Read idege 2 EGO OGBEGBE 36 Bible Online

2 EGO OGBEGBE 36 - idege bible

2 EGO OGBEGBE 36

¹Ụka ọọwa, ala iJuda hu iJehowahasị ọnyị nya iJosaya ri adịrahụ kwiwa nyamwụ i-iJerusalẹm.

²IJehowahasị gu ẹka iwo imiiye kụrụ ịta ụka ka kọ ri adịrahụ nya iJuda. Ọ hụ i-iJerusalẹm ri adịrahụ ẹ-ẹpwụ nya ịya ịta.

³Ụka ọọwa, iNeko Adịrahụ nya ala Ijipiti pwọọ ọmwụ cheji hi adịrahụ oriri i-iJerusalẹm. Ọ woo nya ọlagba nyamwụ lẹ, ọ nyẹ ala iJuda ẹpwa lokpoko onyoowuru ụnọ ịta da ohu ine (3,400) bala okpoko ịgọm iwo ịta kụrụ ine lẹlẹ.

⁴Adịrahụ iNeko hu Eliyakim ọnyịnịna nya iJowahasị ri adịrahụ nya iJuda lẹ, ọ yẹ ẹnyị nyamwụ da bwu Eliyakm kaka ri iJehoyakim lẹlẹ. Ọọwa, iNeko à kpa iJehowahasị rụ ka Ijipiti lala ọlagba lẹlẹ.

⁵IJehoyakim gu ẹka iwo imiiye kụrụ ịrụ ụka kọ dọmwụ nyọka ri adịrahụ nya iJuda. Ọ hụ i-iJerusalẹm ri adịrahụ ẹka iwo kụrụ ookpokpo. Ọ họ ang onyobyi ba Amkpaa Ohe Oluhye nyamwụ.

⁶INebukadinesa Adịrahụ nya ala ịBabịlọn wẹ kaka be ala iJuda ẹpwa, jwoo agba kpa rụ ka ịBabịlọn.

⁷INebukadinesa go ang-abwọ ịhyẹ bwu Ube nya Amkpaa kpa rụ ka guru ẹ-ẹpwa nya ịlọmwụ ị-ịBabịlọn.

⁸Ang myị ang ịkịla ịlẹ ká iJehoyakim họ lụka nya adịrahụ oriri nyamwụ tụ ang inyibyi ịlẹ kọ họ bala ala ịlẹ kị denyi chọọ wuu lẹ, ị daa ju ụ-ụpwụ nya Ego nya Ịdịrịhụ nya ala Isirẹlụ bala iJuda. Ọọwa, iJehoyachin ọnyị nyamwụ à ri adịrahụ ẹ-ẹkpẹ nyamwụ lẹlẹ.

⁹IJehoyachin gu ẹka iwo kụrụ ineku ụka kọ dọmwụ nyọka ri adịrahụ. Ọ hụ i-iJerusalẹm ri adịrahụ ịya ịta da ẹnụtụrụ iwo chiriri. Ọ họ ang ịtịpyọ ba Amkpaa ịnyịnyị.

¹⁰Lụka nya ụrwẹnụ lẹ, iNebukadinesa-à du ẹrụ kaka wu iJehoyachin kpa ka ịBabịlọn lẹlẹ. INebukadinesa go ang-ụdụ lụmẹ-lụmẹ kpa rụ bwu Ube nya Amkpaa ụka ọọwa. Ọ hu iSedekaya ọnyịnịna nya iJehoyachin ri adịrahụ nya iJuda bala iJerusalẹm.

¹¹ISedekaya gu ẹka iwo imiiye kụrụ ookpokpo ụka kọ dọmwụ nya adịrahụ oriri i-iJuda. Ọ hụ i-iJerusalẹm ri adịrahụ ẹka iwo kụrụ ookpokpo gbẹgbịlẹ.

¹²Ọ họ ang onyobyi ba Amkpaa Ohe Oluhye nyamwụ. Ọ myị kpa ịlọmwụ keji juwa ke ụrụ lọna ọdada nya iJeremaya ọlọmwụ nya Amkpaa ka.

¹³ISedekaya la egbeju-ọngịrị ta iNebukadinesa Adịrahụ. Ọ lẹẹ tụ iSedekaya tutu kaka nwa iro lẹnyị nya Ohe Oluhye ya ọwa nyị ka jwoo ihi. Ọ tị la egbeju-ọngịrị, chị ọkịlẹtụ nyamwụ ori. Ọ́ myị yẹ irya da wẹ ẹga nya Amkpaa Ohe Oluhye nya ala Isirẹlụ ka.

¹⁴Ụka ọọwa, alegbeju nya ala iJuda tụ angịkiliya bala angịnyị juwa họ tịpyọ gụ olene-ene. Ị gbịla ang onyobyi ọhọhọ nya alẹpwụma ịdagaga jwaa du kị kpa ibyi kaka chịkịla Ube nya Amkpaa ọlẹ ịnọ kọọwa ayịdang chị ịgọgọ ju.

¹⁵Amkpaa Ohe Oluhye nya adaa igogo kaa du alọmwụ kaka da angịnyị nyamwụ ọna ịnyịnyịịnyị ọọ-lajị nya ahyẹẹrwẹrwa nyamwụ oluhye nya angịnyị nyamwụ bala Ube Ịgọgọ nyamwụ.

¹⁶Ị tị kpa alẹrụ nya Ohe Oluhye ịịwa hu utungguru, nyẹẹkpẹ da ẹla oyaya nyaa. Ị kpa alọmwụ họ gbee ká agbama nya Amkpaa wuleji ụka ohyẹẹkpẹ kpoye nyọka bebe nyaa.

¹⁷Ọọwa, Amkpaa-à kpa Adịrahụ nya ala ịBabịlọn kaka dẹwụ taa lẹlẹ. Ọ nwụ ikolobya nya ala iJuda, domwụ ba angịhyẹ nyaa kaka nwụ u-Ube Ịgọgọ. Ọ nwụ anjwo tụ angịgbahị bala anyang tụ alẹng bala angị jụ ẹdụrụ lee angị la kpịra-kpịra la o-jujwo nya ọngọngọhẹ nyaa kpong-kpong ka. Ohe Oluhye yaa wuu ju iNebukadinesa ẹ-ẹpwụtụbwọ.

¹⁸Adịrahụ nya ala ịBabịlọn nwụla ang-abwọ ichiche tụ ịtụka ịlẹ kị juwa u-Ube Ịgọgọ bala ang-ụdụ ịlụwa bala ịlẹpwa nya adịrahụ bala ịnya alegbeju ịtụkụ yoo wuu kpa rụ ka ịBabịlọn.

¹⁹Ọ chị Ube nya Amkpaa bala epweji ila. Ọ chị ẹpwa ịnyịịla-ịnyịịla ịlụwa bala ang-ụdụ nyaa wuu ila lẹ, ọ tụrụ egwalọ nya iJerusalẹm beji lẹlẹ.

²⁰Angị ịmanyị-ịmanyị ịlẹ kị hi lọhịhị, ọ kpaa rụ kaka ri anyịhị nya ịlọmwụ bala ịnya anyị nyamwụ gbee da ka ụka ka Ọpyị nya iPechiya wuleji gburum nyọka ri ẹpwụma ọlọngịrị.

²¹Ọwẹ ri ọ-họ jịra nya ẹla ọlẹ ka Amkpaa ya deeji bwula iJeremaya ọlọmwụ yẹkẹẹ, “Ọpyị ọlẹ ka dam kpụ egwawụ-egwawụ ẹka iwo irwiye gbẹgbịlẹ kọ ka mwụ ịnyọ kwiwa nya ịnyọ ọmwụmwụ ọlẹ kịị ya họọ ẹka ọharwiye jaabwọ ká ehile ri ka.”

²²Ẹ-ẹpwụ nya ẹka nya ọgbanyẹ nyọlẹ ká ịSayịrọsị ọla iPechiya ri adịrahụ ọtụka, Amkpaa họ ọmwụ ọyẹyẹ nya iJeremaya họ jịra. Ọ gu ọkịlẹtụ nya ịSayịrọsị gbịla du kọ da ụ-ụpwụ kị kpa pyebile tụ ọpyị nyamwụ da wuu yẹkẹẹ,

²³“Ehile ọlẹ ká ịSayịrọsị Adịrahụ ọtụka nya ala iPechiya da à lẹẹlẹ. Amkpaa Ohe Oluhye nya epwoohe ya ẹpwụma ilodehe ọlẹ wuu jum ụ-ụbwọ lẹ. Ọ ya ụkụrwọ ham nyọka nwụ ube ịgọgọ họọ i-iJerusalẹm ọ-ọpyị nya iJuda. Lẹẹlẹ, anụ angịlẹ wuu kanụ ri angịnyị nyamwụ ā rụ tịrẹkpẹ kele chajị nyọka họ ụkụrwọ ọọwa mẹ. Amkpaa Ohe Oluhye nyanụ ā juwa tanụ mẹ.”