Read idege 1 EGO OGBEGBE 23 Bible Online

1 EGO OGBEGBE 23 - idege bible

1 EGO OGBEGBE 23

¹Ụka ká iDevidi chị okwirichi kụnyẹ-kụnyẹ lẹ, ọ hu iSolomọn ọnyị nyamwụ ri Adịrahụ nya ala Isirẹlụ lẹlẹ.

²Adịrahụ iDevidi tụ alegbeju nya ala Isirẹlụ wuu tụ angịkiliya bala ala iLivayị wuu gụrụ.

³Ọ wa ala iLivayị ịlẹ kị gu ẹka iwo ịta myị lee o-gu kịlahị nya ọọwa. Iru ojuju nya angịịwa wuu la angị ụnọ iwo ịta da angị ụnọ ineku (38,000).

⁴Ọọwa, ọ chụ angị ụnọ iwo imiiye da angị ụnọ ine (24,000) bwu ẹpwụ nyaa kị ka kpẹhị rịrị ụkụrwọ nya Ube Ịgọgọ ọnwụnwụ lẹlẹ. Ọ chụ angị ụnọ ịrwọnyẹ (6,000) kị ka ri alegbeji bala angịleje.

⁵Angịnyị angị ụnọ ine (4,000) ka ri angịgbeji, angị ụnọ ine ọkịla ka ri angị mwu eje gwogbo ha Amkpaa la ang-abwọ ị-kpa du ayịlọ ịlẹ ká adịrahụ nwụlanọ chajị nya ọọwa.

⁶Ụka ọọwa, iDevidi ga ala iLivayị ebwo ịta jaabwọ ká ogang ịta nya ịGẹẹchọn bala iKohatị bala iMerarị la.

⁷ỊGẹẹchọn ma anyị alẹng imiiye ịlẹ ká ẹnyị nyaa ri ịLadan bala iChimeyi.

⁸ỊLadan ma anyị alẹng ịta ịlẹ ká ẹnyị nyaa ri iJehiyẹlụ bala iSetam bala iJuwẹlụ.

⁹Ịwa angịwẹ à ri alegbeju nya ogang ịlẹ kị ri anyị ịtụma nya ịLadan lẹ. IChimeyi ma anyị ịta ịlẹ ká ẹnyị nyaa ri iChelemotu bala ịHasiyẹlụ bala ịHaran.

¹⁰Anyị alẹng angị ine ịkịla ịlẹ ká iChimeyi ma ri ịJahatị bala iSina bala iJewuchi bala iBeriya.

¹¹ỊJahatị ri ọnyị ọgbahị. ISina bọọba. IJewuchi bala iBeria á ma anyị ju iru ka lẹ, ị waa julawụlẹ nya ogang ookpokpo.

¹²IKohatị ma anyị alẹng angị ine ịlẹ ká ẹnyị nyaa ri Amram bala Isaa bala iHebirọn bala Usiyẹlụ.

¹³Amram kọ ri ọnyị ọgbahị nya iKohatị à ri adịda nya Erọn bala iMosisi lẹ. Ị chị ịgọgọ ju Erọn bala anyị ịtụma nyamwụ kịịwa-à ka kpẹhị rịrị ang-abwọ nya Amkpaa pyịyọọ. Ịwa-à ka kịla iya nya ịtangare i-ijata nya Amkpaa bala ọ-ka myị ẹrụ họọ bala ọ-ka wahị kụrụ angịnyị bwula ẹnyị nyamwụ lẹ.

¹⁴Anyị nya iMosisi ọngịnyị nya Ohe Oluhye tị lẹ, ị waa juwa ẹ-ẹpwụ nya ala iLivayị.

¹⁵Anyị ịlẹ ká iMosisi ma la angị imiiye ịlẹ ká ẹnyị nyaa ri ịGẹẹchọm bala Eliyesa.

¹⁶Ọngọ ri olegbeju nya anyị nya ịGẹẹchọm à ri iChebuwẹlụ lẹ.

¹⁷IRehabiya à ri ọnyị olookpokpo ọlẹ ká Eliyesa ma lẹ. IRehabiya ayịdang tị ma anyị ju iru.

¹⁸Ọnyị oheeye nya iKohatị ọlẹ kị wụrụ Isaa à ma iChelomiti ọlẹ kọ ri olegbeju nya ogang nyaa lẹ.

¹⁹Ọnyị ọhata nya iKohatị ọlẹ kị wụrụ iHebirọn ma anyị alẹng angị ine. Ẹnyị nya ọngọgbahị ri iJeriya. Ọnyị oheeye ri Amariya. Ọnyị ọhata ri ịJahasiyẹlụ. Ọnyị ohene ri iJekamiyam.

²⁰Ọnyị ohene nya iKohatị ọlẹ kị wụrụ Usiyẹlụ ma anyị imiiye. Ẹnyị nya Ọngọgbahị ri ịMayịka. Ẹnyị nya ọnyị ọbọọba ri Ichiya.

²¹IMerari ma anyị alẹng angị imiiye ịlẹ ká ẹnyị nyaa ri ịMahali bala iMuchi. ỊMahili ma anyị imiiye ịnyịnyị. Ọngọhẹ nyaa ri Eliyesa, ọngọkịla ri iKichi.

²²Ụka kọ nọ chẹẹ, Eliyesa gbu la ọ-ma ọnyị ọlẹng ọhẹ-lọhẹ ka. Anyị anyang kem ọ ma lẹ. Anyị nya iKichi ọnyịnamwụ à ye anyị ịịwa lẹ.

²³Ọnyị oheeye nya iMerarị ọlẹ kị wụrụ iMuchi ma anyị alẹng angị ịta. Ẹnyị nyaa ri ịMahali bala Edẹẹ bala iJerimotu.

²⁴Angịwẹ à ri anyị ịtụma nya iLivayị jaabwọ kị la ogang-ogang bala ugbiyegu-ugbiyegu nyaa kị da ẹnyị ọngọngọọng nyaa ju wuu lẹlẹ. Ọngọngọọng nya anyị nyamwụ ịlẹ kị gu ẹka iwo imiiye myị lee o-gu gụ ọwẹ la ụpa nya ụkụrwọ ọhẹ ọlẹ kị ga họọ kọ ka họ u-Ube nya Amkpaa.

²⁵Anụ tị́ jẹ lẹ, iDevidi lẹẹ yẹkẹẹ, “Amkpaa Ohe Oluhye nya ala Isirẹlụ nyị họ ká angịnyị nyamwụ nyị hụ lokpunyi lẹ, ọwa ayịdang nyị tị ka kụ iJerusalẹm pyịyọọ lẹ.

²⁶Lẹẹ nyị baba nya ala iLivayị ọ-ka kpa olo nya Ọdụ nya Amkpaa bala ang-abwọ ị-kpa gbịgba jẹ ịnyịnyịịnyị kaka.”

²⁷Jaabwọ ká iDevidi mẹjaa ku ẹkpẹ-ẹkpẹ lẹ, ị kaa da ẹnyị nya ala iLivayị ju nyọka myị ẹrụ ha Ohe Oluhye ụka kị gu ẹka iwo imiiye.

²⁸Ụkụrwọ nyaa ri ọ-ka da angịkiliya anyị ịtụma nya Erọn ubwọ la ẹrụ ọmyịmyị bwula ọkpẹhị rịrị ọdọda bala ebe ịlụwa ọ-ka kpa ang-abwọ nya Amkpaa ịlụwa charị-charị bala ọ-ka họ ụkụrwọ ọkịla ọhẹ-lọhẹ ọlẹ kọ juwa ẹ-ẹpwa nya Ohe Oluhye.

²⁹Ịwa-à kaa kpẹhị ju ịkaa ọlẹ kị ya ha ọhaha ha Ohe Oluhye lẹ. Ị kaa kpẹhị rịrị ọrụ nya ajẹ nya ang-ẹrụ ịlẹ kị kaa ya kịla iya bala ịkama ịlẹ kị ya ang ọ-mịrị ịkaa ju-ka bala ọrụ nya ajẹ nya ang-ẹrụ ịlẹ kị ya ida ju bala ọ-ka me ang ị-kpa kịla iya wuu jaabwọ ká ọnyọnyọọnyị chịla kọ ka lụmẹ kaka ba.

³⁰Ị kaa godayị ị-ịlahị nya Amkpaa juwa mwu eje bala o-gwogbo họọ lụtụrụ bala alobyi ẹnụ myị ẹnụ

³¹bala ụka myị ụka kị ka kịla iya ọ-rụ ila ha Amkpaa Ẹnụ Ọhịnyọ lụkụrwọ bala ọhụhụ nya Ọya Onyeewe bala ọhụhụ ịkịla wuu. Ị danọ jaabwọ ká ala iLivayị ka ju iru kaka ba ẹ-ẹpwụ nya ụkụrwọ nyaa ọwẹ ụka ọnyị myị ọnyị.

³²Ịịwẹ ala iLivayị à họ ụkụrwọ nya ọkpẹhị rịrị Ọdụ nya Amkpa bala Ube Ịgọgọ juwa da aanaa anyị ịtụma nya Erọn kị ri angịkiliya ụbwọ ẹ-ẹpwụ nya ẹrụ ọmyịmyị ha Amkpaa lẹlẹ.