Read idege 1 EGO OGBEGBE 19 Bible Online

1 EGO OGBEGBE 19 - idege bible

1 EGO OGBEGBE 19

¹Ụka kọ nọ chẹẹ, ịNahachị Adịrahụ nya ala Amọn gbu. Ọọwa, ịHanun ọnyị nyamwụ à ri adịrahụ ku ọmwakpa nyamwụ lẹlẹ.

²Ọọwa, iDevidi à yẹkẹẹ, “ỊNahachị họ hiigu ẹ-ẹga nyam. Lẹẹlẹ, m̀ tịtị ka họ hiigu ẹ-ẹga nya ịHanun ọnyị nyamwụ ịnyịnyị.” Ịnyị, iDevidi à du alegbeju ịtụkụ yoo ẹrụ kele ka Amọn kaka da ịHanun ogogo chajị nya igu nya adamwụ lẹlẹ. Ụka ká alegbeju ịtụka yi iDevidi ịwẹ pwụ Amọn,

³Alegbeju nya ala Amọn tị byi ịHanun ayịbaa yẹkẹẹ, “Aajị nya ihi nya adang à du ká iDevidi du angịnyị nyamwụ warị ka kpụng ẹjẹ koo. Á jẹ ka aalẹ, ọ daa warị chajị kị ka wụla ọpyị nyahị yẹ, kị ka wẹ ka nuhi ịnyị!”

⁴Ọọwa, ịHanun à wu angịnyị nya iDevidi ịịwa lẹlẹ. Ọ chị oyoyi jwaa bwula ọ-pwaa ịchwọ bala ọ-chị ịwụrụ nyaa eku pwaarịị hi iwa da ọ-ọmwụ. Ọọwa, ọ kwaa lakụ-lakụ rụ lẹlẹ.

⁵Ụka ká angịnyị ya ẹlẹwẹ je iDevidi, ọ du alẹrụ kaka tọ alegbeju ịịwa, chajị ọ laa oyoyi lụmẹ. Adịrahụ iDevid du kaka byaa yẹkẹẹ, “Anụ hụ i-iJeriko gbee ká ịchwọ nyanụ ka myị̀ ene kanụ ka nyà pwụ ẹpwa mẹ.”

⁶Ụka ká ala Amọn ayịdang jẹ ịwa nyị ju iDevidi uji, ị ya okpoko onyoowuru ụnọ ookpokpo (1,000) du kaka diro angị kpa ang ịrụnyẹ dẹwụ bala ang ịrụnyẹ nyaa ị-kpa dẹwụ ịlẹ ká anyịrẹ kaa gbile bwu iMesopotemiya oluhye tụ epweji nya ịMaaka bala iSoba ịlọpyị nya iSiriya.

⁷Ị diro ang ịrụnyẹ ị-kpa dẹwụ ụnọ iwo ịta da ụnọ imiiye (32,000) tụ Adịrahụ nya ala ịMaaka la angịdẹwụ nyamwụ. Ụka ọọwa, ị wẹ kaka chịkụ ju iMedeba chwẹẹ. Ala Amọn tịtị kpehe bwu epweji nya ịlaa ịwa warị kaka yẹ julaa ẹgẹwẹ ju agidi nya ẹwụ ọka dada.

⁸Ụka ká iDevidi wo ọnwụlanọ nyaa ọwẹ, ọ du iJowabụ la angịdẹwụ nyamwụ wuu kele.

⁹Ala Amọn kpehe kaka hị ọgba nya ẹwụ ọ-ọnụ ogirigba nya epweji nya ịRaba ọlẹ kọ ri egbeju-ẹpwa nyaa. Ịdịrịhụ ịkịla ịlẹ kị dọkọ wulaa ju ogu nya ịlaa ịwa kaka kụ ẹ-pwamẹ kị ka dẹwụ bwu ụwa.

¹⁰IJowabụ yẹ jaabwọ ká aluji ji ịlahị bala o-ji ẹkpẹ nyamwụ ji. Ọọwa, ọ chụ angịdẹwụ ịlahịchịng nya ala Isirẹlụ ịhyẹ lẹ, ọ yaa kụ ẹwụ ta ala iSiriya lẹlẹ.

¹¹Ọ ya angịdẹwụ ihihi nyamwụ wuu ji ekpeleji nya Abichayị ọnyịnamwụ kịịwa ka dẹwụ ta ala Amọn.

¹²Ọọwa, iJowabụ à byi Abichayị yẹkẹẹ, “Ó-ri ká ala iSiriya-á juwa yẹm jiíí lụmẹ lẹ, aa wẹ kaka dam ụbwọ mẹ. Ọ́ tị ri ká ala Amọm-ń juwa yẹng jiíí lụmẹ, m̀ ka wẹ kaka dang ụbwọ ịnyịnyị.

¹³Aa godayị gịrị-gịrị lugbodu ojuju mẹ. Ahị ka dẹwụ ọlẹ yẹ angịnyị nyahị bala epweji nya Ohe Oluhye ịlẹ dada. Amkpaa ā họ ang ọlẹ kọ ri irya nyamwụ mẹ.”

¹⁴Ọọwa, iJowabụ bala angịdẹwụ ịlẹga nyamwụ à jẹ kele kị ka gba mịla ala iSiriya lẹ, ala iSiriya à rụnyẹ rụ lẹlẹ.

¹⁵Ụka ká ala Amọn yẹ ka ala iSiriya juwa rụnyẹ rụ lẹ, ịwa à tịtị rụnyẹ rụ hi Abichayị tịrẹkpẹ ka epweji nya ịlaa lẹlẹ. Ọọwa, iJowabụ à rụ tịrẹkpẹ ka iJerusalẹm lẹlẹ.

¹⁶Ụka ọọwa, ala iSiriya yẹ jaabwọ ká ala Isirẹlụ kụrwaa. Ịnyị, ị du kaka wụrụ angịdẹwụ ịkịla nyaa bwu oye ọkịla nya Ihu iYufuretisi lẹ, ị yaa ji ekpeleji nya iChofakị ọgẹwụ nya angịdẹwụ nya ịHadadẹsẹẹ Adịrahụ nya ala iSoba lẹlẹ.

¹⁷Ụka ká iDevidi wo ẹlẹwẹ, ọ tụ angịdẹwụ nya Isirẹlụ wuu guru. Ị chẹwụ kpoye nya Ihu ịJọdan lẹ, ọ yaa hị ọgba nya ẹwụ jahị da ala iSiriya lẹlẹ. Ụka kị dọmwụ nya ẹwụ ọdada,

¹⁸ala iSiriya ịwẹ rụnyẹ rụ hi ala Isirẹlụ. IDevidi anyị nwụ angị kụ ang ịrụnyẹ ịlẹ ká anyịrẹ kaa gbile angị ụnọ irwiye (7,000) bala angịdẹwụ ịkala angị ụnọ iwo ine (40,000). Ị nwụ iChofakị ọgẹwụ nya ala iSiriya ịnyịnyị.

¹⁹Ụka ká ịdịrịhụ ịlẹ kị ji ekpeleji nya Adịrahụ ịHadadẹsẹ ene-ene yẹ ká ala Isirẹlụ kụrwaa lẹ, ị họ okpunyi ta iDevidi lẹ, ị ji ekpeleji nyamwụ lẹlẹ. Ala iSiriya-á tụtụm myị ọnụ nyọka da ala Amọn ụbwọ gụ ọwẹ kaka.