Read idege 2 EGO OGBEGBE 26 Bible Online

2 EGO OGBEGBE 26 - idege bible

2 EGO OGBEGBE 26

¹Ụka ọọwa, ala iJuda hu Usiya ọnyị nyamwụ ọnyị nya Amasiya ọlẹ kọ gu ẹka iwo kụrụ ịrwọnyẹ nya adịrahụ kwiwa nya adamwụ.

²Usiya ye epweji nya Elatị tịrẹkpẹ wẹ iJuda bala ọ-mọọ nwụ ụka ká Amasiya adamwụ gbu kpá.

³Usiya gu ẹka iwo kụrụ ịrwọnyẹ ụka kọ dọmwụ nya nyọka ri adịrahụ. Ọ hụ iJerusalẹm ri adịrahụ ẹka iwo ịrụ kụrụ imiiye gbẹgbịlẹ. Ẹnyị nya ịnamwụ à ri iJekoliya ọla iJerusalẹm lẹ.

⁴Usiya Adịrahụ họ ang ọnyịịla ị-ịlahị nya Amkpaa jaabwọ ká Amasiya adamwụ họ.

⁵Ọ myị ẹrụ ha Amkpaa kpẹẹkpẹẹ lụka nya ọhịhị nya ịSẹkaraya ọngọ kaa jwoo irya nyọka ju ihi nya Ohe Oluhye. Jaabwọ kọ dịrẹ Amkpaa kaka ba ịnyịnyị Ohe Oluhye à wahị kụrwọọ lẹ.

⁶Ụka ọhẹm Usiya kele kaka dẹwụ ta ala iFilisitiya. Ọ tụrụ egwalọ nya epweji nya ịGaatị bala ịJabune bala Achịdọdụ beji. Ọọwa, ọ nwụ epweji inyeewe ịlẹ kọ me egwalọ ju o-oye nya Achịdọdụ bala tụ ọpyị nya ala iFilisitiya da wuu lẹlẹ.

⁷Ohe Oluhye dọọ ụbwo kụrụ ala iFilisitiya bala ala Arabụ ịlẹ kị kụ iGurubaalụ bala ala iMeyuni.

⁸Ala Amọn kaa nyẹ ẹpwa ha Usiya. Ọ lọngịrị ọtụka-ọtụka gbee ká ohi oruru nyamwụ pwụ Ijipiti.

⁹Usiya me ebe iluhye ịnyịịngịrị i-iJerusalẹm ẹ-ẹga nya Ogirigba Ọlọtụpịrịhyo bala Ogirigba Ọlọkpọọ bala ẹga ká ugulọ yẹgẹmwụ.

¹⁰Ọ me ebe iluhye ịnyịịngịrị u-ugbileji bala ọ-wụ ẹmwụ nya enyi lụmẹ-lụmẹ ịnyịnyị, chajị ọ la iru nya iyo ileji ọ-mwụ nya ịgbọdọ ịlọmwẹnụ-obyi bala ụteeji. Ang-ẹrụ ọhọhọ họọ. Lẹẹlẹ, ọ la iru nya alụkụrwọ ịlẹ kị kaa kpẹhị rịrị ang-ẹrụ bala ẹrụ nya alakọnụ nyamwụ ịlẹ kị ji ikiti bala ịlọpyị i-ju eyo.

¹¹Ọ la iru nya angịdẹwụ ịlẹ kị nwụlanọ nya ẹwụ ụka wuu. IJeyẹlụ bala ịMaaseya à ri akịraa ị-da ẹnyị nya angịdẹwụ ịwẹ ju ebwebweebwo lẹ. ỊHananiya kọ ri ọngọhẹ nya alụkụrwọ nya adịrahụ à kpẹhị rịrị angịdẹwụ ịịwa lẹ.

¹²Alegbeju angị ụnọ imiiye da angị ohu ịrwọnyẹ (2,600) ịlẹ kị kpẹhị rịrị ogang datị-datị à ri alegbeju nya angịdẹwụ ịwẹ lẹ.

¹³Angịdẹwụ ilekpeleji nyaa wuu la angị ụnọ ohu ịta da ụnọ irwiye da angị ohu ịrụ (307,500).

¹⁴Ang-abwọ nya ẹwụ ịlẹ ka Usiya ya ha angịdẹwụ ịwẹ ri akụmada bala ịkpachị bala okpo ịkụrụ egbeju bala ịwụrụ iloje-oje bala eda bala ịcha bala ajwọ ịlẹ kị ka kpa da ọmẹ nyaa.

¹⁵Alịbàńg nyamwụ họ injin ịlẹ kị ya rịrị u-uhye nya egwalọ bala ịtụpịrịhyo ila iJerusalẹm nyọka kpa da ịcha bala ajwọ ịtụka-ịtụka bwu ụwa. Ohi oruru nyamwụ pyebile tụ ẹga myị ẹga da wuu. Amkpaa dọọ ụbwọ lụgbẹyị ọlẹbyẹbyị lụmẹ gbee kọ la ọngịrị ọtụka-ọtụka.

¹⁶Ụka ká Usiya Adịrahụ la ọngịrị ịnyị lẹ, ọ hi ọbọọchẹ lẹlẹ. Ọọwa-à ju ọmwụ nya ayịreji ọtata nyamwụ lẹ. Ọ họ ọhọbịrị ba Amkpaa Ohe Oluhye nyamwụ bwula o-kele ka ẹga ịgọgọ nyọka ju iya nya ịtangare ila lịlọmwụ u-uhye nya ogidi nya ịtangare.

¹⁷Ụka ọọwa, Asariya olegbeju okiliya bala angịkiliya ịlọngịrị bala o-ju ugbodu angị iwo ineku ịkila dịrẹ adịrahụ kele

¹⁸kị ka chọọ ọnụ. Ọọwa, ị byoo yẹkẹẹ, “Usiya ee, ọ pwoku ká ka kịla iya nya ịtangare ha Amkpaa ka. Angịkiliya kị ri anyị ịtụma nya Erọn ịlẹ kị chị ịgọgọ ju kẹnẹ-kẹnẹ à ri angị kaa kịla iya ọwẹ lẹ. Kpehe hi ẹga ịgọgọ ọlẹ mẹ. À họ ọhọbiri ba Amkpaa lẹ. Ọ́ ka wahị kụrụng kaka.”

¹⁹Usiya godayị lẹja nya iya nya ịtangare ụ-ụbwọ ịkịka nya ogidi nya iya nya ịtangare. Ẹla nya angịkiliya ịwẹ wọọ ẹjẹ lụmẹ. Ahyaahị lẹ ẹdụrụ olugba nya ịnyịrọ à kpehe i-itochi nyamwụ lẹlẹ.

²⁰Ụka ká Asariya olegbeju okiliya bala angịkiliya ịkịla chẹhị ka itochi nyamwụ kị yẹ ẹdụrụ olugba nya ịnyịrọ ọwẹ kọ kpehe i-itochi nyamwụ, ị kwoo lakụ-lakụ kpehe bwu Ube nya Amkpaa. Ọwa ayịdang dọmwụ juwa chị agaga nyọka kpehe, chajị Amkpaa yọọ akama lẹ.

²¹Usiya Adịrahụ ri ọlẹdụrụ olugba nya ịnyịrọ ọwẹ gbẹnụ-gbẹnụ kọ gbu. Ọ́ tụtụm yẹta chị Ube nya Amkpaa myịmyị kaka. Ị chọọ ịgọ kaka kụ ẹpwa nya ịlọmwụ hi angịkịla. Ị hu iJotam ọnyị nyamwụ kpẹhị rịrị lala adịrahụ nya ọpyị.

²²Angị ịkịla ịlẹ kị họ lụka nya adịrahụ oriri nya Usiya bwu ọmwụ ọdada gbee ka pwụ ocheju lẹ, Ayịsaya ọlọmwụ ọnyị nya Amọsị à daa ju ụ-ụpwụ lẹ.

²³Ụka ká Usiya gbu, ị jwoo eji ọ-ọnụ nya iworu nya ịdịrịhụ. Ị́ jwoo eji i-iworu nya ịdịrịhụ mịlẹ-mịlẹ ka chajị nyọlẹ kọ ri ọlẹdụrụ olugba nya ịnyịrọ. IJotam ọnyị nyamwụ à ri adịrahụ kwiwa nyamwụ lẹ.