Read idege 1 EGO OGBEGBE 28 Bible Online

1 EGO OGBEGBE 28 - idege bible

1 EGO OGBEGBE 28

¹Ụka ọhẹ, iDevidi Adịrahụ du ẹrụ to alegbeju nya ala Isirẹlụ wuu kị ka wẹ iJerusalẹm. Alegbeju nya alimwawụ wuu bala ịnya ụkụrwọ nya igomenti nya adịrahụ bala alegbeju nya angịdẹwụ ebwebweebwo bala alegbeju nya angịdẹwụ ịkịla tụ alegbeju ịkpẹhị rịrị iyo ileji bala ang ịlẹ ká adịrahụ bala anyị alẹng nyamwụ la bala alụkụrwọ ịlẹpwa nya adịrahụ bala angị ri ịbagọ bala angịdẹwụ ị-kụ ịlahị wuu wẹ kaka jịra i-iJerusalẹm.

²Ọọwa, iDevidi à godayị ị-ịlahị nyaa lẹ, ọbyaa yẹkẹẹ, “Anụ anyịnam bala angịnyị nyam ee, anụ ya ụrụ ham wẹẹ. Ịnọ m̀ me irya nyọka nwụ ube ọlẹ ká Akpa nya Iro, ẹga ọ-ya ẹta rịrị nya Amkpaa Ohe Oluhye nyahị ka rịrị. M̀ nwụla ang ịlẹ kị baba nyọka kpa nwọọ nọ wuu.

³Ohe Oluhye tị byim yẹkẹẹ, ‘Á ka nwụ ẹpwa nyọka chị ihi jum ka, chajị à ri ọngọdẹwụ ọle ká chị ịwọ nya angịnyị lụmẹ-lụmẹ cheji ẹ-ẹwụ.’

⁴“Amkpaa Ohe Oluhye nya ala Isirẹlụ chụm bwu ẹpwụ nya alugbiyegu nya adam wuu nyọka ri adịrahụ nya ala Isirẹlụ. Ọ chụ imwawụ nya iJuda nyọka ri olegbeju. Bwu imwawụ nya iJuda ọọwa ọ chụ ugbiyegu nya adam lẹ. Ọọwa, ọ ri irya nyamwụ du kọ bá pyee wẹ ugbiyegu nya adam kaka chụm bwu ẹpwụ nya anyị alẹng nya adam wuu nyọka ri adịrahụ nya ala Isirẹlụ wuu lẹ.

⁵Ọ ya anyị alẹng lụmẹ-lụmẹ ham. Bwu ẹpwụ nyaa wuu ọ chụ iSolomọn nyọka kpẹhị rịrị Isirẹlụ kọ ri ọpyị nya Amkpaa.

⁶“Amkpaa byim yẹkẹẹ, ‘ISolomọn ọnyị nyang à ka nwụ Ube Ịgọgọ nyam lẹ, chajị m̀ chwọọ nya ọnyị nyam. M̀ tị ka ri adamwụ.

⁷Ó-ri kọ kịnyaa juwa ju ihi nya ehile bala ọmẹjẹ nyam jaabwọ kọ wẹẹ họ lẹẹlẹẹ aalẹ, m̀ ka họ ká ọpyị-adịrahụ nyamwụ ka godayị giri-giri gbe oyi myị oyi.’

⁸“Lẹẹlẹ, anụ angịnyị nyam, ịlahị nya Ohe Oluhye nyahị bala aluche nya ala Isirẹlụ angịnyị nya Amkpaa a lẹlẹ. Anụ-ụ̀ ba ehile ọnyị myị ọnyị nya Amkpaa Ohe Oluhye nyahị jẹ kpẹẹkpẹẹ, chajị kanụ ka kịnyaa juwa ri angị la ọpyị ọnyịịla ọlẹ lụbwọ-lẹta kanụ ka yọọ ụbwọ ha anyị ịtụma nyanụ ịnyịnyịịnyị pyịyọọ mẹ.”

⁹Ọọwa, ọ byi iSolomọn yẹkẹẹ, “Ọnyị nyam ee, aa jẹ Ohe Oluhye nyam am adang, ká myị ẹrụ họọ lọkịlẹtụ bala irya ookpokpo mẹ. Ọ jẹ irya bala obyi omeme ọlọkịlẹtụ nya angịnyị wuu. Ó-ri ká tịtọ nyamwụ, à ka yọọ. Á tị gu ahị gboo hyoo aalẹ, ọ ka nyẹẹkpẹ dang gbe oyi myị oyi.

¹⁰Aa jẹ mẹ, Amkpaa chụng ká ka nwụ Ụbe Ịgọgọ nyamwụ lẹ. Aa ju ugbodu, ká họ ụkụrwọ ọwẹ lọkịlẹtụ nyang wuu mẹ.”

¹¹IDevidi hu ihwoto ọlẹ kọ chabwọ jaabwọ ká Ube Ịgọgọ ka la tụ ebe ị-ya ang guru bala ebe iluhye bala ebe ịlẹpwụ bala Ẹga Ọlịgọgọ Ọgụgụ ọlẹ kọ ri ẹga nya ịhọbịrị ọhịnyọhi lẹ, ọ ya ha iSolomọn lẹlẹ.

¹²Ọ ya ihwoto ọlẹ kọ chabwọ jaabwọ ká irya nyamwụ ri chajị nya ọdọda nya ube ịgọgọ bala ẹga ị-ya okpoko ju bala ẹga ọ-ya ang-ahị ịlẹ kị ya ha Amkpaa guru họọ ịnyịnyị.

¹³Ọ ya joo jaabwo ká angịkiliya bala ala iLivayị ka la ebwebweebwo juwa họ ụkụrwọ u-Ube nya Amkpaa bala ọ-ka kpẹhị rịrị ang-abwọ ị-kpa họ ụkụrwọ ịlụwa.

¹⁴Ọ ya joo jaabwọ ka okpoko onyoowuru bala okpoko ịgọm-ịgọm ịlẹ kị ka kpa họ ang-abwọ ka lụmẹ kaka ba.

¹⁵Ọ ya joo jaabwọ ká okpoko ịgọm ọlẹ kị ka kpa họ otinika ọnyọnyọọnyị bala ang ọ-ya itinika rịrị ka lụmẹ kaka ba bala jaabwọ ká okpoko onyoowuru ọlẹ kị ka kpa họ otinika ọnyọnyọọnyị bala ang ọ-ya itinika rịrị ka lụmẹ kaka ba.

¹⁶Ọ hunọ jaabwọ ká okpoko ịgọm ọlẹ kị ka kpa họ iteburu nya ịkaa ọlịgọgọ ka lụmẹ kaka ba bala jaabwọ ká okpoko onyoowuru ọlẹ kị ka kpa họ iteburu ịkịla ka lụmẹ kaka ba.

¹⁷Ọ ya ịnyịnyị jaabwọ ká okpoko ịgọm ọlẹ kị ka kpa họ ajangga bala ịja bala ịta nya enyi ka lụmẹ kaka ba bala jaabwọ ká okpoko onyoowuru ọlẹ kị ka kpa họ ẹja ọnyọnyọọnyị ka lụmẹ kaka ba.

¹⁸Ọ hunọ ịnyịnyị jaabwọ ka okpoko ịgom ọlẹ kị ka kpa họ ogidi nya iya nya ịtangare ka lụmẹ kaka ba bala ọlẹ kị ka kpa họ alegu-icherubu nya okpoko ịgọm ịlẹ kị pyẹ achwọ ke uhye nya Akpa nya Iro nya Amkpaa.

¹⁹IDevidi Adịrahụ byi iSolomọn yẹkẹẹ, “Abwọ ọchịchị nya ang ịwẹ wuu la jaabwọ ká Amkpaa lịlọmwụ daju mẹjẹm chajị nya ọhọhọ nyaa.”

²⁰IDevidi Adịrahụ byi iSolomọn ọnyị nyamwụ yẹkẹẹ, “Aa ju ugbodu ká godayị giri-giri, ká họ ụkụrwọ ọwẹ mẹ. Ā ju uhi lee ọ-la ọkịlẹtụ ọ-kpụ enyi ka. Amkpaa Ohe Oluhye ọlẹ kọ ri Ohe Oluhye nyam ka juwa tang. Ọ́ ka nyẹẹkpẹ dang ka. Ọ ka juwa tang gbee ká ka họ ụkụrwọ ọnyị myị ọnyị oluhye nya Ube nya Amkpaa cheju.

²¹Angịkiliya bala ala iLivayị la ebwo nya ụkụrwọ datị-datị kị ka họ u-Ube nya Amkpaa. Angị jẹ ịbańg lee ụkụrwọ nya ụbwọ datị-datị ka chụ ịlaa nyọka họ ụkụrwọ. Alụma wuu bala alegbeju nyaa-à wẹ kị ka họ ang myị ang ọlẹ ká byaa lẹ.”