Read idege 1 EGO OGBEGBE 16 Bible Online

1 EGO OGBEGBE 16 - idege bible

1 EGO OGBEGBE 16

¹Ọọwa, ị kpa Akpa nya Iro kele kaka rịrị ẹ-ẹpwụ nya ọdụ ọlẹ ka iDevidi nwụlanọ gbọọ lẹlẹ. Ụka kị họ ịnyị kpá, ị kịla iya ọ-rụ ila bala iya nya ọhọlawụlẹ ha Ohe Oluhye.

²Ụka ká iDevidi kịla iya ịịwa kpá lẹ, ọ wahị kụrụ angịnyị lẹnyị nya Amkpaa

³ọ-ga anyang tụ alẹng ịla Isirẹlụ wuu ang oriri lẹlẹ. Ọ ga ọngọngọọng ẹbẹ nya ịkaa bala iyo bala ịkama.

⁴IDevidi chụ ala iLivayị ịhyẹ kị ka kpẹhị rịrị ịgba ọgbagba ị-ịlahị nya Akpa nya Iro bwula ọ-ka raabwọ bịlẹ ahị ọwawa bala ọ-ka ji obe juwa gwogbo ha Amkpaa Ohe Oluhye nya ala Isirẹlụ.

⁵Asafụ à ri olegbeju ọlẹ kị chụ lẹ. ỊSẹkaraya ri ọngọ tụkụ yoo. Angị ka du ogum̀ ri iJeyẹlụ bala iChemiramotu bala iJehiyẹlụ bala ịMatitiya bala Eliyabụ bala iBenaya bala Ọbẹdị-ẹdọm bala iJeyẹlụ ọkịla. Asafụ ayịdang à ka du ịchẹchẹ lẹ.

⁶IBenaya bala ịJahasiyẹlụ kị ri angịkiliya ka juwa chị ekụrwẹ ụka wuu ịlahị nya Akpa nya Iro.

⁷Ẹnụ ọọwa kpangga à ri ụka nya ọgbanyẹ-ọgbanyẹ ọlẹ ka iDevidi ya ụkụrwọ nya eje o-mwu gwogbo ha Amkpaa ju Asafụ bala ala iLivayị aanamwụ ụ-ụbwọ lẹ.

⁸Anụ ji Amkpaa obe, anụ ya ụmụmẹ nyamwụ pyẹ. Anụ ya je ụma wuu ang ịlẹ kọ họ.

⁹Anụ mwu eje họọ, anụ mwu eje gwogbo họọ. Anụ ya ụkụrwọ ẹbyẹbyị ịlẹ kọ họ dodehe.

¹⁰Anụ chị ọkẹkẹnị, kanụ gbịgba ha ẹnyị nyamwụ, angị kaa gbịgba ha Amkpaa wuu ā chị ọkẹkẹnị.

¹¹Anụ dahịhile Amkpaa bala ọngịrị nyamwụ, anụ gbịgba họọ ụka wuu.

¹²Anụ anyị ịtụma nya iJekọbụ ọnchẹ nya Ohe Oluhye ee, anụ anyị ịtụma nya Isirẹlụ ịlẹ ká Ohe Oluhye chụ, anụ kpịtịya nya ụkụrwọ ẹbyẹbyị ịlẹ ká Ohe Oluhye họ, bala eje ịlẹ kọ chị.

¹⁴Ọwa-à ri Amkpaa Ohe Oluhye nyahị lẹ, ehile nya ọpyị ọkpakpa nyamwụ ri inya ala odehe wuu.

¹⁵Anụ kpịtịya nya iro ọlẹ ká Ohe Oluhye nwa pyịyọọ, iro nyamwụ ọlẹ kọ juwa ha alụka nya oyi ọnyị myị ọnyị.

¹⁶Iro ọọwa-à ri ọlẹ kọ nwa ta Ebiraham bala ọnụ ọlẹ kọ myị ha Ayịsiki lẹ.

¹⁷Ọ yụbwọ ju ọnụ ọmyịmyị ọọwa ẹ-ẹpwụ ha iJekọbụ lala ehile, ọlẹ kọ ri iro o-gbe oyi myị oyi ha Isirẹlụ

¹⁸bwula o-ya ọwa nyị ka ya ọpyị nya iKenan ọwẹ haa kịị nyị ka ri ang ọlala nyaa gbe oyi myị oyi.

¹⁹Ụka ọọwa, ịwa ayịdang la wure-wure wẹwẹ, ị ri angga riri ọ-ọpyị nya iKenan.

²⁰Ị juwa ga bwu ọpyị ọhẹ ka ọpyị ọkịla, bwu ụma ọhẹ ka ọkịla.

²¹Ohe Oluhye-é tị myị ọngọngọhẹ taa pyịpyị ka, ọọ-lajị nyaa, ọ gbile ịdịrịhụ ụbwọ ụ-ụrụ

²²byaa ya nyị họ anchẹ nyọwa ịlẹ kọọwa nyị chụ ịngịngịhyẹ koo, nyị yụbwọ gu alọmwụ nyọwa kwẹnggẹ kpong-kpong koo.

²³Anụ alodehe wuu, anụ mwu eje ha Amkpaa, kanụ ya pyẹ ẹnụ myị ẹnụ nyori ọ chịhị da lẹ mẹ.

²⁴Anụ ya ụmụmẹ nyamwụ dodehe je alụma wuu, kanụ kpa ụkụrwọ ịtụka ịlẹ kọ họ pyebile tụ epwoja-epwoja da.

²⁵Anụ tị́ jẹ lẹ, Amkpaa lụmẹ, ọ chịla kị ka gwogbo họọ ọtụka-ọtụka. Ọ pwoku kị ka jwoo ihi gụ ijiga wuu.

²⁶Ijiga nya alụma ịkịla wuu ri ekpeku kem, Amkpaa-à tị họ uhye-ọgba lẹ.

²⁷Ụmụmẹ bala ihi nyamwụ la gede-gede, ọngịrị ọlẹ kọ la bala ọkẹkẹnị ọlẹ kọọ ya ha ji Ube nya Amkpaa chọba-lọba.

²⁸Anụ alụma ilodehe wuu, anụ gwogbo ha Amkpaa, Anụ mịla oja nya ụmụmẹ bala ọngịrị nyamwụ.

²⁹Anụ gwogbo ha ẹnyị ọlụmẹ-ụmẹ nya Amkpaa, anụ kpa ọhaha warị, kanụ gbịgba họọ.

³⁰Anụ alodehe wuu, anụ hụ́ kpákpaakpa ị-ịlahị nyamwụ, odehe yeji giri-giri lẹ, ịngịngịhyẹ-ẹ́ ka jẹ-ẹ̀ gwoo gbaá myị kaka.

³¹Uhye-ọgba bala odehe ā chị ọkẹkẹnị, kị juwa kpa ya je alụma nya odehe wuu ya Amkpaa ri adịrahụ!

³²Ihu ọtụka bala iyo ịlẹpwụ nyamwụ wuu ā gu ágbụ, ẹrụ wuu tụ ang-ẹrụ ịlụwa ā chị ọkẹkẹnị.

³³Ekeji ilipyinu ā tị̀tị̀ mwu eje nya ọkẹkẹnị, anụ tị́ jẹ, Amkpaa ka warị kaka ri Adịrahụ nya odehe.

³⁴Anụ ji Amkpaa obe chajị ọ hiigu! ọháha nyamwụ juwa ogbe oyi myị oyi.

³⁵Anụ byoo ịnyịnyị yẹkẹẹ, “Chịhị da mẹ, Ohe Oluhye ọngọchịda nyahị. Tụụhị guru, ká chịhị da bwu ẹpwụtụbwọ nya alụma ịkịla, chajị kahị ka jẹ-ẹ̀ ji ẹnyị ọlịgọgọ nyang obe bala ọ-ka gwogbo hang gbe oyi myị oyi.”

³⁶Anụ gwogbo Amkpaa Ohe Oluhye nya ala Isirẹlụ, anụ gwogbo họọ bwu ọlẹẹlẹẹ pwụ ụka myị ụka. Ọọwa, angịnyị wuu à yẹkẹẹ, “Amẹn” lẹ, ị gwogbo ha Amkpaa lẹlẹ.

³⁷Ụka ọọwa, iDevidi ya Asafụ bala ala iLivayị aanamwụ anyị kpẹhị rịrị ịgba ọgbagba ẹ-ẹga kị ya Akpa nya Iro rịrị. Ị ka la iwe-ahụrụ ọwẹ pyịyọọ juwa họ ụkụrwọ ọnyị myị ọnyị ọlẹ kọ baba ụ-ụwa ẹnụ myị ẹnụ.

³⁸Angị ji ebwo nya ụkụrwọ ọwẹ ịnyịnyị ri Obẹdị-ẹdọm ọnyị nya iJedutun bala alẹng angị iwo ịrwọnyẹ kụrụ ineku bwu ogang nyamwụ. Obẹdị-ẹdọm ayịdang bala iHosa ri angịgbeji.

³⁹ỊSadọkọ ọngọkiliya bala angịkiliya aanamwụ ịkịla tị kpehị rịrị ịgba ọgbagba ọ-ọdụ nya Amkpaa ọlẹ kọ juwa i-ikiti nya iGibyọn.

⁴⁰Ịwa ka juwa kịla iya ọ-rụ ila u-uhye nya ogidi ịnyịnyịịnyị ẹnụ myị ẹnụ lụtụrụ bala alobyi jaabwọ kị da ẹ-ẹpwụ nya ehile ọlẹ ká Amkpaa ya ha ala Isirẹlụ.

⁴¹Angịkịla ịlẹ ká iDevidi chụ jula angịwẹ ri ịHẹman bala iJedutun bala angịkịla ịlẹ kị yụchụ me ịnyịnyị nyọka mwu eje gwogbo ha Amkpaa chajị nya ọháha o-gbe oyi myị oyi nyamwụ.

⁴²ỊHẹman bala iJedutun à kpẹhị rịrị ụkụrwọ nya ẹkụrwẹ ọchịchị bala ịchẹchẹ odudu bala ang-abwọ ịkịla ị-kpa du ang ju eje o-gwogbo ha Ohe Oluhye ịlẹ kị ka mwu lẹ. Alogang nya iJedutun à ri angịgbeji lẹ.

⁴³Ụka ká ọwẹ kam̀ lẹ, ọng myị ọng à rụ ka ẹpwụ nya ịlọmwụ lẹlẹ. IDevidi rụ ka ẹpwa kaka ya alugbiyegu nyamwụ ịnyịnyị.