Read idege 1 EGO OGBEGBE 26 Bible Online

1 EGO OGBEGBE 26 - idege bible

1 EGO OGBEGBE 26

¹Jaabwọ kị ga ụkụrwọ ha ala iLivayị ịlẹ kị ka gbe ọnang ebwebweebwo à lee lẹ. IMechelmaya ọnyị nya iKore bwu ugbiyegu nya Asafụ à bwu ogang nya iKora lẹ.

²IMechelemaya ma anyị alẹng irwiye ịlẹ ká ẹnyị nyaa jaabwọ kị la ọgbahị-ọgbahị ri ịSẹkaraya bala iJediyẹlụ bala iSebadiya bala iJatịnẹlụ

³bala Elam bala iJehohanan bala Eliyehonayị.

⁴Obẹdị-ẹdọm juwa ịnyịnyị kọ ma anyị alẹng ineku ịlẹ ká ẹnyị nyaa ri iChemaya bala iJehosabadị bala iJowa bala ịSakaa bala iNetanẹlụ

⁵bala Amiyẹlụ bala Isakaa bala ịPẹwụlẹtayị. Ohe Oluhye wahị kụrụ Obẹdị-ẹdọm.

⁶IChemaya ọnyị ọgbahị nya Obẹdị-ẹdọm ma anyị alẹng ịlẹ kị ri ịbagọ alihi ogang nyaa.

⁷Ẹnyị nyaa ri Otini bala iRefẹlụ bala Obẹdị bala Elisabadị. Elihu bala iSemakiya aanaa ri angị jẹ ang họ ịnyịnyị.

⁸Anyị ịtụma nya Obẹdị-ẹdọm wuu ịlẹ kị ri angị jẹ ang yẹẹyẹẹ pwoku ụkụrwọ ọwẹ kị ya haa la angị iwo ịrwọnyẹ kụrụ imiiye (62).

⁹Alugbiyegu nya iMechelemaya ịlẹ wuu kị jẹ ang pwoku ụkụrwọ ọhọhọ ịnyịnyị la angị iwo kụrụ ineku.

¹⁰IHosa kọ bwu ogang nya iMerarị ma anyị alẹng angị ine. Ẹnyị nyaa ri iChimri ká adamwụ hu nya olegbeju ịnọ kọọwa-à tị ri ọnyị ọgbahị ka

¹¹bala iHilikaya bala iTebaliya bala ịSẹkaraya. Angị iwo kụrụ ịta ị go bwu ugbiyegu nya iHosa nyọka ri angị gbe ọnang nya Ube nya Amkpaa lẹ.

¹²Ị ga angịgbeji ịwẹ ebwebweebwọ jaabwọ ká ugbiyegu nyaa la, ị tị gaa ụkụrwọ ọlẹ kị ka họ u-Ube nya Amkpaa ịnyịnyị jaabwọ kị ga ha ala iLivayị aanaa ịkịla.

¹³Bwula iwo ọdada, ị kpa jẹ ọnang ọlọlọọlẹ ká alugbiyegu ọnyọnyọọnyị ka kpẹhị rịrị lẹ. Iiru ojuju lee ịkpa ọlẹ kị ri ị kpa jẹ ka.

¹⁴Iwo chụ iChelemaya nyọka gbe ọnang ọlọmwẹnụ-ụtụrụ. Iwo chụ ịSẹkaraya ọnyị nyamwụ ọlẹ kọọ ju angịnyị irya ọnyịịla nyọka gbe ọnang ọlẹtẹ.

¹⁵Iwo chụ Obẹdị-ẹdọm nyọka gbe ọnang oledii. Ị ya ụkụrwọ nyọka kpẹhị rịrị ube ọ-ya ang guru ju anyị nyamwụ ụ-ụbwọ.

¹⁶Iwo chụ iChupim bala iHosa nyọka gbe ọnang ọlọmwẹnụ-obyi bala ọnang nya ịChalaketi ọlẹ kọ ji ụgbẹyị oluhye. Angịgbeji ịwẹ kaa họ ụkụrwọ ụkụkụụka hi ụbwọ ha awụlẹ.

¹⁷Ahyẹẹnụ ọnyị myị ọnyị angịgbeji kaa la angị ịrwọnyẹ kụ ọ-ọnang ọlọmwẹnụ-ụtụrụ. Ịị la angị ine kụ ọnang ọlẹtẹ. Ịị la angị ine o-oledii ịnyịnyị. Ị kaa la angị imiiye gbe ube ọ-ya ang guru ọnyọnyọọnyị.

¹⁸Angị imiiye kaa gbe ọdọda ọlọmwẹnụ-obyi, angị ine kaa kụ ụgbẹyị ọ-ba ụwa ba.

¹⁹Ịwẹ à ri ụkụrwọ nya eji ogbegbe ịlẹ kị ga ha alogang nya iKora bala alogang nya iMerarị lẹ.

²⁰Ahija-à ri ọngọ kpa ala iLivayị ịkịla kụ ịlahị nyọka kpẹhị rịrị ẹga ọ-ya okpoko ju olube ịgọgọ bala ube ọ-ya ang-ahị ịlẹ kị ya ha Ohe Oluhye guru lẹ.

²¹ỊLadan ologang nya ịGẹẹchọn ri adịda nya iJehiyẹlụ bala alugbiyegu ịkịla datị-datị.

²²ISetam bala iJuwẹlụ kị ri anyị alẹng imiiye ịkịla nya iJehiyẹlụ à kpẹhị rịrị ẹga nya okpoko bala ẹga ị-ya ang guru ịlube ịgọgọ lẹ.

²³Ị ya ụkụrwọ ha anyị ịtụma Amram bala Isiha bala iHebirọn bala Usiyẹlụ ịnyịnyị.

²⁴IChebuwẹlụ kọ ri ọnyị ọtụma nya ịGẹẹchọm ọnyị nya iMosisi à ri olegbeju ọgbahị wuu nya ẹga ọ-ya okpoko ju olube ịgọgọ lẹ.

²⁵Aanamwụ ịkịla ịlẹ kị ri anyị nya Eliyesa ọnyị nya ịGẹẹchọm ọnyịnamwụ ri iRehabiya kọ ri adịda nya iJechaya. IJechaya ma iJoram. IJoram ma iSikiri ọlẹ kọ ri adịda nya iChelomiti.

²⁶IChelomiti bala aanamwụ ri angị kpẹhị rịrị ang-ahị ịlẹ wuu ká iDevidi Adịrahụ bala alegbeju nya ugbiyegu datị-datị bala alegbeju nya ogang bala alegbeju nya angịdẹwụ ya ha Ohe Oluhye.

²⁷Angịwẹ ka yile ang ịlahịchịng bwu ẹpwụ nya ang-ẹwụ ịlẹ kị wụwụ kpa nyà kaka ha ọhaha nyọka kpa họ ụkụrwọ u-Ube nya Amkpaa.

²⁸IChelomiti bala aanamwụ kpẹhị rịrị ang myị ang ịlẹ kị ya ha nyọka kpa họ ụkụrwọ u-Ube nya Amkpaa. Ang-ahị ịlẹ wuu ká ịSamwẹlụ ọlọmwụ bala ịSọlụ Adịrahụ ọnyị nya iKichi bala Abụnẹẹ ọnyị nya ịNẹẹ bala iJowabụ ọnyị nya iSeruya ya ha ri ịlẹ kị ka kpẹhị rịrị ịnyịnyị.

²⁹Bwu ogang nya Isihaa, ị chụ iChenaniya bala anyị nyamwụ nyọka ri alegbeju nya igomenti. Ị ri angị ka da apwụ ju bala ọ-ka leje u-uhye nya owolawụlẹ-ka ọhẹ-lọhẹ kọ ji Isirẹlụ.

³⁰Bwu ogang nya iHebirọn, ị chụ ịHachabiya bala aanamwụ alẹng angị ụnọ ookpokpo da ohu irwiye (1,700) nyọka kpẹhị rịrị ụkụrwọ nya Amkpaa bala ụkụrwọ nya igomenti ọ-ọpyị nya Isirẹlụ okoye nya ọmwẹnụ-obyi nya Ihu ịJọdan.

³¹IJeriya-à ri olegbeju o-bwu ogang nya iHebirọn lẹ. Ụka ká iDevidi ri adịrahụ kọ gu ẹka iwo ine, ị wụla apwụ nya ego nya alogang nya iHebirọn yẹ. Ọọwa, ị jẹ nyori aleng ịlọngịrị ịtụka-ịtụka bwu ugbiyegu ịlụwa nyị kụ ẹpwụ juwa ị-ịJasẹẹ ọ-ọpyị nya iGiliyadị lẹlẹ.

³²IDevidi Adịrahụ chụ angị ịgbẹgbịlẹ ẹ-ẹpwụ nya alegbeju nya ugbiyegu angị ụnọ imiiye da angị ohu irwiye (2,700) bwu ẹpwụ nya aanịna nya iJeriya. Ọ yaa ri alegbeju ịkpẹhị rịrị ụkụrwọ nya Ohe Oluhye bala ụkụrwọ nya igomenti ụ-ụwa i-imwawụ nya iRubẹn bala ịGadị bala ịManasẹ Ọlọmwẹnụ-ụtụrụ.