 EGO OGBEGBE 12

¹Ụka ọọwa, iDevidi kụ i-iSikilagị ẹga kọ rụ kaka kpịbaa hi ịSọlụ Adịrahụ. Ọọwa, iru nya angịdẹwụ ịlahịchịng ịlẹ kị jẹ ẹwụ yẹẹyẹẹ kị ji oye nyamwụ ẹ-ẹwụ ụka ọhẹ lẹ à kele kaka tọọ ụ-ụwa lẹlẹ.

²Angịịwa bwu imwawụ nya iBenjamịn ẹga ká ịSọlụ bwu. Ịwa wuu ri ọnggwọ nya ịcha ọdada bala ọmẹ ọdada labwiye-abwiye.

³Ahiyesa bala iJowachị anyị nya iChemaa bwu iGibiya-à kpaa kụ ịlahị lẹ. Ẹnyị nyaa ri iJesiyẹlụ bala ịPẹlẹtị kị ri anyị nya Asimavẹtị bala iBeraka bala iJehu ọla Anatotu

⁴bala Ichimaya bwu iGibyọn kọ ri ogirima bala ọngọhẹ ẹ-ẹpwụ nya angịdẹwụ ịtụka angị iwo ịta nya iDevidi. Angịkịla ri iJeremaya bala ịJahasiyẹlụ bala iJohanan bala iJosabadị ọla iGedera.

⁵Angịkịla nyaa ri Elusayị bala iJerimotu bala iBiyaliya bala iChemaya bala iChefatiya bwu ịHarufu

⁶Elikana bala Ichiya bala Asarẹlụ bala iJowesẹẹ bala ịJachobiyam kọ bwu ogang nya iKora

⁷bala iJuwẹla bala iSebadaya kị ri anyị nya iJeroham ọla ịGẹdọọ.

⁸Angịdẹwụ ịgbẹgbịlẹ ịlahịchịng ịhyẹ bwu imwawụ nya ịGadị rụ kaka yẹjula iDevidi u-ugbileji ẹga kọ kpịbaa. Angịịwa ri ọnggwọ nya akụmada bala awangga ọ-kpa dẹwụ. Ị lụrụrụ lala egabẹ, ị lịmịla lala apyị.

⁹Ẹsẹẹ à ri olegbeju nyaa wuu lẹ. Obadayị ri olegbeju oheeye, Eliyabụ ri ọngọ ọhata,

¹⁰iMichimana bọọ ba ju ọngọ ohene, iJeremaya ri ọngọ ọharụ,

¹¹Atayị ri ọngọ ọharwọnyẹ, Eliyẹlụ ri ọngọ ọharwiye,

¹²iJohanan ri ọnọ ọhaneku, Elisabadị ri ọngọ ohikichu,

¹³iJeremaya ri ọngọ okiriwo bala iMakịbanayị kọ ri ọngọ kụrụ ookpokpo.

¹⁴Angị bwu imwawụ nya ịGadị ịwẹ ri alegbeju nya angịdẹwụ. Angịgbẹgbịlẹ nyaa kaa kpẹhị rịrị angịdẹwụ angị ụnọ. Angị ichiche nyaa kaa kpẹhị rịrị angịdẹwụ angị ohu.

¹⁵Angịdẹwụ ịwẹ kpoye nya Ihu ịJọdan lọya ọhọhẹ nya ẹka ụkụ kọ myị̀ chụpwụ-chụmẹ. Ọọwa, ị ku angị kụ ọkpọọ koye nya ọmwẹnụ-ụtụrụ bala ọmwẹnụ-obyi nya ihu ọwẹ wuu rụ lẹlẹ.

¹⁶Angịkịla bwu imwawụ nya iBenjamịn bala ịnya iJuda wẹ kaka yẹjula iDevidi ẹ-ẹga kọ kpịbaa.

¹⁷IDevidi kele kaka taa ụgbẹyị lẹ, ọ byaa yẹkẹẹ, “Ó-ri kanụ wẹ nya okpunyi nyọka dam ụbwọ aalẹ, anụ wụraba wẹ ẹpwụ nyahị. Ọ́ tị ri kanụ kpa irya nyọka pịrịm ha aluji nyam la ọ-da ẹlẹlẹhẹ ka aalẹ, Ohe Oluhye nya adahị igogo anyị ā yẹ ẹlẹwẹ kọ wunu uri.”

¹⁸Ọọwa, olegu nya Ohe Oluhye à hwo kụ Amasayị ọle kọ ri olegbeju nya Angịdẹwụ Ịtụka angị Iwo Ịta ị-ịlahị lẹ, ọ dakọ gboo yẹkẹẹ, “IDevidi ee, ahị ri angịnyị nyang lẹ! Ọnyị nya iJesi ee, ahị ji oye nyang lẹ! À ka pyẹ̀ẹẹ! À ka pyẹ̀ẹẹ! Angị wẹẹ dang ụbwọ wuu ka pyẹ̀ẹẹ! Ohe Oluhye juwa ma uya hang.” Ọọwa, iDevidi à daa ọwụrụba lẹ, ọ gyaa ri alegbeju ịlẹpwụ nya angịdẹwụ nyamwụ lẹlẹ.

¹⁹Ala ịManasẹ ịhyẹ kpehe bwu ẹpwụ nya angịdẹwụ nya ala Isirẹlụ kaka yẹjula iDevidi ụka kọ ba ala iFilisitiya kele nyọka dẹwụ ta ịSọlụ Adịrahụ. Ọ́ tị dọmwụ da ala iFilisitiya ụbwọ kaka, chajị ụka ká alegbeju nya ala iFilisitiya hu ẹkpẹ lẹ, ị ya nyị eheehe, ịwa nyị ka ri enyi gu obyi ó-ri ká iDevidi nyị ji kpata kaka chẹkpẹ ju ịSọlụ ayịbamwụ onyogo.

²⁰Ẹnyị nya angịdẹwụ i-bwu ịManasẹ ịlẹ kị rụ kaka jula angịnyị nya iDevidi ụka kọ juwa nyà tịrẹkpẹ ka iSikilagị ri Adịna bala iJosabadị bala iJedẹlụ bala ịMayịkẹlụ bala iJosabadị bala Elihu bala iSiletayị. Ọngọngọọng nyaa wuu kaa kpẹhị rịrị ebwo nya angịdẹwụ angị ụnọ ị-ịManasẹ ene-ene.

²¹Ị da iDevidi ụbwọ ku ogu nya angị be angịnyị ẹpwa ịhyẹ rụ. Ị ri angịdẹwụ ịlahịchịng lẹ, iDevidi gyaa ri alegbeju nya angịdẹwụ nyamwụ.

²²Ahyẹẹnụ myị ahyẹẹnụ, angịdẹwụ inyeewe-inyeewe juwa wẹ kaka jula angịnyị nya iDevidi gbee ká angịdẹwụ nyamwụ ju iru ọtụka-ọtụka lala angịdẹwụ nya Ohe Oluhye.

²³Ịlẹ ri ịnọmba nya angịdẹwụ ịlẹ kị wẹ kaka ju angịnyị nya iDevidi i-iHebirọn. Ọ hwaa kokooko nyọka họ ká iDevidi ka ri adịrahụ kwiwa nya ịSọlụ jaabwọ ká Amkpaa myị ọnụ.

²⁴Angịdẹwụ i-bwu imwawụ nya iJuda wuu la angị ụnọ ịrwọnyẹ da angị ohu ineku (6,800). Ịwa wuu kpa akụmada bala awangga.

²⁵Angịdẹwụ i-bwu imwawụ nya iSimyọn la angị ụnọ irwiye da angị ohu ookpokpo (7,100).

²⁶Angịdẹwụ i-bwu imwawụ nya iLivayị la angị ụnọ ine da angị ohu ịrwọnyẹ (4,600).

²⁷IJehoyada kọ ri olegbeju o-bwu ugbiyegu nya Erọn kpa angị ụnọ ịta da angị ohu irwiye (3,700) ba ịlọmwụ.

²⁸ỊSadọkọ kọ ri ọgẹwụ okolobya kpa alegbeju nya angịdẹwụ angị iwo imiiye kụrụ imiiye bwu ugbiyegu nyamwụ.

²⁹Angịdẹwụ i-bwu imwawụ nya iBenjamịn kị ri aanịna nya ịSọlụ la angị ụnọ ịta (3,000). Iru nya alẹng i-bwu iBenjamịn ji ụpa nya ịSọlụ gbee da wẹ ụka ọwẹ.

³⁰Angịdẹwụ i-bwu imwawụ nya Ifurem la angị ụnọ iwo imiiye da angị ohu ineku (20,800). Ọngọngọọng nyaa lehe ogang nyamwụ.

³¹Bwu imwawụ nya ịManasẹ ọlọmwẹnụ-obyi, ị chụ alẹng angị ụnọ iwo kụrụ ineku (18,000) kị ka wẹ kaka hu iDevidi adịrahụ.

³²Alimwawụ nya Isakaa chụ alegbeju angị ohu imiiye (200) bala angịlẹ kị ji ekpeleji nyaa du kele. Ịwa ayịdang jẹ jaabwọ ká iwe-ahụrụ wẹẹ la bala ọ-jẹ ang ọlẹ kọ pwoku nya ala Isirẹlụ ka họ lụka ọwẹ.

³³Angịdẹwụ i-bwu imwawụ nya iSebulọn la angị ụnọ iwo ịrụ (50,000). Ị jẹ ẹwụ yẹẹyẹẹ. Ị nwụlanọ nya ẹwụ ọdada, ị tị hu irya nyaa wuu ha iDevidi.

³⁴Angị bwu imwawụ nya ịNafụtali ri alegbeju nya angịdẹwụ angị ụnọ ookpokpo bala angịdẹwụ angị ụnọ iwo ịta da angị ụnọ irwiye (37,000) ịlẹ kị kpa akụmada bala awangga ụ-ụwa giri-giri.

³⁵Angịdẹwụ i-bwu imwawụ nya ịDan la angị ụnọ iwo imiiye da ụnọ ineku da angị ohu ịrwọnyẹ (28,600). Ịwa wuu nwụlanọ nya ẹwụ.

³⁶Angịdẹwụ i-bwu imwawụ nya Achẹẹ la angị ụnọ iwo ine (40,000) ịlẹ kị jẹ ẹwụ yẹẹyẹẹ bala ọ-nwụlanọ nya ẹwụ.

³⁷Angịdẹwụ i-bwu ọmwẹnụ-ụtụrụ nya ịJọdan ẹga ká alimwawụ nya iRubẹn bala ịnya ịGadị bala ịnya ịManasẹ ọlọmwẹnụ-ụtụrụ kụ la angị ụnọ ohu da ụnọ iwo imiiye (120,000). Ịwa wuu kpa ang-abwọ nya ẹwụ ụma datị-datị.

³⁸Angịdẹwụ ịwẹ wuu nwụlanọ nya ẹwụ, hu ang ka iHebirọn lirya nyọka ka hu iDevidi adịrahụ nya Isirẹlụ. Ala Isirẹlụ ihihi wuu dọmwụ myị ju awụlẹ nyọka hu iDevidi adịrahụ ịnyịnyị.

³⁹Ị hụ ta iDevidi ẹnụtụrụ ịta juwa ri ang bala ọ-nwa ere ịlẹ ká ala Isirẹlụ aanaa nwụlanọ gbaa.

⁴⁰Alimwawụ nya Isakaa bala iSebulọn bala ịNafụtali hu ang bwu ẹtẹ nyaa hwẹẹẹ lolo nya ang oriri ịlẹ kị ya chị ori ba ibyiyó bala anyịrẹ-ịkamẹlụ bala ịna kpa kele. Ị kpa ọrụ nya ambakpa bala ikiledu bala ịkama bala ere bala ida nya olivu. Ị kpa ịna bala ịkpịlọ kele kị ka nwụ ri ịnyịnyị. Ọng myị wuu Isirẹlụ chị ọkẹkẹnị ọtụka-ọtụka.