Read idege 2 EGO OGBEGBE 29 Bible Online

2 EGO OGBEGBE 29 - idege bible

2 EGO OGBEGBE 29

¹IHesekaya gu ẹka iwo imiiye kụrụ ịrụ ụka kọ dọmwụ nyọka ri adịrahụ nya ala iJuda. Ọ hụ i-iJerusalẹm ri adịrahụ ẹka iwo imiiye kụrụ ihikichu gbẹgbịlẹ. Ẹnyị nya ịnamwụ ri Abija ọnyị nya ịSẹkaraya lẹ.

²Ọ họ abwẹla ọ-kpu Amkpaa ịpyọ lala iDevidi adamwụ ogogo.

³Ẹ-ẹpwụ nya ọya ọhọhẹ nya ẹka ọlẹ ká iHesekaya ri adịrahụ, ọ wụrụ ogirigba nya Ube nya Amkpaa da dodo lẹ, ọ ya ị nwụlaa lẹlẹ.

⁴Ọ wụrụ angịkiliya bala ala iLivayị ịhyẹ kaka jịra ọdọda ọlọmwẹnụ-ụtụrụ nya Ube nya Amkpaa.

⁵Ọọwa, ọ byaa yẹkẹẹ, “Anụ ala iLivayị ee, anụ wo mẹ-ẹ. Anụ chị ịgọgọ ju ịlọnụ, kanụ họ ka Ube nya Amkpaa Ohe Oluhye nya adahị igogo ā la charị-charị mẹ. Anụ ka tụ ang myị ang ọchịrị kịnyaa hi Ube Ịgọgọ.

⁶Adahị igogo anyị-ị́ họ kpẹẹkpẹẹ ẹ-ẹga nya Amkpaa Ohe Oluhye nyahị ka. Ị họ ang ịtịpyọ ị-ịlahị nyamwụ. Ị nyẹẹkpẹ da Amkpaa bala Ube Ịgọgọ nyamwụ. Ị gu ahị gboo hyoo.

⁷Ị tụ ọnang nya Ube Ịgọgọ ku, mịrị itinika ịlụwa. Ị hịnyọ la ịtangare o-ju ila bala iya ị-rụ ila ọkịlaakịla u-Ube Ịgọgọ nya Ohe Oluhye nya ala Isirẹlụ.

⁸Ajị nya ọọwa-à du ká Amkpaa wụ ẹjẹ ta ala iJuda bala ala iJerusalẹm lẹ. Ọ họ ká iwe-ahụrụ nyahị la angịnyị uhi-uhi bala o-wu angịnyị ejiri bala ri ẹla-ẹlẹhụ nya angịnyị jaabwọ kaanụ ayịdang wẹẹ kpa ẹhị nya ịlọnụ yẹ.

⁹Ị nwụ adahị anyị ẹ-ẹwụ. Ị wu ịhụ bala anyị nyahị kpa rụ kaka ri anyịhị.

¹⁰“Lẹẹlẹ, m̀ jam ka nwa iro ta Amkpaa Ohe Oluhye nya ala Isirẹlụ, chajị kọ ka hịnyọ la ọ-wụ ẹjẹ tahị lẹ.

¹¹Anụ anyị nyam ee, anụ họ atịmẹ kaka. Anụ Amkpaa-à chụ nyọka ju iya nya ịtangare ila họọ bala ọ-ka kụ ịlahị nya ịgba ọgbagba họọ lẹ.”

¹²Ala iLivayị ịlẹ nwụlanọ nyọka họ ụkụrwọ ahyaahị jaabwọ ká adịrahụ ya. Angị bwu ogang nya iKohatị ri ịMahatị ọnyị nya Amasayị bala iJuwẹlụ ọnyị nya Asariya. Angị bwu ogang nya iMerarị ri iKichi ọnyị nya Abudi bala Asariya ọnyị nya iJehalẹlẹlụ. Angị bwu ogang nya ịGẹẹchọn ri iJowa ọnyị nya iSima bala Idẹn ọnyị nya iJowa.

¹³Angị bwu ogang nya Elisafan ri iChimri bala iJeyuwẹlụ. Angị bwu ogang nya Asafụ ri ịSẹkaraya bala ịMataniya.

¹⁴Angị bwu ogang nya ịHẹman ri iJehiyẹlụ bala iChimeyi. Angị bwu ogang nya iJedutun ri iChemaya bala Usiyẹlụ.

¹⁵Alẹng ịwẹ wụrụ ala iLivayị aanaa ịkịla kaka jịra lẹ, ị chịl ịlaa ịgọgọ lẹlẹ. Ọọwa, ị dọmwụ nyọka chị ịgọgọ ju Ube Ịgọgọ jaabwọ ká adịrahụ daa ehile ya nyị họ lẹlẹ. lọ gụ gụ ọlẹ ka Amkpaa daa ehile lẹlẹ, Ị họ ụkụrwọ ọọwa kpẹẹkpẹẹ jaabwọ ká Amkpaa mẹjẹ.

¹⁶Angịkiliya jụ ka ẹpwụ nya Ube Ịgọgọ nyọka họ kọ ka la charị-charị. Ị gba ang-ibyi ọnyị myị ọnyị ọlẹ kị yẹ ụ-ụwa kpehe wẹ ọdọda nya Ube Ịgọgọ. Ọọwa, ala iLivayị à gọ ang ịlịnyị wuu kpa chịịrụ ọ-Ọkpọọ nya iKidirọn lẹlẹ.

¹⁷Ị dọmwụ nya ụkụrwọ ọọwa ẹnụtụrụ ọhọhẹ nya ọya ọhọhẹ. Ọ ka pwụ ẹnụtụrụ ọhaneku lẹ, ị họ pwụ ọnụụkpa nya Ube Ịgọgọ lẹlẹ. Ị kịnyaa juwa chị Ube nya Amkpaa ịgọgọ gbee ẹ-ẹpwụ nya ẹnụtụrụ ineku ọkịla. Ẹnụtụrụ iwo kụrụ ịrwọnyẹ ị kpa họ ụkụrwọ ọọwa wuu cheju lẹ.

¹⁸Ụka ọọwa, ala iLivayị kele kaka ya je iHesekaya Adịrahụ yẹkẹẹ, “Ahị họ ọhọhọ nya ọcharị-charị nya Ube nya Amkpaa kpá lẹ. Ogidi okiliya ọ-rụ ila bala itebwuru nya ịkaa ọlịgọgọ tụ ang-abwọ nyaa wuu la charị-charị lẹ.

¹⁹Ang-abwọ ịlẹ wuu ká Ehasị Adịrahụ go kpehe hi Ube nya Amkpaa lụka kọ nyẹẹkpẹ da Amkpaa lẹẹ, ahị kpaa nyà wuu lẹ. Ị juwa ị-ịlahị nya ogidi nya Amkpaa lẹ. Ị la charị-charị nyọka kpa họ ụkụrwọ myịmyị lẹ.”

²⁰Lụtụrụ gbegbegbe nya ahị ọpyẹpyẹ ọọnamwụ, iHesekaya Adịrahụ à wuleji lẹ, ọ tụ alegbeju nya epweji wuu guru lẹ, ị kele ka Ube nya Amkpaa lẹlẹ.

²¹Ị ya ịna irwiye bala imilodo irwiye bala anyị-ịkpịlọ irwiye bala iyichi irwiye kịla iya ọ-hụ́ ọhọbịrị chajị nya alugbiyegu nya adịrahụ bala ala iJuda bala ịnya ọcharị-charị nya Ube nya Amkpaa. Adịrahụ byi angịkiliya anyị ịtụma nya Erọn ya nyị ya iyo ịwẹ kịla iya u-uhye nya ogidi nya Amkpaa mẹ.

²²Angịkiliya nwụ ịna lẹ, ị nyí ịwọ nyaa hụ ogidi lẹlẹ. Ị nwụ imilodo, ị nyí ịwọ nyaa hụ ogidi ịnyịnyị. Ị nwụ anyị-ịkpịlọ lẹ, ị nyí ịwọ nyaa hụ ogidi ịnyịnyị lẹlẹ.

²³Ụka ohyẹẹkpẹ lẹ, ị kpa iyichi ka ẹga nya adịrahụ bala aluche lẹlẹ. Adịrahụ bala aluche yabwọ nịraa lẹ,

²⁴angịkiliya-à nwaa kịla iya ọ-hụ́ ọhọbịrị lẹ, ị nyi ịwọ nyaa hụ ogidi nyọka họ ọhọhọ nya ọhịnyọhi nya ọhọbiri nya ala Isirẹlụ wuu lẹlẹ. Adịrahụ ayịdang lẹẹ ya nyị kịla iya ọ-rụ ila bala iya ọ-hụ́ ọhọbịrị ịwẹ wọnụ nya ala Isirẹlụ wuu ju.

²⁵IHesekaya Adịrahụ họ kpẹẹkpẹẹ ba ehile ịlẹ ká Amkpaa ya ha iDevidi Adịrahụ bwula ịGadị ọlọmwụ nya adịrahụ bala ịNatan ọlọmwụ jẹ. Ọ ya ala iLivayị godayị u-Ube nya Amkpaa lịchẹchẹ bala ogum̀ bala ẹnwụ nyaa

²⁶ịlẹ kị ri ang i-du ayịlọ nya iDevidi. Angịkiliya godayị lẹkụrwẹ nyaa ịnyịnyị.

²⁷IHesekaya ya nyị kịla iya ọ-rụ ila mẹ. Ụka kị dọmwụ nyọka kịla iya lẹ, angịnyị à juwa mwu eje gwogbo ha Amkpaa lẹ, angị du ang à tị̀tị̀ juwa chị ẹkụrwẹ bala o-du ang-abwọ ịkịla ịlẹ kị ri nya iDevidi Adịrahụ nya ala Isirẹlụ lẹlẹ.

²⁸Alọjịra-jịra ọọwa wuu yẹju lawụlẹ juwa gbịgba jaabwọ ká angị mwu eje juwa mwu bala alẹkụrwẹ juwa chị gbee kị kịla iya kpá.

²⁹Ọọwa, iHesekaya Adịrahụ bala alụwa wuu à hirikpẹẹ gbịgba ha Ohe Oluhye lẹlẹ.

³⁰Ụka ọọwa, iHesekaya Adịrahụ bala alegbeju nya ọpyị byi ala iLivayị nyị mwu ẹjẹ nya ogbo ogwogwo ịlẹ ká iDevidi bala Asafụ ọlọmwụ da. Ịnyị, ịwa wuu à hirikpẹẹ juwa gbịgba ha Ohe Oluhye leje nya ọkẹkẹnị lẹlẹ.

³¹Ọọwa, iHesekaya-à byi aluche yẹkẹẹ, “Anụ la charị-charị ugbẹnyị lẹ. Lẹẹlẹ, anụ kpa iya ọkịlaakịla bala ọhaha nya obe ojiji wẹ Amkpaa mẹ.” Ị ju ihi nya ẹla ọọwa lẹ, ị kpa iya ọkịlaakịla bala ọhaha nya obe ojiji kele lẹlẹ. Angịhyẹ nyaa kpa iyo kele bwu irya nya ịlaa nyọka ya kịla iya ọ-rụ ila ịnyịnyị.

³²Iyo ikiliya ịlẹ kị kpa kele nyọka ya kịla iya ọ-rụ ila ha Amkpaa ri ịna iwo irwiye bala ịkpịlọ ohu (100) bala anyị-ịkpịlọ ohu imiiye (200).

³³Ị kpa ịna ohu ịrwọnyẹ (600) bala ịkpịlọ ụnọ ịta (3,000) kele kaka kịla iya ịnyịnyị.

³⁴Ajị nyọlẹ ká angịkiliya-á ju iru nyọka kịla iya ịịwa wuu ka lẹ, ala iLivayị aanaa daa ụbwọ gbee ká ụkụrwọ-ọ̀ cheju bala ọ-da ka ụka ká angịkiliya ịkịla họ ọhọhọ nya ọcharị-charị nya ịlaa. Ala iLivayị ayịdang kpahị ju ọcharị-charị ọlala nya ịlaa gụ angịkiliya.

³⁵Datị hi iru nya iya ọ-rụ ila ịlẹ kị kịla, angịkiliya jụ eyo nya iyo ịlẹ kị ya kịla iya nya ọhọlawụlẹ ila bala ọ-kịla iya nya ere ịlẹ kịị ya ta iya ọ-rụ ila jẹ̀. Lẹẹlẹ, ị dọmwụ nyọka gbịgba u-Ube nya Amkpaa myịmyị lẹ.

³⁶Ụka ọọwa, iHesekaya Adịrahụ bala angịnyị wuu chị ọkẹkẹnị jaabwọ ka Ohe Oluhye daa ụbwọ kị jụ ang ịwẹ wuu họ ahyaahị.