Read idege 1 EGO OGBEGBE 15 Bible Online

1 EGO OGBEGBE 15 - idege bible

1 EGO OGBEGBE 15

¹Ụka ọọwa, iDevidi nwụ ẹpwa ịhyẹ e-Epweji nya iDevidi[10] ha ịlọmwụ. Ọ nwụla ẹga nọ chajị nya Akpa nya Iro nya Ohe Oluhye lẹ, ọ ya ẹpwang nya ọdụ yeji ụ-ụwa lẹlẹ.

²Ọọwa, iDevidi à da ehile yẹkẹẹ, “Anụ wo mẹ, ala iLivayị kem à ka kpa Akpa nya Iro lẹ, chajị ịwa kem Amkpaa-à chụ nyọka kpọọ-ọ̀ kpa bala ọ-ka myị ẹrụ họọ gbe oyi myị oyi lẹ.”

³Ọọwa, iDevidi à wụrụ ala Isirẹlụ wuu kaka jịra i-iJerusalẹm chajị kị ka kele ka hu Akpa nya Iro kpa nyà wẹ ẹga ọlẹ kọ nwụlanọ gbọọ lẹlẹ.

⁴Ọ du ẹrụ ka wụrụ anyị ịtụma nya Erọn bala ala iLivayị ịnyịnyị.

⁵Bwu ẹpwụ nya ala iLivayị ịịwa, angị bwu ogang nya iKohatị la angị ohu da angị iwo imiiye (120). Uriyẹlụ à ri olegbeju ọ-kpaa kụ ịlahị lẹ.

⁶Angị bwu ogang nya iMerarị la angị ohu imiiye da angị iwo imiiye (220). Asaya à ri olegbeju nyaa lẹ.

⁷Angị bwu ogang nya ịGẹẹchọm la angị ohu da angị iwo ịta (130). IJuwẹlụ à ri olegbeju nyaa lẹ.

⁸Angị bwu ogang nya Elisafan la angị ohu imiiye (200). IChemaya à ri olegbeju nyaa lẹ.

⁹Angị bwu ogang nya iHebirọn la angị iwo ineku (80). Eliyẹlụ à ri olegbeju nyaa lẹ.

¹⁰Angị bwu ogang nya Usiyẹlụ la angị ohu ookpokpo da angị iwo kụrụ imiiye (112). Aminadabụ à ri olegbeju nyaa lẹ.

¹¹Ụka ọọwa, iDevidi wụrụ ịSadọkọ bala Abiyata kị ri angịkiliya bala ala iLivayị angị ịrwọnyẹ ịlẹ ká ẹnyị nyaa ri Uriyẹlụ bala Asaya bala iJuwẹlụ bala iChemaya bala Eliyẹlụ bala Aminadabụ.

¹²Ọọwa, ọ byaa yẹkẹẹ, “Anụ tị́ yẹ-ẹ̀ wẹ, anụ à ri alegbeju nya ogang-ogang nya ala iLivayị wẹ lẹ. Anụ chị ịlọnụ bala ala iLivayị aananụ ịkịla ịgọgọ, chajị kanụ ka jẹ-ẹ̀ hu Akpa nya Iro nya Amkpaa Ohe Oluhye nya ala Isirẹlụ kpa nyà wẹ ẹga ọlẹ kam nwụlanọ gbọọ mẹ.

¹³Anụ ayịdang juwa kpụ ānụ kpa olo nyamwụ lụka nya ọgbanyẹ ka lẹ, Amkpaa Ohe Oluhye nya ala Isirẹlụ yẹhị akama. Ang odudu ri áhị tọọ wo āhị jẹ jaabwọ kọ pwoku kị ka kpa olo nyamwụ ka.”

¹⁴Ọọwa, angịkiliya bala ala iLivayị à chị ịlaa ịgọgọ chajị kị ka hu Akpa nya Iro nya Ohe Oluhye nya ala Isirẹlụ kpa wẹ iJerusalẹm lẹlẹ.

¹⁵Ala iLivayị hu Akpa nya Iro chụ ịlaa a-amwachwọ lẹ, ị kpọọ la igbilo ị-kpa kpa olo nyamwụ jaabwọ ká Amkpaa da ehile neeji bwula iMosisi lẹlẹ.

¹⁶IDevidi byi alegbeju nya ala iLivayị kị ka chụ angịhyẹ nya ala iLivayị aanaa kị ka mwu eje nya ọkẹkẹnị, ká angịkịla nyaa ka juwa dụ ẹnwụ bala ogum̀ bala ịchẹchẹ.

¹⁷Ụka ọọwa, ala iLivayị chụ ịHẹman ọnyị nya iJuwẹlụ bala Asafụ ọnyị nya iBerekiya bala Itan ọnyị nya iKuchaya bwu ogang nya iMerarị kị ka kpẹhị rịrị angị du ang.

¹⁸Angịlẹ kị chụ nyọka da angịwẹ ụbwọ ri ịSẹkaraya bala ịJaasiyẹlụ bala iChemiramotu bala iJehiyẹlụ bala Uni bala Eliyabụ bala iBenaya bala ịMaaseya bala ịMatitiya bala Elifẹhẹụ bala iMikineya bala angịgbeji ịlẹ ká ẹnyị nyaa ri Obẹdị-ẹdọm bala iJeyẹlụ.

¹⁹ỊHẹman bala Asafụ bala Itan ri angị ka du ịchẹchẹ nya oje ọnyọmịla.

²⁰Ị chụ ịSẹkaraya bala Asiyẹlụ bala iChemiramotu bala iJehiyẹlụ bala Uni bala Eliyabụ bala ịMaaseya bala iBenaya kị ka du ogum̀ lomyi oluhye[11].

²¹Ị tị chụ ịMatitiya bala Elifẹlẹhụ bala iMineya bala Obẹdị-ẹdọm bala iJeyẹlụ bala Asasiya kị ka du ẹnwụ lomyi oleji[12].

²²Ọọ-lajị nyọlẹ ká iKenaniya jẹ ang chajị nya eje omwumwu lụmẹ lẹ, ị chwọọ kọ ka ri olegbeju nya aleje.

²³IBerekiya bala Elikana bala Obẹdị-ẹdọm bala iJehiya anyị ri angịgbeji ẹ-ẹga kị ya Akpa nya Iro rịrị. Angịkiliya ịlẹ kị ka du ẹkụrwẹ ị-ịlahị nya Akpa nya Iro ri iChebaniya bala iJochafatị bala iNetanẹlụ bala Amasayị bala ịSẹkaraya bala iBenaya bala Eliyesa.

²⁵Ọọwa, Adịrahụ iDevidi bala ịgabwọ nya ala Isirẹlụ bala alegbeju nya angịdẹwụ à kele kutu-kutu ka ẹpwa nya Obẹdị-ẹdọm nyọka hu Akpa nya Iro kpa nyà wẹ iJerusalẹm lẹlẹ. Ị jẹdịyẹ ọwẹ lọkẹkẹnị ọtụka-ọtụka.

²⁶Ohe Oluhye da ala iLivayị ụbwọ ẹ-ẹpwụ nya Akpa nya Iro ọkpakpa. Lẹẹlẹ, ị ya ịna irwiye bala ịkpịlọ irwiye kịla iya.

²⁷IDevidi kụrụ awụrụ ogbileji ọlẹ kị kpa apwụ ọnyịịla-ọnyịịla họ. Awụrụ ọlịnyịnyị ala iLivayị ịlẹ kị kpa olo nya Akpa nya Iro bala aleje bala iKenaniya olegbeju nyaa wuu à kụrụ lẹ. IDevidi kụrụ awụrụ oluhye ọlẹ kị wuru ẹfọdụ kị họ la apwụ ọnyịịla-ọnyịịla ịnyịnyị.

²⁸Ala Isirẹlụ wuu dịrẹ Akpa nya Iro wurututuutu kaka ju ka iJerusalẹm. Ị juwa da iwuru nya ọkẹkẹnị bala ọ-chị ẹkụrwẹ bala òkó nya achụ nya iyo bala o-du ịchẹchẹ bala ogum̀ bala ẹnwụ.

²⁹Ụka kị wẹẹ kpa Akpa nya Iro jẹ pwụ iJerusalẹm, iMikalụ ọnyị ọnyang nya ịSọlụ chẹhị kaka yẹ iDevidi bwu iwindo kọ juwa gbajị bala o-chewo lọkẹkẹnị. Ọọwa, ọ yẹ ọhọhọ nya iDevidi ọwẹ lala ẹla ohideeji lẹlẹ.