Read idege 2 EGO OGBEGBE 11 Bible Online

2 EGO OGBEGBE 11 - idege bible

2 EGO OGBEGBE 11

¹Ụka ká iRehobowam nyà tịrẹkpẹ pwụ iJerusalẹm, ọ wụrụ angịdẹwụ ịlahịchịng angị ụnọ ohu da ụnọ iwo ineku (180,000) dala awụlẹ bwu imwawụ nya iJuda bala iBenjamịn. Ọ tịtọ kọ ka kpa ọngịrị tịrị ala Isirẹlụ ẹkpẹ wẹ ẹga nya ịlọmwụ kọ ka ri adịrahụ nyaa.

²Ma, Amkpaa byi iChemaya ọlọmwụ

³nyị byi iRehobowam Adịrahụ bala ala iJuda tụ ala iBenjamịn wuu yẹkẹẹ,

⁴“Ānụ kele kaka mwẹla ta ala Isirẹlụ aananụ koo. Anụ wuu ā rụ tịrẹkpẹ ka ẹpwa mẹ, chajị am Amkpaa-à du ká ang ịwẹ wuu lịnyị lẹ!” Ọọwa, ịwa wuu à ju ẹla nya Amkpaa ihi lẹ, ị hịnyọ la o-kele kaka mwẹla ta iJerobowam lẹlẹ.

⁵Ụka ọọwa, iRehobowam kụ i-iJerusalẹm. Ọ me egwalọ dagaga ju epweji datị-datị ịla iJuda bala iBenjamịn nyọka chẹwụ ke ọpyị nyamwụ. Epweji ịịwa ri

⁶ịBẹtịlẹhẹm bala Etam bala iTekowa

⁷bala ịBẹtị-isuu bala iSoko bala Adulam

⁸bala ịGaatị bala ịMarẹcha bala iSifu

⁹bala Adorayim bala ịLakichi bala Aseka

¹⁰bala iSora bala Ayịjalọn bala iHebirọn.

¹¹Ụka ọlẹ kọ me egwalọ ịnyịịngịrị ju epweji ịwẹ kpá ọ hu olegbeju nya angịdẹwụ kpẹhị rịrị ọnyọnyọọnyị nyaa bala ọ-ya ang oriri bala ida nya olivu bala ere myị̀ ebe ị-ya ang guru ịlụwa.

¹²Ọ ya akụmada bala awangga guru e-epweji ọnyị myị ọnyị wuu. Ịịwẹ iRehobowam à bwu wu epweji ịla iJuda bala iBenjamịn kpa lọngịrị nyamwụ lẹlẹ.

¹³Angịkiliya bala ala iLivayị ibwam-bwale nya Isirẹlụ wuu tị wẹ kaka tụ ugu ju iRehobowam Adịrahụ.

¹⁴Ala iLivayị tụụbwọ hi ịpyị ị-kpa iyo ileji ri bala ịpyị nyaa ịkịla lẹ, ị mwụ ka iJuda bala iJerusalẹm lẹlẹ. Ang odudu ri iJerobowam Adịrahụ bala angị ri ịdịrịhụ ẹ-ẹkpẹ nyamwụ-ụ́ myị haa ị họ ụkụrwọ nyaa lala angịkiliya nya Amkpaa ka.

¹⁵IJerobowam chụ angịkiliya nya ịlọmwụ ịlẹ kị ka kịla iya a-ada nya ijiga bala ọ-ka kpụ eteji ha ekpeku nya ịmwụ bala ịna ịlẹ kọ họ.

¹⁶Angị ihihi ịkịla i-bwu imwawụ nya ala Isirẹlụ datị-datị ịlẹ kị tịtọ nyọka gbịgba ha Amkpaa Ohe Oluhye nya ala Isirẹlụ nya ịlẹhị wuu dịrẹ ala iLivayị kele ka iJerusalẹm. Chajị kị ka jẹ-ẹ̀ kịla iya nya Amkpaa Ohe Oluhye nya adaa igogo anyị.

¹⁷Ọọwa du ká ọpyị-adịrahụ nya iJuda la ọngịrị kpọngkpọng. Ị myị ẹrụ ha iRehobowam ọnyị nya iSolomọn ẹ-ẹpwụ nya ẹka ịta gbẹgbịlẹ jaabwọ kị họ lụka nya adịrahụ oriri nya iDevidi bala iSolomọn.

¹⁸IRehobowam ye ịMahalatị ọlẹ ka adamwụ ri iJerimotu ọnyị nya iDevidi. Ịnịna nya ahụ nyamwụ ri Abihẹlụ ọnyị nya Eliyabụ ọnyị nya iJesi.

¹⁹ỊMahalatị ma anyị alẹng angị ịta ịlẹ kị wụrụ iJewuchi bala iChemariya bala ịSaham.

²⁰Ụka kọ nọ chẹẹ ọ ye ahụ ọkịla ọlẹ ká ẹnyị nyamwụ ri ịMaaka ọnyị nya Abụsalọm. Ị ma anyị alẹng angị ine ịlẹ kị wụrụ Abija bala Atayị bala iSisa bala iChelomiti.

²¹IRehobowam ye ịhụ iwo kụrụ ineku bala ịhụ-anchẹ iwo ịrwọnyẹ. Anyị alẹng nyamwụ la angị iwo imiiye kụrụ ineku, anyị anyang nyamwụ la angị iwo ịrwọnyẹ. Ẹ-ẹpwụ nya ịhụ bala ịhụ-anchẹ nyamwụ wuu ịMaaka à ri ọnụ-ahụ lẹ.

²²Abija kọ ri ọnyị nya ọnụ-ahụ nyamwụ à tị̀tị̀ họọ gụ anyị alẹng nyamwụ ịkịla lẹ. Ọ chwọọ kọọwa-à ka ri adịrahụ ẹ-ẹkpẹ nyamwụ.

²³IRehobowam họ ju lẹla ọjẹjẹ ẹ-ẹpwụ, ọ go anyị alẹng ịkịla nyamwụ ri alegbeji ịkpẹhị rịrị epweji datị-datị ịlẹ kị me egwalọ dagaga ju ịla iJuda bala iBenjamịn. Ọ kaa tụ ang datị-datị ịlẹ kị baba haa wuu rịraa bala o-ye iru nya ịhụ haa ịnyịnyị.