Read idege 2 EGO OGBEGBE 3 Bible Online

2 EGO OGBEGBE 3 - idege bible

2 EGO OGBEGBE 3

¹ISolomọn dọmwụ nya Ube Ịgọgọ ọnwụnwụ i-iJerusalẹm ọ-ọgbọdọ nya iMoriya ẹga ká Amkpaa chị ịlọmwụ ehe mẹjẹ Adịrahụ iDevidi adamwụ. Ẹga ọọwa ri ẹga o-ru ajẹ nya ang-ẹrụ nya Arawụna ọla iJebusi.

²Ọ dọmwụ nya ụkụrwọ ọwẹ ẹ-ẹpwụ nya ọya oheeye nya ẹka ohene nya adịrahụ oriri nyamwụ.

³Udiyo ọlala nya itiwe nya Ube nya Amkpaa ọọwa ri apatẹ iwo ihikichu. Ẹpwụ ojuju nyamwụ ri apatẹ iwo ịta.

⁴Ọnụụkpa ọlịlahị nyamwụ la udiyo ta ẹpwụ ojuju nya Ube Ịgọgọ meme ọlẹ kọ ri apatẹ iwo ịta. Uhye ọlala nyamwụ ri apatẹ ohu ookpokpo da iwo ineku.

⁵Ọ ya ene nya okoji ịsayịpịrẹsị ba egwalọ ịlẹpwụ nya ẹpwụ ọgbẹgbịlẹ. Ị kpụ okpoko ịgọm kụrwaa ene kị gu ịna nya ihwoto nya ịrị bala agba baa u-uhye.

⁶Adịrahụ họ Ube nya Amkpaa ịnyangga lajwọ ịnyịịla-ịnyịịla bala okpoko ịgọm ịlẹ kị ra bwu ọpyị nya ala ịPavayim.

⁷Ị kpụ okpoko ịgọm kụrụ egwalọ bala ịtachị bala ekpileku bala ọnang ịlụwa wuu. Ị kọ ihwoto nya alegu-icherubu ba egwalọ nyamwụ.

⁸Ọ me ube ọlẹpwụ ọlẹ kị wụrụ Ẹga Ọlịgọgọ Ọgụgụ. Udiyo nyamwụ ta ẹpwụ ojuju nya Ube Ịgọgọ ọlẹ kọ ri apatẹ iwo ịta meme. Ẹpwụ ojuju nyamwụ ri apatẹ iwo ịta ịnyịnyị. Okpoko ịgọm ọlahịchịng ohu ịrwọnyẹ (600) ị ya kpụ kụrụ egwalọ nya Ẹga Ọlịgọgọ Ọgụgụ lẹ.

⁹Ilo ọlala nya iloo nya okpoko ịgọm ịlẹ kị kpụ họ ụkụrwọ lala eku nya okolo. Ị kpụ okpoko ịgọm kụrụ egwalọ nya ebe iluhye ịnyịnyị.

¹⁰ISolomọn ya ị họ alegu-icherubu imiiye ịlẹ kị kpụ okpoko ịgọm kụrụ. Ị ya alẹgu-icherubu ịịwa guru ẹ-Ẹga Ọlịgọgọ Ọgụgụ wuu.

¹¹Udiyo ọlala nya ụchwọ nya olegu-icherubu ọhẹ la apatẹ irwiye ba ẹhya. Ụchwọ ọọwa nịra kpaa kaka gu ugulọ nya Ube nya Amkpaa. Ụchwọ ọkịla la apatẹ irwiye ba ẹhya ịnyịnyị. Ọ nịra kpaa kaka gu ụchwọ ọhẹ nya olegu-icherubu ọkịla.

¹²Udiyo ọlala nya ụchwọ nya olegu-icherubu ọkịla la apatẹ irwiye ba ẹhya. Ọ nịra kpaa kaka gu ugulọ oloye ọkịla nyamwụ. Ụchwọ ọkịla nyamwụ la apatẹ irwiye ba ẹhya ịnyịnyị. Ọ nịra kpaa kaka gu ụchwọ ọhẹ nya olegu-icherubu nya ọgbanyẹ.

¹³Udiyo nya achwọ nya alegu-icherubu ịwẹ tụchawụlẹ ri apatẹ iwo ịta. Ị haa ịwa imimiiye godayị rịrị yahị da ka ẹpwụ nya ube ọgbẹgbịlẹ.

¹⁴Apwụ o-ke Ẹga Ọlịgọgọ Ọgụgụ wuu ri ọnyịịla-ọnyịịla. Ị jwoo ido onyuukpuukpo bala ọnyọmịla gbuu bala ọnyọmịla nyẹrị-nyẹrị. Ị họ ịnyangga nya ihwoto nya alegu-icherubu bọọ.

¹⁵ISolomọn ya ị me ịtachị imiiye rịrị ị-ịlahị nya Ube Ịgọgọ. Uhye ọlala nya ọnyọnyọọnyị nyaa la apatẹ iwo imiiye kụrụ irwiye. Ọnyọnyọọnyị la egbeju onmee ọlẹ kị ya kụrwọọ u-uhye. Uhye ọlala nyamwụ ri apatẹ irwiye ba ẹhya.

¹⁶Ị họ uhye nya ịtachị ịwẹ ịnyangga lagba ịlẹ kị kpa daba rị awụlẹ bala egbe nya ipomegiraneti ohu pịlaa rẹẹrẹẹrẹẹ.

¹⁷Ị ya ịtachị imiiye ịwẹ wu eji ọ-ọnụụkpa nya Ube nya Amkpaa. Ị wụrụ ọtachị ọlẹ kọ weji e-edii ịJakin[1]. Ị wụrụ ẹnyị nya ọkịla ọlẹ kọ weji koye nya ẹtẹ iBowasị[2].