Read idege 1 EGO OGBEGBE 17 Bible Online

1 EGO OGBEGBE 17 - idege bible

1 EGO OGBEGBE 17

¹Ụka ọọwa, iDevidi ayịdang kụ ẹ-ẹpwa nya adịrahụ ọlẹ kị nwụ họọ. Ọọwa, ọ wụrụ ịNatan ọlọmwụ ẹnẹhẹ lẹ, ọ byoo yẹkẹẹ, “Yẹ wẹ́ẹ̀, am ayịdang kụ am̀ ẹ-ẹpwa ọnyịịla-ọnyịịla ọlẹ kị nwụ la ekeji nya isida. Akpa nya Iro nya Amkpaa tị rịrị ẹ-ẹpwụ nya ọdụ ochwengkpe ọlẹ.”

²Ọọwa, ịNatan à wọọ yẹkẹẹ, “Họ ang myị ang ọlẹ kọ juwa irya nyang nyọka họ mẹ, chajị Ohe Oluhye juwa tang.”

³Lodu nya ẹnụ ọọwa lẹ, Ohe Oluhye à tị byi ịNatan yẹkẹẹ,

⁴“Kele ká byi iDevidi ọnchẹ nyam am nyị ya ọọwa-à ka nwụ ẹpwa ọlẹ kam ka kụ ka.

⁵Bwu ụka ọlẹ kam gba ala Isirẹlụ kpehe bwu ọ-ọpyị nya Ijipiti pyịyọọ daalẹ lẹ, ḿ kụ u-ube ọhẹ ẹnẹhẹ lẹka. Ẹ-ẹpwụ nya ọdụ m̄ kụ lẹẹ, juwa mwụ báa bwu ẹgẹhẹ ka ẹga ọkịla lẹ.

⁶Ẹ-ẹpwụ nya ẹdịyẹ ọlẹ wuu kam jẹ bala ala Isirẹlụ lẹ, ḿ cheru ju ọngọngọhẹ nya alegbeju ịlẹ kam chụ nyọka kpẹhị rịrị angịnyị nyam ang odudu kị nwụ ube la isida ham ka lẹ ka.

⁷“Lẹẹlẹ, byi iDevidi ọnchẹ nyam mẹ, am nyị ya ụka kọ lẹẹ kpa ịkpịlọ ri amẹ wẹ́ẹ̀, m̄ chwọọ kọ ka ri adịrahụ kpẹhị rịrị angịnyị nyam lẹ.

⁸M̀ juwa tang ẹ-ẹga myị ẹga ịlẹ ká jẹ bwu wuu. M̀ ta aluji nyang ayịreji jaabwọ ká juwa jẹ kịlahị-ịlahị. M̀ juwa ka họ ká ka lehe lala alebeju ịtụka ilodehe.

⁹M̀ ya ẹga ọhẹ ha ala Isirẹlụ angịnyị nyam, yaa kụ ụwa nya ẹpwa nya ịlaa. Ẹ-ẹga ọọwa lẹ, ọngọngọhẹ-ẹ́ ka tịtọ nya ẹla nyaa kaka. Angị họ ang onyobyi-í tị ka taa pyịpyị lala olene-ene

¹⁰ụka kam chụ angịleje kpẹhị rịrị angịnyị nyam kaka. M̀ ka kụrụ aluji nyang wuu hang. M̀ myị ọnụ hang ya am Amkpaa ka ya anyị ịtụma hang ịlẹ kị ka ri ịdịrịhụ.

¹¹Ụka ká ọhịhị nyang-ńg myị kpá, m̀ ka hu ọnyị nyang ọhẹ ri adịrahụ ku ọmwakpa nyang. M̀ ka ya ọpyị ọkpakpa nyang yeji giri-giri.

¹²Ọngọọwa-à ka nwụ ẹpwang ham lẹ. M̀ ka ya ẹchị adịrahụ olugbiyegu nyamwụ yeji gbe oyi myị oyi.

¹³M̀ ka ri adamwụ, ọ ka ri ọnyị nyam. Ḿ ka tụ ọnụ ọmyịmyị nyam biri ẹ-ẹga nyamwụ jaabwọ kam họ ẹ-ẹga nya ọngọlẹ kọ ri adịrahụ ene nyang ka.

¹⁴M̀ ka hwoo nya olegbeju nya angịnyị nyam bala ọpyị nyam gbe oyi myị oyi. Ẹchị nya adịrahụ-ụ́ ka myị hi ugbiyegu nyamwụ ẹnẹnẹhẹ kaka.”

¹⁵Ọọwa, ịNatan à kele kaka tịrọnụ ya je iDevidi kpẹẹkpẹẹ ẹla myị ẹla ịlẹ wuu ká Ohe Oluhye wụrụ mẹjọọ-ọ̀ wẹ lẹlẹ.

¹⁶Ọọwa, iDevidi à kele ka ẹpwụ nya ọdụ ọlẹ kị ya Akpa nya Iro rịrị lẹ, ọ hụhụ lẹ, ọ raabwọ yẹkẹẹ, “Amkpaa ee, am ayịdang bala ugbiyegu nyam-ḿ pwoku kpụ ọ-ka la ang ịlẹ wuu ká họ ham wẹ gbee daalẹ ka.

¹⁷Ọ lala ịwẹ nyaa nwang lẹka, à myị ọnụ nyọka họ gụ ịwẹ ha anyị ịtụma nyam ịlẹ kị ka ma kịlahị. Amkpaa Ohe Oluhye nyam ee, à hum kpá lala am à ri ọngọtụka ọhẹ lẹ!

¹⁸Ányị m̄ tị́ tụm ka ya wẹ́ẹ̀? À jẹm am ọnchẹ nyang jẹ kpá wuu, à tị chihi bam!

¹⁹Ajị nyam bala jaabwọ kọ ri irya nyang à dudu ká họ ang ịtụka ịlẹ wuu bala ọ-ya ọnụ ọmyịmyị ịtụka nyang ịlẹ dodehe lẹ.

²⁰Amkpaa ee, ọngọngọhẹ-ẹ́ lala ahụ ka. Ohe Oluhye ọkịla ọhe-lọhẹ-ẹ́ ji dala ahụ ka. Áhị wo oja nya ojiga ọhẹ kọ lala ahụ ka.

²¹Ẹpwụma ọkịla ọhẹ-lọhẹ-ẹ́ jam odehe kọ lala ala Isirẹlụ kaka. À gbaa kpehe bwu ọnyọhị oriri chajị kị ka ri angịnyị nyang. Ang ịtụka bala ụkụrwọ ẹbyẹbyị ịlẹ ká họ haa du ká ẹnyị nyang ru ohi pwụ ọbaba nya odehe wuu. À gba angịnyị nyang kpehe bwu Ijipiti bala o-ku alụma ịkịla hi ẹga da haa ụka kị juwa jẹ kịlahị.

²²À hu ala Isirẹlụ ri angịnyị nyang gbe oyi myị oyi. Ahụ Amkpaa tị ri Ohe Oluhye nyaa.

²³“Amkpaa ee, aa họ jaabwọ ká myị ọnụ u-uhye nyam am ayịdang bala ugbiyegu nyam mẹ. Họ ká ọnụ ọmyịmyị ọọwa ā godayị pyịyọọ mẹ.

²⁴Ụka ọọwa, ohi oruru nyang ka godayị gbe oyi myị oyi. Angịnyị wuu ka juwa yẹkẹẹ, ‘Amkpaa Agụgụ à ri Ohe Oluhye nya Isirẹlụ lẹ.’ Họ ká ẹchị adịrahụ olugbiyegu nyam am iDevidi ọnchẹ nyang ā yeji ị-ịlahị nyang pyịyọọ mẹ.

²⁵À chị ang ịlẹ wuu ehe mẹjẹm am ọnchẹ nyang bala ọ-myị ọnụ ya anyị ịtụma nyam nyị ka ri ịdịrịhụ. Ịnyị à du kam la ugbodu ojuju lẹẹ raabwọ ọlẹ hang lẹ.

²⁶Amkpaa ee, ahụ à ri Ohe Oluhye lẹ. Ahụ lịlọng à myị ọnụ nya ang ịnyịịla ịlẹ wuu ham lẹ.

²⁷Lẹẹlẹ, aa wahị kụrụ ugbiyegu nyam ká ẹchị adịrahụ ọlụwa ka kịnyaa pyịyọọ mẹ. M̀ jẹ kaahụ Amkpaa wahị kụrwọọ lẹ. Ahị ọwawa nyang ọọwa ri o-gbe oyi myị oyi.”