Read idege 2 EGO OGBEGBE 35 Bible Online

2 EGO OGBEGBE 35 - idege bible

2 EGO OGBEGBE 35

¹Ụka ọọwa, iJosaya la ọhụhụ nya Ang Oriri Ọchịpwụrụ i-iJerusalẹm nyọka chị ihi ju Amkpaa. Ẹnụtụrụ iwo kụrụ ine nya ọya ọhọhẹ ị nwụ anyị-ịkpịlọ ịlẹ kị ka kpa họ ọhụhụ ọọwa lẹ.

²Ọ ga ụkụrwọ datị-datị ịlẹ ká angịkiliya ka họ u-Ube nya Amkpaa jwaa ụ-ụbwọ lẹ, ọ jwaa ọhụ kị ka haa kpẹẹkpẹẹ lẹlẹ.

³Ọ byi ala iLivayị angị myị ẹrụ ha Amkpaa bala ọ-kaa mẹ ang jẹ ala Isirẹlụ yẹkẹẹ, “Anụ ya Akpa nya Iro rịrị u-Ube Ịgọgọ ọlẹ ká iSolomọn ọnyị nya iDevidi nwụ mẹ. Ánụ ka juwa kpọọ jẹ kele-warị kaka. Anụ kpa ụka nyanụ myị ẹrụ ha Amkpaa Ohe Oluhye nyanụ bala ala Isirẹlụ angịnyị nyamwụ mẹ.

⁴Anụ kele kaka họ ebwo nya ụkụrwọ datị-datị jaabwọ ká iDevidi Adịrahụ bala iSolomọn ọnyị nyamwụ ga ha adanụ igogo anyị ogang-ogang mẹ.

⁵Anụ godayị ebwebweebwo u-Ube Ịgọgọ jaabwọ kị ganụ, chajị kanụ ka jẹ-ẹ̀ da ugbiyegu ọnyọnyọọnyị nya ala Isirẹlụ ụbwọ mẹ.

⁶Anụ nwụ anyị-ịkpịlọ nya ọhụhụ nya Ang Oriri Ọchịpwụrụ, kanụ hụ́ ịlọnụ charị-charị bala ọ-nwụlanọ nyọka da ala Isirẹlụ ịkịla aananụ ụbwọ chajị kị ka ba ọmẹjẹ nya Amkpaa ịlẹ kọ ya ha iMosisi jẹ kpẹẹkpẹẹ mẹ.”

⁷IJosaya Adịrahụ dà agba nya imbiri bala anyị-ịkpịlo ụnọ iwo ịta (30,000) e-egbeju nya ịlọmwụ ha angịlẹ kị juwa wuu nyọka kpa họ ọhụhụ nya Ang Oriri Ọchịpwụrụ. Ọ da ịna ụnọ ịta (3,000) ịnyịnyị.

⁸Alegbeju ịtụka yo da iyo ha angịngị bala angịkiliya bala ala iLivayị chajị nya ọhụhụ nya Ang Oriri Ọchịpwụrụ ọwẹ ịnyịnyị. IHilikaya Olegbeju Okiliya bala ịSẹkaraya bala iJehiyẹlụ kị ri alegbeju nya Ube nya Amkpaa ya anyị-ịkpịlọ bala agba nya imbiri ụnọ imiiye da ohu ịrwọnyẹ (2,600) bala ịna ohu ịta (300) ha angịkiliya nyọka ya kịla iya lụka nya ọhụhụ ọwẹ.

⁹IKonaniya bala iChemaya bala ịNẹtanẹlụ ọnyịnamwụ bala ịHachabiya bala iJeyẹlụ bala iJosabadị kị ri alegbeju nya ala iLivayị da anyị-ịkpịlọ bala agba nya imbiri ụnọ ịrụ (5,000) bala ịna ohu ịrụ (500) ha ala iLivayị kị ka ya kịla iya lụka nya ọhụhụ nya Ang Oriri Ọchịpwụrụ ọwẹ.

¹⁰Ụka kị nwụla ang myị ang nya ọhụhụ nya Ang Oriri Ọchịpwụrụ nọ kpá lẹ, ala iLivayị à kele ka kụ gagaaga e-ebwebweeb wo nyaa jaabwọ ká adịrahụ ya lẹlẹ.

¹¹Ụka kị nwụ anyị-ịkpịlọ bala agba nya imbiri nya ọhụhụ nya Ang Oriri Ọchịpwụrụ kpá, ala iLivayị daa egba lẹ, angịkiliya-à nyi ịwọ nyaa hụ ogidi lẹlẹ.

¹²Ị ga iyo ikiliya ọ-rụ ila gịla angịnyị ugbiyegu-ugbiyegu, chajị kị ka ya kịla iya ha Amkpaa jaabwọ kị lẹ kị ka ya kịla iya ọ-rụ ila gịla ala ọdọda ọdọda ẹpwa chajị kị ya kịla iya jaabwọ kị da ụ-ụpwụ nya Ehile nya iMosisi.

¹³Ị hya anyị-ịkpịlọ nya Ang Oriri Ọchịpwụrụ ịịwa i-ila jaabwọ ká ehile ya. Ị kpụ iyo ikiliya ịlịgọgọ ị-ịchụ bala ẹkpẹrẹ bala ediyo ịtụka. Ọọwa, ị gyaa gịla angịnyị ahyaahị lẹlẹ.

¹⁴Ụka kị họ ang ịwẹ kpá, ala iLivayị nwụla ang oriri nya ịlaa bala ịnya angịkiliya anyị ịtụma nya Erọn nọ. Angịkiliya ayịdang lẹ, ụkụrwọ nya iya ị-rụ ila ịkịlaakịla bala eyo nya iyo ikiliya ọ-jụ ila myaa lụtụrụ-ụtụrụ gbee da ka alobyi.

¹⁵Angị mwu eje bwu ogang nya Asafụ ọla iLivayị kụ ẹga ká iDevidi Adịrahụ bala Asafụ bala ịHẹẹman bala iJedutun ọlọmwụ nya adịrahụ hunọ haa. Angịgbeji ọ-ọnang nya Ube nya Amkpaa-á tụtụm pyị ọmwụ hi ẹga nya ụkụrwọ nyaa kaka, chajị ala iLivayị aanaa kpa ang oriri nyaa baa kele.

¹⁶Ị họ ang myị ang nya ọhụhụ nya Ang Oriri Ọchịpwụrụ nya Amkpaa wuu cheju ẹnụ ọọwa. Ị kịla iya ọ-rụ ila wuu kpẹẹkpẹẹ jaabwọ ká iJosaya Adịrahụ ya.

¹⁷Ala Isirẹlụ ịlẹ kị juwa wuu họ ọhụhụ nya Ang Oriri Ọchịpwụrụ bala ọhụhụ nya Ịkaa Ọmịrịị-mịrị-ka jịra ẹẹnụtụrụ irwiye gbẹgbịlẹ.

¹⁸Ẹ-ẹkpa nya ụka nya ịSamwẹlụ ọlọmwụ gbee da wẹ ụka ọwẹ, ị́ họ ọhụhụ nya Ang Oriri Ọchịpwụrụ pyụbwọ ju ịịwẹ lẹka. Ịdịrịhụ inyogo nya ala Isirẹlụ ọhẹ-lọhẹ-ẹ́ họ ọhụhụ nya Ang Oriri Ọchịpwụrụ ụgbẹyị ọtụka ọlẹ ká iJosaya Adịrahụ bala angịkiliya bala ala iLivayị bala ala iJuda bala ala Isirẹlụ tụ ala iJerusalẹm wuu họ-ọ̀ wẹ ka.

¹⁹Ẹ-ẹpwụ nya iwo kụrụ ineku nya adịrahụ oriri nya iJosaya ị họ ọhụhụ ọwẹ lẹ.

²⁰Ụka ká iJosaya Adịrahụ họ ụkụrwọ ịwẹ wuu chajị nya Ube nya Amkpaa, iNeko Adịrahụ nya ala Ijipiti kpa angịdẹwụ nyamwụ kele ka ịKaakemichi ọ-ọnụ nya Ihu iYufuretisi kaka dẹwụ. IJosaya kpa angịdẹwụ nyamwụ yahị dọọ nyọka mwẹla tọọ.

²¹INeko Adịrahụ tị du alẹrụ nyamwụ kaka byi iJosaya yẹkẹẹ, “Adịrahụ nya ala iJuda ee, oyina-à tị́ gung kpá ẹ-ẹpwụ nya ẹla ọlẹ wẹ-ẹ̀? Ḿ wẹ ọlẹwụ yahị dang koo. Ẹpwụma ọlẹ kaam bala ịwa ri alẹwụ nya awụlẹ kem m̄ kpa ẹla ta lẹ. Ohe Oluhye tị jam tam. Ọ byim am nyị chị agaga ju ẹwụ ọlẹ. Á bá ẹla ta Ohe Oluhye, ọ ka tang ayịreji ā ka yẹ ayịlọ-ọ̄.”

²²IJosaya-á tị myị wa wii hyoo ka. Ọ́ ke ụrụ lẹla ọlẹ ká Ohe Oluhye ya wẹ bwula iNeko Adịrahụ ka. Ọọwa, ọ go ang ịkịla kụrụ nya ihwirihwa kị ka joo ogu kaka lẹ, ọ kpa angịdẹwụ nyamwụ kele kaka da ẹwụ tọọ ụteeji nya iMegido lẹlẹ.

²³Ụka ka ẹwụ yere, ala Ijipiti chị iJosaya Adịrahụ ịcha kẹng-ng. Ọọwa, ọ dakọ byi angịnyị nyamwụ yẹkẹẹ, “Anụ kẹwẹ kaka hum kpa rụ bwu ẹwụ mẹ, ị họm ang aboji lẹ-ẹ̄!”

²⁴Ị hwoo bwu ang ọrụnyẹ nyamwụ, yọ hụ a-ang ọrụnyẹ oheeye ọlẹ kọ juwa lẹ, ị kpọọ rụ ka iJerusalẹm lẹlẹ. Ọ gbu ụ-ụwa lẹ, ị jwoo eji i-iworu nya ịdịrịhụ lẹlẹ. Ala iJuda bala ala iJerusalẹm wuu bida chajị nya igu nyamwụ.

²⁵IJeramaya Ọlọmwụ be eje nya ida ọbaba ọhẹ mwu chajị nya iJosaya Adịrahụ. Bwu ụka ọwẹ pyịyọọ ọ ri ọhọhọ nya angị mwu eje ịla Isirẹlụ nyọka mwu eje ọọwa ụka kị ka mwu eje nya rụ igu ogbugbu nyamwụ. Ị da eje ọọwa ju ụ-Ụpwụ nya Eje nya Ida Ọbaba.

²⁶Ang myị ang ịkịla ịlẹ ká iJosaya họ, jaabwọ kọ họ ang ịnyịịla juwa ba ehile nya Amkpaa jẹ kpẹẹkpẹẹ

²⁷bala ego nya ọhịhị nyamwụ bwu ọmwụ ọdada kaka ju ka ọbaba lẹ, ị daa ju ụ-ụpwụ nya Ego nya Ịdịrịhụ nya ala Isirẹlụ bala iJuda.