Read idege 2 EGO OGBEGBE 34 Bible Online

2 EGO OGBEGBE 34 - idege bible

2 EGO OGBEGBE 34

¹IJosaya gu ẹka ineku ụka kọ dọmwụ nya adịrahụ oriri i-iJuda. Ọ hụ i-iJerusalẹm ri adịrahụ ẹka iwo ịta kụrụ ookpokpo gbẹgbịlẹ.

²Ọ họ abwẹla opwoku ị-ịlahị nya Amkpaa dịrẹ ọgụ-ẹpẹtẹ nya iDevidi adamwụ ogogo. Ọ kpa ehile nya Ohe Oluhye wuu kpẹẹkpẹẹ.

³Ẹ-ẹpwụ nya ẹka ọhaneku nya adịrahụ oriri nya iJosaya, kọ domwụ ri onjwo ri wẹẹ, ọ domwụ nyọka gbịgba ha Ohe Oluhye nya iDevidi adamwụ ogogo. Ụka kọ nọ pwụ ẹka iwo kụrụ imiiye lẹ, ọ domwụ nyọka ta ẹga ị-kpụ ijiga bala ekpeku nya Achẹra ojiga ọnyang bala ekpeku ịkịla wuu ayịreji lẹlẹ.

⁴Ọ ya ị be ada ikiliya ha ojiga ịBaalụ ene hụrụ tụ ada i-ju ịtangare ila ịlẹ kị ji baa ba. Ị go ekpeku nya Achẹra bala ekpeku ịkịla wuu kpọrụ pwụrwẹ-pwụrwẹ lẹ, ị nyí ọrụ nyaa epepe hule-hule hụ iworụ nya angịlẹ kị kpụ ijiga ịịwa lẹlẹ.

⁵Ọ chị ekpinegu nya angịkiliya nya ijiga ịwẹ ila u-uhye nya ada ịlẹ kịị kịla iya ịịwa. Bwula ọhọhọ nyamwụ ịwẹ wuu du ká iJuda bala iJerusalẹm la charị-charị lẹlẹ.

⁶Ọ họ ịwẹ-ịwẹ tụ epweji datị-datị da tụ ẹga ị-kpụ egwawụ-egwawụ ịla imwawụ nya ala ịManasẹ bala ala Ifurem bala ala iSimyọn lalaala kaka ju ala ịNafụtali.

⁷Ọ be ada ikiliya bala ekpeku nya Achẹra ịlẹ kị juwa ẹ-ẹga myị ẹga nya ọpyị ọlẹtẹ wuu ene hụrụ. Ọ go ekpeku ịịwa kpọrụ pwụrwẹ-pwụrwẹ. Ọ be ada i-ju ịtangare ila ene lẹ, ọ nyà tịrẹkpẹ ka iJeruslẹm lẹlẹ.

⁸Ẹ-ẹpwụ nya ẹka iwo kụrụ ineku nyọlẹ ká iJosaya ri adịrahụ, kọ họ ọpyị bala Ube nya Amkpaa la charị-charị kpá, ọ chụ ịChafan ọnyị nya Asaliya bala ịMaaseya ịgọvụnọ nya iJerusalẹm bala iJowa ọnyị nya iJowahasị kọ ri akịraa kị ka nwụla Ube nya Amkpaa.

⁹Ị kele lẹ, ị ya okpoko nya ọhaha ọlẹ kị ye u-Ube nya Amkpaa ha iHilikaya Olegbeju Okiliya lẹlẹ. Ala iLivayị ịlẹ kịị gbe ọnang nya Ube Ịgọgọ à ye ọhaha ọọwa bwu ẹga nya ala Ifurem bala ịManasẹ bala ẹga nya angịkịla ịlẹ kị bwu ọpyị ọlẹtẹ tụ ala iJuda bala ala iBenjamịn bala ala iJerusalẹm lẹ.

¹⁰Ị ya okpoko ọọwa ha angịlẹ kị chụ nya alegbeju ịkpẹhị rịrị ụkụrwọ nya Ube nya Amkpaa. Ọọwa, ị kpa nwụ alụkụrwọ ịlẹ kị nwụla Ube Ịgọgọ uri lẹlẹ.

¹¹Ị ya okpoko ohihi ha ikebenta bala angị me ube bala ọ-ra ajwọ ịlẹ kị be bala ekeji datị-datị ị-kpa nwụ Ube Ịgọgọ ọlẹ ká ịdịrịhụ nya ala iJuda pẹhi ju àgụgụ.

¹²Alẹng ịlẹ kị họ ụkụrwọ ọọwa họ kpẹẹkpẹẹ lụmẹ. Ala iLivayị ịlẹ kị kpẹhị rịraa ẹ-ẹpwụ nya ụkụrwọ ọọwa ri ịJahatị bala Obadaya kị bwu ogang nya iMerarị bala ịSẹkaraya bala iMechulam kị bwu ogang nya iKohatị. Ala iLivayị ịkịla ịlẹ kị jẹ-ẹ̀ mwu eje lụmẹ

¹³kpẹhị rịrị alụkụrwọ ebwo datị-datị bala angị kpa olo nya ang-abwọ nya ube, juwa kpẹhị rịrị angịlẹ wuu kị họ ebwọ nya ụkụrwọ datị-datị. Angịkịla nyaa ri akịraa bala alegbeju ịgbẹgbịlẹ bala angịgbeji.

¹⁴Ụka kị juwa gba okpoko nya ọhaha ọlẹ kị ye kpehe bwu Ube nya Amkpaa lẹ, iHilikaya-à yẹ ụpwụ nya Ehile nya Amkpaa ọlẹ kọ ya ha iMosisi lẹlẹ.

¹⁵Ọọwa, ọ byi ịChafan akịraa yẹkẹẹ, “M̀ ye ụpwụ nya Ehile nya Amkpaa am̀ u-Ube nya Amkpaa lẹ̀ẹ̄.” Ọọwa, ọ ya ụpwụ ọọwa ha ịChafan lẹlẹ.

¹⁶ỊChafan à kpa ụpwụ ọọwa kịla adịrahụ lẹ, ọ byi adịrahụ yẹkẹẹ, “Ahị họ ang myị ọlẹ ká ya ahị nyị họ kpá lẹ.

¹⁷Ahị hụ okpoko nya ọhaha ọlẹ kị ye u-Ube Ịgọgọ ha alụkụrwọ bala angị kpẹhị rịraa lẹ.”

¹⁸Ọọwa, ọ ya je adịrahụ ịnyịnyị yẹkẹẹ, “IHilikaya olegbeju okiliya ya ụpwụ ọhẹ ham lẹẹ.” Lẹ, ịChafan à wọọ je adịrahụ lẹlẹ.

¹⁹Ụka ká iJosaya Adịrahụ wo ala ịlẹpwụ nya Ụpwụ nya Ehile ọwẹ kị wẹẹ wa jo, ọ gu ịwụrụ nyamwụ ene hụrwang-ng ẹ-ẹpwụ nya olujwo ọtọtọ.

²⁰Ọọwa, adịrahụ a da iHilikaya bala Ahikam ọnyị nya ịChafan bala Abudọn iMayịka bala ịChafan akịraa bala Asaya ọngọ myị ẹrụ ha adịrahụ ehile yẹkẹẹ,

²¹“Anụ kele kanụ wo la Amkpaa ham bala angị hi lọhịhị nya ala Isirẹlụ bala ala iJuda wuu kọ ya jenu wẹẹ. Ọmẹjẹ ịlanyị ị tị́ da ụ-ụpwụ ọlẹ kị ye lẹẹ u-Ube nya Amkpaa-āà? Ikẹjẹ-awụrụ nya Amkpaa wuru jahị dahị lụmẹ, chajị adahị igogo anyị-ị́ myị ju ihi nya ala ịlẹpwụ nya ụpwụ ọwẹ jaabwọ ká Amkpaa tịtọ kahị ka họ ka.”

²²Ọọwa, iHilikaya bala alẹng ịkịla ịịwa à kele ka ẹga nya ọlọmwụ ọnyang ọhẹ kị wụrụ iHuluda lẹlẹ. Ọ kụ ẹpwa o-oye onyeewe nya iJerusalẹm. ỊChalum ọrụmwụ ri ọnyị nya iTikiva. Adamwụ-ọgbahị ri ịHaahasị. Ọwa-à kaa kpẹhị rịrị ịwụrụ ịla Ube nya Amkpaa lẹ. Ị tịrọnụ nya ẹla ọọwa joo.

²³Ọọwa, ọ byaa yẹkẹẹ, “Anụ kele kanụ byi ọngọ duunu ẹrụ tọm mẹ ịịlẹ Amkpaa Ohe Oluhye nya ala Isirẹlụ a ya lẹ:

²⁴‘M̀ juwa ka ta epweji nya iJerusalẹm ọlẹ bala alụwa ayịreji jaabwọ kị da-à wẹ ụ-ụpwụ ọwẹ. Ọlọ myị ọlọ ọlụwa ka wu pyii lẹ.

²⁵Ang odudu ri ị nyẹẹkpẹ dam juwa kpụ eteji ha ijiga. Ị du agbama jum bwula ang myị ang ịlẹ kị họ wuu. Agbama nyam wuleji lẹ, ọ́ tị ka kpụba kaka.

²⁶Ịnyang ahụ adịrahụ tị lẹ, am Amkpaa Ohe Oluhye nya ala Isirẹlụ jam bying ya à wo ẹla ọlụpwụ ọlẹ kị wa lẹ.

²⁷À yẹ irya da ká kpa ịlọng keji ị-ịlahị nyam, kpụ ā gu ịwụrụ nyang ene ụka ká wo jaabwọ kam hwahwa nya akama ọlẹ kam juwa ka yẹ epweji ọlẹ bala angịnyị ịlụwa. Ma m tị wo abwọ ọrịrị nyang lẹ.

²⁸Akama ọlẹ kam ka yẹ iJerusalẹm ka wẹ ụka ká gbu lokpunyi kpá, kị jung eji.’ ” Ọọwa, alẹrụ ịwẹ à nya kaka ya ẹrụ ọwẹ je iJosaya Adịrahụ lẹlẹ.

²⁹IJosaya Adịrahụ wụrụ alegbeju nya ala iJuda bala ịnya iJerusalẹm wuu kaka jịra.

³⁰Ọọwa, ọ kele ka Ube nya Amkpaa tụ angịkiliya bala ala iLivayị bala angịnyị ihihi ịkịla tụ alụdụ bala alẹbyahị wuu lẹlẹ. Ọọwa, ọ wa ụpwụ nya iro ọnwanwa ọlẹ kị ye bwu Ube Ịgọgọ gboo ị-ịlahị nyaa lẹlẹ.

³¹Ọ godayị rịrị ẹ-ẹga ká ịdịrịhụ kaa kụ ya ẹla lẹ, ọ nwa iro ta Amkpaa nyọka ju ihi nyamwụ bala ọ-ka kpa ehile tụ ọmẹjẹ nyamwụ lokịletu bala irya nyamwụ wuu lẹlẹ. Ọ myị ọnụ nyọka kpa ehile oluhye nya iro ọnwanwa ọwẹ kpẹẹkpẹẹ jaabwọ kị da ju ụpwụ ọọwa.

³²Ọ byi ala iBenjamịn bala angịlẹ wuu kị juwa i-iJerusalẹm nyị myị ọnụ nyọka kpa iro ọwẹ ịnyịnyị. Lẹẹlẹ, ala iJerusalẹm wuu ju ihi nya ehile nya iro ọlẹ kị nwa ta Ohe Oluhye nya adaa igogo.

³³Adịrahụ iJosaya ta ekpeku nya ijiga ịlẹ kị juwa i-imwawụ nya ala Isirẹlụ wuu ayịreji. Angịnyị-ị́ tụtụm nyẹẹkpẹ da Ohe Oluhye nya adaa igogo lụka nya ọhịhị nya iJosaya kaka.