Read idege 1 EGO OGBEGBE 18 Bible Online

1 EGO OGBEGBE 18 - idege bible

1 EGO OGBEGBE 18

¹Ụka kọ nọ chẹẹ, iDevidi dẹwụ ta ala iFilisitiya myịmyị. Ọ kụrụ epweji nya ịGaatị bala epweji ichiche ịlẹ kị kụ dagaga ju ụwa.

²Ọ kụrụ ala iMowabụ ịnyịnyị. Ọọwa, ị ji ekpeleji nya ọngịrị nyamwụ lẹ, ị juwa nyẹ ẹpwa họọ lẹlẹ.

³IDevidi myịmyị dẹwụ kụrụ ịHadadẹsẹẹ Adịrahụ nya ala iSoba ọlẹ kọ ji oye nya ịHamatị ọlọpyị nya iSiriya. Ụka ọọwa, ịHadadẹsẹẹ ayịdang juwa jẹ kaka ye ọpyị oloye oluhye nya Ihu iYufuretisi jubwọ lala ọpyị nya ịlọmwụ.

⁴IDevidi nu ịHadadẹsẹẹ ụnọ ookpokpo (1,000) nya ang ịrụnyẹ ịlẹ ká anyịrẹ kaa gbile. Ọ wu angị kpa anyịrẹ dẹwụ angị ụnọ irwiye (7,000) bala angịdẹwụ ịkịla angị ụnọ iwo imiiye (20,000) ịnyịnyị. Ọ mwụ anyịrẹ i-gbile ang ịrụnyẹ nyaa wuu kụnyà-kụnyà kẹnẹ-kẹnẹ ka hi ịlẹ kị ka meme la o-gbile ang ịrụnyẹ ohu ookpokpo (100).

⁵Ụka ká ala iSiriya ịla ịDamasịkọsị du angịdẹwụ kaka da ịHadadẹsẹẹ ọwẹ ụbwọ, iDevidi nwụ angị ụnọ iwo imiiye da ụnọ imiiye (22,000) nyaa.

⁶Ọọwa, iDevidi à nwụ ịkampụ nya angịdẹwụ nyamwụ ọ-ọpyị nyaa lẹ, ala iSiriya ịwẹ à yẹ ri anchẹ nyamwụ juwa nyẹ ẹpwa họọ lẹlẹ. Amkpaa họ iDevidi kụrụ ẹ-ẹga myị ẹga kọ dẹwụ.

⁷IDevidi nu ọkụmada nya okpoko ịgọm ịlẹ ká alegbeju ịtụkụ yi ịHadadẹsẹẹ kpa lẹ, ọ gyaa kpa rụ ka iJerusalẹm lẹlẹ.

⁸Ọ go iru nya oje ọnyọmịla kpa rụ bwu epweji nya iTibihatị bala iKun. Epweji ri nya ịHadadẹsẹẹ. Ije ịnyịmịla ịwẹ iSolomọn à kpa họ irim ọ-ya enyi ju bala ịtachị bala ịja ị-kpa ju ang ịlube nya Ohe Oluhye ị-ịlahị lẹ.

⁹Ụka ká iTowu Adịrahụ nya ala ịHamatị wo oja ya iDevidi nyị kụrụ angịdẹwụ nya ịHadadẹsẹẹ wuu,

¹⁰ọ du ịHadoram ọnyị nyamwụ kaka dọnụ chị Adịrahụ iDevidi bala ọ-dọọ ọlẹẹkwaa nyọlẹ kọ kụrụ ịHadadẹsẹẹ bwu ẹwụ. Adịrahụ iTowu ọwẹ bala ịHadadẹsẹẹ ayịdang ri alẹwụ nya awụlẹ kpụ ị dawụlẹ ẹwụ ụka lụmẹ-lụmẹ. ỊHadoram kpa ang-ahị ụma datị-datị ịlẹ kị họ lokpoko ịgọm bala okpoko onyoowuru bala oje ọnyọmịla kịla iDevidi.

¹¹Ọọwa, iDevidi à go ang-ahị ịwẹ wuu ha Amkpaa nya ọ-kpa họ ụkụrwọ họọ jaabwọ kọ ya ịlẹ kọ nu bwu ẹga nya ala Ẹdọm bala ala iMowabụ bala ala Amọn bala ala iFilisitiya bala ala Amalẹkị họọ lẹlẹ.

¹²Ụka ọọwa, Abichayị ọlẹ ka ịnamwụ ri iSeruya dẹwụ ta ala Ẹdọm ọ-Ọkpọọ nya Ịma. Ọ kụrwaa kpụ ọ nwụ angị ụnọ iwo kụrụ ineku (18,000) nyaa.

¹³Ọ nwụ́ ịkampụ nya angịdẹwụ tụ ọpyị nya Ẹdọm da. Ọọwa, alụwa à ji ekpeleji nya iDevidi lẹlẹ. Amkpaa họ ká iDevidi kụrụ ẹ-ẹga myị ẹga kọ dẹwụ.

¹⁴IDevidi ri Adịrahụ nya ala Isirẹlụ wuu gu ọka gu ọka. Ọ kpẹhị rịrị angịnyị nyamwụ kpẹẹkpẹẹ la ọ-jẹ oye-oye ka.

¹⁵IJowabụ ọlẹ ká ẹnyị nya ịnamwụ ri iSeruya à ri ọgẹwụ nya angịdẹwụ nya iDevidi lẹ. IJehochafatị ọnyị nya Ahiludu à ri ọngọ kaa da ego ju lẹ.

¹⁶ỊSadọkọ ọnyị nya Ahitubu bala Ahimẹlẹkị ọnyị nya Abiyata ri angịkiliya. ỊChavụcha ri akịraa.

¹⁷IBenaya ọnyị nya iJehoyada ri olegbeju nya angị gbe Adịrahụ iDevidi. Anyị alẹng nya iDevidi ri alegbeju ịgbẹgbịlẹ gụ wuu ẹ-ẹpwụ nya alụkụrwọ nyamwụ lẹ.