Read idege 2 EGO OGBEGBE 33 Bible Online

2 EGO OGBEGBE 33 - idege bible

2 EGO OGBEGBE 33

¹ỊManasẹ gu ẹka iwo kụrụ imiiye ụka kọ dọmwụ nya adịrahụ oriri i-iJuda. Ọ hụ i-iJerusalẹm ri adịrahụ ẹka iwo ịrụ kụrụ ịrụ gbẹgbịlẹ.

²ỊManasẹ họ ang inyibyi ị-ịlahị nya Amkpaa gbịla ọhọhọ ịtịpyọ nya alẹpwụma ịlẹ ká Amkpaa ku rụ hi ẹga da ha ala Isirẹlụ.

³ỊManasẹ myịmyị ma ada ị-kpụ ijiga ịlẹ wuu ká iHesekaya adamwụ ta ayịreji wuu nwụ. Ọ mẹ ogidi ha ojiga ịBaalụ. Ọ me ekpeku nya Achẹra ojiga ọnyang bala o-hirikpẹẹ ha ịdịchụ bala ọ-gbịgba haa.

⁴Ọ me ada ị-kpụ ijiga u-Ube nya Amkpaa, ẹga ịnọ ká Amkpaa ya ụwa nyaa ka gbịgba họwa lẹ.

⁵Ọ myịmyị me ada ikiliya ẹga kị ka kpụ ịdịchụ rịrị ọdọda imimiiye ịlẹpwụ nya Ube nya Amkpaa.

⁶ỊManasẹ dọmwụ go anyị ọlẹng nya ịlọmwụ kịla iya ọ-rụ ila. Ọ yụbwọ ju ẹla nya egino ọyẹyẹ bala ụhwa. Ọọ ka ọlọmwụ ọyẹyẹ bala o-wo ẹla bwu ẹga nya alegu. Ọ họ ang inyibyi lụmẹ ka kpoye ị-ịlahị nya Amkpaa, du agbama ju Amkpaa.

⁷ỊManasẹ hu ukpeku nya Achẹra ojiga ọnyang ọlẹ kọ rịrị u-Ube nya Amkpaa, ẹga ọlẹ kpangga ká Ohe Oluhye lẹẹ ya ẹla ta iDevidi bala iSolomọn ọnyị nyamwụ chajị nyamwụ yẹkẹẹ, “Am̀ u-Ube Ịgọgọ ọla iJerusalẹm ọlẹ à ri ẹga kam chụ bwu ẹpwụ nya imwawụ iwo kụrụ imiiye nya ala Isirẹlụ wuu kị ka chihi ju ẹnyị nyam gbe oyi myị oyi lẹ.

⁸Ó-ri ká ala Isirẹlụ-ụ́ ju ihi nya ehile nyam ịlẹ wuu kam ya du iMosisi ọnchẹ nyam kịlaa aalẹ, ḿ ka myị aluji ka gyaa kpa rụ nya anyịhị hi ọpyị ọlẹ kam ya ha adaa igogo kaka.”

⁹ỊManasẹ kpa ala iJuda bala ala iJerusalẹm hwahị kaka họ ang inyibyi ịlẹ kị dọmwụ gụ ịnya alẹpwụma ịlẹ ká Amkpaa ta ayịreji hi ẹga da ha ala Isirẹlụ wẹẹ.

¹⁰Amkpaa da ịManasẹ bala angịnyị nyamwụ ọna, ị́ tị myị ke ụrụ lọọ ka.

¹¹Ụka ọọwa, Amkpaa ya iwe da ha angịdẹwụ nya ala Asiriya ị wẹ kaka be iJuda ẹpwa. Ị wu ịManasẹ, ịkụja dụrwọọ pyịịị bala ọ-ya agba jwoo lẹ, ị kpọọ rụ ka ịBabịlọn lẹlẹ.

¹²Ụka ká ịManasẹ juwa ẹ-ẹpwụ nya uhila nya akama ọwẹ, ọ kpa ịlọmwụ keji ẹ-ẹga nya Ohe Oluhye. Ọ bịlọọ kọ ka dọọ ụbwọ.

¹³Amkpaa wẹ abwọ ọrịrị nyamwụ. Ọọwa, ọ ya ẹga da họọ nyà tịrẹkpẹ ka iJerusalẹm kaka ri adịrahụ myịmyị lẹlẹ. Ọọwa, ịManasẹ à jẹ ịnyịlẹhị nyọri Amkpaa kẹnẹ-kẹnẹ à ri Ohe Oluhye lẹ lẹlẹ.

¹⁴Ẹ-ẹkpẹ nya ọwẹ, ịManasẹ me ugulọ olodehe nya Epweji nya iDevidi ọlọmwẹnụ-obyi luhye gụ olene bwu ẹgẹhẹ nya ọkpọọ ọ-ba ụgbụ nya enyi ọla iGihọn ba ẹ-ẹtẹ kele ka ju ka Ogirigba nya Iyenyi bala ẹga kị wụrụ Ofẹlụ. Ọ chụ olegbeju nya angịdẹwụ kpẹhị rịrị ebwo nya angịdẹwụ ọnyọnyọọnyị e-epweji ịlẹ kị me egwalọ ju wuu i-iJuda.

¹⁵Ọ nwụla ijiga bala ekpeku ịlẹ kọ rịrị u-Ube Ịgọgọ wuu kpehe. Ọ tụrụ ada ị-kpụ ijiga ịlẹ wuu kọ me rịrị i-ikiti ọlẹ ká Ube nya Amkpaa rịrị tụ ada ịkịla ịlẹ kị juwa i-iJerusalẹm wuu. Ọ gyaa wuu lẹ, ọ kpa kaka chịịrụ odehe nya epweji lẹlẹ.

¹⁶Ọ nwụla ogidi okiliya nya Amkpaa lẹ, ọ kịla iya nya ọhọlawụlẹ bala iya nya obe ojiji u-uhye nyamwụ lẹlẹ. Ọ da ala iJuda wuu ehile ya nyị gbịgba ha Amkpaa Ohe Oluhye nya ala Isirẹlụ mẹ.

¹⁷Angịnyị kịnyaa juwa kịla iya a-ada ị-kpụ ijiga wẹ́ẹ̀, Amkpaa Ohe Oluhye nyaa kẹnẹ-kẹnẹ ị tị kaa kịla iya ịịwa ha lẹ.

¹⁸Ang myị ang ịkịla ịlẹ ká ịManasẹ họ tụ abwọ ọlẹ kọ rị ha Ohe Oluhye nyamwụ bala ẹla ịlẹ ká alọmwụ ya tọọ lẹnyị nya Amkpaa Ohe Oluhye nya ala Isirẹlụ wuu lẹ, ị daa ju ụ-ụpwụ nya Ego nya Ịdịrịhụ nya ala Isirẹlụ.

¹⁹Abwọ ọlẹ ká ịManasẹ rị bala jaabwọ ká Ohe Oluhye wẹ abwọ ọrịrị ọọwa bala ịhọbịrị ịlẹ kọ họ wuu tụ ẹga datị-datị ịlẹ kọ me ada ị-kpụ ijiga bala ekpeku nya Achẹra ịlẹ kọ me bala ijiga ịlẹ kọ kpụ wuu ene kọọ yẹ irya da lẹ, ị da ju ụ-ụpwụ nya Ego nya Alọmwụ[5].

²⁰Ụka ká ịManasẹ gbu, ị jwoo eji ẹ-ẹpwa nya adịrahụ. Ọọwa, Amọn ọnyị nyamwụ à ri adịrahụ kwiwa nyamwụ lẹlẹ.

²¹Amọn gu ẹka iwo imiiye kụrụ imiiye ụka kọ dọmwụ nya adịrahụ oriri i-iJuda. Ọ hụ iJerusalẹm ri adịrahụ ẹka imiiye. Ẹnyị nya ịnamwụ ri iMechulẹmẹtị ọnyị nya ịHarusi iJotiba.

²²Ọ họ ang onyobyi ba Amkpaa jaabwọ ká ịManasẹ adamwụ họ. Ọ kpụ eteji ha ekpeku ịlẹ wuu ká adamwụ họ bala ọ-kpụ eteji ha.

²³Ọ́ tị hiri ịlọmwụ kpẹẹ tịrẹkpẹ chị Amkpaa ọgụ lala adamwụ ka. Ang onyobyi ọhọhọ nyamwụ dọmwụ gụ ịnya adamwụ wẹ́ẹ̀.

²⁴Ọọwa, alegbeju ịtụkụ yi Amọn a me obyi jwoo lẹ, ị bọọ kele ka ẹpwang nyamwụ kaka nwụ lẹlẹ.

²⁵Ụka ọọwa, ala iJuda nwụ angịlẹ kị nwụ Amọn Adịrahụ lẹ, ị hu iJosaya ọnyị nyamwụ ri adịrahụ ku ọmwakpa nyamwụ lẹlẹ.