Read idege 1 EGO OGBEGBE 24 Bible Online

1 EGO OGBEGBE 24 - idege bible

1 EGO OGBEGBE 24

¹Ọlẹ ri jaabwọ kị chụ angịkiliya anyị nya Erọn ebwebweebwọ chajị nya ụkụrwọ ọlẹ kị ka họ. Erọn lẹẹ ma anyị alẹng angị ine ịlẹ ká ẹnyị nyaa ri ịNadabụ bala Abihu bala Eliyesa bala Itamaa.

²ỊNadabụ bala Abihu tị lẹẹ gbu ene nya adaa la ọ-ma anyị ene ka. Lẹẹlẹ, Eliyesa bala Itamaa anyịnaa à hi ri angịkiliya kem lẹ.

³ỊSadọkọ kọ ri ọngọhẹ nya anyị ịtụma nya Eliyesa bala Ahimẹlẹkị kọ ri ọnyị ọtụma nya Itamaa da iDevidi ụbwọ lẹ, ị chị anyị ịtụma nya Erọn ebwo jaabwọ ká ụkụrwọ nya ebwo ọnyọnyọọnyị ri lẹlẹ.

⁴Ị ga anyị Ịtụma nya Eliyesa ebwo iwo kụrụ ịrwọnyẹ. Ị ga anyị ịtụma nya Itamaa ebwo ineku. Ị họ ịnyị chajị angị ri alegbeju nya ugbiyegu bwu ẹpwụ nya anyị ịtụma nya Eliyesa ju iru gụ.

⁵Angị ri alegbeju bala angị myị ẹrụ u-ube nya Ohe Oluhye ji ẹpwa nya anyị ịtụma nya Eliyesa bala Itamaa lẹ, ị ga ụkụrwọ ha ebwo ọnyọnyọọnyị nyaa bwula iwo ọdada. Ang odudu kị da iwo ene ri ajị kị ka họ ebwo ọhẹ ri ka.

⁶IChemaya ọnyị nya iNetanẹlụ kọ ri akịraa ọhẹ nya ala iLivayị da ẹnyị nyaa ju ụ-ụpwụ kpẹẹkpẹẹ jaabwọ kị juwa ga ụkụrwọ ha ebwebweebwo. Ị da iwo ju anyị ịtụma nya Eliyesa bala Itamaa hi ụbwọ ha awụlẹ. Adịrahụ bala alegbeju ịtụka yoo bala ịSadọkọ ọngọkiliya bala Ahimẹlẹkị ọnyị nya Abiyata tụ alegbeju nya ugbiyegu nya angịkiliya bala ịnya ala iLivayị wuu hụhụ e-eji ri ibeenu nya ọhọhọ ọọwa.

⁷Jaabwo kị bwu ga ụkụrwọ ha ebwebweebwo nya ugbiyegu jịra i-iwo imiiye kụrụ ine bwula iwo ọdada à lẹẹ lẹ. Iwo ọhọhẹ-họhẹ ọlẹ kị da chụ iJehoyaribu, oheeye chụ iJedaya.

⁸Ọhata chụ ịHarim, ohene chụ iSeyorim.

⁹Ọharụ chụ ịMalụkija, ọharwọnyẹ chụ iMijamin.

¹⁰Ọharwiye chụ ịHakọsị, ọhaneku chụ Abija.

¹¹Ohikichu chụ iJechuwa, okiriwo chụ iChekaniya.

¹²Ọlẹ kọ ri iwo kụrụ ọhọhẹ chụ Eliyachibu, ọlẹ kọ ri iwo kụrụ oheeye chụ ịJakim.

¹³Ọlẹ kọ ri iwo kụrụ ọhata chụ iHupa, ọlẹ kọ ri iwo kụrụ ohene chụ iJechebeyabụ.

¹⁴Ọlẹ kọ ri iwo kụrụ ọharụ chụ iBiliga, ọlẹ kọ ri iwo kụrụ ọharwọnyẹ chụ Imẹẹ.

¹⁵Ọlẹ kọ ri iwo kụrụ ọharwiye chụ iHesii, ọlẹ kọ ri iwo kụrụ ọhaneku chụ ịHapisẹẹsị.

¹⁶Ọlẹ kọ ri iwo kụrụ ohikichu chụ iPetahiya, ọlẹ kọ ri iwo oheeye chụ iJehesikẹlụ.

¹⁷Ọlẹ kọ ri iwo oheeye kụrụ ọhọhẹ chụ ịJakin, ọlẹ kọ ri iwo oheeye kụrụ oheeye chụ ịGamulu.

¹⁸Ọlẹ kọ ri iwo oheeye kụrụ ọhata chụ iDelayịla, ọlẹ kọ ri iwo oheeye kụrụ ohene chụ ịMaasiya.

¹⁹Jaabwọ ká ebwo ọnyọnyọọnyị la kịị họ ụkụrwọ ọlẹ kị ga haa u-Ube Ịgọgọ nya Amkpaa à wẹ lẹ. Ị kaa họ ụkụrwọ nyaa kpẹẹkpẹẹ dịrẹ ọgụ ọlẹ ká Erọn adaa ogogo ya neeji haa jaabwọ ká Amkpaa Ohe Oluhye nya ala Isirẹlụ dọọ ehile.

²⁰Angịkịla ịlẹ ri alegbeju nya ugbiyegu nya anyị ịtụma nya Livayị ịnyịnyị.

²¹Ọngọ ri olegbeju bwu ẹpwụ nya anyị ịtụma nya iRehabiya ri Ichiya.

²²Ọngọ ri olegbeju bwu ẹpwụ nya anyị ịtụma nya Isaa ri iChelemotu. Ọngọ bwu ẹpwụ nya anyị ịtụma nya iChelemotu ri ịJahatị.

²³Ọngọ ri olegbeju ọgbahị bwu ẹpwụ nya anyị ịtụma nya iHebirọn ri iJeriya. Amariya ri olegbeju oheeye bọọba. ịJahasiyẹlụ ri olegbeju ọhata bọọba. IJekamin à ri olegbeju ohene lẹ.

²⁴Olegbeju o-bwu ẹpwụ nya anyị ịtụma nya Usiyẹlụ ri ịMayịka. Ọngọ bwu ẹpwụ nya anyị ịtụma nya ịMayịka ri ịChamii.

²⁵Ọnyịnịna nya ịMayịka ri Ichiya. Olegbeju o-bwu ẹpwụ nya anyị ịtụma nya Ichiya ri ịSẹkaraya.

²⁶Alegbeju i-bwu ẹpwụ nya anyị ịtụma nya iMerarị ri ịMahali bala iMuchi. Ọngọ bwu ẹpwụ nya anyị ịtụma nya ịJaasiya ri iBeno.

²⁷Alegbeju i-bwu ẹpwụ nya anyị ịtụma nya ỊJaasiya ri iBeno bala iChoham bala ịSakuu bala Ibiri.

²⁸Olegbeju o-bwu ẹpwụ nya anyị ịtụma nya ịMahali ri Eliyesa. Eliyesa ayịdang-ńg tị ma ọnyị ọlẹng ka.

²⁹IJeramiili à ri olegbeju o-bwu ẹpwụ nya anyị ịtụma nya iKichi lẹ.

³⁰Alegbeju i-bwu ẹpwụ nya anyị ịtụma nya iMuchi ri ịMahali bala Ẹdẹẹ bala iJeremotu. Ala iLivayị à wẹ wuu jaabwọ kị la ugbiyegu-ugbiyegu nyaa lẹlẹ.

³¹Ị ga ụkụrwọ ha ugbiyegu ọnyọnyọọnyị bwula iwo ọdada la ọ-jẹ ọngọgbahị datị hi ọnjwo ka jaabwọ ká aanaa angịkiliya ịlẹ kị ri anyị ịtụma nya Erọn họ. Adịrahụ iDevidi bala ịSadọkọ bala Ahimẹlẹkị bala alegbeju nya ugbiyegu nya angịkiliya bala ịnya ala iLivayị wuu hụhụ e-eji ri ibeenu nya ọhọhọ ọọwa wuu.