Read idege 1 EGO OGBEGBE 14 Bible Online

1 EGO OGBEGBE 14 - idege bible

1 EGO OGBEGBE 14

¹Ụka ọhẹ, iHiram Adịrahụ nya ala ịTaya du alẹrụ ịhyẹ tọ iDevidi. Ị kpa egbile nya ekeji nya isida ba ịlaa. Ọ chụ ikebenta bala angị be ajwọ du kele, chajị kị ka nwụ ẹpwa ha Adịrahụ iDevidi.

²Ụka ọọwa, iDevidi ayịdang jẹ ká Amkpaa yọọ hụhụ giri-giri lala adịrahụ nya Isirẹlụ lẹ. Ọ jẹ ịnyịnyị ká Amkpaa họ ká ọpyị nyamwụ juwa nwa pwụụpwụụ ịnyịnyị chajị nya ala Isirẹlụ angịnyị nyamwụ lẹ.

³Ụka ká iDevidi mwụ ka iJerusalẹm kpá, ọ ye ịhụ ịkịla myịmyị bala ọ-ma anyị alẹng bala anyị anyang ịkịla ụ-ụwa ịnyịnyị.

⁴Ẹnyị nya anyị ịlẹ kọ ma i-iJerusalẹm ri ịChamuwa bala iChobabụ bala ịNatan bala iSolomọn.

⁵Angịkịla nyaa ri Ibuhaa bala Elichuwa bala Elipẹlẹtị

⁶bala iNoga bala ịNẹfẹgị bala ịJafiya

⁷bala Elichama bala bala iBiiliyada[8] bala Elifẹlẹtị.

⁸Ụka ká ala iFilisitiya wo ya nyị hu iDevidi Adịrahụ nya ọpyị nya ala Isirẹlụ wuu lẹpwụ-lẹpwụ, angịdẹwụ nyaa-à dụgba wule awụlẹ hu ang kele kị ka woo. IDevidi tị wo ẹlẹwẹ. Ịnyị, ọ wuleji la angịnyị nyamwụ yahị daa lẹlẹ.

⁹Ụka ọwẹ, ala iFilisitiya ayịdang tị wẹ kaka chịkụ ọ-Ọkpọọ nya iRefayim ene-ene juwa be epweji ịlụwa ẹpwa lẹ.

¹⁰Ọọwa, iDevidi à to Ohe Oluhye wo yẹkẹẹ, “M̄ kele ka dẹwụ ta ala iFilisiyiya ịwẹ mẹ-ẹ̄ẹ́? À ka họ m̄m̀ kụrwaa-á?” Ọọwa, Amkpaa-à wẹ byi iDevidi yẹkẹẹ, “Ee, kele mẹ, m̀ ka yaa jung ẹ-ẹpwụtụbwọ!”

¹¹Ọọwa, iDevidi bala angịdẹwụ nyamwụ à gba mịla ala iFilistiya ị-ịBaalụ-ịpẹrasim lẹ, ị kụrwaa ụ-ụwa lẹlẹ. Ọọwa, iDevidi à yẹkẹẹ, “Ọ dụwẹ lẹ! Ohe Oluhye kpam be bwụụụ bwu ẹpwụ nya aluji nyam lala enyi à myị̀ be ọhwọ́ọ̀ ene lẹ oo!” Ọọwa, ọ wụrụ ẹnyị nya ẹgẹwẹ ịBaalụ-ịpẹrasim[9] lẹlẹ.

¹²Ala iFilisitiya mwụ ata bịmwụ rụ hi ijiga nyaa chị ụ-ụwa. Ọọwa, iDevidi à ya nyị chaa ila mẹ lẹlẹ.

¹³Ụka kọ tị nọ chẹẹ lẹ, ala iFilisitiya-à myịmyị tịrẹkpẹ wẹ Ọkpọọ nya iRefayim kaka be alụwa ẹpwa lẹlẹ.

¹⁴Ọọwa, iDevidi à tọ Ohe Oluhye wo myịmyị jaabwọ kọ ka họ lẹ, ọ wẹ byi iDevidi yẹkẹẹ, “Ā mwẹla taa bwu ịlahị ịịwẹ ka. Jẹ dọgịlẹ jwaa bwu ẹkpẹ, ká gba mịlaa bwu ẹga nya ịmwụ nya ekeji ịbalụsam mẹ.

¹⁵Ụka ká wo ikwata nya ẹwụ ọchịchị u-uhye nya ekeji ịwẹ lẹ, anụ gba mịlaa ahyaahị mẹ. Ọwẹ ri ang-ẹjẹẹ nyori am Ohe Oluhye jịlahị nyanụ kaka kụrụ angịdẹwụ nya ala iFilisitiya hanụ lẹ.”

¹⁶IDevidi họ jaabwọ ká Ohe Oluhye byoo. Lẹẹlẹ, ọ ku ala iFilisitiya ịwẹ tịrẹkpẹ lalaala bwu ịGẹba kaka ju ka ịGẹsẹẹ.

¹⁷Ụka ọọwa, iDevidi ru ohi ju ka ẹga myị ẹga wuu. Amkpaa họ alụma ọnyị myị ọnyị wuu ju uhi nyamwụ.