Read idege 1 EGO OGBEGBE 13 Bible Online

1 EGO OGBEGBE 13 - idege bible

1 EGO OGBEGBE 13

¹Ụka ọhẹ, iDevidi me obyi bala alegbeju nya angịdẹwụ nyamwụ ịkpẹhị rịrị ebwo nya angị ụnụnụụnọ bala angị kpẹhị rịrị angị ohwohwoohu.

²Ọọwa, ọ byi ala Isirẹlụ wuu yẹkẹẹ, “Ó-ri kanụ myị jum, kọ tị ri irya nya Amkpaa Ohe Oluhye nyahị aalẹ, āhị du ẹrụ tọ alịnyahị ihihi bala angịkiliya bala ala iLivayị ilepweji-epweji nyaa kị wẹ kaka yẹju lahị ẹgẹlẹ mẹ.

³Ọọwa lẹ, kahị kele kaka hu Akpa nya Iro nya Ohe Oluhye ọlẹ kahị gu ahị gboo hi bwu ụka nya adịrahụ oriri nya ịSọlụ kpa nyà mẹ.”

⁴Oyaya nyamwụ ọọwa kpụ angịnyị wuu ịpyọ, ọọwa ị myị jwoo lẹlẹ.

⁵Ọọwa, iDevidi a wụrụ ala Isirẹlụ wuu bwam-bwale nya ẹpwụma nyaa bwu oyi o-gu Ijipiti gu e-edii lalaala ka ju ka ẹga Ọchịpwụrụ bwu nya ịHamatị ẹ-ẹtẹ nyọka kpa Akpa Iro bwu iKiriyatị-ịjarim nyà wẹ iJerusalẹm lẹlẹ.

⁶Ọọwa, iDevidi bala ala Isirẹlụ à kele ka epweji nya ịBaala ọlẹ ká ẹnyị ọkịla nyamwụ ri iKiriyatị-ịjarim kị ka kpa Akpa nya Iro nya Ohe Oluhye nyà lẹlẹ. Ẹchị nya Amkpaa ji uhye nya Akpa ọọwa apewa nya alegu icherubu.

⁷Ị hu Akpa nya Iro bwu ẹpwa nya Abinadabụ lẹ, ị ya rịrị u-uhye nya ang ọrụnyẹ onyeewe ọ-kpa kpa olo lẹ, Usa bala Ahiyo à kpọọ ji ịlahị lẹlẹ.

⁸Ụka ọọwa, iDevidi bala ala Isirẹlụ wuu juwa chewo lọngịrị nyaa wuu nyọka chị ihi ju Ohe Oluhye. Ị juwa mwu eje bala o-du ẹnwụ bala ogum̀ bala ịchẹchẹ bala ẹkụrwẹ ịdatị-datị.

⁹Ụka kị jẹ ka pwụ ẹga o-ru ịrayịsị iwiiti nya iKidọn, ang ọrụnyẹ ọwẹ chị ụchụụ. Ọọwa, Usa à nịra ụbwọ kpaaa kaka wu Akpa nya Iro kpa lẹlẹ.

¹⁰Ọọwa, agbama nya Amkpaa à wuru jahị da Usa lẹ, ọ nwụ Usa chajị nyọlẹ kọ yụbwọ gu Akpa nya Iro lẹlẹ. Ọ gbu dụwa ị-ịlahị nya Ohe Oluhye.

¹¹IDevidi wụ ẹjẹ chajị nyọlẹ ká Amkpaa yẹ Usa akama ọlịịwẹ. Ọọwa, ị wụrụ ẹnyị nya ẹgẹwẹ “ỊPẹrẹsị-usa”[7] bwu ụka ọwẹ lẹlẹ.

¹²Ọọwa, iDevidi à ju uhi nya Ohe Oluhye lẹ, ọ yẹkẹẹ, “Ányị m̄ tị ka bwu kpa Akpa nya Iro wẹ ka rịrị ẹ-ẹga nya ịlọm tị̀ tị̄ mẹ?”

¹³Lẹẹlẹ, iDevidi-í kpa Akpa nya Iro ba ịlọmwụ ka iJerusalẹm kaka. Ọkọkọ nya ọọwa lẹ, ọ kpọọ pẹ kaka rịrị ẹ-ẹpwa nya Obẹdị-ẹdọm ọla ịGaatị.

¹⁴Akpa nya Iro rịrị ẹgẹwẹ ịya ịta gbẹgbịlẹ. Amkpaa wahị kụrụ Obẹdị-ẹdọm bala alugbiyegu nyamwụ tụ ang myị ang ịlẹ kọ la wuu.