Read idege 2 EGO OGBEGBE 4 Bible Online

2 EGO OGBEGBE 4 - idege bible

2 EGO OGBEGBE 4

¹ISolomọn Adịrahụ ya ị me ogidi loje ọnyọmịla. Ẹpwụ ojuju nya ogidi ọọwa la apatẹ iwo ịta. Uhye ọlala nyamwụ ri apatẹ iwo kụrụ ịrụ.

²Ọ me irim ọkịlọlọ ọhẹ loje ọnyọmịla. Ọ la apatẹ irwiye ba ẹhya nya okpori-kpori nyamwụ. Ọ la apatẹ iwo kụrụ ịrụ ẹ-ẹpwụ ojuju bwu ọka ọhẹ ka ọkịla. Ọ la apatẹ iwo ine kụrụ ịrụ nya ọdagaga ju.

³Ọ họ ịnyangga la ịgba imiiye nya ang ịlala ịna nya oje ọnyọmịla ịlẹ kị họ ju irim ọwẹ lookpokpo lawụlẹ.

⁴Ị ya irim ọwẹ rịrị u-uhye nya ịna iwo kụrụ imiiye nya oje ọnyọmịla. Ịna ịta nyaa jahị da ka ẹtẹ, ịta nyaa jahị da ka ọmwẹnụ-obyi, ịta ịkịla jahị da ka edii. Ịta ihihi jahị da ka ọmwẹnụ-ụtụrụ. Ịna ịwẹ godayị ya okwata da ka ẹpwarịrị.

⁵Ụka ọchịchị nya irim ọtụka ọwẹ lala eku nya ẹpẹtẹ ookpokpo. Ugbọọnụ nyamwụ lala ụgbọọnụ nya ukoku, yọnụ da daaa lala àpwụ̀ nya ekeji ịwụrụ arụ. Enyi ọlẹ kọ ka ka ẹpwụ nyamwụ ka myị̀ ịgalụwa ụnọ iwo kụrụ irwiye da ohu ịrụ (17,500).

⁶Ọ myịmyị họ ịja i-ju enyi iwo ịlẹ kị ka kpa enyi ọlụwa wụla iyo ikiliya. Ị ya ịrụ nya ịja ịwẹ rịrị ka edii nya irim. Ị ya ịrụ ịkịla rịrị ka ẹtẹ nyamwụ. Enyi ọlẹpwụ nya irim ayịdang ri ọlẹ ká angịkiliya ka kpa tọ abwọ.

⁷Ị kpa okpoko ịgọm họ ang ọ-ya itinika rịrị iwo jaabwọ kị danọ nyọka bwu haa họ. Ị ya ịrụ nyaa rịrị koye nya edii, ị ya ịrụ ịkịla rịrị koye nya ẹtẹ.

⁸Ọ myịmyị kọ itebwuru iwo chiriri chụwa u-Ube nya Amkpaa. Ị ya ịrụ nyaa rịrị koye oledii, ị ya ịrụ ịkịla rịrị koye nya ẹtẹ. Ọ họ ịja ichiche ohu (100) lokpokpo ịgọm.

⁹Ọ me ọdọda ọlẹpwụ ha angịkiliya bala ọdọda ọgbamgbam olodehe ịnyịnyị. Ọ kpụ oje ọnyọmịla kụrụ ekpileku nya ị-gba chị ọdọda ịwẹ wuu.

¹⁰Ị ya irim ọtụka ọọwa rịrị ka ọtụpịrịhyo ọlapewa nya edii bala ọmwẹnụ-ụtụrụ nya Ube nya Amkpaa.

¹¹IHuram me ịta nya enyi bala ọ-họ alẹ bala ịja ikpori-kpori. IHuram họ ang ịlẹ wuu ká iSolomọn Adịrahụ byoo ya nyị họ chajị nyọka kpa họ ụkụrwọ u-Ube nya Amkpaa. Ang ịlẹ kọ họ ri

¹²ịtachị ịtụka imiiye bala àpwụ̀ igugu ịlala ịja ikperi-kperi iluhye nya ịtachị ịịwa bala ebwo nya agba ịlẹ kị ya bwọ awụlẹ pịlẹ àpwụ̀ igugu iluhye nya nya ịtachị ịwẹ,

¹³bala egbe nya ipomegịraneti ohu ine (400) ịlẹ kị ya pịlẹ agba iluhye nya àpwụ̀ igugu. Ị họ ịgba imiiye nya egbe nya ipomegịraneti ju ebwo nya agba ịlẹ kị ya bwọ awụlẹ pịlẹ dagaga ju àpwụ̀ igugu iluhye nya ịtachị,

¹⁴ang ịrụnyẹ ikpolo iwo bala ịja iwo iluhye nya

¹⁵irim bala ịna iwo kụrụ imiiye ịlẹ kị họ ji ekpeleji nyamwụ

¹⁶ị̀ta bala alẹ bala ajanga bala ang-abwọ ịlụwa. IHuram họ ang-abwọ ịwẹ wuu jaabwọ ká iSolomọn byoo nyị họ. Oje ọnyọmịla ọlahịchịng ọ kpa haa wuu lẹ.

¹⁷Adịrahụ ya lẹ, ị kpa imoda nya ume gba ang ịwẹ wuu guru ẹ-ẹga ọlẹ kọ ji apewa nya iSukotu bala ịSaretan ọ-Ọkpọọ nya ịJọdan lẹlẹ.

¹⁸Iru ojuju nya oje ọnyọmịla ịlẹ kị kpa họ ang ịwẹ lụmẹ gbee ká ọngọhẹ-ẹ́ jẹ ilo ọlala nyamwụ myị ka.

¹⁹ISolomọn ya ị kpa okpoko ịgọm họ ang-abwọ ịkịla chajị nya Ube nya Amkpaa ịnyịnyị. Ang-abwọ ịịwa ri ogidi okiliya bala iteburu nya ịkaa ọlịgọgọ.

²⁰Ang ị-ya itinika rịrị ịlẹ kị họ lokpoko ọlahịchịng nyọka ya rịrị ị-ịlahị nya Ẹga Ọlịgọgọ Ọgụgụ wuu jaabwọ kị danọ nyọka họhọ.

²¹Ịnyangga nya àpwụ̀ igugu nya ekeji bala itinika bala abụwa ịlẹ kị họ lokpoko ịgọm ọlahịchịng.

²²Ang ịkịla ri bala ịwanggbẹ ị-kpa chị itinika ebyi bala ịja ịtụka bala ịja nya ịtangare bala ịja ị-kpa chụ ila. Okpoko ịgọm ị kpa họ ang-abwọ ịwẹ wuu lẹ. Ị kpụ okpoko ịgọm kụrụ ekpileku nya ọnang nya Ẹga Ọlịgọgọ Ọgụgụ wuu tụ ịnya ekpileku nya ọnang ilodehe nya Ube nya Amkpaa.