Read idege 1 EGO OGBEGBE 21 Bible Online

1 EGO OGBEGBE 21 - idege bible

1 EGO OGBEGBE 21

¹Ụka ọhẹ juwa ká Ohe Onyobyi wuleji nyọka tu ala Isirẹlụ pyịpyị. Ọọwa, ọ ju iDevidi irya nyị wa ala Isirẹlụ mẹ lẹlẹ.

²Ọọwa, iDevidi à byi iJowabụ bala alegbeju nya angịdẹwụ ịkịla yẹkẹẹ, “Anụ kele kanụ wa ala Isirẹlụ wuu bwu ọbaba ọla iBiyẹchẹba lalaala ka ju ka ọbaba ọla ịDan. Ụka kanụ họ ịnyị kpá lẹ, anụ wẹ kaka ya jem jaabwọ kị ju iru ba mẹ.”

³Ọọwa, iJowabụ à tị byoo yẹkẹẹ, “Ohe Oluhye ā myị ká angịdẹwụ nya ala Isirẹlụ ā ju iru ugbabwọ ohu mwụ aba ba iru ojuju nyaa ọlẹẹlẹẹ mẹ. Agaba Idu ee, tị yẹ wẹ́ẹ̀, ọ́ lịnyị la, alekpeleji nyang ịwa wuu à tị́ ri lẹ. Lẹ, ịyẹ à tị du ká wẹẹ tịtọ nyọka wa angịnyị ene-è? Ọ-họ ịnyị ka du ká ala Isirẹlụ ka la abyị.”

⁴Ma, Adịrahụ iDevidi byi iJowabụ ya nyị họ jaabwọ kọọwa nyị ya pyii mẹ. Ọọwa, iJowabụ à wa ala Isirẹlụ tụ ala iJuda wuu lẹ, ọ nyà wẹ iJerusalẹm lẹlẹ.

⁵IJowabụ ya je iDevidi jaabwọ ká alẹng ị-ka dẹwụ myị ju iru kaka ba. Angị ịlịnyị Isirẹlụ wuu la angị uku ookpokpo da ụnọ ohu ookpokpo (1,100,000). Ala iJuda la angị ụnọ ohu ine da ụnọ iwo irwiye (470,000).

⁶IJowabụ-ụ́ wa ala iLivayị bala ala iBenjamịn kpịlọ ka chajị ehile nya adịrahụ ọlẹ kọ da-á họọ ka.

⁷Ohe Oluhye wẹjẹ chajị nya angịnyị ọwawa ọwẹ. Ọọwa, ọ yẹ ala Isirẹlụ akama lẹlẹ.

⁸Ọọwa, iDevidi à byi Ohe Oluhye yẹkẹẹ, “M̀ họ ang onyobyi ọtụka-ọtụka bwula ọ-wa angịnyị lẹ. Chuchuu hịnyọhi ham mẹ. Ẹla nya uchi m̄ họ-ọ̀ wẹ lẹ.”

⁹Ọọwa, Amkpaa-à byi ịGadị ọngọhẹ nya alọmwụ nya iDevidi yẹkẹẹ,

¹⁰“Kele kaka byi iDevidi mẹ, m̀ jam wa ang ịta chọọ e-eji lẹ. Ọlẹ kọ chụ lẹpwụ nyaa m̄ ka họ lẹ.”

¹¹Ọọwa, ịGadị à kele kaka byi iDevidi yẹkẹẹ, “Amkpaa ya ahụ nyị chụ ọlẹ kịị nyị hang gụ lẹpwụ nya akama ịta ịlẹ mẹ. Akama ịịwa ri

¹²ūhi ọ-ka ji ọpyị nyang ẹ-ẹpwụ nya ẹka ịta gbẹgbịlẹ lee aluji nyang ọ-ka kụrụng ká ka juwa rụnyẹ rụ hyaa ọya ịta lẹpwụ-lẹpwụ lee Amkpaa ọ-ka ya ẹdụrụ onyobyi-obyi jụ alọpyị nyang ẹnụtụrụ ịta ká olegu-ẹrụ nya Amkpaa ka juwa nwụ angịnyị tụ Isirẹlụ wuu da tị́? Ọyina lẹpwụ nya ịwẹ ā tị́ chụ kam ka kpa kaka ya je Amkpaa?”

¹³Ọọwa, iDevidi à byi ịGadị yẹkẹẹ, “Áhyu! Iwe-ahụrụ olujwo ọtụka m̄ ji lẹ-ẹẹ́! Ḿ tị kpụ ẹpwụ nya ẹla nya Amkpaa, ọ hám gụ chajị ọwa ri ọngọ yẹ ahyẹẹrwẹrwa. Ọ̄ ya iwe da ká angịnyị ā yẹm akama koo.”

¹⁴Ịnyi, Amkpa à du ẹdụrụ onyobyi-obyi wẹ Isirẹlụ lẹ, angị ụnọ iwo irwiye (70,000) nyaa à gbu lẹlẹ.

¹⁵Amkpaa du olegu-ẹrụ nyamwụ kele kọ ka ta iJerusalẹm ayịreji. Ma, ụka kọ juwa ka tọọ ayịreji lẹ, Amkpaa-à nwụ irya me lẹ, ọ byi olegu-ẹrụ ọọwa yẹkẹẹ, “Ọ nwa lẹ! Ba mẹ!” Ụka ọwẹ, olegu-ẹrụ ọọwa juwa ẹ-ẹga o-ru ajẹ nya ang-ẹrụ nya Arawụna[14] ọla iJebusi.

¹⁶IDevidi yẹ olegu-ẹrụ ọọwa kọ godayị u-uhye ọhụ la oge nyamwụ jahị da iJerusalẹm. Ọọwa, ọwa bala alegbeju nya ala Isirẹlụ kị kụrụ ịwụrụ nya owuru ọkpakpa à hirikpẹẹ ya ahị nyaa cheji lẹlẹ.

¹⁷Ọọwa, iDevidi à byi Ohe Oluhye yẹkẹẹ, “Am kpangga à du kị wà angịnyị lẹ. Am à họ tịpyọ lẹ. Ịnya ikpehika nya angịlẹ tị́ ri oyina? Amkpaa Ohe Oluhye nyam ee, yẹm bala alugbiyegu nyam akama kem, ká ba hi angịnyị nyang mẹ.”

¹⁸Ọọwa, olegu-ẹrụ nya Amkpaa à byi ịGadị nyị da iDevidi ehile kịị nyị kele kaka me ogidi ẹ-ẹga o-ru ajẹ nya ang-ẹrụ nya Arawụna ọla iJebusi mẹ lẹlẹ.

¹⁹IDevidi ju ihi nya ehile ọlẹ ká Amkpaa dọọ bwula o-kele jaabwọ ká ịGadị byoo.

²⁰Arawụna bala anyị alẹng nyamwụ angị ine juwa kpa iwiiti ru. Ụka kị yẹ olegu-ẹrụ ọọwa lẹ, anyị nyamwụ à rụnyẹ kaka kpịbaa lẹlẹ.

²¹Ahyaahị ká Arawụna yẹ iDevidi kọ juwa jẹ yahị dọọ lẹ, ọ rụ bwu ẹga o-ru ang kaka hirikpẹẹ juwa da ọbayile họọ lẹlẹ.

²²Ọọwa, iDevidi à byoo yẹkẹẹ, “Ya ẹga o-ru ang nyang ọlẹ ham ra, chajị kam me ogidi ám ha Amkpaa kọ ká ẹdụrụ onobyi ọlẹ hị angịnyị mẹ. M̀ ka nwụng uri jaabwọ ká ị̀nya nyamwụ ri.”

²³Ọọwa, Arawụna à byi iDevidi yẹkẹẹ, “Agaba Idu ee, m̀ pẹ hyoo hang lẹ. Họ ang myị ang ọlẹ kọ hang ám mẹ. Ịna bala iwiiti lẹẹ ká ka ya kịla iya lẹ. Eginikpo ị-kpa ru ang lẹẹ ịnyịnyị ká ka be ju ila nya iya ọọwa lẹ. M̀ yaa hang wuu lawụlẹ-awụlẹ lẹ.”

²⁴Ụka ọọwa, adịrahụ tị wẹ byoo yẹkẹẹ, “Eheehe, m̀ ka rọọra ịnyị! Aang ọlẹ kọ ri nyang m̄ ka hu kịla iya ha Amkpaa ka. Ḿ ka hu ịngịngịhyẹ ọlẹ kam ye lorwaahị kịla iya ha Amkpaa ka!”

²⁵Ọọwa, iDevidi à nwụ Arawụna uri nya ẹga o-ru ang ọọwa lokpoko ịgọm ohu ịrwọnyẹ (600) lẹlẹ.

²⁶Ọ me ogidi ha Amkpaa ụ-ụwa lẹ, ọ kịla iya ọ-rụ ila bala iya nya ọhọlawụlẹ lẹlẹ. Ọ raabwọ lẹ, Amkpaa-à wẹ abwọ ọrịrị ọọwa bwula o-du ila bwu epwoohe kaka rụ iya ọlẹ kọ kịla lẹlẹ.

²⁷Ọọwa, Amkpaa-à ya lẹ, olegu-ẹrụ à ya oge nyamwụ dụrụ ka apịlẹ lẹlẹ.

²⁸Ụka ká iDevidi yẹ ká Amkpaa wẹ abwọ ọrịrị nyamwụ ẹ-ẹga o-ru ang nya Arawụna, ọ myịmyị kịla iya ụ-ụwa.

²⁹Ụka ọwẹ lẹ, Ọdụ nya Amkpaa bala ogidi ọlẹ ká iMosisi họ juwa a-ada ọgbịgba ọla iGibyọn wẹẹ,

³⁰iDevidi-í tị ka ụwa kaka gbịgba ha Amkpaa myị ka, chajị ọ ju uhi nya oge ọlẹ ká olegu-ẹrụ nya Amkpaa kpa ụ-ụbwọ.