Read idege 1 EGO OGBEGBE 20 Bible Online

1 EGO OGBEGBE 20 - idege bible

1 EGO OGBEGBE 20

¹Lụka nya ụrwẹnụ, ká ịdịrịhụ kaa ka ẹwụ, iJowabụ kpa angịdẹwụ kpehe kaka be ala Amọn ẹpwa. Ị ta epweji ịlọpyị nya ala Amọn ayịreji. Ị yẹ epweji nya ịRaba dada lẹ, ị gba mịlọọ lẹ, ị tọọ ayịreji. Ụka ọwẹ, iDevidi tị hi hụ ẹ-ẹpwa i-iJerusalẹm.

²Ụka ká iDevidi kele ka ịRaba, ọ nwụla okpo-adịrahụ bwu egbeju nya Adịrahụ nya ala Amọn[13]. Ị ya ẹjwọ ọnyịịla-ọnyịịla ju okpo ọọwa. Ilo ọlala nya okpo ọọwa la nyẹẹnyẹẹ lala okpoko ịgọm ookpokpo lẹpwụ-lẹpwụ. IDevidi ya okpo ọọwa kụrụ. Ọ kpa iru nya ang-ẹwụ nyà bwu epweji ọwẹ.

³Ọ yẹ ala ịRaba la anyịhị nyamwụ, juwa kpaa họ ụkụrwọ la ịma ị-kpa gu ekeji ene bala eje i-be ọwụ bala alẹ iloje-oje. Ịwẹ-ịwẹ ọ họ alepweji ịkịla ịla Amọn lẹ. Ọọwa, ọwa bala angịdẹwụ nyamwụ wuu à nyà ka iJerusalẹm lẹlẹ.

⁴Ụka kọ nụwa chẹẹ lẹ, ala Isirẹlụ myịmyị dẹwụ ta ala iFilisitiya ị-ịGẹsẹẹ. Ụka ọọwa, iSibekayị ọla iHucha nwụ ogburujwo ọhẹ ọlẹ ká ẹnyị nyamwụ ri iSipayị lẹ, ị kụrụ ala iFililsitiya lẹlẹ.

⁵Lụka kị dẹwụ ọkịla ta ala iFilisitiya, Elihanan ọnyị nya ịJayii nwụ ịLamii ọnyịnịna nya iGolayatị. Ekilo nya ụwangga nya ịLamii ọọwa hye lala ojẹkpa ọnapwụ.

⁶Ị dẹwụ ọkịla ị-ịGaatị. Ogburujwo ọhẹ juwa ẹ-ẹwụ ọọwa kọ ju akachụ ịrwọnyẹ a-abwiye-abwiye bala achụụ ịrwọnyẹ a-atiye-atiye. Ọ ri ọnyị ọtụma nya igburujwo.

⁷Ọ ya ẹhị da ala Isirẹlụ bwee lẹ, iJonatan ọnyị nya iChimiya à nwọọ lẹlẹ.

⁸Igburujwo ịta ịwẹ ká iDevidi bala angịdẹwụ nyamwụ nwụ ri anyị ịtụma nya igburujwo ịla ịGaatị.