Read idege 2 EGO OGBEGBE 18 Bible Online

2 EGO OGBEGBE 18 - idege bible

2 EGO OGBEGBE 18

¹Ụka ká iJehochafatị kpụ ụdụ bala ọ-la ihi-ihi lụmẹ lẹ, ọ ya ẹla nya ọnyị ọnyang nya Ehabụ Adịrahụ nya ala Isirẹlụ ha ọnyị nyamwụ kọ ka ye lẹlẹ.

²Ụka ká ẹka ịmanyị-ịmanyị chịpwụrụ kpá ẹ-ẹkpẹ nya ọọwa lẹ, iJehochafatị à ju Ehabụ ụga ka ịSameriya lẹlẹ. Ehabụ họ ọhụhụ ọtụka-ọtụka họọ bala alegbeju ịlẹ kị kpọọ chị kele. Ị nwụ iru nya ịkpịlọ bala ịna chajị nya ọhụhụ ọọwa. Inyị, Ehabụ à tụ iJehochafatị tutu kọ ka bọọ kele kaka dẹwụ ta ala ịRamotu ọla iGiliyadị lẹlẹ.

³Ọọwa, Ehabụ à tọ iJehochafatị wo yẹkẹẹ, “À ka bam kele kaka dẹwụ ịRamotu-ú?” IJehochafatị wọọ yẹkẹẹ, “Ịnọọ! Á nwụlanọ lẹ aalẹ, m̀ tịtị nwụlanọ. Angịdẹwụ nyam wuu nwụlanọ nyọka wo bwu ẹga nyang lẹ. Ahị ka yẹju lang ẹ-ẹwụ ọwẹ”

⁴Ọọwa, iJehochafatị à myịmyị yẹkẹẹ, “Āhị tị tọ Amkpaa wo ene mẹ.”

⁵Ọọwa, Ehabụ Adịrahụ à wụrụ alọmwụ lala angị ohu ine (400) kaka chọnụ kiding-ng lẹ, ọ taa wo yẹkẹẹ, “M̄ kele ka dẹwụ ta ala epweji nya ịRamotu-igiliyadị lee m̄ tị́ kele ka-à?” Ịwa wuu wọọ yẹkẹẹ, “Kele mẹ-ẹ̀, Amkpaa ka ya ọkụrụ-kụrụ hang!”

⁶Ma, iJehochafatị tọọ wo yẹkẹẹ, “Ọlọmwụ nya Amkpaa ọkịla ọhẹ ji āhị ka tọ wo lẹẹ nyọka jẹ myị̀myị̀ wẹẹ-ẹ́?”

⁷Ehabụ wọọ yẹkẹẹ, “Ee, ọngọ ookpokpo ọhẹ ọlẹ kọ hi ri ịMikaya ọnyị nya Imla. Ẹla nyamwụ ọwa-á tị ham ka, chajị ọ́ kaa yẹ ọmwụ ọnyịịla u-uhye nyam kpong-kpong ka. Ẹla ọtịpyọ kẹnẹ-kẹnẹ mẹ ịnyị.” IJehochafatị à byoo yẹkẹẹ, “Ā ya ịnyị koo!”

⁸Ọọwa, adịrahụ nya ala Isirẹlụ à byi ọlụkụrwọ nyamwụ ọhẹ ya nyị kpa iMikaya ọnyị nya Imla warị ahyaahị mẹ lẹlẹ.

⁹Ụka ọọwa, ịdịrịhụ imiiye ịwẹ hụhụ lịwụrụ nya ịdịrịhụ nyaa ẹ-ẹchị nya adịrahụ nyaa ẹ-ẹga o-ru ajẹ nya ang-ẹrụ ọ-ọnụ nya ogirigba nya ịSameriya. Alọmwụ nya Ehabụ wuu juwa yẹ ọmwụ ị-ịlahị nyaa.

¹⁰Ọlọmwụ ọhẹ ka ẹnyị nyamwụ ri iSedekaya ọnyị nya iKenaana họ achụ nya ịyo iloje-oje. Ọọwa, ọ byi Ehabụ yẹkẹẹ, “Ẹla ọlẹ ká Amkpaa ya à lẹẹ lẹ: ‘Achụ nya iyo ịlẹ ā ka kpa mwẹla ta ala iSiriya gbee ká ka taa ayịreji gbanggbang lẹ.’ ”

¹¹Alọmwụ ịkịla wuu mịrọọ ịnyịnyị juwa yẹkẹẹ, “Ee, kele ka mwẹla ta epweji nya ịRamotu-igiliyadị mẹ, à ka kụrụ, chajị Amkpaa juwa ka ya ọkụrụ-kụrụ hang.”

¹²Ụka ọọwa, olegbeju ọlẹ kị du ẹrụ nyọka wụrụ iMikaya byoo yẹkẹẹ, “Yẹ mẹẹ, alọmwụ ịkịla wuu yẹ ọmwụ ọnyịịla chajị nya adịrahụ lẹ-ẹ̄. Ọnụ nyang à ya owuna-owuna ịnyịnyị mẹ.”

¹³IMikaya tị byoo yẹkẹẹ, “M̀ kpa ẹnyị nya Amkpaa ọlẹ kọ juwa hịhị ya nya ịlẹhị-ịlẹhị ya ẹla myị ẹla ká Amkpaa-á byim m̄ ka ya lẹ!”

¹⁴Ụka kọ pwụ ụwa, Ehabụ Adịrahụ tọọ wo yẹkẹẹ, “IMikaya ee, am bala iJehochafatị Adịrahụ ā bajẹ kele kaka dẹwụ ta ala ịRamotu-igiliyadị lee āhị tị́ kele ka?” IMikaya wẹ byoo yẹkẹẹ, “Anụ kele ịnọ. Amkpaa ka ya ọkụrụ-kụrụ hang.”

¹⁵Ehabụ tị byoo yẹkẹẹ, “IMikaya ee, m̀ tị́ bying ya ụka myị ụka ka juwa ya ẹla jem lẹnyị nya Amkpaa aalẹ, à ya ẹla nya ịlẹhi! Ụka ịmanyị m̄ tị ka bying ịnyi ene-è?”

¹⁶Ọọwa, iMikaya-à byoo yẹkẹẹ, “M̀ yọyị a-arụrụ ká angịdẹwụ nya ala Isirẹlụ nyi epepe tụ uhye nya ikiti da lala ịkpịlọ ịlẹ kị la ọngọgbaa gbe ka. Ọọwa, Amkpaa-à yẹkẹẹ, ‘Angịdẹwụ ịlẹ-ẹ́ la ayịbaba kaka. Ọngọngọọng nyaa-ā rụ ka ẹpwa lokem nyamwụ mẹ.’ ”

¹⁷Ehabụ Adịrahụ à byi iJehochafatị yẹkẹẹ, “Ḿ bying lẹẹ ya ọngọwẹ-ẹ́ kaa yẹ ọmwụ ọnyịịla chajị nyam ka lẹ ka-á? Ẹla onyobyi ọ kaa ya ụka wuu lẹ.”

¹⁸IMikaya myịmyị kịnyaa lẹla oyaya tọọ yẹkẹẹ, “Aa wo mẹ, m̀ yẹ Amkpaa kọ hụhụ ẹ-ẹchị-adịrahụ nyamwụ la alegu-ẹrụ ilepwoohe godayị dagaga jwoo.

¹⁹Ọọwa, Amkpaa-à tọ wo yẹkẹẹ, ‘Oowo tị ka du Ehabụ Adịrahụ chụrwa kọ ka kele ka ịRamotu-igiliyadị ká ebe ka bọọ ụ-ụwa kpá-à wẹ-ẹ̀?’ Alegu-ẹrụ ịhyẹ ya abwọhẹ, ịkịla ya abwọkịla.

²⁰Ụka ohyẹẹkpẹ lẹ, olegu ọhẹ à kele kaka byi Amkpaa yẹkẹẹ, ‘M̀ ka họ ịnyị myị.’ Amkpaa tọọ wo yẹkẹẹ, ‘Ụgbẹyị oyina-ā tị́ ka kpa bwu?’

²¹Olegu ọọwa wọọ yẹkẹẹ, ‘M̀ ka họ alọmwụ nya Ehabụ wuu ka me ọnọọkịla joo.’ Ọọwa, Amkpaa-à byoo yẹkẹẹ, ‘Kele kaka doo chụrwa mẹ. À ka jẹ-ẹ̀ họ ịnyị myị ịlẹhị.’

²²“Lẹ, à tị́ yẹ-ẹ̀ wẹ lẹ, Amkpaa-à họ du ká alọmwụ nyang ịwẹ wuu wẹẹ me ọnọọkịla jeng lẹ, chajị ọwa ayịdang cheje nyọka yang kpụ ịtẹbyị lẹ!”

²³Ọọwa, iSedekaya ọlọmwụ ọnyị nya iKenaana à kele ká ẹga nya iMikaya, wọọ abwọ a-ahị kpuu lẹ, ọ tọọ wo yẹkẹẹ, “Ẹnịyẹ kpong-kpong olegu nya Amkpaa-à tị́ rụ him kpụ kọ ka kpang ahụ ya ẹla-à?”

²⁴IMikaya wẹ byoo yẹkẹẹ, “À ka jẹ ahyaahị kpá ẹnụ ká ka rụ gwẹẹgwẹẹ kaka kpịbaa ikwee ọhẹ!”

²⁵Ọọwa, Ehabụ Adịrahụ à byi ọngọhẹ nya alegbeju ịtụkụ yoo yẹkẹẹ, “Wu iMikaya kpa kele kịla Amọn ịGọvụnọ ọla ịSameriya bala iJowachị ọnyị nyam.

²⁶Byaa kị yọọ ju agba. Ị̄ ya ịngịngịhyẹ ọkịla họọ ri dala ịkaa bala enyi ka gbee kam ka nyà lokpunyi bwu ọgbẹwụ.”

²⁷Ọọwa, iMikaya-à chabwo-igo ju adịrahụ byoo yẹkẹẹ, “Ó-ri ká nyà lọkpunyi bwu ẹwụ ọwẹ pyíì aalẹ, Amkpaa-á kpam ya ẹlẹwẹ ịnyịlẹhị ka.” IMikaya ya ẹla ta angị ji eji ịnyịnyị yẹkẹẹ, “Anụ wuu ā yẹta ba ẹlẹwẹ kam ya wẹ mẹ!”

²⁸Ọọwa, Ehabụ Adịrahụ nya ala Isirẹlụ bala iJehochafatị Adịrahụ nya ala iJuda a hu ang kele ka dẹwụ ta ala ịRamotu-igiliyadị lẹlẹ.

²⁹Ehabụ byi iJehochafatị yẹkẹẹ, “Ẹwụ ọlẹ kahị lẹẹ ka lẹ, m̀ ka kụrụ ang nya ihwirihwa kị ka jẹm ogu datị ka. Ahụ tị lẹ, aa kụrụ iwụrụ nya adịrahụ oriri nyang mẹ.” Ọọwa, Ehabụ à go ang ịkịla kụrụ lẹ, ị rụ ka ẹwụ lẹlẹ.

³⁰Adịrahụ nya ala iSiriya tị lẹẹ da alegbeju nya angị kụ ang ịrụnyẹ ị-kpa dẹwụ nyamwụ ọna yẹkẹẹ, “Ānụ mwẹla ta ọngọngọhẹ dala adịrahụ nya ala Isirẹlụ koo.”

³¹Ụka kị yẹ iJehochafatị Adịrahụ, ị yahị dọọ myị̀myị̀ị̀myị̀ juwa yẹkẹẹ, “Ẹhẹẹ, adịrahụ nya ala Isirẹlụ lẹẹ lẹ!” Ụka ká iJehochafatị tị yeko kpọnụ lẹ, Amkpaa Ohe Oluhye à dọọ ụbwọ lẹ, ẹwụ à yẹ hyoo lẹlẹ.

³²Ahyaahị ká alegbeju nya angịdẹwụ ị-kụ ang ịrụnyẹ ịwẹ jẹ nyori Ehabụ nyaa wẹ kaka lẹ, ị hịnyọ la o-kwoo-ò ku lẹlẹ.

³³Ụka ọọwa, ọngọdẹwụ nya ala iSiriya ọhẹ da ịcha nyamwụ ju ka ẹpwụ nya angịdẹwụ nya ala Isirẹlụ ịịwẹ ododu lẹ, ịcha ọọwa-à kele kaka chị Ehabụ kpọ̀ńg-ng apewa nya ẹga ká ọkụmada nyamwụ yọnụ yi awụlẹ lẹlẹ. Ọọwa, ọ chị eko onyoowuru byi ọngọ kụ ang ọrụnyẹ nyamwụ yẹkẹẹ, “Ị họm ang lẹ̀ẹ, jahị kpata ka kpam rụ bwu ẹwụ mẹ!”

³⁴Ẹ-ẹpwụ nya ẹnẹwẹ wuu ẹwụ-ụ́ pwuru ka. Ehabụ Adịrahụ lẹ, ọwa kpụnịrọ ang ẹ-ẹpwụ nya ang ọrụnyẹ nyamwụ yahị da ka ẹga nya ala iSiriya. Ụka ká ẹnụ juwa ya ẹtẹ dụrụ ugba lẹ, ọ gbu lẹlẹ.