Read idege 2 EGO OGBEGBE 25 Bible Online

2 EGO OGBEGBE 25 - idege bible

2 EGO OGBEGBE 25

¹Amasiya gu ẹka iwo imiiye kụrụ ịrụ ụka dọ dọmwụ nya adịrahụ oriri. Ọ hụ i-iJerusalẹm ri adịrahụ ẹka iwo imiiye kụrụ ihikichu gbẹgbịlẹ. Ẹnyị nyamwụ ri iJehowadin ọla iJerusalẹm.

²Ọ họ ang ịlẹ kị pwoku ị-ịlahị nya Amkpaa. Ọ́ tị họ lọkịlẹtụ ookpokpo ka.

³Ụka ká Amasiya yẹta rịrị e-eji giri-giri lala adịrahụ lẹ, ọ go alegbeju ịlẹ kị nwụ adamwụ nwụ ịnyịnyị lẹlẹ.

⁴Ọ́ tị nwụ anyị nya alegbeju ịịwa ka. Ọ ju ihi nya ehile nya Amkpaa ọlẹ kị da ụ-Ụpwụ nya Ehile nya iMosisi yẹkẹẹ, “Ị́ ka nwụ adịda chajị nya ọ-họ tịpyọ nya anyị ka, ị́ tị ka nwụ anyị chajị nya ọ-họ tịpyọ nya adịda ka ịnyịnyị. Ọngọnọọng ka gbu chajị nya ang onyobyi ọhọhọ nya ịlọmwụ-ịlọmwụ.”

⁵Amasiya Adịrahụ wụrụ alẹng ilimwawụ nya iJuda bala iBenjamịn dala awụlẹ nyọka ri angịdẹwụ. Ọ chaa ebwebweebwo jaabwọ kị bwu ogang datị-datị. Ọọwa, ọ go alegbeju nya ogang kpẹhị rịrị ebwo ịhyẹ ịlẹ kị la angị ụnụnụụnọ bala ebwo ịkịla ịlẹ kị la angị ohwohwoohu lẹlẹ. Ụka kọ waa wuu, ọ yẹ nyori angịdẹwụ nyamwụ la angị ụnọ ohu ịta (300,000). Ịwa wuu ri alẹng ịlẹ kị gu ẹka bwu iwo imiiye ka uhye. Ị ri angịdẹwụ ịlahịchịng ịlẹ kị ju agidi nya ẹwụ, kị jẹ-ẹ̀ kpa ịkpachị bala akụmada dẹwụ yẹẹyẹẹ.

⁶Ọ myịmyị diro angịdẹwụ angị ụnọ ohu ookpokpo (100,000) bwu Isirẹlụ kaka baa. Ọ nwụ uri nya angịdẹwụ ịịwa lokpoko onyoowuru ohu (100) chiriri.

⁷Ọlọmwụ nya Ohe Oluhye ọhẹ tị kele kaka byi Amasiya Adịrahụ yẹkẹẹ, “Adịrahụ ee, ā kpa angịdẹwụ nya ala Isirẹlụ ịwẹ ba ịlọng ka ẹwụ koo, chajị Amkpaa-á juwa ta angị bwu ọpyị adịrahụ ọlẹtẹ ịwẹ kpong-kpong ka.

⁸Á meme ká ịwa-à ka du kaka lọngịrị kụrụ ẹ-ẹwụ aalẹ, Ohe Oluhye ka yang ju aluji nyang ụ-ụbwọ. Ọwa-à lọngịrị kaa ya ọkụrụ-kụrụ ha ọngịnyị lee ọ-ya ọngịnyị ha aluji nyamwụ lẹ.”

⁹Amasiya tọ ọlọmwụ ọọwa wo yẹkẹẹ, “Ee lẹ, anyị m̄ tị́ ka họ nya iru nya okpoko onyoowuru ọlẹ kam go kpa kaka nyaa mẹ?” Ọlọmwụ ọọwa wọọ yẹkẹẹ, “Amkpaa ka ya ọ-gụ ọọwa gụ hang tịrẹkpẹ myị.”

¹⁰Ọọwa, Amasiya-à byi angịdẹwụ ịlẹ kọ diro ya nyị tịrẹkpẹ rụ ka ẹpwa mẹ lẹlẹ. Ọọwa, ị ju agbama ọtụka-ọtụka pwuuu ta ala iJuda lẹ, ị rụ ka ẹpwa lẹlẹ.

¹¹Ọọwa, Amasiya-à tụ ịlọmwụ michi lẹ, ọ kpa angịdẹwụ nyamwụ kele ka Ọkpọọ nya Ịma lẹlẹ. Ị dẹwụ kpụ ị nwụ angịdẹwụ nya ala Ẹdọm angị ụnọ iwo (10,000) chiriri.

¹²Ị wu angị ụnọ iwo (10,000) nyaa lahị-lahị, kpaa ka achinege nya ọgbọdọ onwúuu ọhẹ lẹ, ị chaa abwọ kaka gbu u-uhye nya ajwọ ilekpeleji nya ụwa lẹlẹ.

¹³Ụka ọwẹ, angịdẹwụ nya ala Isirẹlụ ịlẹ ká Amasiya ku tịrẹkpẹ lẹẹ jahị kpata lẹ, ị gba mịla epweji nya ala iJuda ịlẹ kị kụ apewa nya ịSameriya lalaala ka ju ka ịBẹtị-ịhọrọn lẹlẹ. Ị nwụ angị ụnọ ịta bala ọ-wụ iru nya ang lụmẹ-lụmẹ wụ kpa rụ.

¹⁴Ụka ká Amasiya kụrụ angịdẹwụ nya ala Ẹdọm kpá kọ ka nyà lẹ, ọ go ijiga nyaa kpa ba ịlọmwụ nyà lẹlẹ. Ọ ya ijiga ịịwa yeji lẹ, ọ gbịgba haa bala ọ-kịla iya ju ila haa lẹlẹ.

¹⁵Ọhọhọ ọwẹ wụ Amkpaa ẹjẹ lụmẹ. Ọọwa, ọ du ọlọmwụ ọhẹ ẹrụ tọ Amasiya lẹ, ọlọmwụ ọọwa-à tọọ wo yẹkẹẹ, “Ịyẹ tị́ du ká kpụ eteji ha ijiga ịlẹ kị dọmwụ la ọngịrị gba angịnyị nyaa kpehe bwu ẹpwụtụbwọ nyang myị ka?”

¹⁶Ọọwa, Amasiya-à chị ọlomwụ ọwẹ ọnụ yẹkẹẹ, “Ụka oyina m̄ tị́ chụng nyọka ri ọngọ jum am adịrahụ irya kpong-kpopng lẹẹ ene-è? Á yọnụ bawụlẹ ka aalẹ, m̀ ka ya kị ka nwụng kpá ā ka yẹ!” Ene ká ọlọmwụ ka ba lẹla oyaya, ọ byi adịrahụ yẹkẹẹ, “Ịnọọ́ọ̀, m̀ jẹ nyori Ohe Oluhye chị eje nyọka tang ayịreji lẹ. Ịnyị à du ká họ ẹlẹwẹ, ká ya ụrụ nyí irya ọlẹ kam wẹẹ jung ajị lẹ.”

¹⁷Ẹnẹhẹ, Amasiya Adịrahụ nya ala iJuda hwẹkpẹ bala angị jwoo irya lẹ, ọ du alẹrụ nyamwụ ịhyẹ kele kaka da iJehowachị Adịrahụ nya ala Isirẹlụ ọnyị nya iJehowahasị ká adamwụ ọgbahị ri iJehu uya yẹkẹẹ, “Á ri ọlẹng aalẹ, à kpehe warị kaka tọm ọ-ọgbẹwụ wẹẹ.”

¹⁸Ọọwa, iJehowachị Adịrahụ nya ala Isirẹlụ à wẹ tịrẹkpẹ du kịla Amasiya yẹkẹẹ, “Ụka ọhẹ juwa ká ujwo-owuru ọhẹ ị-ịgbọdọ nya iLibanọn du ẹrụ tọ ùgboji nya isida yẹkẹẹ, ‘Ya ọnyị nyang ha ọnyị ọlẹng nyam ye mẹ-ẹ̀.’ Ọọwa, iyo ọlẹpwamẹ ọhẹ à tị chịpwụrụ kam lẹ, ọ bwu uhye nya ujwo ọwẹ doo abwọ yịgẹ-yịgẹ lẹlẹ!

¹⁹Amasiya ee, ịnyịlẹhị ịnyị, à kụrụ ala Ẹdọm. Ọọwa, ā wẹẹ myẹ gẹgẹẹgẹ chajị nya ọọwa lẹka le? Aa kpa ahị ohihi nya ọkụrụ-kụrụ nyang ọwẹ ba ẹ-ẹpwa nya ịlọng mẹ. Ịyẹ tị́ du ká wẹẹ bẹẹdọ nya ẹla ọlẹ kọ ka kpa akama wẹ uhye nyang bala ala iJuda angịnyị nyang wuu wẹ mẹ?”

²⁰Amasiya-á tị myị ke ụrụ ka. Ọ ri irya nya Ohe Oluhye nyọka tọọ ayịreji ọọ-lajị nyọlẹ kọ kpụ eteji ha ijiga nya ala Ẹdọm.

²¹Ọọwa, iJowachị Adịrahụ nya ala Isirẹlụ à tụ angịdẹwụ nyamwụ dala awụlẹ, kpaa yahị da Amasiya Adịrahụ nya ala iJuda lẹlẹ. Ị tọ awụlẹ ẹ-ẹwụ ị-ịBẹtị-ịchẹmẹchị i-iJuda.

²²Ala Isirẹlụ kụrụ ala iJuda chẹẹchẹẹ. Angịdẹwụ nyaa nyi epepe rụnyẹ rụ ka ẹpwa.

²³IJehowachị Adịrahụ nya ala Isirẹlụ wu Amasiya Adịrahụ nya ala iJuda lahị-lahị nya ọlagba. Ọọwa, ọ kpọọ bwu ụwa ka iJerusalẹm lẹlẹ. Ọ tụrụ ugulọ nya iJerusalẹm bwu Ogirigba nya Ifurem lalaala ka ju ka Ogirigba Ọlọtụpịrịhyo. Udiyo nya ẹgẹwẹ lala apatẹ ohu ịrwọnyẹ (600) lẹpwụ-lẹpwụ.

²⁴Adịrahụ nya ala Isirẹlụ go okpoko ịgọm bala okpoko onyowuru bala ang-abwọ ị-kpa họ ụkụrwọ u-Ube nya Amkpaa ịlẹ ká anyị ịtụma nya Obẹdị-ẹdọm lẹẹ kpẹhị rịrị bala ang-ụdụ ịlẹpwa nya adịrahụ wuu kpa ba ịlọmwụ rụ ka ịSameriaya. Ọ go angịnyị kpa rụ lala alagba ịnyịnyị.

²⁵Amasiya Adịrahụ nya ala iJuda hịhị kịnyaa kịlahị ẹka iwo kụrụ ịrụ ẹ-ẹkpẹ nyọlẹ ká iJowachị Adịrahụ nya ala Isirẹlụ gbu kpá.

²⁶Ang myị ang ịkịla ịlẹ ká Amasiya Adịrahụ nya ala iJuda họ bwu ọmwụ ọdada gbee pwụ ocheju nya adịrahụ oriri nyamwụ lẹ, ị daa ju ụ-ụpwụ nya Ego nya Ịdịrịhụ nya ala iJuda bala ala Isirẹlụ.

²⁷Bwu ụka ọlẹ ká Amasiya nyẹẹkpẹ da Amkpaa, angịnyị kaa me obyi jwoo i-iJerusalẹm. Ọọwa, ọ rụnyẹ rụ ka epweji nya ịLakichi lẹlẹ. Aluji nyamwụ tị bọọ ka ụwa kaka nwụ.

²⁸Ị hu ogu nyamwụ kpa nyà wẹ iJerusalẹm ụ-ụnyịrẹ lẹ, ị jwoo eji i-iworu nya ịdịrịhụ e-Epweji nya iDevidi lẹlẹ.