Read idege 2 EGO OGBEGBE 30 Bible Online

2 EGO OGBEGBE 30 - idege bible

2 EGO OGBEGBE 30

¹Ụka ọọwa, iHesekaya Adịrahụ du ẹrụ ta ala Isirẹlụ bala ala iJuda wuu bala ọ-da ileta du tọ imwawụ nya Ifurem bala ịnya ịManasẹ. Ọ byaa ya nyị kẹwẹ wẹ Ube nya Amkpaa i-iJerusalẹm nyọka la ọhụhụ nya Ang Oriri Ọchịpwụrụ chị ihi ju Amkpaa Ohe Oluhye nya ala Isirẹlụ.

²Adịrahụ bala alegbeju ịtụka yoo tụ ala iJerusalẹm wuu chị eje nyọka la ọhụhụ nya Ang Oriri Ọchịpwụrụ lọya oheeye,

³chajị ọ́ chịkpẹẹ ị lọọ lọya ọhọhẹ ọlẹ kọ ri ụka ọhunọ nyamwụ ka. Ang ọdudu ri ịnọmba nya angịkiliya ịlẹ kị dịlọ hụ́ ịlaa charị-charị á la gbuu ụka ọwẹ ka. Ang ọkịla ri angịnyị á wẹ kaka jịra i-iJerusalẹm lụka ọwẹ lẹka ịnyịnyị.

⁴Obi omeme ọwẹ há adịrahụ bala angịnyị wuu.

⁵Ọọwa, ị wụrụ angịnyị tụ Isirẹlụ da wuu bwu ịDan ẹ-ẹtẹ lalaala ka ju ka iBiyẹchẹba e-edii kị ka wẹ iJerusalẹm ju iru gụ olene-ene nyọka la ọhụhụ nya Ang Oriri Ọchịpwụrụ jaabwọ ká ehile ya lẹlẹ.

⁶Ụka ọọwa, alẹrụ ga lileta o-bwu ẹga nya adịrahụ bala alegbeju ịtụkụ yoo tụ iJuda bala Isirẹlụ da wuu. Ẹla ọlẹpwụ nya ileta ọọwa ri yẹkẹẹ, “Anụ ala Isirẹlụ ee, anụ hi lọhịhị, be ẹpwụtụbwọ nya ịdịrịhụ nya ala Asiriya ịlẹ kị kụrụụnụ lẹ! Lẹẹlẹ, anụ nyà tịrẹkpẹ chị Amkpaa Ohe Oluhye nya Ebiraham bala Ayịsiki bala iJekọbụ ọgụ mẹ. Aalẹ, ọ tịtị ka nyà chịnụ ọgụ.

⁷Ānụ họ lala adanụ igogo anyị bala ala Isirẹlụ aananụ ịkịla ịlẹ kị nyẹẹkpẹ da Amkpaa Ohe Oluhye nyaa koo. Anụ tị́ yẹ lịlọnụ jaabwọ ká Amkpaa yaa akama onyobyi-obyi-ì wẹ lẹ.

⁸Ānụ la egbeju-ọngịrị lala ịwa kaka. Anụ ju ihi nya Amkpaa kanụ wẹ Ube Ịgọgọ nyamwụ ọla iJerusalẹm ọlẹ kọ chị ịgọgọ ju gbe oyi myị oyi mẹ. Anụ gbịgba họọ chajị kọ ka hịnyọ la ọ-wụ ẹjẹ tanụ mẹ.

⁹Ó-ri kanụ nyà tịrẹkpẹ chị Amkpaa ọgu aalẹ, angịlẹ kị wu aananụ kpa rụ ka agba ka yẹ ahyẹẹrwẹrwa nyaa kpụ ị ka bahyaa nyà tịrẹkpẹ we ọpyị ọlẹ wẹ́ẹ̀. Amkpaa Ohe Oluhye nyanụ ri ọlọnahị bala ọlahyẹẹrwẹrwa. Lẹẹlẹ, ó-ri kanụ nyà chọọ ọgụ, ọ́ ka nyẹẹkpẹ danụ kaka.”

¹⁰Alẹrụ ịịwa ga tụ epweji ilimwawụ nya Ifurem bala ịManasẹ lalaala ka ju ka imwawụ nya imwawụ nya iSebulọn ẹ-ẹtẹ. Ẹhụ-ẹhụ alụwa wuu à tị hụlọ jwaa bala ọ-kpaa họ lẹ.

¹¹Angị ịmanyị-ịmanyị bwu imwawụ nya Achẹẹ bala ịManasẹ bala iSebulọn kẹnẹ-kẹnẹ à wẹ iJerusalẹm lẹ.

¹²Ụka ọwẹ, Amkpaa gu ọkịlẹtụ nya ala iJuda gbịla du kị ya irya nyaa wuu da lawụlẹ lookpokpo juwa ju ihi nya ehile ịlẹ ká adịrahụ bala alụkụrwọ nyamwụ da ba ẹla nya Amkpaa jẹ.

¹³Ụka ọọwa, iru nya angịnyị lụmẹ-lụmẹ warị kaa jịra i-iJerusalẹm lọya oheeye nyọka la ọhụhụ nya Ịkaa Ọmịrịị-mịrị-ka.

¹⁴Ị tụrụ ada ị-kpụ ijiga bala ịlẹ kịị ju ịtangare ila ịla iJerusalẹm wuu lẹ, ị gyaa kpa kaka hụrụ ọ-Ọkpọọ nya iKidirọn lẹlẹ.

¹⁵Ẹnụtụrụ iwo kụrụ ine nya oya oheeye ọwẹ lẹ, ị nwụ anyị-ịkpịlọ okiliya nya Ang Oriri Ọchịpwụrụ lẹlẹ. Ụka ọọwa, angịkiliya bala ala iLivayị ịlẹ kị da ịlọ hụ́ ịlaa charị-charị ene nya ụka ọwẹ ka la ịlaa oyoyi mọmbọọ. Ọọwa, ị kele kaka chị ịgọgọ ju ịlaa ene kịị kpa iya ịkịlaakịla ka ẹpwụ nya Ube nya Amkpaa lẹlẹ.

¹⁶Ị kụ ẹgẹgẹẹga nya ụkụrwọ ọlẹ kọ ri nyaa jaabwọ kị da ẹ-ẹpwụ nya ehile nya iMosisi ọngịnyị nya Ohe Oluhye. Ala iLivayị kpa ịwọ nya iyo okiliya wẹ angịkiliya lẹ, angịkiliya-à nyoo hụ ogidi lẹlẹ.

¹⁷Ajị nyọlẹ ká iru nya angịnyị lụmẹ-lụmẹ ịlụwa-á chị ịgọgọ ju ịlaa ka lẹ, ala iLivayị nwụ anyị-ịkpịlọ nya Ang Oriri Ọchịpwụrụ nyaa haa bala o-hu anyị-ịkpịlọ ịịwa ha Amkpaa.

¹⁸Iru nya angị bwu imwawụ nya Ifurem bala ịManasẹ bala Isakaa bala iSebulọn juwa kị chị ịlaa ịgọgọ ene ka, ị tị kpoye nya ehile nya Ohe Oluhye juwa ri Ang Oriri Ọchịpwụrụ. IHesekaya Adịrahụ tị raabwọ chajị nyaa yẹkẹẹ, “Ahụ Ohe Oluhye ọnyịịla ee, aa hịnyọhi hi ha angịlẹ wuu

¹⁹kị wẹẹ gbịgba hang ahụ Ohe Oluhye nya adahị igogo anyị lokịlẹtụ ookpokpo mẹ, ọ ri nya ịlẹhị ị́ la charị-charị jaabwọ ká ehile ya ka.”

²⁰Amkpaa wẹ abwọ ọrịrị nya iHesekaya. Ọ́ yẹ angịịwa akama ka.

²¹Ala Isirẹlụ ịlẹ kị wẹ iJerusalẹm wuu la ọhụhụ nya Ịkaa Ọmịrịị-mịrị-ka ọwẹ jịra ẹẹnụtụrụ irwiye gbẹgbịlẹ lọkẹkẹnị ọtụka-ọtụka. Ala iLivayị bala angịkiliya juwa mwu eje gwogbo ha Amkpaa lọngịrị nyaa wuu ẹnụ myị ẹnụ.

²²IHesekaya mịla oja ha ala iLivayị wuu chajị nya ọ-jẹ kpẹhị ju ẹrụ ọmyịmyị ha Amkpaa kpẹẹkpẹẹ. Ị la ọhụhụ ọwẹ ẹnụtụrụ irwiye gbẹgbịlẹ juwa kịla iya nya ọhọlawụlẹ bala o-ri iyo ịlẹ kị ya kịla iya bala o-gwogbo nya Amkpaa Ohe Oluhye nya adaa igogo anyị.

²³Ọọwa, aluche wuu à myị ju awụlẹ nyọka la ọhụhụ ọwẹ ẹnụtụrụ irwiye ịkịla myịmyị lẹ, ị kịnyaa lọọ ẹ-ẹpwụ nya ọkẹkẹnị ọchịchị lẹlẹ.

²⁴IHesekaya Adịrahụ ya ịna ụnọ ookpokpo (1,000) bala ịkpịlọ ụnọ irwiye (7,000) ha alụma kị ka ya kịla iya. Alegbeju ịtụkụ yoo ya ịna ụnọ ookpkpo (1,000) bala ịkpịlọ ụnọ iwo (10,000) haa ịnyịnyị. Iru nya angịkiliya da ịlọ hụ́ ịlaa charị-charị lụka ọwẹ.

²⁵Ụka ọọwa, ọng myị ọng wuu nya ala iJuda tụ angịkiliya bala ala iLivayị bala angịlẹ kị bwu ẹtẹ nya Isirẹlụ bala angga ịlẹ wuu kị kụ i-iJuda chị ọkẹkẹnị ọtụka-ọtụka.

²⁶Ọkẹkẹnị ọtụka-ọtụka kpeji i-iJerusalẹm, chajị bwu ụka nya iSolomọn Adịrahụ ọnyị nya iDevidi gbee da wẹ ụka ọwẹ lẹ, ọhụhụ ọtụka ọlịịwẹ-ẹ́ ji i-iJerusalẹm lẹka.

²⁷Angịkiliya bala ala iLivayị bịlẹ ká Amkpaa ka wahị kụrụ angịnyị wuu. Ohe Oluhye wo abwọ ọriri nyaa pwụ ẹpwa olepwoohe nyamwụ, ọ wahị kụrwaa.