Read idege 2 EGO OGBEGBE 10 Bible Online

2 EGO OGBEGBE 10 - idege bible

2 EGO OGBEGBE 10

¹Ụka ọhẹ, iRehobowam kele ka iChekem ẹga ká ala Isirẹlụ wuu tụ gụrụ chajị kị ka hwọọ adịrahụ.

²Ụka ká iJerobowam ọnyị nya iNebatị ọlẹ kọ rụnyẹ rụ kaka kpịbaa Ijipiti hi iSolomọn Adịrahụ wo ẹlẹwẹ lẹ, ọ nyà tịrẹkpẹ bwu ụwa lẹlẹ.

³Alimwawụ ịlẹtẹ du ẹrụ ta iJerobowam lẹ, ị bajẹ lawụlẹ wuu ka ẹga nya iRehobowam lẹ, ị byoo yẹkẹẹ,

⁴“Adang iSolomọn ya olo olilo ọtụka-ọtụka chụụhi. Ọ́ tị ri ká ka chụ olo olilo ọọwa hị aalẹ, ahị ka myị ẹrụ hang.”

⁵IRehobowam waa yẹkẹẹ, “Anụ ya ẹnụtụrụ ịta da ham chajị kam kụ irya ju ẹlẹwẹ ene kanụ ka tịrẹkpẹ mẹ.” Ụka ọọwa, angịnyị wuu a rụ ka ẹpwa nyaa lẹlẹ.

⁶IRehobowam Adịrahụ hu ẹkpẹ bala angịgbahị ịlẹ kị kaa ju iSolomọn adamwụ irya lụka nyamwụ. Ọ taa wo yẹkẹẹ, “Anyị à tị pwọku kam ka wẹ angịlẹ-ẹ̀?”

⁷Ị wẹ byoo yẹkẹẹ, “Ó-ri ká haa ọnahị, myị ọnụ nyọka họ jaabwọ kị bịlẹ, ká waa ẹla lụgbẹyị ọ-kpụ nẹnẹ aalẹ, ị ka myị ẹrụ hang pyịyọọ.”

⁸IRehobowam tị nyẹẹkpẹ da irya ọlẹ ká angịgbahị jwoo, rụ kele kaka hu ẹkpẹ bala ikolobya aliko nyamwụ ịlẹ kị nwa lawụlẹ, kị ri angị jwoo irya lụka ọọwa.

⁹Ọ ta wo yẹkẹẹ, “Anyị à tị pwoku kam ka wẹ ẹla nya angịlẹ kịị wẹẹ ya am nyị chụ olo nyịwa hi-ì?”

¹⁰Anjwo ikolobya ịịwa wọọ yẹkẹẹ, “Ịịlẹ ā ka byaa lẹ: ‘Ánụ yẹ ọhẹ yẹ lẹka. Ánụ jẹ ka aalẹ, ụkụchụ ọhịnyẹnyẹ nyam ọlẹ hye kpụrụcha gụ ọhị nya adam wẹẹ.

¹¹Ịnyịlẹhị lẹ, adam ya olo olilo nịrọọnụ. M̀ ka ya ọ-gụ ịnyamwụ gụ nịrọọnụ. Ugboji ọlam-ọlam ọ kpa nyiinu lẹ, ọgbẹ nya ụnyịrẹ m̄ tị ka kpa nyiinu lẹ!’ ”

¹²Ẹnụtụrụ ọhata ẹ-ẹkpẹ nya ọọwa lẹ, iJerobowam bala angịnyị wuu a tịrẹkpẹ wẹ ẹga nya iRehobowam jaabwọ kọ byaa lẹlẹ.

¹³Adịrahụ pwa ọmẹjẹ nya angịgbahị deeji, juwa wẹ angịnyị ẹla pwaapwaa

¹⁴jaabwọ ká ikolobya jwoo irya. Ọ byaa yẹkẹẹ, “Ịnyịlẹhị lẹ, adam ya olo olilo nịrọọnụ. M̀ tị ka ya ọ-gụ ịnyamwụ gụ nịrọọnụ. Ugboji ọlam-ọlam ọ kpa nyiinu lẹ, ọgbẹ nya ụnyịrẹ m̄ tị ka kpa nyiinu lẹ.”

¹⁵IRehobowam adịrahụ-ụ́ ke ụrụ la ọbịlẹ-bịlẹ nya angịnyị ka. Ọhọhọ nyamwụ ọọwa tị ri irya nya Amkpaa Ohe Oluhye, chajị ọwẹ du ká ẹrụ ọlẹ kọ du Ahija ọlọmwụ ọla iChilo to iJerobowam ọnyị nya iNebatị họ jịra.

¹⁶Ụka ká ala Isirẹlụ wuu yẹ nyori adịrahụ-ụ́ myị ke ụrụ laa kaka lẹ, ịwa wuu à yọnụ dawụlẹ dọọọ juwa yẹkẹẹ, “Anụ ba hi ẹla nya iDevidi bala ugbiyegu nyamwụ mẹ pyíiì! Ẹlẹhẹ-ẹ́ guhi ẹ-ẹpwụ nya ẹla nya ọnyị nya iJesi ọwẹ kaka! Anụ ala Isirẹlụ wuu, anụ kịnyaa ká ọng myị ọng ā rụ ka ẹpwa nya ịlọmwụ mẹ! IRehobowam ā ri adịrahụ nya alugbiyegu nya iDevidi mẹ oo!” Ọọwa, ala Isirẹlụ à bene kpachịka hi awụlẹ rụ ka ẹpwa lẹ,

¹⁷iRehobwam à ri adịrahụ nya ala Isirẹlụ ịlẹ kị kụ oye nya iJuda kem lẹlẹ.

¹⁸Ụka ọọwa, iRehobowam Adịrahụ du Adoniram olegbeju ọ-kpa angịnyị họ ụkụrwọ nya igwabwọ kele nyọka ká ala Isirẹlụ. Ma, ị tị da ajwọ nwọọ kẹhị-kẹhị. Ụka ká iRehobowam wọ ẹlẹwẹ, ọ chị agaga gba kụ ang ọrụnyẹ nyamwụ lẹ, ọ rụnyẹ rụ ka iJerusalẹm lẹlẹ.

¹⁹Bwu ụka ọwẹ pyịyọọ wẹ ịlahị, alọpyị-adịrahụ ọlẹtẹ nya Isirẹlụ kaa la egbeju-ọngịrị ta adịrahụ o-bwu ugbiyegu nya iDevidi.