Read idege 2 EGO OGBEGBE 22 Bible Online

2 EGO OGBEGBE 22 - idege bible

2 EGO OGBEGBE 22

¹Ụka ọhẹ, ógù nya ala Arabụ ịhyẹ be iJuda ẹpwa, go anyị alẹng nya iJehoram Adịrahụ nwụ wuu kẹnẹ-kẹnẹ kaka hi Ahasiya ko ri onjwo nyaa wuu. Ịnyị, ala iJerusalẹm à hu Ahasiya ri adịrahụ kwiwa nya adamwụ lẹlẹ.

²Ahasiya gu ẹka iwo imiiye kụrụ imiiye[4] ụka kọ dọmwụ nya adịrahụ oriri. Ọ hụ i-iJerusalẹm ri adịrahụ ẹka ookpokpo kem. Ẹnyị nya ịnamwụ ri Ataliya ọnyị ọtụma nya Omri Adịrahụ nya ala Isirẹlụ.

³Ahasiya Adịrahụ họ ang onyobyi gbịla ugbiyegu nya Ehabụ, chajị ịnamwụ yori chọọ ẹ-ẹgọ nyọka họ ang onyobyi.

⁴Ọ họ ang onyobyi ba Amkpaa, chajị ụka ká adamwụ gbu kpá lẹ, angịkịla bwu ugbiyegu nya Ehabụ Adịrahụ à ri angị jwoo irya lẹ. Ịwa-à ju ọmwụ nya eji ọmịla-mịla nyamwụ lẹ.

⁵Bwula irya onyobyi ọlẹ kị ju Ahasiya Adịrahụ du kọ ba iJoram Adịrahụ nya ala Isirẹlụ kele ka dẹwụ ta ịHasẹlụ Adịrahụ nya ala iSiriya. Alẹwụ ebwo imimiiye ịwẹ kpị̀la awụlẹ ị-ịRamotu-igiliyadị lẹ, ị họ iJoram ang ẹ-ẹwụ lẹlẹ.

⁶Ọ nyà kele ka epweji nya iJesiryẹlụ kaka hụ ụ-ụwa gbe ụka kọ ka hagụ. Ọọwa, Ahasiya Adịrahụ nya ala iJuda-à kele kaka wụlọọ yẹ lẹlẹ.

⁷Ohe Oluhye kpa iwe-ahụrụ nya ụga ọwẹ ká Ahasiya ju iJoram wẹ gu adịrahụ oriri nya Ahasiya cheji. Ụka ká Ahasiya kele, ọwa bala iJoram hu ang kaka tọ iJehu ọnyị nya iNimchi. IJehu ọwẹ Amkpaa-à lẹẹ yụchụ me nyọka ta ugbiyegu nya Ehabụ ayịreji lẹ.

⁸Ụka ká iJehu juwa họ jaabwọ ká Ohe Oluhye byoo, ọ jẹ kaka tọ alegbeju nya ala iJuda ịhyẹ bala aanịna nya Ahasiya ịhyẹ kị kpọọ chị ẹ-ẹpwụ nya ẹdịyẹ ọọwa. IJehu go angịwẹ nwụ wuu.

⁹Ọọwa, angịnyị nya iJehu à pịlahị nya Ahasiya gbee kị kaka yọọ kọ kpịbaa ị-ịSameriya lẹlẹ. Ị kpọọ wẹ iJehu lẹ, ị nwọọ lẹlẹ. Ị tị jwoo eji lihi-ihi ajị nya ihi nya iJehochafatị adamwụ-ọgbahị ọlẹ kọ myị ẹrụ ha Amkpaa lọkịlẹtụ nyamwụ wuu. Ọngọngọhẹ nya angịlẹ kị hi bwu ugbiyegu nya Ahasiya-á la ọngịrị nwa nyọka jẹ-ẹ̀ ri adịrahụ nya ọpyị myị kaka.

¹⁰Ụka ká Ataliya wo ya nyị nwụ Ahasiya Adịrahụ ọnyị nyọwa lẹ, ọ da ehile ya nyị nwụ angị ri alugbiyegu nya adịrahụ nya iJuda wuu mẹ lẹlẹ.

¹¹IJehochẹba ahụ nya iJehoyada ọngọkiliya kọ ri ọnyadịda ọnyang nya Ahasiya, kọ ri ọnyị nya iJehoram Adịrahụ tị hu iJowachị ọnyị nya Ahasiya kpa rụ kaka kpịbaa hi anyị nya adịrahụ ịkịla ịlẹ kị wẹẹ ka go nwụ. Ọ kpọọ bala ọnyị ọnyang ọlẹ kọọ kpẹhị rịrọọ kaka kpịbaa u-ube ọlẹpwụ nya Ube nya Amkpaa hi Ataliya du ká Ataliya-á nwọọ ka.

¹²IJowachị kpịbaa u-Ube nya Amkpaa ẹ-ẹpwụ nya ẹka ịrwọnyẹ gbẹgbịlẹ lụka ká Ataliya ri adịrahụ kpẹhị rịrị ọpyị.