Read idege 1 EGO OGBEGBE 22 Bible Online

1 EGO OGBEGBE 22 - idege bible

1 EGO OGBEGBE 22

¹Ọọwa, iDevidi à yẹkẹẹ, “Ẹga ká Ube nya Amkpaa Ohe Oluhye ka rịrị à lẹẹ lẹlẹ. Ogidi ọlẹ ká ala Isirẹlụ ka kịla iya ọ-rụ ila à lẹẹ ịnyịnyị lẹlẹ.”

²Ụka ọọwa, Adịrahụ iDevidi ya ị wụrụ angga ịlẹ kị kụ ọpyị nya Isirẹlụ wuu kaka tuguru. Ọ chụ angịhyẹ nyaa kị ka be ajwọ, haa memeeme lala ịbịlọọkụ kị ka kpa me Ube Ịgọgọ.

³Ọ ya iru nya ije lụmẹ-lụmẹ haa kị ka kpa họ iloo bala ịgbanị nya ekpileku bala ije ịnyịmịla ịlẹ kị ju iru kịla ọwawa kịla.

⁴Ọ ya egbile nya ekeji nya isida ịlẹ kị ju iru kịla ọwawa kịla haa ịnyịnyị chajị ọ lẹẹ me ta ala Taya bala iSayịdọn kpụ ị kpa iru nya ekeji isida warị wọọ.

⁵IDevidi ayịdang lẹẹ ya i-irya nyamwụ yẹkẹẹ, “Ube nya Amkpaa ọlẹ ká iSolomọn ọnyị nyam juwa ka nwụ́ ka há ụ́hị bala ọ-la ehe. ISolomọn tị ri onjwo bala ọ-jẹ ụkụrwọ lụmẹ lẹka lẹ, m̀ ka nwụla ang nọ gbe ube ọọwa.” Lẹẹlẹ, iDevidi nwụla iru nya ang-abwọ nọ u-hye ene kọọ gbu.

⁶Ọọwa, ọ wụrụ iSolomọn ọnyị nyamwụ lẹ, ọ byoo kọ ka nwụ Ube Ịgọgọ nya Amkpaa Ohe Oluhye nya ala Isirẹlụ lẹlẹ.

⁷IDevidi byoo yẹkẹẹ, “Ọnyị nyam ee. Yẹ mẹẹ, ịnọ m̀ tịtọ kam ka nwụ Ube Ịgọgọ nyọka chị ihi ju Amkpaa Ohe Oluhye nya ala Isirẹlụ.

⁸Ma, Amkpaa tị byim ụka ọhẹ ya am nyị nwụ angịnyị lụmẹ ẹ-ẹpwụ nya iru nya ẹwụ ịlẹ kam nyị da. Lẹẹlẹ, ám̀ nyaa ka nwụ ube họwa ka.

⁹Ọ tị myị ọnụ ham am nyị ka ma ọnyị ọlẹ ká okpunyi nyị ka ji lụka nya adịrahụ oriri nyamwụ, chajị ọwa nyị ka ya okpunyi họọ ẹ-ẹga nya aluji nyamwụ wuu. Ẹnyị nya ọnyị ọọwa nyaa ka ri iSolomọn[15] lẹ. Ọwa nyị ka ya okpunyi bala ịnyọ ọmwụmwụ ha ala Isirẹlụ lụka nyamwụ.

¹⁰Ọnyị ọọwa nyị ka nwụ Ube Ịgọgọ họwa. Nyị ka ri ọnyị nyọwa, ọwa nyị ka ri adamwụ. Anyị ịtụma nyamwụ nyị ka ri ịdịrịhụ pyịyọọ Isirẹlụ.

¹¹“Lẹẹ ọnyị nyam ee, Amkpaa Ohe Oluhye nyang ā juwa tang kọ họnụ ọmyịmyị nyamwụ jịra bwula ọ-dang ụbwọ chajị ká ka nwụ Ube Ịgọgọ họọ mẹ.

¹²Amkpaa Ohe Oluhye nyang ā ya ang ọ-jẹ rige-rige bala ẹla ọjẹjẹ hang chajị ká ka kpẹhị rịrị ala Isirẹlụ jaabwọ ká ehile nyamwụ la ịnyịnyị mẹ.

¹³Ó-ri ká ju ihi nya ehile ịlẹ ká Amkpaa ya ha ala Isirẹlụ bwula iMosisi kpẹẹkpẹẹ aalẹ, à ka nwa kịlahị-ịlahị. Aa ju ugbodu ká godayị giri-giri mẹ. Ā ju uhi nya ịngịngịhyẹ koo.

¹⁴“Ẹla chajị nya Ube Ịgọgọ tị lẹ, m̀ ya egbeju rịrị e-eji chii kpụ m̄ tụ ang-abwọ nyamwụ lụmẹ-lụmẹ guru lẹ. Okpoko igọm wuu la ụnọ ịta da ohu ine (3,400). Okpoko onyoowuru wuu gụ ụnọ iwo ịta da ụnọ ine (34,000). Ọ́ ba ịịwẹ ka, ije ịnyịmịla bala ije ịlam-ịlam ịkịla ịlẹ kị ji eji ju iru kịla ọwawa kịla. Ọ tị baba ká ka ya ang-abwọ haju ịwẹ wẹẹ.

¹⁵Alụkụrwọ jam e-eji yẹẹyẹẹ hang lẹ. Angịhyẹ nyaa ri angị be ajwọ, angịkịla ri angị me ang bala angị ri ikebenta tụ iru nya angị họ ịbańg datị-datị ịlẹ kị họ ang

¹⁶la okpoko ịgọm bala okpoko onyoowuru bala oje ọnyọmịla ije ịkịla. Lẹẹlẹ, dọmwụ nya ụkụrwọ ọwẹ mẹ. amkpaa ā juwa tang mẹ.”

¹⁷IDevidi da alegbeju nya ala Isirẹlụ wuu ehile kị ka yụbwọ ju ụkụrwọ ọọwa ta iSolomọn.

¹⁸Ọ byaa yẹkẹẹ, “Anụ tị́ yẹ-ẹ̀ wẹ lẹ, Amkpaa Ohe Oluhye nyanụ jam tanụ kpụ ọ ya okpunyi hanụ-ụ̀ wẹ dagaga ju wuu lẹ. Ọ họ m̄ kụrụ angịlẹ kị kụ ọpyị ọlẹ ene-ene. Ọlẹẹlẹẹ lẹ, ị ji ekpeleji nya Amkpaa bala anụ angịnyị nyamwụ lẹ.

¹⁹Lẹẹlẹ, anụ gbịgba ha Amkpaa Ohe Oluhye nyanụ lọkịlẹtụ bala ugbodu okpukpuru nyanụ wuu mẹ. Anụ dọmwụ nya Ube Ịgọgọ ọwẹ ọnwụnwụ chajị kanụ ka kpa Akpa nya Iro nya Amkpaa bala ang-abwọ ịkịla ị-kpa gbịgba họọ wẹ ẹpwụ nyamwụ mẹ.”