Read idege 2 EGO OGBEGBE 24 Bible Online

2 EGO OGBEGBE 24 - idege bible

2 EGO OGBEGBE 24

¹IJowachị gu ẹka irwiye ụka kọ dọmwụ nyọka ri adịrahụ nya ala iJuda. Ọ hụ i-iJerusalẹm ri adịrahụ ẹka iwo ine gbẹgbịlẹ. Ẹnyị nya ịnamwụ à ri iSibiya lẹ. Ọ bwu epweji nya iBiyẹchẹba.

²IJowachị họ ang ọlẹ kọ kpụ Amkpaa ọkịlẹtụ nyii lụka nya ọhịhị nya iJehoyada ọngọkiliya.

³IJehoyada chụ ịhụ imiiye ha iJowachị Adịrahụ. Ịhụ ịịwa ma anyị alẹng bala anyị anyang họọ.

⁴Ụka kọ ri adịrahụ tata chẹẹ lẹ, ọ chị eje nyọka nwụla Ube nya Amkpaa lẹlẹ.

⁵Ọ wụrụ ala iLivayị bala angịkiliya kaka jịra lẹ, ọ byaa yẹkẹẹ, “Anụ kele ka epweji nya iJuda ọnyị myị ọnyị kanụ ye okpoko ọlẹ ka angịnyị kaa da ẹkẹkẹkẹẹka kanụ kpa warị nyọka kpa nwụla Ube nya Amkpaa mẹ. Ānụ họ atịmẹ ju ẹlẹwẹ koo.” Ma, ala iLivayị tị kpa ju ipyeyi.

⁶Ọọwa, adịrahụ à wụrụ iJehoyada olegbeju okiliya lẹ, ọ tọọ wo yẹkẹẹ, “Ịyẹ tị́ du ka byi ala iLivayị ị ye okpoko nya ẹpwa ọnyẹnyẹ o-bwu iJuda bala iJerusalẹm ọlẹ ká iMosisi ọnchẹ nya Amkpaa byi angịnyị nyị nyẹ nyọka kpa nwụla Ube nya Amkpaa ka-à?”

⁷(Angị ba Ataliya ọnyang onyobyi ọwẹ jẹ lẹẹ be ang ene ju ka Ube nya Amkpaa kaka jwoo agụgụ bwula ọ-kpa ang-abwọ ịlịgọgọ ịlụwa kpụ ojiga ịBaalụ.)

⁸Adịrahụ ya lẹ, ala iLivayị à kọ akpa ọ-kpa ye ọhaha ọlẹ kị ya rịrị ogirigba o-bwu ka Ube nya Amkpaa lẹlẹ.

⁹Ị da ọna tụ epweji nya iJuda bala iJerusalẹm wuu da byi ọng myị ọng nyọka wẹ kaka nyẹ ẹpwa ha Amkpaa jaabwọ ká Mosisi ọnchẹ nya Amkpaa byaa u-ugbileji.

¹⁰Ẹla ọọwa kpụ alegbeju bala angịnyị wuu ịpyọ. Ọọwa, ị kpa ẹpwa ọnyẹnyẹ nyaa kele kaa ju ka akpa nya ọhaha ọọwa gbee ká okpoko myọọ lẹlẹ.

¹¹Ụka myị ụka ka ala iLivayị-ị́ yẹ ká okpoko-ó myị akpa nya ọhaha ọọwa, ị kaa hwoo kpa kịla alụkụrwọ nya adịrahụ. Ọọwa, akịraa nya adịrahụ bala ọlụkụrwọ nya olegbeju okiliya ọhẹ à kaa ya okpoko yẹju hyoo ene kị ka kpa akpa tịrẹkpẹ kaka rịrị ẹ-ẹga kọọ rịrị lẹlẹ. Ị kaa họ ịịwẹ ẹnụ myị ẹnụ. Ọọwa, ị tụ okpoko guru ọtụka-ọtụka lẹlẹ.

¹²Adịrahụ bala iJehoyada kaa ya okpoko ọọwa ha alegbeju ịkpẹhị rịrị ụkụrwọ nya Ube Ịgọgọ ọnwụla-nwụla. Ọọwa, ị kaa diro angị be ajwọ bala ikebenta bala alụkụrwọ ị-kpa ije họ ang kị ka họ ụkụrwọ lẹlẹ.

¹³Alụkụrwọ ịịwa wuu họ ụkụrwọ nya ịlẹhị-ịlẹhị. Ọọwa, ị nwụ Ube Ịgọgọ họ, lọngịrị giri-giri jaabwọ kọ la ene-ene lẹlẹ.

¹⁴Ụka kị nwụla Ube Ịgọgọ kpá, ị ya okpoko ịgọm bala okpoko onyoowuru ihihi ha adịrahụ bala iJehoyada. Ọọwa, ị ya họ ịja bala ang-abwọ ịkịla ịla Ube Ịgọgọ lẹlẹ. Ang-abwọ ịịwa ri ị-kpa gbịgba bala ị-kpa kịla iya ọ-rụ ila tụ uhi bala ang-abwọ ịkịla ịlẹ kị kpa okpoko ịgọm bala okpoko onyoowuru họ. Jaabwọ ká iJehoyada ọngọkiliya hịhị kaka ba lẹ, ị kịnyaa juwa kịla iya u-Ube nya Amkpaa ịnyịnyịịnyị.

¹⁵IJehoyada ri ehe gbee pwụ ẹka ohu da iwo ịta (130) gbẹgbịlẹ ene kọọ gbu.

¹⁶Ị jwoo eji i-iworu nya ịdịrịhụ e-Epweji nya iDevidi nyọka chị ihi jwoo, chajị nya ụkụrwọ ọlẹ kọ họ ha ala Isirẹlụ bala Ohe Oluhye bala u-Ube nya Amkpaa.

¹⁷Ụka ká iJehoyada gbu kpá, alegbeju nya ala iJuda tụ iJowachị Adịrahụ tutu nyọka wo ọmẹjẹ nyaa ịwa.

¹⁸Ọọwa, angịnyị a hịnyọ la ọ-ka Ube nya Amkpaa Ohe Oluhye nya adaa igogo anyị kaka gbịgba lẹlẹ. Ị dọmwụ nyọka kpụ eteji ha ekpeku nya Achẹra ojiga ọnyang. Ọhọbịrị nyaa ọwẹ du ká Amkpaa wụ ẹjẹ ta ala iJuda bala ala iJerusalẹm lụmẹ.

¹⁹Ụka ọọwa, Amkpaa du alọmwụ kele kaa daa ọna kị ka tịrẹkpẹ wẹ ẹga nyamwụ, ị́ tị myị ka.

²⁰Ụka ọhẹ, olegu nya Ohe Oluhye hwo kụ ịSẹkaraya ọnyị nya iJehoyada ọngọkiliya lẹ, ọ ya ẹla gboo ta angịnyị yẹkẹẹ, “Amkpaa jam tọnụ wo yẹkẹẹ, ‘Ịyẹ tị́ du kanụ juwa bịrị ehile nyam am Amkpaa, du akama kpụ ịlọnụ mẹ. Anụ nyi ẹkpẹ dam lẹ, m̀ tịtị nyẹẹkpẹ danụ lẹ.’ ”

²¹Ụka ọọwa, ala iJuda kọ ju ịSẹkaraya nyọka da ajwọ mịlọọ. Adịrahụ myị jwaa, ọ ya lẹ, ị da ajwọ nwọọ ọdọda nya Ube nya Amkpaa lẹlẹ.

²²IJowachị Adịrahụ myị kwẹẹ ị nwụ ịSẹkaraya. Ọ deeri gbanggbang jaabwọ ká iJehoyada adịda nya ịSẹkaraya họọ ọnahị kaka ba. Ụka ká ịSẹkaraya juwa ka gbu, ọ dakọ yẹkẹẹ, “Amkpaa-ā yẹ ang ọlẹ ká wẹẹ họ, kọ yẹng akama chajị nya ọọwa!”

²³Ụka ká ẹka ọọwa wẹ ocheju, angịdẹwụ nya ala iSiriya wẹ kaka dẹwụ ta iJuda bala iJerusalẹm lẹ, ị nwụ alegbeju nya alụwa wuu lẹlẹ. Ị ya ang-ẹwụ ịlẹ kị go wuu du kịla adịrahụ nyaa ị-ịDamasịkọsị.

²⁴Ịnọ angịdẹwụ nya ala iSiriya la pyịnyẹng, Amkpaa tị họ ị kụrụ angịdẹwụ nya ala iJuda kị ju iru gwaa. Ang odudu ri yẹkẹẹ ala iJuda nyẹẹkpẹ da Amkpaa Ohe Oluhye nya adaa igogo anyị. Ịịwẹ Ohe Oluhye à bwu yẹ iJowachị akama lẹ.

²⁵Ị họọ ang aboji-aboji. Ụka ká angịdẹwụ nya ala iSiriya rụ kpá, angị imiiye ịhyẹ nya alụkụrwọ nyamwụ kọ jwoo kị ka nwọọ, chajị nyọlẹ kọ nwụ ịSẹkaraya ọnyị nya iJehoyada. Ị nwọọ ụka kọ nọnọ ị-ịbẹẹdị nyamwụ. Ị jwoo eji e-Epweji nya iDevidi, i-iworu nya ịdịrịhụ tị ka.

²⁶Angịlẹ kị nwọọ ri ịSabadị ọnyị nya ọnyang nya ala Amọn ọhẹ ká ẹnyị nyamwụ ri iChimiyatị bala iJehosabadị ọnyị nya ọnyang nya ala iMowabụ ọlẹ ká ẹnyị nyamwụ ri iChimriti.

²⁷Ọkpẹẹkpẹẹ nya ẹla chajị nya anyị alẹng nya iJowachị bala ọmwụ ọyẹyẹ u-uhye nyamwụ bala ego jaabwọ kị bwu ma Ube nya Amkpaa nwụ lẹ, ị daa ju ẹ-ẹpwụ nya Oja nya Ụpwụ nya Ịdịrịhụ. Ụka ká iJowachị gbu, Amasiya ọnyị nyamwụ ri adịrahụ kwiwa nyamwụ.