Read idege 2 EGO OGBEGBE 12 Bible Online

2 EGO OGBEGBE 12 - idege bible

2 EGO OGBEGBE 12

¹Ụka ká iwe-ahụrụ nya adịrahụ ọriri nya iRehobowam yeji kpọngkpọng, kọ nwa lọngịrị ọtụka-ọtụka lẹ, ọwa bala ala Isirẹlụ ịla iJuda-à nyẹẹkpẹ da ehile nya Amkpaa lẹlẹ.

²Ajị nyọlẹ kị họ kpẹẹkpẹẹ ẹ-ẹga nya Amkpaa ka lẹ, iChichakị Adịrahụ nya ala Ijipiti wẹ kaka dẹwụ ta ala iJerusalẹm ẹ-ẹpwụ nya ẹka ọharụ nya adịrahụ oriri nya iRehobowam.

³IChichakị dẹwụ ọọwa la ang ịrụnyẹ ụnọ ookpokpo da ohu imiiye (1,200) bala angị kụ anyịrẹ angị ụnọ iwo ịrwọnyẹ (60,000). Ọ kpa iru nya angịdẹwụ ịkịla ịlẹ kị ka jụ wa ka bwu Ijipiti bala iLibya bala iSuki bala Itiyopyiya dịrẹ ịlọmwụ.

⁴Ọ nu epweji ịla iJuda ịlẹ kị me egwalọ ju wuu lalaala kaka pwụ iJerusalẹm.

⁵Ụka ọọwa, iChemaya ọlọmwụ kele ka ẹga nya iRehobowam bala alegbeju nya ala iJuda ịlẹ kị rụnyẹ rụ ka iJerusalẹm nyọka kpa ịlaa be hi iChichakị lẹ, ọ byaa yẹkẹẹ, “Amkpaa yẹkẹẹ, ‘Ajị nyọlẹ kanụ nyẹẹkpẹ dam lẹ, m̀ tị̀tị̀ nyẹẹkpẹ danụ tụ hiinu ju iChichakị ụ-ụbwọ lẹ.’ ”

⁶Adịrahụ bala alegbeju nya ala iJuda ịịwa myị ịwa nyị họ tịpyọ ịnyịlẹhị. Ọọwa, ị yẹkẹẹ, “Amkpaa họ kpakpa.”

⁷Ụka ká Amkpaa yẹ nyori ọhọbịrị nyaa taa olujwo lẹ, ọ ya ẹla ta iChemayị myịmyị yẹkẹẹ, “Ajị nyọlẹ ká ala iJuda jẹ abyị nya ịlaa-à wẹ lẹ, ḿ ka taa ayịreji gbanggbang kaka, m̀ ka chaa da. Ḿ ka kpa iChichakị yẹ iJerusalẹm akama jaabwọ ká agbama nyam lụmẹ kaka ba kaka.

⁸IChichakị tị ka kụrwaa. Ọọwa, ị ka jẹ ang odatị ẹ-ẹpwarịrị nyọka myị ẹrụ ham bala ọ-ka myị ẹrụ ha ịdịrịhụ ilodehe lẹlẹ.”

⁹Ọọwa, iChichakị Adịrahụ nya ala Ijipiti à wẹ iJerusalẹm lẹ, ọ go ang-ụdụ ịla Ube nya Amkpaa bala ịlẹpwa nya adịrahụ lẹlẹ. Ọ go ang myị ang ịlụwa tụ akụmada nya okpoko ịgọm ịlẹ ka iSolomọn họ.

¹⁰Ụka kọ nọ chẹẹ lẹ, iRehobowam Adịrahụ à họ akụmada nya okpoko ọnyọmịla ya ku ọmwakpa nyaa lẹ, ọ ya ju alegbeju ịlẹ kịị gbe ogirigba nya adịrahụ ụ-ụbwọ lẹlẹ.

¹¹Ụka myị ụka ka adịrahụ-ụ́ juwa ka ka Ube nya Amkpaa, angịgbeji kaa go akụmada ịịwa kpa dịrọọ kele ene kị ka kpa nyà kaka guru u-ube nya angịgbeji.

¹²Ajị nyọlẹ ka iRehobowam kpa ịlọmwụ keji lẹ, Amkpaa wu agbama nyamwụ kpa hyoo, ọ́ tọọ ayịreji gbanggbang ka. Iwe-ahụrụ há chẹẹ ha ala iJuda ụka ọọwa.

¹³IRehobowam ri adịrahụ i-iJerusalẹm. Ọngịrị nya adịrahụ oriri nyamwụ nwa kịlahị-ịlahị. Ụka kọ gu ẹka iwo ine kụrụ ookpokpo ọ dọmwụ nyọka ri adịrahụ lẹ. Ọ ri adịrahụ ẹka iwo kụrụ irwiye i-iJerusalẹm epweji ọlẹ ká Amkpaa chụ bwu ẹpwụ nya epweji iliimwawụ ịla Isirẹlụ wuu nyọka ri ẹga kị ka gbịgba ha ẹnyị nyamwụ. Ẹnyị nya ịnamwụ ri ịNaama bwu ọpyị nya ala Amọn.

¹⁴Ọ họ ang onyobyi chajị ọ́ myị kpa ọkịlẹtụ nyamwụ tịtọ nya irya nya Amkpaa ka.

¹⁵Ang myị angị ịkịla ịlẹ ká iRehobowam họ bwu ọmwụ ọdada ka ocheju tụ ego nya ugbiyegu nyamwụ wuu lẹ, ị daa ju ụ-ụpwụ nya Ego nya iChemaya ọlọmwụ bala Ego nya Ido ọlọmwụ. IRehobowam bala iJerobowam da awụlẹ ẹwụ ịnyịnyịịnyị lụka nya adịrahụ oriri nyaa.

¹⁶Ụka ká iRehobowam gbu, ị jwoo eji i-iworu nya ịdịrịhụ e-Epweji nya iDevidi. Ọọwa, Abija ọnyị nyamwụ a ri adịrahụ kwiwa nyamwụ lẹlẹ.