Read idege 2 EGO OGBEGBE 28 Bible Online

2 EGO OGBEGBE 28 - idege bible

2 EGO OGBEGBE 28

¹Ehasị gu ẹka iwo imiiye ụka kọ dọmwụ nyọka ri adịrahụ. Ọ hụ i-iJerusalẹm ri adịrahụ ẹka iwo kụrụ ịrwọnye. Ọ́ họ abwẹla dịrẹ ọgụ ẹpẹtẹ ọnyịịla nya iDevidi adamwụ ogogo ka. Ọ họ ang ịtịpyọ ị-ịlahị nya Amkpaa.

²Ọ dịrẹ ọgụ ẹpẹtẹ nya ịdịrịhụ nya ala Isirẹlụ. Ọ họ ekpeku nya ojiga nya ịBaalụ.

³Ọ ju ịtangare ila ọ-Ọkpọọ nya iHinọm. Ọ domwụ ya anyị alẹng nyamwụ kịla iya ha ijiga jaabwọ ká alẹpwụma ịlẹ ká Amkpaa ku hi ẹga da ha ala Isirẹlụ kaa họ.

⁴Ọọ kịla iya bala o-ju ịtangare ila a-ada ị-kpụ ijiga bala u-uhye nya ikiti bala okoji ọ-kpụ ụrụrụ ọnyị myị ọnyị wuu.

⁵Ajị nyọlẹ ká Ehasị Adịrahụ họ ọtịpyọ lẹ, Amkpaa Ohe Oluhye nyamwụ ya iwe da adịrahụ nya ala iSiriya wẹ kaka dẹwụ kụrwọọ bala o-go iru nya angịnyị nyamwụ lụmẹ-lụmẹ nya alagba kpa rụ ka ịDamasịkọsị. Amkpaa ya iwe da angịdẹwụ nya ala Isirẹlụ wẹ kaka dẹwụ kụrụ Ehasị kpụ ị nwụ iru nya angịdẹwụ nyamwụ.

⁶Ẹ-ẹpwụ nya ẹnụtụrụ ookpokpo, iPeka Adịrahụ nya ala Isirẹlụ kọ ri ọnyị nya ịRẹmaliya nwụ angịdẹwụ ịlahịchịng nya ala iJuda angị ụnọ ohu da ụnọ iwo imiiye (120,000). Amkpaa ya iwe ọwẹ da, chajị ala iJuda nyẹẹkpẹ da Amkpaa Ohe Oluhye nya adaa igogo anyị.

⁷Ụka ọọwa, ọngọdẹwụ nya ala Isirẹlụ ká ẹnyị nyamwụ ri iSikiri nwụ ịMaaseya ọnyị nya Ehasị Adịrahụ bala Asirikam olegbeju nya ẹpwa nya adịrahụ bala Elikana kọ ri olegbeju ọ-ba adịrahụ ba.

⁸Ịnọ ala iJuda ri aanịna nya ala Isirẹlụ, angịdẹwụ nya ala Isirẹlụ tị go anyang bala anjwo angị ụnọ ohu imiiye (200,000) nya alagba kpa rụ bwu iJuda kele ka ịSameriya. Ị go iru nya ang-ẹwụ kpa rụ ịnyịnyị.

⁹Ụka ọọwa, ọlọmwụ nya Amkpaa ọhẹ ọlẹ kị wụrụ Odẹdị juwa kọ kụ ị-ịSameriya. Ọ kpehe kele kaka tọ angịdẹwụ nya ala Isirẹlụ kị juwa jẹ nyà lẹ, ọ byaa yẹkẹẹ, “Amkpaa Ohe Oluhye nya adanụ igogo à wụ ẹjẹ ta ala iJuda du kọ họ anụ kụrwaa-à wẹ lẹ. Anụ tị họ kpoye nya oyi bwụla ọ-nwụ iru nyaa jẹ olujwo-ka. Ẹlẹwụ wu Ohe Oluhye ọyị lẹ-ẹ̄.

¹⁰Ọọwa, ānụ wẹẹ go alẹng bala anyang bwu iJerusalẹm bala iJuda nyọka ri anyịhị nyanụ lẹka le? Anụ ayịdang jẹ kanụ tị̀tị̀ họ ang inyibyi ba Amkpaa ịnyịnyị ka-á?

¹¹Anụ wo mẹ, alagba nyanụ ịwẹ ri aananụ alẹng bala anyang. Anụ tụụbwọ hyaa rụ. Ó-ri ịnyị ka aalẹ, Amkpaa ka wụ ẹjẹ onyobyi-obyi tanụ.”

¹²Alegbeju nya ala Isirẹlụ angị ine ịhyẹ ịlẹ ká ẹnyị nyaa ri Asariya ọnyị nya iJehohanan bala iBerekiya ọnyị nya iMechilemotu bala iJehisikiya ọnyị nya ịChalum bala Amasa ọnyị nya ịHadulayị pwa ẹlẹwẹ ká angịdẹwụ nya ala Isirẹlụ họ ịnyịnyị.

¹³Ị byi angịdẹwụ ịịwa yẹkẹẹ, “Ānụ kpa alagba nyanụ ịwẹ wẹ ẹgẹlẹ koo! Ahị họ tịpyọ lụmẹ-lụmẹ ba Amkpaa lẹẹ ene, du ká agbama nyamwụ wẹẹ wuru yahị da ala Isirẹlụ. Ọọwa, ānụ juwa myịmyị-ị̀ kpa abyị ọkịla kaka ba ịịwa u-uhye lẹ-ẹ́?”

¹⁴Ọọwa, angịdẹwụ à tụ hi alagba ịịwa a-ahị nya angịnyị bala alegbeju nyaa wuu lẹlẹ.

¹⁵Alẹng angị ine ịhyẹ ịlẹ kị chụ ya ang ịkụrụ-kụrụ ha alagba ịwẹ bwu ẹpwụ nya ang-ẹwụ ịlẹ ká angịdẹwụ kpa nyà. Ị ya ịwụrụ haa kụrụ bala ọ-ya egbatẹ haa ju. Ị ya ang oriri haa ri bala enyi haa nwa yẹẹyẹẹ lẹ, ị gu ida nya olivu ju abẹ nyaa lẹlẹ. Ị ya angịlẹ ká ịnyịrọ chaa pyẹpyẹ kịla ọ-ka jẹdịyẹ kịla hụ i-ibyiyóp lẹ, ị kpaa wuu tịrẹkpẹ ka ọpyị nya ịlaa kaka ju ka iJeriko Epweji nya Ịrị lẹlẹ. Ọọwa, ịwa-à rụ tịrẹkpẹ ka ịSameriya lẹlẹ.

¹⁶Lụka ọwẹ, Ehasị Adịrahụ nya ala iJuda bịlẹ adịrahụ nya ala Asiriya kọ ka dọọ ụbwọ kụrụ aluji nyamwụ.

¹⁷Ala Ẹdọm myịmyị wuleji be ala iJuda ẹpwa kpụ ị wu angịnyị lụmẹ-lụmẹ kpa rụ.

¹⁸Lụka ọwẹ-ọwẹ, ala iFilisitiya juwa be epweji nya ala iJuda ịlẹ kị kụ ọ-ọmwụ nya ịgbọdọ bala edii ẹpwa ịnyịnyị. Ị lẹẹ kụrụ epweji nya ịBẹtị-ịchẹmẹchị bala Ayịjalọn bala iGederotu bala ẹpweji ịtụka iSoko bala iTimna bala iGimso tụ epweji ichiche ịlụwa kpụ ị kụ ụwa wuu ẹpwa lẹ.

¹⁹Ajị nyọlẹ ká Ehasị Adịrahụ nya ala iJuda yori chị angịnyị nyamwụ ẹ-ẹgọ nyọka họ ang onyobyi bala ọlẹ kọọwa ayịdang á họ kpẹẹkpẹẹ ẹ-ẹga nya Amkpaa ka à du ká Amkpaa kpa akama ịwẹ chị iJuda ọgụ lẹ.

²⁰Ụka ọọwa, iTigilatị-ịpịlẹsẹẹ Adịrahụ ọtụka nya ala Asiriya wẹ kaka tụ ila yi Ehasị ọkọkọ nyọka dọọ ụbwọ.

²¹Ọọwa, Ehasị à nwụla ang-ụdụ bwu Ube nya Amkpaa bala ẹpwa nya adịrahụ tụ ẹpwa nya alegbeju ịlọpyị nyamwụ wuu kpa kaka nyẹ ẹpwa ha adịrahụ ọtụka nya ala Asiriya lẹlẹ. Ọọwa-á tị jụ ọnụ nya ẹlẹlẹhẹ họ myị ka.

²²Ụka ká akama ịwẹ juwa lụmẹ kịlahị-ịlahị wẹwẹ, ọọwa, Ehasị à juwa họ ang onyobyi ba Amkpaa gụ olene wẹẹ lẹ.

²³Ọ kịla iya ha ijiga nya ala iSiriya angịlẹ kị lẹẹ dẹwụ kụrwọọ, chajị ọ ya i-irya nyamwụ yẹkẹẹ, “Ijiga ịwẹ à da ịdịrịhụ nya ala iSiriya ụbwọ lẹ. Ị ka dam ụbwọ ịnyịnyị ó-ri kam kịla iya haa.” Akama ị tị kpa wọọ bala ẹpwụma nyamwụ kem lẹ.

²⁴Ọ́ ba ọọwẹ ka, Ehasị go ịja bala ang-abwọ ịlube ịgọgọ wuu lẹ, ọ baa ene yịgẹ-yịgẹ lẹlẹ. Ọ tụ Ube nya Amkpaa ku lẹ, ọ me ada ị-kpụ ijiga tụ ẹga myị ẹga nya iJerusalẹm wuu da lẹlẹ.

²⁵E-epweji ọnyị myị ọnyị wuu i-iJuda, ọ me ada ị-kpụ ijiga ẹga kị ka ju ịtangare ila ha ijiga nya alẹpwụma ịkịla. Ịịwẹ ọ bwu du agbama ju Amkpaa Ohe Oluhye nya adamwụ igogo anyị lẹlẹ.

²⁶Ang myị ang ịkịla ịlẹ kị họ lụka nya adịrahụ oriri nyamwụ bwu ọmwụ ọdada kele ka ocheju wuu lẹ, ị daa ju ụ-ụpwụ nya Ego nya Ịdịrịhụ nya iJuda bala Isirẹlụ.

²⁷Ụka ká Ehasị Adịrahụ gbu, ị jwoo eji i-iJerusalẹm, i-iworu nya ịdịrịhụ tị ka. Ọọwa, iHesekaya ọnyị nyamwụ à ri adịrahụ kwiwa nyamwụ lẹlẹ.