Read idege 2 EGO OGBEGBE 14 Bible Online

2 EGO OGBEGBE 14 - idege bible

2 EGO OGBEGBE 14

¹Ụka ká Abija gbu, ị jwoo eji e-Epweji nya iDevidi. Ọọwa, Asa ọnyị nyamwụ à ri adịrahụ kwiwa nyamwụ lẹlẹ. Okpunyi ji ẹ-ẹpwụ nya ẹka iwo chiriri lụka nya adịrahụ oriri nya Asa.

²Asa họ ẹla ọ-kpụ Amkpaa Ohe Oluhye nyamwụ ịpyọ.

³Ọ tụrụ ada ị-kpụ ijiga bala ẹga ị-kpụ eteji ha ijiga wuu hụrụ. Ọ tụrụ ajwọ iweji irigọgọ bala ekpeku nya Achẹrụ ojiga ọnyang chị e-eji.

⁴Ọ da ala iJuda wuu ehile kị ka gbịgba ha Amkpaa Ohe Oluhye nya adaa igogo bala ọ-ka kpa ehile bala ọmẹjẹ nyamwụ.

⁵Asa hile ijiga ọkpụkpụ bala ịtangare nya ijiga o-ju ila e-epweji ọnyị myị ọnyị ịla iJuda wuu. Okpunyi ji ọpyị lụka nyamwụ.

⁶Ọ me egwalọ dagaga ju epweji nya iJuda lụka nya okpunyi ọọwa. Ọngọngọhẹ-ẹ́ dẹwụ tọọ lụka ọọwa ka, chajị Amkpaa ya okpunyi họọ.

⁷Ọ byi ala iJuda yẹkẹẹ, “Anụ kẹwẹ kahị chajẹ ju epweji ịlịnyahị bwula o-me egwalọ dagaga bala ebe iluhye dagaga jwaa mẹ. Ahị ka ya ekpileku kwaa chajị kị ka jẹ-ẹ̀ taa ku bala ọ-da chị lije. Ajị nya ọlẹ kahị ju ihi nya Amkpaa Ohe Oluhye nyahị à du ká ọpyị ọlẹ ri ịnyahị lẹẹ lẹ. Ahị họ irya nyamwụ lẹ, ọ họ ká okpunyi ji hahị ịkịka ọnyị myị ọnyị.” Ọọwa, ị me egwalọ ịịwa bala ọ-pyẹ pyọ́ọ̀ọ lẹlẹ.

⁸Angịdẹwụ nya Asa ịlẹ kị bwu iJuda la angị ụnọ ohu ịta (300,000). Ị kpa akụmada ịtụka bala awangga. Angịdẹwụ nyamwụ ịlẹ kị bwu imwawụ nya iBenjamịn la angị ụnọ ohu imiiye da angị ụnọ iwo ineku (280,000). Ịwa kpa akụmada ichiche bala eda. Angịdẹwụ nyamwụ ebwo imimiiye ịwẹ wuu ri angị ju ugbodu.

⁹Ụka ọhẹ juwa ká ọla Itiyopyiya ọhẹ ọlẹ ká ẹnyị nyamwụ ri ịSẹra kpa angịdẹwụ angị uku (1,000,000) lang ịrụnyẹ ohu ịta (300) kaka be iJuda ẹpwa. Ị jẹ lalaala kaka pwụ ịMarẹcha.

¹⁰Ọọwa, Asa-à kpa angịdẹwụ nyamwụ hu ang nya ẹwụ ọọwa lẹ, ị tọ awụlẹ ọ-Ọkpọọ nya ịSẹfata ọlẹ kọ ju ịMarẹcha chwẹẹ lẹlẹ.

¹¹Ọọwa, Asa-à raabwọ ha Amkpaa Ohe Oluhye nyamwụ yẹkẹẹ, “Amkpaa ee, ahụ ụbwọng kẹnẹ-kẹnẹ à lọngịrị ka jẹ-ẹ̀ da angị ịdẹwụ-dẹwụ ụbwọ nyọka bá ẹla ta angị ịnyịịngịrị myị lẹ. Amkpaa Ohe Oluhye nyahị ee, dahị ụbwọ mẹ, chajị ahị kpụnịrọng à du kahị lẹẹ yahị da iru nya alẹwụ ịtụka ịlẹ lẹ. Amkpaa ee, ahụ à ri Ohe Oluhye nyahị lẹ. Ā myị ká angịnyị ehe ā kụrụng ka.”

¹²Amkpaa kụrụ angịdẹwụ nya ala Itiyopyiya ụka ká angịdẹwụ nya ala iJuda gba mịlaa. Ị mwụ ata bịmwụ.

¹³Asa bala angịdẹwụ nyamwụ kwaa lalaala ka ka ju ka ịGẹra. Ị nwụ iru nya angịdẹwụ nya ala Itiyopyiya ẹnẹwẹ. Ị́ jẹ tụ ịlaa michi kpụ ị ka dẹwụ myị kaka. Amkpaa kụrwaa chẹẹchẹẹ. Angịdẹwụ nya ala iJuda wụ iru nya ang-ẹwụ wụ kpa rụ.

¹⁴Ị ta epweji ịlẹ kị juwa ọ-ọnụ nya ịGẹra ayịreji. Alụwa ju uhi nya Amkpaa dapwụ hụ amẹ. Ala iJuda wụ ang-ụdụ nya alụwa wuu wụ kpa rụ.

¹⁵Asa bala angịdẹwụ nyamwụ myịmyị be angịgbikpịlọ ịhyẹ ẹpwa ẹ-ẹga ị-chịkụ nyaa, gyaa iru nya ịkpịlọ bala anyịrẹ-ịkamẹlụ kpa rụ. Ụka ohyẹẹkpẹ lẹ, ị nyà rụ ka iJerusalẹm lẹlẹ.