Read idege 2 EGO OGBEGBE 17 Bible Online

2 EGO OGBEGBE 17 - idege bible

2 EGO OGBEGBE 17

¹Ụka ọọwa, iJehochafatị ri adịrahụ kwiwa nya adamwụ. Ọ họ ka iJuda la ọngịrị ọtụka-ọtụka nyọka jẹ-ẹ̀ godayị kpọọ ó-ri ká ala Isirẹlụ-ụ́ tịtọ nya ẹla nyaa.

²Ọ ya angịdẹwụ ịhyẹ kụ e-epweji nya ala iJuda ịlẹ wuu kị me egwalọ dagaga ju bala epweji ịla Ifurem ịlẹ wuu ka Asa adamwụ nu.

³Ajị nyọlẹ ka iJehochafatị dịrẹ ọgụ ẹpẹtẹ nya ọgbanyẹ nya adamwụ, kọ kpụ eteji ha ojiga ịBaalụ ka lẹ, Amkpaa juwa tọọ.

⁴Ọ myị ẹrụ ha Ohe Oluhye nya adamwụ, juwa kpa ehile nyamwụ kpẹẹkpẹẹ. Ọ́ ba abwẹla ịtịpyọ nya ịdịrịhụ nya ala Isirẹlụ jẹ ka.

⁵Amkpaa họ iJehochafatị hụhụ giri-giri ri adịrahụ nya iJuda. Ala iJuda wuu kaa kpa ang-ahị kịlọọ gbee kọ kpụ ụdụ nya ịlẹhị-ịlẹhị bala ọ-la ihi-ihi ịnyịnyị.

⁶Ọ ya irya nyamwụ nịrọ ụgbẹyị nya Amkpaa ọdịrẹ-dịrẹ. Ọ tụrụ ẹga ị-kpụ ijiga bala ekpeku nya Achẹrụ ojiga ọnyang hụrụ hi ọpyị nya iJuda.

⁷Ẹ-ẹpwụ nya ẹka ọhata nyọlẹ kọ ri adịrahụ, ọ chụ alegbeju du ka epweji ịla iJuda wuu nyọka mẹ ang jẹ ụ-ụwa. Alegbeju ịịwa ri ịBẹnhayilu bala Obadaya bala ịSẹkaraya bala ịNẹtanẹlụ bala iMikaya.

⁸Ala iLivayị angị ihikichu bala angịkiliya angị imiiye juwa ẹ-ẹpwụ nya ẹdịyẹ ọọwa. Ala iLivayị ịlẹ kọ ya du ri iChemaya bala iNetaniya bala iSebadiya bala Asahẹlụ bala iChemiramotu bala iJehonatan bala Adonija bala iTobija bala iTobadonija. Angịkiliya ịlẹpwụ nyaa ri Elichama bala iJehoram.

⁹Ị hu ụpwụ nya ehile nya Amkpaa lẹ, ị ga tụ epweji ịla iJuda da wuu juwa mẹ ang jẹ angịnyị bwu ẹpwụ nyamwụ lẹlẹ.

¹⁰Amkpaa họ ẹpwụma ịkịla ịdagaga ju iJuda wuu ju uhi nyọka dẹwụ ta iJehochafatị.

¹¹Ala iFilisitiya ịhyẹ kpa okpoko onyoowuru lụmẹ-lụmẹ bala ang-ahị ịkịla wẹ iJehochafatị. Ala Arabụ kpa imilodo ụnọ irwiye da ohu irwiye (7,700) bala embiri ụnọ irwiye da ohu irwiye wọọ.

¹²IJehochafatị juwa nwa ẹpwụ nya ọngịrị ọlala kịlahị-ịlahị. Ọ me egwalọ bala ebe ịnyịịngịrị bala ebe ị-ya ang guru tụ iJuda da.

¹³Ẹga ịịwa ị kaa ya iru nya ang lụmẹ-lụmẹ guru lẹ. Ọ ya angịdẹwụ ị-jẹ ẹwụ yẹẹyẹẹ chịkụ i-iJerusalẹm.

¹⁴Ị da ẹnyị nya angịdẹwụ nyamwụ wuu ju jaabwọ kị la ogang-ogang. Angịdẹwụ nyamwụ ịlẹ kị bwu ogang ịla iJuda wuu la angị ụnọ ohu ịta (300,000). Adịna-à ri olegbeju nyaa lẹ.

¹⁵Olegbeju ọ-bọọ ba ri iJehohanan ọlẹ kọ kpẹhị rịrị angịdẹwụ angị ụnọ ohu imiiye da angị ụnọ ineku (280,000).

¹⁶Olegbeju ọhata ri Amasiya ọnyị nya iSikiri ká angịdẹwụ angị ụnọ ohu imiiye (200,000) ji ekpeleji nyamwụ. Amasiya chụ ịlọmwụ nyọka myị ẹrụ ha Amkpaa.

¹⁷Olegbeju nya angịdẹwụ i-bwu imwawụ nya iBenjamịn ri Eliyada kọ ri ọngọdẹwụ ọtụka. Ọ kpẹhị rịrị angịdẹwụ angị ụnọ ohu imiiye (200,000) ịlẹ kị kpa akụmada bala eda.

¹⁸Olegbeju ọ-bọọ ba ri iJehosabadị ọlẹ ká angịdẹwụ angị ụnọ ohu ookpokpo da angị ụnọ iwo ineku (180,000) ji ekpeleji nyamwụ. Ịwa wuu ju agidi nya ẹwụ.

¹⁹Angịwẹ wuu ri angịmyị ẹrụ ha adịrahụ i-iJerusalẹm. Adịrahụ myịmyị ya angịdẹwụ ịkịla kụ e-epweji ịlẹ kị me egwalọ dagaga ju ịla iJuda.