Read idege 2 EGO OGBEGBE 23 Bible Online

2 EGO OGBEGBE 23 - idege bible

2 EGO OGBEGBE 23

¹Ẹ-ẹpwụ nya ẹka ọharwiye lẹ, iJehoyada a cheje nyọka họ abwọhẹ lẹlẹ. Ọ nwa iro bala alegbeju nya angịdẹwụ angị ịrụ ịlẹ ká ẹnyị nyaa ri Asariya ọnyị nya iJeroham bala Ichimẹlụ ọnyị nya iJehohanan bala Asariya ọnyị nya Obẹdị bala ịMaaseya ọnyị nya Adaya bala Elichafatị ọnyị nya iSikiri.

²Ị ga tụ epweji ịla iJuda da lẹ, ị kpa ala iLivayị bala alegbeju nya ogang datị-datị ba ịlaa wẹ iJerusalẹm lẹlẹ.

³Ịwa wuu jịra u-Ube nya Amkpaa lẹ, ị nwa iro ta iJowachị ọnyị nya adịrahụ lẹlẹ. IJehoyada byaa yẹkẹẹ, “Ọnyị nya adịrahụ ọlẹ kọ ka ri adịrahụ lẹẹlẹẹ à lẹẹ lẹ, chajị Amkpaa lẹẹ myị ọnụ nyori ọnyị ọtụma nya nya iDevidi ọhẹ nyị ka juwa nyọka ri adịrahụ ụka wuu.

⁴Ang ọlẹ kahị ka họ à lẹẹ lẹ. Ụka ka angịkiliya bala ala iLivayị á wẹ ọlụkụrwọ Ẹnụtụrụ Ọhịnyọ Lụkụrwọ, ebwo ọhẹ ẹ-ẹpwụ nya ebwo ịta nyanụ ka gbe ogirigba nya Ube Ịgọgọ.

⁵Ebwo oheeye ka gbe ẹpwa nya adịrahụ. Angị ihihi nyanụ ka gbe Ogirigba nya Itiwe. Angịkịla wuu ka juwa ọdọda nya Ube Ịgọgọ.

⁶Ọngọkịla ọhẹ-lọhẹ dala angịkiliya bala ala iLivayị ịlẹ kị ji ụkụrwọ á ka jụ ka Ube Ịgọgọ ka. Ịwa lẹ, ị ka kele, chajị ị chị ịgọgọ jwaa. Angịkịla wuu ā ba ọmẹjẹ nya Amkpaa jẹ kị godayị odehe mẹ.

⁷Anụ ala iLivayị ka godayị dagaga ju iJowachị Adịrahụ juwa gboo lang-abwọ nya ẹwụ nyanụ a-abwọ. Ọngọngọhẹ kọ maga nyọka jụ ka Ube nya Amkpaa aalẹ, anụ nwọọ.”

⁸Ala iLivayị bala ala iJuda họ kpẹẹkpẹẹ jaabwọ ká iJehoyada byaa. Angịgbeji-í rụ gbanggbang ka. Alegbeju nya angịdẹwụ kpẹhị rịrị angịlẹ kị ji ụkụrwọ tụ angị juwa kpehe bwu ụkụrwọ.

⁹Ọọwa, iJehoyada-à ya awangga bala akụmada ha alegbeju ịịwa lẹlẹ. Ang-abwọ nya ẹwụ ịwẹ ri ịlẹ ká iDevidi Adịrahụ la ene, kị tị yaa nọ a-ang u-Ube nya Amkpaa.

¹⁰Ọ ya angịgbeji ịwẹ kụ lang-abwọ nya ẹwụ nyaa wuu dagaga ju Ube Ịgọgọ bala ogidi nyọka chẹwụ ke adịrahụ. I ji ọgba bwu ịkịka oledii kele ka ju ka ịkịka ọlẹtẹ.

¹¹Ọọwa, iJehoyada-à gba iJowachị ọnyị nya adịrahụ kpehe, ya okpo-adịrahụ kụrwọọ lẹ, ọ hu ụpwụ nya ehile chajị nya ọpyị ọkpakpa họọ lẹ, ọ yoo dodehe nya adịrahụ oriri lẹlẹ. IJehoyada ọngọkiliya bala anyị nyamwụ ya ida hwọọ lẹ, angịnyị wuu à juwa da iwuru jwoo yẹkẹẹ, “Adịrahụ ka pyẹ̀ẹẹ! Adịrahụ ka pyẹ̀ẹẹ!”

¹²Ụka ká Ataliya Adịrahụ ọnyang wo iwuru nya adịrahụ ọlẹ ká angịnyị juwa da, ọ chị agaga kele ka Ube nya Amkpaa kọ ka jẹ ẹla ọlẹ kọ juwa họ ụ-ụwa.

¹³Ọọwa, ọ yẹ adịrahụ onyeewe ọlẹ kị hu kọ godayị ba ọtachị nya Ube nya Amkpaa ba jaabwọ ká ọhọhọ ọlụka nya adịrahụ ohuhu ri lẹlẹ. Ọ yẹ ká alegbeju nya angịdẹwụ bala angị chị ẹkụrwẹ dagaga jwoo bala angịnyị wuu o-juwa da iwuru lọkẹkẹnị bala ọ-chị ẹkụrwẹ. Angị mwu eje ịla Ube nya Amkpaa-à kụ ịlahị nya iwuru ọtụka ọwẹ lẹ. Ọọwa, ọ gu ịwụrụ nyamwụ ene lẹ, ọ dakọ gboo yẹkẹẹ, “Ọpịrị-ha ịnyị! Ọpịrị-ha ịnyị!”

¹⁴Ọọwa, iJehoayada-à da alegbeju nya angịdẹwụ yẹkẹẹ, “Anụ gbọọ kpehe bwu ẹpwarịrị nya angịdẹwụ kanụ nwụ ọng myị ọng ọlẹ kọ juwa maga nyọka jwoo-ò ju tanụ. Ānụ tị nwọọ ọwa ẹ-ẹga nya Ube nya Amkpaa koo.”

¹⁵Ọọwa, ị woo pyẹẹ, kpọọ jẹ ka ẹpwa nya adịrahụ lẹ, ịnwọọ ẹ-ẹga nya ogirigba ọlẹ ká anyịrẹ kaa jụ bwu wẹ ọdọda nya adịrahụ lẹlẹ.

¹⁶Ụka ọọwa, iJehoyada họ ọwa bala iJowachị Adịrahụ bala ala alụma nwa iro ta Amkpaa nyọka ka ri angịnyị nya Amkpaa pyịyọọ.

¹⁷Ọọwa, alụma wuu à kele ka ube nya ojiga ịBaalụ lẹ, ị tụrwọọ ju eji lẹlẹ. Ị be ogidi bala ekpeku ịlụwa ene hụrụ. Ị nwụ ịMatan ọngọkiliya nya ịBaalụ ị-ịlahị nya ogidi ịlụwa.

¹⁸Ọọwa, iJehoyada-à chụ angịkiliya bala ala iLivayị kpẹhị rịrị ụkụrwọ olube ịgọgọ lẹlẹ. Ọ byaa kị ka họ ụkụrwọ ịlẹ ká iDevidi Adịrahụ ga haa ene bala ọ-ka kịla iya jaabwọ ká ehile nya iMosisi ri. Ịwa-à kpẹhị rịrị ẹla nya eje omwumwu bala ọhụhụ ọhọhọ lẹ.

¹⁹IJehoyada ya angịnyị gbe ọnang i-bwu ka Ube nya Amkpaa ịnyịnyị chajị kị ka myị ọngọ ji ibyi ka ka ụwa ka.

²⁰Ụka ọọwa, alegbeju nya angịdẹwụ bala ịbagọ ilihi bala alegbeju ịkịla bala angịnyị wuu à kpa adịrahụ chị bwu Ube nya Amkpaa kele ka ẹpwa nya adịrahụ lẹlẹ. Ị jụ bwu Ogirigba Oluhye ka ẹpwa nya adịrahụ lẹ, iJowachị Adịrahụ à kele kaka hụhụ ẹ-ẹchị-adịrahụ lẹlẹ.

²¹Angịnyị wuu chị ọkẹkẹnị. Okpunyi ji ọpyị ụka ọọwa, chajị ị nwụ Ataliya lẹ.