Read idege 2 EGO OGBEGBE 5 Bible Online

2 EGO OGBEGBE 5 - idege bible

2 EGO OGBEGBE 5

¹Ụka ka iSolomọn họ ụkụrwọ ọnyị myị ọnyị oluhye nya Ube nya Amkpaa kpá, ọ kpa ang-ahị nya okpoko onyoowuru bala okpoko ịgọm tụ ang-abwọ ịkịla wuu ịlẹ ká adamwụ iDevidi Adịrahụ ya ha Amkpaa kele ka ju e-ebe ị-ya ang guru ilube ịgọgọ.

²Ụka ọọwa, iSolomọn Adịrahụ wụrụ alegbeju nya ala Isirẹlụ wuu bwu imwawụ bala ogang datị-datị kaka jịra i-iJerusalẹm, chajị kị ka hu Akpa nya Iro bwu ẹga kọ rịrị ị-ịSayọn epweji nya iDevidi kpa ka ẹpwụ nya Ube Ịgọgọ.

³Ụka ọọwa, ịwa wuu wẹ kaka tụguru ẹ-ẹga nya adịrahụ lụka nya Ọhụhụ nya Adáa ọlẹ kị kaa la ẹ-ẹpwụ nya ọya ọharwiye.

⁴Ụka ka alegbeju nya ala Isirẹlụ jịra wuu lẹ, ala iLivayị à hu Akpa nya Iro

⁵bala Ọdụ Ọlịgọgọ tụ ang-abwọ ịlịgọgọ ịlụwa kpa ka Ube nya Amkpaa lẹlẹ. Ala iLivayị ịlẹ kị ri angịkiliya-à kpa ang ịwẹ wuu ka ube ịgọgọ lẹ.

⁶ISolomọn Adịrahụ bala ala Isirẹlụ ịlẹ kị jịra ị-ịlahị nya Akpa nya Iro ya iru nya ịkpịlọ bala ịna kịla iya. Iyo ikiliya ịịwa ju iru kịla ọwawa kịla.

⁷Ọọwa, angịkiliya-à hu Akpa nya Iro kpa ka Ube nya Amkpaa lẹ, ị ya rịrị ẹ-Ẹga Ọlịgọgọ Ọgụgụ wuu e-ekpeleji nya achwọ nya alegu-icherubu lẹlẹ.

⁸Achwọ ị-pyẹmaa nyaa ke Akpa nya Iro bala igbilo ị-kpa kpa olo nyamwụ.

⁹Ajị nyọlẹ ká ịgbilo ịwe la udiyo lụmẹ lẹ, ị jẹ-ẹ̀ yaa pwụ odehe nya Ẹga Ọlịgọgọ Ọgụgụ wuu, ị́ tị jẹ yaa bwu oye ọkịla ka. Igbilo ịịwa juwa pyịyọọ daalẹ wẹẹ.

¹⁰Ang ịlẹ kị juwa ẹ-ẹpwụ nya Akpa nya Iro kẹnẹ-kẹnẹ ri ajwọ ịpapịla imiiye ịlẹ ká iMosisi ya juwa ọ-Ọgbọdọ nya ịSayịnayị ụka ká Amkpaa nwa iro ta ala Isirẹlụ nyọlẹ kị gba kpehe bwu Ijipiti.

¹¹Ụka ọọwa, angịkiliya gba kpehe hi Ẹga Ọligọgọ. Ịwa angịkiliya ịlẹ kị juwa wuu hụ́ ịlaa charị-charị.

¹²Ala iLivayị ịlẹ kị ri angị mwu eje bwu ogang nya Asafụ bala ịHẹman bala iJedutun tụ anyị alẹng bala aanaa alẹng wuu kụrụ ịwụrụ nya ịpwụ ịnụnụ ịnyịịla-ịnyịịla godayị ka ọmwẹnụ-ụtụrụ nya ogidi. Ọọwa, ị juwa du ịchẹchẹ bala ogum̀ bala ẹnwụ lẹlẹ. Angịkiliya angị ohu da iwo imiiye (120) yẹ julaa juwa chị ẹkụrwẹ.

¹³Angị chị ẹkụrwẹ bala angị mwu eje yẹ julawụlẹ la okpokpo juwa gwogbo bala o-ji Amkpaa obe. Ị juwa kpa ẹkụrwẹ bala ịchẹchẹ du ju eje ịlẹ kị juwa mwu gbooo gwogbo ha Amkpaa yẹkẹẹ, “Anụ gwogbo ha Amkpaa, chajị ọ ri ọngọ ọnyịịla, ọháha o-gbu enyi-ka nyamwụ juwa gbe oyi myị oyi!” Ụka ọwẹ lẹ, egbamwụ à wẹ ka myị̀ Ube nya Amkpaa pwẹẹpwẹẹ lẹlẹ.

¹⁴Egbamwụ nya ụmụmẹ nya ijata ojiji nya Amkpaa ọọwa lụmẹ gbee lẹ, angịkiliya-á jẹ kịnyaa lụkụrwọ nyaa ọhọhọ myị kaka.