Read idege 2 EGO OGBEGBE 16 Bible Online

2 EGO OGBEGBE 16 - idege bible

2 EGO OGBEGBE 16

¹Ụka ọhẹ, ẹ-ẹpwụ nya ẹka iwo ịta kụrụ ịrwọnyẹ nya adịrahụ oriri nya Asa, ịBaacha Adịrahụ nya ala Isirẹlụ be iJuda ẹpwa. Ọọwa, ọ chị egwalọ ịnyịịgịrị ju epweji nya ịRama, chajị ká ọngọngọhẹ-ẹ́ ka jẹ-ẹ̀ bwu iJuda kpehe lee ọ-jụ kele kaka lẹlẹ.

²Ụka ọọwa, Asa go okpoko onyoowuru bala okpoko ịgọm ịlẹ kị ji Ube nya Amkpaa bala ẹpwa nya adịrahụ lẹ, ọ ya du kịla ịBẹnhadadị Adịrahụ nya ala iSiriya ọlẹ kọ hụ ị-ịDamasịkọsị lẹlẹ. Ọ du ẹrụ nya ọnụ tọọ ịnyịnyị yẹkẹẹ,

³“À tị́ kpịtịya jaabwọ ká adam bala adang anyị ri igu lee ugbeene. Āhị chị igu ọọwa ahị mẹ-ẹ̀. Okpoko onyoowuru bala okpoko ịgọm ịlẹ kam wẹẹ ya du tọng ri ang-ahị ọlẹ kam ye hang. Lẹẹlẹ, myị́ igu ọlẹ kaahụ bala ịBaacha Adịrahụ nya ala Isirẹlụ ri wẹ, chajị kọ kpa angịdẹwụ nyamwụ rụ hi ọpyị nyam kam dọhụ rwẹẹ mẹ.”

⁴ỊBẹnhadadị myị ẹla ọlẹ ká Asa Adịrahụ ya lẹ, ọ du alegbeju nya angịdẹwụ nyamwụ bala angịdẹwụ ilekpeleji nyaa kele kaka mwẹla ta epweji nya ala Isirẹl lẹlẹ. Ị kụrụ epweji nya Ịjọn bala ịDan bala Ebẹlụ-ịbẹtị-ịmaaka bala epweji ịla ịNafụtali ịlẹ kị kaa ang-abwọ guru.

⁵Ụka ká ịBaacha Adịrahụ wo ẹlẹwẹ lẹ, ọ hwabwọ la egwalọ o-me ju epweji nya ịRama lẹlẹ.

⁶Ọọwa, Asa Adịrahụ à kpa ala iJuda wuu kele lẹ, ị go ajwọ bala ekeji ịlẹ ká ịBaacha Adịrahụ lẹẹ kpa me epweji nya ịRama kpa rụ bwu ụwa lẹ, Asa-à ya me egwalọ ịnyịịngịrị ju epweji nya ịGẹba bala iMisipa lẹlẹ.

⁷Lụka ọọwa, ịHanani ọlọmwụ kele ka byi Asa Adịrahụ yẹkẹẹ, “Ajị nyọlẹ ka dahịhile adịrahụ nya ala iSiriya nyọka dang ụbwọ ọkọkọ nyọka kpụnịrọ Amkpaa Ohe Oluhye nyang lẹ, angịdẹwụ nya ala iSiriya be bwu ụbwọ nyang lẹ.

⁸Á kpịtịya nyori ala Itiyopyiya bala ala iLibya anyị la iru nya angịdẹwụ ị-kpa ang ịrụnyẹ bala anyịrẹ ka-á? À dahịhile Amkpaa ụka ọọwa lẹ, ọ tị họ ā kụrwaa wuu.

⁹Amkpaa kaa kpa ẹhi nyamwụ yọyị tụ odehe ọlẹ da wuu, kọ ka ya ọngịrị ha ọng myị ọng ọlẹ kọ kpa ọkịlẹtụ nyamwụ myị lọọ kpẹẹkpẹẹ. Ahụ tị lẹ, à họ ẹla nya uchi. Lẹẹlẹ, ẹwụ-ẹwụ ā ka juwa da bwu ọlẹẹlẹẹ kịlahị lẹlẹ.”

¹⁰Ẹla oyaya nya ịHanani ọlọmwụ ọwẹ wụ Asa ẹjẹ lụmẹ. Agbama nyamwụ ọọwa kpọọ ka wu ịHanani ju agba. Bwu ụka ọwẹ, Asa-à dọmwụ nyọka yẹ angịhyẹ nya angịnyị nyamwụ ụhị lẹ.

¹¹Ang myị ang ịkịla ịlẹ ká Asa Adịrahụ họ wuu bwu ọmwụ ọdada gbee pwụ ocheju lẹ, ị daa ju ụ-ụpwụ nya Ego nya Ịdịrịhụ nya ala iJuda bala Isirẹlụ.

¹²Ẹ-ẹpwụ nya ẹka iwo ịta kụrụ ihikichu nya adịrahụ oriri nya Asa, ẹdụrụ ọhẹ jwọọ a-apatẹ. Ụka kọ dọmwụ nọ ọ-ọbẹ nya igu lẹ, ọ́ bịlẹ ụbwọ ọdada bwu ẹga nya Amkpaa ka. Ẹga nya angị ri idongkita ọ ka lẹ.

¹³Ụka kọ lala ẹka imiiye ẹ-ẹkpẹ nya ọwẹ lẹ, Asa-à gbu lẹlẹ.

¹⁴Ị jwoo eji i-iworu ọlẹ kọ wu ẹ-ẹpwụ nya ẹjwọ gbe ilọmwụ ụ-ụwa e-Epweji nya iDevidi. Ị yọọ nọ u-uhye nya ụbwọ, ya etiji bala ida ichoru kwọkwọ wọọ gbịlẹ-gbịlẹ. Ị tụ ila ọtụka-ọtụka ju e-ejida nyamwụ nyọka chị ihi jwoo.