Read idege 1 EGO OGBEGBE 29 Bible Online

1 EGO OGBEGBE 29 - idege bible

1 EGO OGBEGBE 29

¹Ọọwa, iDevidi Adịrahụ à jahị kpata da alụma wuu lẹ, ọ byaa yẹkẹẹ, “ISolomọn ọnyị nyam ọlẹ ká Ohe Oluhye chụ nyọka nwụ ube ịgọgọ lẹẹ, ọ ri onjwo wẹẹ, ọ́ jẹ ẹlẹlẹhẹ lẹka. Ụkụrwọ ọlẹ tị ri ụkụrwọ ọtụka, chajị ẹẹpwa nya ongịnyi ehe ọ wẹẹ ka nwụ ka, ịnya Amkpaa Ohe Oluhye ịnyị.

²M̀ ma uya jẹkpẹ da jahị da kpụ m̄ nwụla ang-abwọ ị-kpa nwụ Ube nya Amkpaa nọ lẹ. Ọlẹẹlẹẹ lẹ, okpoko ịgọm bala okpoko onyoowuru bala oje ọnyọmịla bala oje bala ekeji bala ajwọ ịnyịịla-ịnyịịla nya onikisi bala ịkịla ị-kpa chị ang ịna bala ajwọ i-ju ido datị-datị wuu jam nwa ụga lẹ.

³Ọ-dang ịwẹ kam nwụlanọ-ọ̀ wẹ u-uhye, m̀ hu okpoko onyoowuru bala okpoko ịgọm nya ịlọm ha kpịlọ ajị nya ọháha ọlẹ kam la ẹ-ẹga nya ube ịgọgọ nya Ohe Oluhye.

⁴M̀ ya okpoko ịgọm ọlahịchịng ụnọ ịta (3,000) bala okpoko onyoowuru ụnọ irwiye (7,000) ha kị ka ya kpụ kụrụ ugulọ nya Ube nya Amkpaa

⁵bala chajị nya ụkụrwọ datị-datị ịlẹ ká alịbańg ka kpa okpoko ịgọm bala okpoko onyoowuru họ. Lẹẹlẹ, oowo à tị́ jam kọ ka hụ ọhaha mwọrị-mwọrị ha Amkpaa?”

⁶Ọọwa, alegbeju nya ogang bala ịnya imwawụ bala alegbeju nya angịdẹwụ ebwebweebwo bala alegbeju nya ụkụrwọ nya adịrahụ à myị ọnụ nyọka hu ha lẹlẹ.

⁷Ang ịlẹ ká angịwẹ hu ha chajị nya ụkụrwọ nya Ube nya Amkpaa ri okpoko ịgọm ụnọ ịrụ bala iku nya okpoko ịgọm ụnọ iwo bala okpoko onyoowuru ụnọ iwo bala oje ọnyọmịla ụnọ ineku bala ụnọ ohu ookpokpo (100,000) nya ije.

⁸Angịlẹ wuu kị la ajwọ ịnyịịla-ịnyịịla juwa gyaa ha ka ẹga ọ-ya okpoko ju olube ịgọgọ ọlẹ ká iJehiyẹlụ ọla ịGẹẹchọn kaa kpẹhị rịrị.

⁹Angịnyị hu ha Amkpaa lọkịlẹtụ ookpokpo lẹ, ị chị ọkẹkẹnị nyọlẹ ká angịnyị hu ha lụmẹ-lụmẹ ịnyị. IDevidi Adịrahụ chị ọkẹkẹnị lụmẹ ịnyịnyị.

¹⁰IDevidi gwogbo ha Amkpaa ị-ịlahị nya aluche yẹkẹẹ, “Ogbo ogwogwo ā juwa hang ahụ Amkpaa Ohe Oluhye nya iJekọbụ adahị ogogo! Ogbo ā juwa hang gbe oyi myị oyi!

¹¹À la ụmụmẹ bala ọngịrị bala ogbo, à la ọkụrụ-kụrụ, à kpẹ̀hị. Ahụ à la ang myị ang iluhye-ọgba bala ilodehe wuu lẹ, Amkpaa ee, ahụ à ri adịrahụ lẹ, ahị hung hwaa lala olegbeju nya odehe wuu.

¹²Ụdụ ọkpụkpụ bala ihi ọlala bwu ẹga nyang, À ri olegbeju nya ang wuu bwula ọngịrị bala ụmụmẹ nyang, ahụ à kaa ya ọngịrị bala ụmụmẹ ha ọngịnyị myị lẹ.

¹³Ohe Oluhye nyahị ee, ahị jing obe, ahị gwogbo ha ẹnyị ọlụmụmẹ nyang.

¹⁴“Ịyẹ am bala angịnyị nyam à tị́ jụ họ nyọlẹ kahị hu ọhaha ịlẹ hang-ǹg? Bwu ẹga nyang āhị-ị̀ ye ang myị ang lẹ. Lẹẹlẹ ang-ang ịlẹ kị ri nyang lụbwọ-lẹta āhị kpa tịrẹkpẹ wang-ǹg wẹ lẹ.

¹⁵À tị́ jẹ lẹ, ahị lala angị chịpwụrụ bala angga ị-ịlahị nyang jaabwọ ká adahị igogo la. Ẹnụtụrụ nyahị lala ụrụrụ ọlẹ kọ ka chịpwụrụ, myị yịra-yịra.

¹⁶Amkpaa Ohe Oluhye nyahị ee, iru nya ang ịlẹ kahị hu ha chajị kị ka ya nwụ ube ịgọgọ ọ-chị ihi ju ẹnyị nyang lẹẹ bwu ẹga nyang. Ịnyang-ịnyang ị tị ri lẹ.

¹⁷Ohe Oluhye nyam ee, m̀ jẹ ká jẹ ẹla ọlọkịlẹtụ nya ọng myị ọng. Ẹla nya angị la ọkịlẹtụ ọkpakpa-à kaa hang lẹ. Am lẹ, m̀ hu ang ịlẹ wuu hang lọkịlẹtụ ọgbagbịla bala ẹla nya ịlẹhị lẹ. M̀ yẹ jaabwọ ká angịnyị nyang hu ha lọkịlẹtụ ookpokpo bala ọkẹkẹnị.

¹⁸Amkpaa Ohe Oluhye nya adahị igogo Ebiraham bala Ayịsiki bala iJekọbụ ee, họ ká angịnyị nyang ā la ọ-hụjeje nyọka ju ihi nyang bala ọ-la kpẹẹkpẹẹ ẹ-ẹga nyang pyịyọọ.

¹⁹Myị ká iSolomọn ọnyị nyam ā kpa ehile bala ọmẹjẹ nyang wuu lọkịlẹtụ ookpokpo bala ọ-ka nwụ ube ịgọgọ ọlẹ kam nwụla ang ịlẹ wuu nọ gbe.”

²⁰Ọọwa, iDevidi à byi alụma wuu yẹkẹẹ, “Anụ gwogbo ha Amkpaa Ohe Oluhye nyanụ mẹ!” Ọọwa, ịwa wuu à gwogbo ha Amkpaa Ohe Oluhye nya adaa igogo anyị lẹ, ị hirikpẹẹ ya arụụ kụ eji chị ihi ju Amkpaa bala adịrahụ lẹlẹ.

²¹Ahị ọpyẹpyẹ ọọnamwụ, ị kịla iya lụmẹ-lụmẹ. Ị ya ịna ụnọ ookpokpo bala imilodo ụnọ ookpokpo bala anyị-ịkpịlọ alẹng ụno ookpokpo kịla iya ọ-rụ ila ha Amkpaa. Ị kịla iya nya ere bala ụma nya iya ịkịla datị-datị wọnụ nya ala Isirẹlụ wuu ju.

²²Ị ri ang bala ọ-nwa ere lọkẹkẹnị ọtụka-ọtụka ijata nya Amkpaa ẹnụ ọọwa. Ị ya iSolomọn dodehe myịmyị ugbabwọ oheeye lala adịrahụ nyaa. Ị chụ ịSadọkọ nyọka ri ọngọkiliya lẹlẹ.

²³Ọọwa, iSolomọn a ri adịrahụ ku ọmwakpa nya iDevidi adamwụ hụhụ ẹ-ẹchị nya adịrahụ ọlẹ ka Amkpaa ya họọ lẹlẹ. Ụkụrwọ nyamwụ kịlahị hiigu-hiigu, ala Isirẹlụ wuu ju ihi nyamwụ.

²⁴Alegbeju ịlẹpwa nya adịrahụ bala alegbeju nya angịdẹwụ wuu tụ anyị alẹng ịkịla nya iDevidi wuu myị ọnụ nyọka hiri ịlaa kpẹẹ họọ.

²⁵Amkpaa hu iSolomọn hwaa du ka ala Isirẹlụ wuu ya ihi họọ. Ọ họ ká iSolomọn ri adịrahụ ọlẹ kọ kpẹ̀hị gụ adịrahụ ọkịla ọhẹ-lọhẹ ọlẹ ká ala Isirẹlụ la ene nyamwụ.

²⁶IDevidi ọnyị nya iJesi ri adịrahụ nya ala Isirẹlụ wuu

²⁷jịra ẹẹka iwo ine gbẹgbịlẹ. Ọ hụ i-iHebirọn ri adịrahụ ẹka irwiye ene kọ-ọ̀ hụ i-iJerusalẹm ẹka iwo ịta kụrụ ịta.

²⁸Ọ gbu ẹ-ẹpwụ nya ụchị ọchịchị. Ọ kpụ ụdụ kpụ, ọ la ihi la. ISolomọn ọnyị nyamwụ à ri adịrahụ kwiwa nyamwụ lẹ.

²⁹Ị da ang ịlẹ kị họ lụka nya adịrahụ oriri nya iDevidi bwu ọmwụ ọdada ka ocheju ju a-apwụ nya Ego nya ịSamwẹlụ Ọlọmwụ bala Ego nya ịNatan Ọlọmwụ bala ịGadị Ọlọmwụ.

³⁰Ego ịịwa ya ẹla rụ adịrahụ oriri bala ọngịrị ọlala bala ang myị ang ịlẹ wuu kị họ tọọ bala ala Isirẹlụ bala alẹpwụma ịlẹ kị dagaga jwaa.