Read idege 2 EGO OGBEGBE 13 Bible Online

2 EGO OGBEGBE 13 - idege bible

2 EGO OGBEGBE 13

¹Abija dọmwụ nyọka ri adịrahụ nya ala iJuda ụka ká iJerobowam Adịrahụ nya ala Isirẹlụ lẹẹ gu ẹka iwo kụrụ ineku nyọlẹ kọọwa ri adịrahụ.

²Abija ri adịrahụ i-iJerusalẹm ẹka ịta. Ẹnyị nya ịnamwụ à ri iMikaya ọnyị nya Uriyẹlụ bwu epweji nya iGibiya lẹ. Abija bala iJerobowam dẹwụ ta awụlẹ ụka ọhẹ.

³Abija wụrụ angịdẹwụ angị ụnọ ohu ine (400,000) nyamwụ dala awụlẹ. IJerobowam tị kpehe langịdẹwụ nyamwụ angị ụnọ ohu ineku yahị da iRehobowam.

⁴Abija godayị ọ-Ọgbọdọ nya ịSẹmarayim ọ-ọpyị olikiti nya Ifurem lẹ, ọ be ẹkọ byi iJerobowam bala ala Isirẹlụ yẹkẹẹ, “Anụ wuu ā ke ụrụ wo lam mẹ.

⁵Anụ jẹ ká Amkpaa Ohe Oluhye nya ala Isirẹlụ nwa iro o-gbe oyi myị oyi ta iDevidi nyori ọwa bala anyị ịtụma nyamwụ nyaa ka ri adịrahụ ọ-ọpyị nya ala Isirẹlụ pyịyọọ lẹ ka-á?

⁶Ahụ iJerobowam ọnyị nya iNebatị ọlẹ ká ri ọnchẹ amamadiroko nya iSolomọn ọnyị nya iDevidi tị la egbeju-ọngịrị tụ ayịbang pyịpyị.

⁷Ọọwa, ahụ bala alachị alakpa nyang à dọkọ wule awụlẹ bá ẹla ta iRehobowam ọnyị nya iSolomọn ajị nyọlẹ kọ ri onjwo lụmẹ du kọ jẹ jaabwọ kọ ka bwu chịnụ bá ka lẹ ka le?

⁸“Anụ nwụlanọ nyọka mwẹla ta ẹchị-adịrahụ ọlẹ ká Amkpaa ya jụ anyị nya iDevidi ụ-ụbwọ lẹ. Ịnyịlẹhị lẹ, angịdẹwụ nyang ju iru kpẹẹẹ, ekpeku nya ịna nya okpoko ịgọm ịlẹ ká iJerobowam ya hanụ nyọka ri ijiga nyanụ kem anụ tị kpa-à wẹ lẹ.

⁹Anụ ku angịkiliya nya Amkpaa, alugbiyegu nya Erọn bala ala iLivayị. Ọọwa, anụ go angịkiliya ku ọmwakpa nyaa jaabwọ ká alẹpwụma ịkịla kaa họ lẹlẹ. Ọng myị ọng ọlẹ kọ kpa ẹna lee imilodo irwiye wanụ, ānụ kaa ye nya ọngọkiliya nya ijiga nyanụ ịwẹ lẹ.

¹⁰“Ahị tị lẹ, áhị nyẹẹkpẹ da Amkpaa Ohe Oluhye nyahị koo. Angịkiliya ịlẹ kị ri anyị ịtụma nya Erọn à kaa myị ẹrụ họọ lẹ, ala iLivayị tị kaa daa ụbwọ ịnyịnyị.

¹¹Ẹnụ myị ẹnụ lụtụrụ bala alobyi ị kaa kịla iya ọ-rụ ila bala iya nya ịtangare ha Amkpaa. Ị kaa hụ ịkaa ọlịgọgọ nọ i-iteburu ọcharị-charị bala ọ-ya ila ju itinika iluhye nya ang ọ-ya itinika rịrị ẹnụ myị ẹnụ lobyi. Ahị lẹ, ahị jam họ kpẹẹkpẹẹ jaabwọ ká Amkpaa dahị ehile, anụ tị nyẹẹkpẹ dọọ lẹ.

¹²Ohe Oluhye lịlọmwu jam tahị. Ọwa-à ri olegbeju nyahị lẹ, angịkiliya nyamwụ jam tahị lẹkụrwẹ nyaa ịlẹ kị ka kpa wụrụụhị kaka dẹwụ tanụ. Anụ ala Isirẹlụ ee, ānụ mwẹla ta Amkpaa Ohe Oluhye nya adanụ igogo anyị koo. Ánụ ka jẹ-ẹ̀ kụrwọọ myị koo.”

¹³Ụka ọwẹ iJerobowam lẹẹ du angịdẹwụ nyamwụ ịhyẹ kaka kụ ịnya ẹ-ẹkpẹ gbe angịdẹwụ nya ala iJuda ene ká angị ihihi nyaa-à kụ yahị daa bwu ịlahị.

¹⁴Ụka ká angịdẹwụ nya ala iJuda yẹ nyori ala Isirẹlụ juwa daa ẹwụ bwu ẹkpẹ bala ịlahị lẹ, ị chị eko bịlẹ ụbwọ ọdada bwu ẹga nya Amkpaa lẹlẹ. Angịkiliya ya ẹkụrwẹ kpọnụ,

¹⁵angịdẹwụ nya ala iJuda chị ụkwa dọ̀ọọ lẹ, Abija-à kpaa kụ ịlahị mwẹla ta ala Isirẹlụ lẹ, Ohe Oluhye à kụrụ iJerobowam bala ala Isirẹlụ ha Abija anyị lẹlẹ.

¹⁶Ala Isirẹlụ rụnyẹ rụ hi ala iJuda, chajị Ohe Oluye yaa ju ala iJuda ụ-ụbwọ.

¹⁷Abija bala angịdẹwụ nyamwụ kụrụ ala Isirẹlụ aboji-aboji. Ị nwụ angịdẹwụ ịlahịchịng nya ala Isirẹlụ angị ụnọ ohu ịrụ (500,000) lẹpwụ-lẹpwụ.

¹⁸Ala iJuda kụrụ ala Isirẹlụ, chajị ị kpụnịrọ Amkpaa Ohe Oluhye nya adaa igogo anyị.

¹⁹Abija ku angịdẹwụ nya iJerobowam kpụ ọ ye epweji nyamwụ ịhyẹ la. Epweji ịịwa ri ịBẹtẹlụ bala iJechana bala Efurọn bala epweji ichiche ịdagaga jwaa.

²⁰Lụka nya adịrahụ oriri nya Abija lẹ, iJerobowam-ḿ jẹ la ọngịrị jaabwọ kọ la ene-ene kaka. Ụka ohẹẹkpẹ, Amkpaa yọọ akama lẹ, ọ gbu lẹlẹ.

²¹Abija Adịrahụ nya ala iJuda tị la ọngịrị kịlahị-ịlahị. Ọ ye ịhụ iwo kụrụ ine. Ọ ma anyị alẹng iwo imiiye kụrụ imiiye bala anyị anyang angị iwo kụrụ ịrwọnyẹ.

²²Ang myị ang ịkịla ịlẹ wuu kị họ lụka nya adịrahụ oriri nya Abija tụ ẹla ịlẹ kọ ya bala ụkụrwọ ịlẹ kọ họ lẹ, ị daa ju ụ-ụpwụ nya Ego nya Ido Ọlọmwụ lẹ.