Read idege 1 EGO OGBEGBE 5 Bible Online

1 EGO OGBEGBE 5 - idege bible

1 EGO OGBEGBE 5

¹IRubẹn à ri ọnyị ọgbahị nya iJekọbụ lẹ. Ajị nyọlẹ kọ doru kịla ahụ-ọnchẹ nya adamwụ ọhẹ lẹ iwe-ahụrụ nya ọnyị ọlẹng ọgbahị oriri-í hi pwọọ kaka. Ị ya iwẹ-ahụrụ ọọwa ha iJosẹfụ. Ịnyị à du kị da ẹnyị nya iRubẹn ju ego nya ugbiyegu nyaa lala ọnyị ọgbahị ka lẹ.

²À tị́ jẹ lẹ, imwawụ nya iJuda-à la ọngịrị gụ imwawụ ịkịla wuu lẹ. Ụwa ịdịrịhụ nya ala Isirẹlụ à kaa bwu lẹ, iJosẹfụ à tị la iwe-ahụrụ nya ọnyị ọgbahị oriri lẹ.

³IRubẹn ọnyị ọlẹng ọgbahị nya iJekọbụ ma anyị alẹng ine ịlẹ kị wụrụ ịHanoku bala ịPalu bala iHesirọn bala ịKaami.

⁴Anyị alẹng nya iJuwẹlụ ri iChemaya bala ịGọọgụ bala iChimeyi

⁵bala ịMayịka bala iRiyaya bala ịBaalụ

⁶bala iBiyẹra. IBiyẹra ọlẹ à ri olegbeju ọhẹ i-imwawụ nya iRubẹn ọlẹ ká iTigilatị-ịpịlẹsẹẹ Adịrahụ ọtụka nya ala Asiriya wu kpa ka agba lẹ.

⁷Alegbeju nya alogang ịlẹ ri angịlẹ kị da ego nyaa ju lala aanịna nya iBiyẹra ịnyịnyị. Ẹnyị nyaa ri iJeyẹlụ bala ịSẹkaraya

⁸bala iBela ọnyị nya Asasị ọlẹ ká adamwụ ri ịChẹma ọnyị nya iJuwẹlụ. Angịwẹ kụ ọ-ọpyị o-bwu Aroyẹẹ lalaala ka ju ka iNebo bala ịBaalụ-imiyọn.

⁹Ị la ịna ju iru ọ-ọpyị nya iGiliyadị lẹ, ị kụ koye nya ọmwẹnụ-ụtụrụ yahị da ka ugbileji ọlẹ kọ jẹ gbee kaka pwụ Ihu iYufuretisi.

¹⁰Ụka ká ịSọlụ ri adịrahụ, alimwawụ nya iRubẹn dẹwụ kụrụ ala ịHagiriti lẹ, ị ye ọpyị nyaa ọlọmwẹnụ-ụtụrụ nya iGiliyadị la lẹlẹ.

¹¹Alimwawụ nya ịGadị nọ ẹpwa nyaa koye nya ẹtẹ nya ala iRubẹn. Ị kụ bwu ịBachan lalaala ka ju ka ịSaleka.

¹²IJuwẹlụ à ri olegbeju nya ọpyị nya ịBachan lẹ. ỊChafam ri olegbeju bọọba. ỊJanayị bala ịChafatị ri alegbeju ịnyịnyị.

¹³Aanaa ịkịla ri alogang irwiye ịlẹ ká ẹnyị nyaa ri ịMayịkẹlụ bala iMechulam bala ịChẹba bala iJorayị bala ịJakan bala iSiya bala Ẹbẹẹ.

¹⁴Ịwa angịwẹ à ri anyị ịtụma nya Abihẹlụ ọnyị nya iHuri ọlẹ ka adịda igogo nyamwụ ri ịJarowa bala iGiliyadị bala ịMayịkẹlụ bala iJechichayị bala ịJahado bala iBusi

¹⁵bala Ahi ọnyị nya Abidiyẹlụ ọlẹ ka adamwụ ri iGuni kọ ri olegbeju nya ogang nyaa lẹ.

¹⁶Ala ịGadị kụ ọ-ọpyị nya iGiliyadị bala ịBachan tụ epweji ịlụwa bala ọ-tụ ụteeji nya ịCharọn da.

¹⁷Ị da ego nya angịwẹ wuu ju lụka nya adịrahụ oriri nya iJotam adịrahụ nya ala iJuda bala iJerobowam oheeye adịrahụ nya ala Isirẹlụ.

¹⁸Alimwawụ nya iRubẹn bala ịnya ịGadị bala ịnya ịManasẹ Ọlọmwẹnụ-ụtụrụ la angịdẹwụ angị ụnọ iwo ine da ụnọ ine da ohu irwiye da angị iwo ịrwọnyẹ (44,760). Angịịwa ri angị jẹ ẹwụ yẹẹyẹẹ, kaa kpa ọkụmada bala oge bala eda dẹwụ.

¹⁹Ị dẹwụ ta ala ịHagiriti bala alimwawụ nya ịJẹtuu bala ịNafichi bala iNodabụ.

²⁰Ị dahịhile Ohe Oluhye, ị raabwọ bịlẹ ụbwọ ọdada nyamwụ ẹ-ẹpwụ nya ẹwụ ọdada ọọwa. Ohe Oluhye wẹ ọbịlẹ-bịlẹ nyaa bwula ọ-họ kị kụrụ ala ịHagiriti bala alakpa nyaa wuu.

²¹Ị nu aluji nyaa anyịrẹ-ịkamẹlụ ụnọ iwo ịrụ (50,000) bala ịkpịlọ ụnọ ohu imiiye da ụnọ iwo ịrụ (250,000) bala ibyiyó ụnọ imiiye ene kịị go angị ụnọ ohu ookpokpo kpa rụ nya alagba nyaa.

²²Ị nwụ iru nya aluji nya chajị Ohe Oluhye daa ụbwọ. Ọọwa, ị ye ọpyị nyaa kụ gbee da ka ụka kị wu ala Isirẹlụ kpa rụ ka agba lẹlẹ.

²³Alimwawụ nya ịManasẹ Ọlọmwẹnụ-ụtụrụ kụ bwu ọpyị nya ịBachan lalaala ka ju ka ịBaalụ-ịhẹmọm bala iSenii bala Ọgbọdọ nya ịHẹmọm. Ị pyẹ ju iru lụmẹ-lụmẹ.

²⁴Angị ri alegbeju nya alogang nyaa ri Ẹfẹẹ bala Ichi bala Eliyẹlụ bala Asirẹlụ bala iJeremaya bala iHodaviya bala ịJahahẹlụ. Ọngọngọọng nya ri ọngọdẹwụ bala olegbeju ọtụka olehe.

²⁵Ma ị́ tị họ kpẹẹkpẹẹ ẹ-ẹga nya Ohe Oluhye nya adaa igogo ka. Ị nyẹẹkpẹ dọọ kaka kpụ eteji ha ijiga nya alẹpwụma ịlẹ ká Ohe Oluhye ku hi ọpyị nya iKenan.

²⁶Ọọwa, Ohe Oluhye à du iPulu Adịrahụ ọtụka nya ala Asiriya ọlẹ ká ẹnyị ọkịla nya ri iTigilatị-ịpịlẹsẹẹ kaka be ọpyị nya alimwawụ nya iRubẹn bala ịGadị bala ịManasẹ Ọlọmwẹnụ-ụtụrụ ịwẹ ẹpwa lẹlẹ. Ọ go alụwa kpa rụ kaka kụ ị-ịHala bala ịHabọ bala ịHara bala ọ-ọnụ nya Ihu nya iGosan ẹga kị kụ pyịyọọ daalẹ lẹlẹ.