Read idege 2 EGO OGBEGBE 32 Bible Online

2 EGO OGBEGBE 32 - idege bible

2 EGO OGBEGBE 32

¹Ụka ká Adịrahụ iHesekaya họ ang wuu kpẹẹkpẹẹ ẹ-ẹga nya Amkpaa ịịwẹ lẹ, ịSẹnakeribyi Adịrahụ ọtụka nya ala Asiriya-à be ala iJuda ẹpwa lẹlẹ. Ị wẹ kaka dagaga ju epwejị ịlẹ kị me egwalọ ju ịla iJuda wuu lẹ, ọ byi angịdẹwụ nyamwụ nyị be egwalọ ene kịị nyị yẹtẹ chị epweji mẹ lẹlẹ.

²Ụka ká iHesekaya jẹ ya ịSẹnakeribyi nyị juwa tịtọ nyọka dẹwụ ta iJerusalẹm ịnyịnyị lẹ,

³ọ me obyi ta alegbeju ịtụkụ yoo bala alegbeju nya angịdẹwụ nyamwụ nyọka tụ agbụ nya enyi ilodehe nya epweji ku lẹlẹ.

⁴Iru nya angịnyị tụguru lẹ, ị tụ agbu ịlẹ ká enyi kaa mwụ bwu kaka ju ẹrụ ku lẹlẹ. Irya nyaa ri ị́ tịtọ ká ala Asiriya ka ye enyi ẹ-ẹgẹgẹhẹ ọ-ọnaabwọ nya iJerusalẹm ka.

⁵Ụka ọọwa, iHesekayị kpa alụkụrwọ nwụ̀ egwalọ nya epweji me kị ka lọngịrị giri-giri bala o-me ebe iluhye rịrị egwalọ nya epweji. Ọ ya ị me ugulọ ọkịla odehe nya ugulọ ọwẹ. Ọ myịmyị chị ugulọ ịnyịịngịrị ju ikpirigidi ịlẹ kị chị koye nya ọmwẹnụ-ụtụrụ nya Epweji nya iDevidi. Ọ họ iru nya ang-abwọ nya ẹwụ tụ akụmada lụmẹ-lụmẹ.

⁶Ọ chụ alegbeju nya angịdẹwụ ịlẹ kị kaa kpẹhị rịrị alẹng ilepweji lẹ, ọ byaa ịwa wuu nyị kele kaka jịra i-ikpọdọda ologirigba nya epweji mẹ lẹlẹ. Ọọwa, ọ ya ẹla o-jwaa ọhụ yẹkẹẹ,

⁷“Anụ ju ugbodu kanụ godayị giri-giri. Ānụ ju uhi nya adịrahụ ọtụka nya ala Asiriya lee iru nya angịdẹwụ nyamwụ koo. Ọngịrị ọlẹ kọ ji oye nyahị lụmẹ gụ ọngịrị ọlẹ kọ ji oye nyamwụ.

⁸Ọngịrị nya ọngịnyị ehe amamadiroko ọ kpa lẹ. Amkpaa Ohe Oluhye nyahị ọlẹ kọ ka dahị ụbwọ bala ọ-ka dẹwụ nyahị hahị tị jam tahị.” Ẹla ọlẹ ká adịrahụ ya ta angịnyị nyamwụ-ụ̀ wẹ jwaa ọhụ hiigu-hiigu.

⁹Ụka kọ nọ chẹẹ, ká ịSẹnakeribyi Adịrahụ ọtụka nya ala Asiriya bala angịdẹwụ nyamwụ juwa epweji nya ịLakichi wẹẹ, ọ du alegbeju ịtụkụ yoo ẹrụ ka iJerusalẹm kaka byi iHesekaya bala ala iJuda wuu yẹkẹẹ,

¹⁰“Ịyẹ kpong-kpong anụ tị́ dahịhile du kanụ juwa i-iJerusalẹm nyọlẹ kpá ka angịdẹwụ nyam dagaga junu-ù wẹ-ẹ̀?

¹¹IHesekaya juwa byinu Amkpaa Ohe Oluhye nyanụ nyị ka gbanụ kpehe bwu ẹpwụtụbwọ nyahị. Ọ juwa pịrịịnụ ju kọ ka yanụ gbu imyi bala imyi-enyi ịịlẹ ododu!

¹²Ọwa-à tị́ tụrụ ebe nya ijiga bala ada ikiliya nya Amkpaa lẹẹ, ọ byi ala iJuda bala iJerusalẹm ya nyị gbịgba bala ọ-kịla iya nya ịtangare ogidi ookpokpo kem.

¹³Anụ tị́ wo oja nya ang ịlẹ ká adam igogo anyị bala am ayịdang họ alẹpwụma ịkịla. Ojiga nya alẹpwụma ọhẹ chị alọpyị nyaa da bwu ẹpwụtụbwọ nya adịrahụ ọtụka nya ala Asiriya ẹnẹnẹhẹ lẹ-ẹ́?

¹⁴Ojiga oyina ẹ-ẹgẹgẹhẹ à tị́ chị angịnyị nyamwụ da bwu ẹpwụtụbwọ nyam myị ụka ọhẹ lẹ? Ee lẹ, ịyẹ tị́ du ká ahị juwa nwụnụ gbọọ nyori Ohe Oluhye nyanụ ka chịnụ da myị-ị̀?

¹⁵Ānụ myị ká iHesekaya-ā pịrịịnụ ju lee ọ-kpanụ hwahị koo. Ānụ myị ẹlẹwẹ jwoo koo. Ojiga nya alẹpwụma ọhẹ-ẹ́ chị angịnyị nyamwụ da myị bwu ẹpwụtụbwọ nya adịrahụ ọtụka nya ala Asiriya ọhẹ ẹnẹhẹ lẹka. Lẹẹlẹ, Ohe Oluhye nyanụ-ụ́ ka chịnụ da myị koo!”

¹⁶Alegbeju nya ala Asiriya ịwẹ dọmwụ ya eguru nya ala Amkpaa Ohe Oluhye bala iHesekaya ọnchẹ nyamwụ gụ ịwẹ wẹẹ.

¹⁷Adịrahụ ọtụka nya ala Asiriya ya ẹla hu ẹpẹpẹ ju Amkpaa Ohe Oluhye nya ala Isirẹlụ yẹkẹẹ, “Ijiga nya alẹpwụma ịkịla-á chị angịnyị nyaa da bwu ẹpwụtụbwọ nyam ẹnẹhẹ lẹka. Lẹẹlẹ, Ohe Oluhye nya iHesekaya-á ka gba angịnyị nyamwụ kpehe bwu ụbwọ nyam myị ka ịnyịnyị.”

¹⁸Ala Asiriya ịwẹ da ẹlẹwẹ gboo loja nya iHiburu je ala iJerusalẹm ịlẹ kị kụ u-uhye nya ugulọ chajị nyọka chị uhi jwaa kị ka jẹ-ẹ̀ kụrụ epweji pịlẹtẹ.

¹⁹Ị ya ẹla rụ Ohe Oluhye nya ala iJerusalẹm lala ịnyaa ri ijiga nya angị jẹ Ohe-ka ịlẹ ka angịnyị kaa họ lụbwọ nya ịlaa.

²⁰Ọọwa, iHesekaya Adịrahụ bala Ayịsaya ọlọmwụ ọnyị nya Amọsị à raabwọ jida ju Ohe Oluhye kọ ka daa ụbwọ lẹlẹ.

²¹Ụka ọọwa, Amkpaa du olegu-ẹrụ ọhẹ kele kaa nwụ angịdẹwụ nya ala Asiriya bala alegbeju nyaa wuu gbanggbang. Ọọwa, adịrahụ ọtụka-à rụ tịrẹkpẹ ka Asiriya loyi mọmbọọ lẹlẹ. Ẹnẹhẹ kọ kele ka ube nya ojiga nyamwụ lẹ, angịhyẹ lẹpwụ nya anyị alẹng nyamwụ à bọọ kele kaka nwụ loge nyaa lẹlẹ.

²²Ịịwẹ Amkpaa-à bwu gba iHesekaya Adịrahụ bala ala iJerusalẹm kpehe bwu ụbwọ nya ịSẹnakeribyi Adịrahụ ọtụka nya ala Asiriya bala luji nyaa ịkịla wuu lẹ. Ọ họ okpunyi ji ẹpwarịrị nyaa bala alẹpwụma ịkịla wuu.

²³Iru nya angịnyị juwa kpa ọhaha wẹ Amkpaa i-iJerusalẹm bala ọ-kpa ang-ahị wẹ iHesekaya ịnyịnyị. Bwu ụka ọwẹ kịlahị alẹpwụma wuu ju iHesekaya ihi.

²⁴Ụka ọọwa, ẹdụrụ ju iHesekaya Adịrahụ nya ịlẹhị-ịlẹhị kpá hi ụkụchụ ookpopo kọ ka gbu. Ọọwa, ọ raabwọ bịlẹ Amkpaa lẹ, ọ họọ uda bala ọ-ya ang-ẹjẹẹ họọ lẹlẹ.

²⁵IHesekaya tị hi ọbọọchẹ. Ọ́ ji Amkpaa obe nya ọnahị ọtụka ọlẹ kọ họọ-ọ̀ wẹ ka. Ọọwa, Amkpaa-à wụ ẹjẹ tọọ bala ala iJuda bala ala iJerusalẹm lẹlẹ.

²⁶Ụka ohyẹẹkpẹ, iHesekaya bala ala iJerusalẹm la olujwo ọtọtọ chajị nya ọọwa. Lẹẹlẹ, Amkpaa-á tụtụm yaa akama lụka nya ọhịhị nya iHesekaya kaka.

²⁷Ụka ọọwa, iHesekaya Adịrahụ kpụ ụdụ ọtụka-ọtụka. Ọng myị ọng wuu jwoo ihi ịnyịnyị. Ọ ya ị me ebe ịlẹ kọ ya okpoko ịgọm bala okpoko onyoowuru bala ajwọ ịnyịịla-ịnyịịla bala etiji ichoru kwọkwọ bala akụmada bala ang-ụdụ nyamwụ ịkịla guru.

²⁸Ọ ya ị nwụ ẹpwang ịlẹ kọọ ya ambakpa bala ere bala ida nya olivu nyamwụ ju tụ ẹpwang nya ịna bala iku nya ịkpịlọ nyamwụ.

²⁹Ọ nwụ epweji lụmẹ-lụmẹ. Ọ la iru nya ịkpịlọ bala ịna lụmẹ-lụmẹ ịnyịnyị, chajị Ohe Oluhye họ ọ kpụ ụdụ ọtụka-ọtụka.

³⁰IHesekaya-à tụ ẹga ka Ụgbụ nya Enyi ọla iGihọn kaa mwụ yahị da ka lẹ. Ọọwa, ọ gwoo ọ̀bá yahị da ka ịkịka ọlọmwẹnụ-obyi nya Epweji nya iDevidi lẹlẹ. Ọ kịlahị ẹ-ẹpwụ nya ang myị ang ịlẹ kọ họ wuu.

³¹Ụka ká angị ku ọmwakpa nya igomenti nya ịBabịlọn warị nyọka towo chajị nya ang datị-datị ịlẹ kị họ ọ-ọpyị nya iHesekaya, Ohe Oluhye tị myẹhwẹẹ hyoo nyọka mọọ yẹ kọ ka jẹ irya ọkịlẹtụ nyamwụ.

³²Ang myị ang ịkịla ịlẹ ká iHesekaya Adịrahụ họ bala jaabwọ kọ hu ọkịlẹtụ nya ha Amkpaa wuu lẹ, ị daa ju ụ-ụpwụ nya Ọyị ọ-yẹ a-Arụrụ nya Ọlọmwụ Ayịsaya ọnyị nya Amọsị ọlẹ kọ ji ẹpwụ nya ụpwụ nya Ego nya Ịdịrịhụ nya ala iJuda bala ala Isirẹlụ.

³³Ụka ká IHesekaya gbu, ị jwoo eji ụpa oluhye nya iworu nya ịdịrịhụ. Ala iJuda bala ala iJerusalẹm wuu chị ihi jwoo ọtụka-ọtụka ụka kọ gbu. Ọọwa, ịManasẹ ọnyị nyamwụ à ri adịrahụ kwiwa nyamwụ lẹlẹ.