Read idege 2 EGO OGBEGBE 21 Bible Online

2 EGO OGBEGBE 21 - idege bible

2 EGO OGBEGBE 21

¹Ụka ka iJehochafatị gbu, ị jwoo eji i-iworu nya ịdịrịhụ e-Epweji nya iDevidi. Ọọwa, iJehoram ọnyị nyamwụ à ri adịrahụ kwiwa nyamwụ lẹlẹ.

²IJehoram ọnyị nya iJehochafatị Adịrahụ lẹẹ la anyịnịna alẹng angị ịrwọnyẹ ịlẹ ká ẹnyị nyaa ri Asariya bala iJehiyẹlụ bala iSekaraya bala Asariyahu bala ịMayịkẹlụ bala ịChẹfatiya.

³Adaa ya okpoko ịgọm bala okpoko onyoowuru bala ụma nya ang-ụdụ datị-datị haa bala epweji ịhyẹ ịlẹ kị me egwalọ dagaga ju i-iJuda haa. Ajị nyọlẹ ká iJehoram tị ri ọnyị ọgbahị lẹ, iJehochafatị adamwụ hwoo nyọka ri adịrahụ kwiwa nya ịlọmwụ.

⁴Ụka ká iJehoram ri adịrahụ kọ yẹ ọwa nyị yụbwọ chị ẹchị-adịrahụ nyọwa giri-giri lẹ, ọ nwụ anyịnamwụ wuu bala angịhyẹ ẹ-ẹpwụ nya alegbeju nya ala Isirẹlụ lẹlẹ.

⁵IJehoram gu ẹka iwo ịta kụrụ imiiye ụka kọ dọmwụ nya adịrahụ oriri. Ọ hụ i-iJerusalẹm ri adịrahụ ẹka ineku gbẹgbịlẹ.

⁶Ọ hịhị dịrẹ ang onyobyi ọhọhọ nya ịdịrịhụ nya ala Ịsirẹlụ bala Ehabụ Adịrahụ, chajị ọ ye ọnyị nya Ehabụ. Ọ họ ang onyobyi ba Amkpaa.

⁷Amkpaa-á tị myị ta ẹchị-adịrahụ nya iDevidi ayịreji ka ọọ-lajị nya ọnụ ọlẹ kọ myị ha iDevidi nyori anyị ịtụma nyamwụ nyị ka kịnyaa juwa ri adịrahụ pyịyọọ.

⁸Lụka nya adịrahụ oriri nya iJehoram, ala Ẹdọm la egbeju-ọngịri tụ ala iJuda pyịpyị lẹ, ị hu adịrahụ nya ụbwọ nya ịlaa rụ kaka la ịlaa lẹlẹ.

⁹Ọọwa, iJehoram à kpa angịdẹwụ nyamwụ lang ịrụnyẹ ị-kpa dẹwụ nyamwụ wuu hu ang kele nyọka dẹwụ taa lẹlẹ. Ụka ọọwa, angịdẹwụ nya ala Ẹdọm yaa dada ụ-ụwa. Ọwa bala alegbeju ị-kụ ang ịrụnyẹ nyamwụ tị jẹ maga gbee kị be rụ lepwodu.

¹⁰Ala Ẹdọm la ịlaa bwu ụbwọ nya ala iJuda bwu ụka ọwẹ kịnyaa kịlahị. Alepweji nya iLibina la egbeju-ọngịrị ta ala iJuda ụka ọwẹ ịnyịnyị, chajị iJehoram nyẹẹkpẹ da Amkpaa Ohe Oluhye nya adamwụ igogo anyị.

¹¹Ọ dọmwụ me ada ị-kpụ ijiga i-ikiti ịla iJuda, kpa ala iJuda bala iJerusalẹm kaka họ ọhọbịrị ba Amkpaa.

¹²Ụka ọhẹ, Ịlayịja ọlọmwụ da ileta kaka byi iJehoram yẹkẹẹ, “Amkpaa Ohe Oluhye nya iDevidi adang ogogo wẹjẹ tang chajị nyọlẹ ka dịre ọgụ ẹpẹtẹ ọnyịịla nya iJehochafatị adang bala ịnya Asa Adịrahụ nya ala iJuda ka.

¹³Ọkọkọ nya ọọwa, a juwa họ ang onyobyi gbịla ịdịrịhụ nya Isirẹlụ, kpa ala iJuda bala iJerusalẹm kaka kpụ ijiga jaabwọ ká Ehabụ adịrahụ họ Isirẹlụ. À họ gbee ká dọmwụ nwụ anyịnang, angịnyị kị dọmwụ há gụng gụ ịnyị-ị̄.

¹⁴Lẹẹlẹ, Amkpaa tụbwọọ ka kpa akama ọtụka wẹ uhye nya angịnyị nyang bala anyị nyang bala ịhụ nyang tụ ang myị ang ịlẹ ká la wuu lẹ.

¹⁵Ahụ ayịdang ka la ẹdụrụ nya igbeene ọlẹ kọ ka nwa kịlahị-ịlahị gbee ká ka gbu.”

¹⁶Ụka ọọwa, Amkpaa du ala iFilisitiya bala ala Arabụ ịhyẹ kị nọ ẹpwa ba ala Itiyopyiya ba yahị da iJehoram.

¹⁷Ị be iJuda ẹpwa, wụ ang ịlẹpwa nya adịrahụ wụ lẹ, ị go ịhụ bala anyị alẹng nya adịrahụ kpa rụ nya alagba lẹlẹ. Ahasiya kọ ri onjwo gu wuu lẹpwụ nya anyị alẹng nyamwụ ị wu kpa rụ kaka lẹlẹ.

¹⁸Ụka ká ọwẹ kam kpá, Amkpaa jụ iJehoram ẹdụrụ onyobyi ọhẹ i-igbeene.

¹⁹Ẹdụrụ ọọwa kpọọ kịlahị-ịlahị ẹ-ẹpwụ nya ẹka imiiye gbee ká ebwu nyamwụ kpehe bwọọọ. Ọọwa, ọ gbu lẹlẹ. Angịnyị nyamwụ-ụ́ tu ila ju chị ihi jwoo lụka nya ejida nyamwụ jaabwọ kị họ lụka nya adamwụ igogo anyị ka.

²⁰IJehoram lẹẹ ri adịrahụ ụka kọ gu ẹka iwo ịta kụrụ imiiye. Ọ hụ i-iJerusalẹm ri adịrahụ ẹ-ẹpwụ nya ẹka ineku gbẹgbịlẹ. Igu nyamwụ-ụ́ jụ ọngọngọhẹ ka. Ị jwoo eji e-Epweji nya iDevidi, i-iworu nya ịdịrịhụ tị ka.