Read idege 2 EGO OGBEGBE 15 Bible Online

2 EGO OGBEGBE 15 - idege bible

2 EGO OGBEGBE 15

¹Ụka ọkịla ọhẹ, olegu nya Ohe Oluhye hwo kụ Asariya ọnyị nya Odẹdị lẹ,

²ọ kele ka ẹga nya Asa Adịrahụ kaka byoo yẹkẹẹ, “Anụ ke ụrụ lam mẹ, Asa Adịrahụ bala ala iJuda tụ ala iBenjamịn wuu. Amkpaa ka juwa tanụ jaabwọ myị abwọ kanụ juwa tọọ tata kaka ba. Ánụ tịtọ nyamwụ, ọ ka chị ịlọmwụ ehe hanụ. Ọ́ tị ri kanụ nyẹẹkpẹ dọọ aalẹ, ọ tị̀tị̀ ka nyẹẹkpẹ danụ.

³Ụka ọlụrụ, ala Isirẹlụ-ụ́ myị la Ohe Oluhye ọlẹ kọ ri nya ịlẹhị ka, ị́ la angịkiliya ịlẹ kị ka me ang jaa ka, ị́ la ehile ka ịnyịnyị.

⁴Ma ụka ká akama-á chaa ọgụ kị jahị kpata da ka ẹga nya Amkpaa Ohe Oluhye nya ala Isirẹlụ, juwa pịlahị nyamwụ, ị kaa yọọ.

⁵Lụka ọọwa, ọ la uhi-uhi nya ongịnyị ọ-ka hu ang nya anyị bwu ẹgẹhẹ ka ẹga ọkịla, chajị akama bala ojigi-jigi ji egeji lụmẹ kaka kpoye.

⁶Ẹpwụma ọhẹ kaa tụ ẹpwụma ọkịla pyịpyị, epweji ọhẹ kaa ya epweji ọkịla ba ịnyịnyị, chajị Ohe Oluhye juwa kpa ụma nya akama datị-datị wẹ uhye nyaa.

⁷Ma, anụ ala iJuda tị lẹ, anụ godayị kpọọọ mẹ, ọkịlẹtụ ā kpụnụ enyi ka. Anụ juwa ka ye uri nya ụkụrwọ nyanụ ọlẹ kanụ wẹẹ họ.”

⁸Ụka ká Asa wo ọmwụ ọyẹyẹ nya Asariya ọnyị nya Odẹdị, ọhụ pwọọ kpuru. Ọ ta ekpeku ịlọpyị nya iJuda bala iBenjamịn wuu ayịreji tụ ịlẹ kị juwa e-epweji ịlẹ kọ ye la ị-ịpyị ilikiti nya Ifurem. Ọ nwụla ogidi nya Amkpaa ọlẹ kọ juwa ọdọda nya Ube nya Amkpaa.

⁹Ụka ọwẹ, angịnyị lụmẹ-lụmẹ bwu Ifurem bala ịManasẹ bala iSimyọn lẹẹ wẹ kaka ji oye nya Asa kpụ ị kụ ọ-ọpyị nyamwụ lẹ. Ọọwa, Asa-à wụrwaa wuu bala ala iJuda bala ala iBenjamịn lẹ,

¹⁰Ị kele kaka jịra i-iJerusalẹm lọya ọhata nya ẹka iwo kụrụ ịrụ nya adịrahụ oriri nya Asa lẹlẹ.

¹¹Ẹnụ ọọwa, ị ya ịna ohu irwiye (700) bala ịmwụ ụnọ irwiye (7,000) kịla iya ha Amkpaa bwu ẹpwụ nya ang-ẹwụ ịlẹ kị kpa nyà.

¹²Ị nwa iro nyọka gbịgba ha Amkpaa Ohe Oluhye nya adaa igogo anyị lọkịlẹtụ bala lugbodu okpukpuru nyaa wuu.

¹³Ọng myị ọng, onjwo lee ọngọgbahị tụ ọnyang tụ ọlẹng ọhẹ-lọhẹ kọ myị gbịgba ha Amkpaa ka aalẹ, ị ka nwụ ọngọọwa.

¹⁴Ịwa wuu nwà iro ọọwa lẹnyị nya Amkpaa lomyi ogboo lẹ, ị chị ẹkụrwe bala o-du oko lẹlẹ.

¹⁵Ala iJuda wuu chị ọkẹkẹni, chajị ị nwà iro ọọwa lọkịlẹtụ nyaa wuu. Ọ maama nyọka gbịgba ha Amkpaa. Amkpaa wahị kụrwaa, ya okpunyi haa ịkịka ọnyị myị ọnyị.

¹⁶Asa Adịrahụ ku ịMaaka ịnamwụ-ọgbahị hi iwe-ahụrụ nyamwụ lala adịrahụ ọnyang. Ang odudu ri ịMaaka lẹẹ họ ukpeku nya Achẹra ojiga ọnyang. Asa tụrwọọ mileji, boo ene yịgẹ-yịgẹ lẹ, ọ chị ene nyamwụ ila ọ-Ọkpọọ nya iKidirọn lẹlẹ.

¹⁷Asa-á ta ada ị-kpụ ijiga ịlọpyị nyamwụ wuu ayịreji gbanggbang kpá ka odu ịnyị-ị̄, ọ ba Amkpaa jẹ kpẹẹkpẹẹ lụka nya ọhịhị nyamwụ wuu.

¹⁸Ookpoko igọm bala okpoko onyoowuru tụ ang-abwọ ịlẹ ká adamwụ bala ọwa ayịdang ya ha ọhaha ha Ohe Oluhye lẹ, ọ gyaa wuu kpa kaka guru u-Ube Ịgọgọ nya Ohe Oluhye.

¹⁹Ẹwụ ọdada-á tụtụm ji kaka gbee ka pwụ ẹka iwo ịta kụrụ irụ nya adịrahụ oriri nya Asa.