Read idege 2 EGO OGBEGBE 1 Bible Online

2 EGO OGBEGBE 1 - idege bible

2 EGO OGBEGBE 1

¹Ụka ọọwa, iSolomọn ọnyị nya iDevidi Adịrahụ yụbwọ chị ahụrụ nya ọpyị nya Isirẹlụ ọkpakpa giri-giri, chajị Amkpaa Ohe Oluhye nyamwụ juwa tọọ bala ọ-họ kọ la ọngịrị ọtụka-ọtụka.

²Ụka ọhẹ, iSolomọn Adịrahụ byi alegbeju ịkpẹhị rịrị angịdẹwụ ịlẹ kị la ebwo ụnụnụụnọ bala ebwo ohwohwoohu bala alegbeju nya igomenti bala alegbeju nya ogang tụ angịkịla wuu kị ka wẹ kaka jịra.

³Ọọwa, iSolomọn bala alụma wuu à bajẹ kele ka ẹga ọgbịgba ha Amkpaa i-iGibyọn lẹlẹ. Ị ka ụwa, chajị ụwa Ọdụ nya Amkpaa ọlẹ ká iMosisi ọnchẹ nya Amkpaa họ u-ugbileji à ji lẹ.

⁴IDevidi lẹẹ kpa Akpa nya Iro bwu iKiriyatị-ịjarim kaka rịrị ẹ-ẹpwang nya ọdụ ọlẹ kọ nwụlanọ chajị nyamwụ i-iJerusalẹm ene lẹ.

⁵Ogidi nya oje ọnyọmịla ọlẹ ká iBesalẹlụ ọnyị nya Uri ọlẹ ká adamwụ ọgbahị ri iHuu họ juwa i-iGibyọn wẹẹ. Ọ rịrị ị-ịlahị nya Ọdụ nya Amkpaa. Ị-ịlahị nyamwụ iSolomọn bala alụma wuu à godayị nyọka gbịgba ha Amkpaa lẹ.

⁶Ị-ịlahị nya Ọdụ nya Amkpaa iSolomọn à kịla iya u-uhye nya ogidi nya oje ọnyọmịla lẹ. Ọ nwụ iyo ụnọ ookpokpo kịla iya ọ-rụ ila ha Amkpaa.

⁷Lodu nya ẹnụ ọọwa, Ohe Oluhye chị ịlọmwụ ehe ha iSolomọn ẹ-ẹpwụ nya ụlaa lẹ, ọ byọọ yẹkẹẹ, “Bịlẹm ang ọlẹ ká tịtọ kam ka họ hang mẹ.”

⁸Ọọwa, iSolomọn a yẹkẹẹ, “À mẹ ọháha ọlala nyang jẹ iDevidi adam. Ọọwa, ā họ m̄ hụhụ lẹẹ ri adịrahụ ku ọmwakpa nyamwụ lẹ.

⁹Amkpaa Ohe Oluhye nyam ee, aa họ ọnụ ọlẹ ká myị ha adam jịra, chajị à họ m̄ ri adịrahụ nya iru nya angịnyị ịlẹ kị kịla ọwawa kịla lẹẹ lẹ!

¹⁰Lẹẹlẹ, ya ẹla ọjẹjẹ bala ang ọjẹjẹ ham, chajị kam ka jẹ-ẹ̀ kpẹhị rịrị iru nya angịnyị nyang ịlẹ yẹẹyẹẹ mẹ.”

¹¹Ọọwa, Ohe Oluhye à byoo yẹkẹẹ, “Ajị nyọlẹ ká bịlẹ ẹla ọjẹjẹ ọ-kpa kpẹhị rịrị angịnyị nyam, ká bịlẹ ụdụ ọkpụkpụ lee ihi ọlala ha ịlọng lee ọ-raabwọ ká aluji nyang ka gbu lee ehe oriri nya ịlọng ka lẹ,

¹²m̀ ka ya ẹla ọjẹjẹ bala ang ọjẹjẹ hang. M̀ ka ya ụdụ ọkpụkpụ bala ihi ọlala bala ehe ọlala hang ịlẹ kị gụ ịnya adịrahụ ọhẹ-lọhẹ ọlẹ kọ jene nyang lee ọlẹ kọ ka wẹ ẹ-ẹkpẹ nyang.”

¹³Ọọwa, iSolomọn à nyà wẹ iJerusalẹm bwu ẹga nya Ọdụ nya Amkpaa ọla iGibyọn lẹ, ọ hụhụ ri adịrahụ nya Isirẹlụ lẹlẹ.

¹⁴ISolomọn la iru nya angịdẹwụ. Ang ịrụnyẹ ị-kpa dẹwụ nyamwụ la ụnọ da ohu ine (1,400). Anyịre nyamwụ la ụnọ iwo kụrụ imiiye (12,000). Ọ ya ịhyẹ nyaa kụ e-epweji ịlẹ kịị ya ang ịrụnye guru. Ọ ya ịkịla kụ i-iJerusalẹm ba ịlọmwụ ba.

¹⁵Ụka nya adịrahụ oriri nyamwụ, okpoko onyoowuru bala okpoko ịgom dịda lala ajwọ i-iJerusalẹm. Ekeji nya isida ju iru lala ekeji nya isikamọ.

¹⁶Angị da ọhị ha ịSolomọn Adịrahụ kaa ra anyịrẹ nyamwụ bwu iMusuri bala iSilisiya.

¹⁷Ị kaa ra ang ịrụnyẹ bwu Ijipiti. Ị ka ya ha anyịrẹ bala ang ịrụnyẹ ha ịdịrịhụ nya ala iHiiti bala ịnya ala iSiriya ra. Ị kaa ya ang ọrụnyẹ ookpokpo ra okpoko ohu ịrwọnyẹ (600). Ụnyịrẹ ookpokpo kaa ri okpoko onyoowuru ohu da iwo ịrụ (150).