Read idege 2 EGO OGBEGBE 6 Bible Online

2 EGO OGBEGBE 6 - idege bible

2 EGO OGBEGBE 6

¹Ọọwa, iSolomọn à raabwọ yẹkẹẹ, “Ahụ Amkpaa ya ọwa nyị ka kụ ẹ-ẹpwụ nya egbamwụ ohite-hite.

²M̀ nwụ ẹpwang olihi-ihi hang ẹga ká ka kụ gbe oyi myị oyi lẹ.”

³Ụka ká ala Isirẹlụ wuu godayị rịrị ụ-ụwa, iSolomọn adịrahụ a jahị kpata daa, juwa wahị kụrwaa lẹlẹ.

⁴Ọọwa, ọ yẹkẹẹ, “Ogbo a ri nya Amkpaa, Ohe Oluhye nya ala Isirẹlụ. Ọ họ ang ọlẹ kọọwa ayịdang kpa ọnụ nya ịlọmwụ myị ha iDevidi adam jịra lẹ. Ọwa ayịdang lẹẹ byi adam yẹkẹẹ,

⁵‘Mwiiji nyọlẹ kam gba ala Isirẹlụ angịnyị nyam kpehe bwu ọpyị nya Ijipiti, ḿ chụ epweji ọhẹ-lọhẹ ọ-ọpyị nya Isirẹlụ ọlẹ wuu nya ẹga kị ka nwụ ube nyam ka. Ḿ tị chụ ọngọngọhẹ nyọka ri olegbeju nya ala Isirẹlụ angịnyị nyam ka.

⁶Ọlẹẹlẹẹ tị lẹ, m̀ chụ iJerusalẹm nya ẹga kị ka gbịgba ham bala ọ-chụng ahụ iDevidi nyọka ri adịrahụ nya angịnyị nyam lẹ.’ ”

⁷ISolomọn ya ịnyịnyị yẹkẹẹ, “Ịnọ iDevidi adam me obyi nyọka nwụ ẹpwang ọlẹ kị ka gbịgba ha Amkpaa Ohe Oluhye nya ala Isirẹlụ.

⁸Ma, Amkpaa tị byọọ yẹkẹẹ, ‘Ọ hiigu nyọlẹ ká lirya nyọka ka nwụ ẹpwang ọraabwọ ham.

⁹Aahụ à tị ka nwụ ẹpwang ham ka. Ọnyị ọlẹng nyang ọhẹ kpangga-à ka me Ube nyam lẹ.’

¹⁰“Amkpaa họ ọnụ ọmyịmyị nyamwụ jịra lẹ. M̀ ri adịrahụ nya ala Isirẹlụ lẹẹ ku ọmwakpa nya iDevidi adam lẹ. M̀ tị nwụ Ube ọlẹ kị ka gbịgba ha Amkpaa Ohe Oluhye nya ala Isirẹlụ lẹ.

¹¹M̀ ya Akpa nya Iro rịrị u-Ube nya Amkpaa lẹ. Ẹpwụ nya Akpa nya Iro ọwẹ ị ya ajwọ ịpapịla nya iro ọlẹ ka Amkpaa nwa ta ala Isirẹlụ ju lẹ.”

¹²Ụka ọọwa, iSolomọn godayị ị-ịlahị nya ogidi okiliya nya Amkpaa i-ijata nya ala Isirẹlụ wuu lẹ ọ kpa abwọ nyamwụ ka uhye lẹlẹ.

¹³ISolomọn lẹẹ họ ang ọdayị rịrị ọhẹ hwoo rịrị ọdọda olodehe nya Ube nya Amkpaa. Udiyo nya ang ọọwa ri apatẹ irwiye ba ẹhya. Ẹpwụ ojuju nyamwụ ri apatẹ irwiye ba ẹhya. Uhye ọlala nyamwụ ri apatẹ ine ba ẹhya. Ọ kpụ uhye nya ang ọdayị rịrị ọwẹ, ya arụụ kụ eji a-ahị nya uche nya ala Isirẹlụ wuu, kpa abwọ nyamwụ ka uhye-ọgba lẹ,

¹⁴ọ raabwọ yẹkẹẹ, “Amkpaa Ohe Oluhye nya ala Isirẹlụ ee, Ohe ọhẹ-lọhẹ-ẹ́ ji kọ lala ahụ ẹ-ẹpwoohe lee am̀ odehe ka. A kaa họ ọnụ ọmyịmyị nyang jịra ẹ-ẹga nya angịnyị nyang bala ọ-mẹ ọháha nyang jẹ u-uhye nyaa ụka kị kpa ọkịlẹtụ nyaa wuu juwa hịhị ẹ-ẹpwụ nya ihi nyang ojuju.

¹⁵A họ ọnụ ọlẹ ká myị ha ọnchẹ nyang iDevidi adam jịra. Ahụ a kpa ọnụ nya ịlọng myị ọnụ ọwẹ lẹ. Alẹ ọlẹ tịị wẹ lẹ, à kpa ụbwọ nya ịlọng họọ jịra wuu lẹ.

¹⁶Lẹẹlẹ, Amkpaa Ohe Oluhye nya ala Isirẹlụ ee, m jam raabwọ hang ká ka họ ọnụ ọmyịmyị ọkịla ọlẹ ká myị ha adam jịra. À lẹẹ myị ọnụ họọ ya ó-ri ká anyị ịtụma nyamwụ nyị ju ihi nyang kpẹẹkpẹẹ jaabwọ kọọwa ayịdang nyị jung ihi aalẹ, ọngọhẹ lẹpwụ nyaa nyị ka ri adịrahụ nya ala Isirẹlụ ụka datị-datị ịnyịnyịịnyị.

¹⁷Amkpaa Ohe Oluhye nya ala Isirẹlụ ee, chuchuu myị ká ang myị ang wuu a họ jịra jaabwọ ká myị ọnụ ha iDevidi adam ọnchẹ nyang mẹ.

¹⁸“Kpakpaakpa lẹẹ, ahụ Ohe Oluhye ka jẹ-ẹ kụ ẹpwa am̀ odehe ọlẹ ta angịnyị ehe myị-ịị́? Epwoohe ri epwoohe wuu lẹpwụ-lẹpwụ-ụ́ la gbamgbam nwa ojuju nyang ka. Ee lẹ, Ube Ịgọgọ amamadiroko ọlẹ kam nwụ lẹẹ tị́ ka họ anyị kọ ka nwang-ǹg nwa-āà!

¹⁹Tị kpọkpọọkpọ, aa wo abwọ ọrịrị nyam am ọnchẹ nyang, ká họ ọbaba nyam ịlẹ kam wẹẹ kpa wẹ ẹga nyang alẹ mẹ, Amkpaa Ohe Oluhye nyam.

²⁰Aa kpẹhị rịrị Ube Ịgọgọ ọlẹ tụ odu tụ ẹnụ. Ụwa-à ri ẹga ká chụ kị ka gbịgba hang lẹ. Lẹẹlẹ, aa wo lam ụka myị ụka kam jahị da wẹ Ube nyang ọlẹ juwa raabwọ hang.

²¹Wo ọbịlẹ-bịlẹ nyam am ọnchẹ nyang bala ịnya ala Isirẹlụ angịnyị nyang ụka myị ụka kị jahị da warị wẹ ẹgẹlẹ juwa ka raabwọ. Aa wo lahị bwu epwoohe ẹga ká kụ, ká hịnyọhi ang onyobyi ịlẹ kahị họ.

²²“Ó-ri kị chị ẹla ba ọngịnyị kpụ kị kpa ọngọọwa warị wẹ ẹga nya ogidi nyang u-Ube Ịgọgọ ọlẹ nyọka nwa iro ọ-wụ́ ọhịlà-hịlà hi ịlọmwụ

²³aalẹ, a chuchuu, ká wo pwụ epwoohe, ká rụ anchẹ nyang ịịwa ịgba. Yẹ ọngọ la abyị akama, ká ọngọ da ẹla ka ā rụ gịlala.

²⁴“Ụka ká aluji-í kụrụ ala Isirẹlụ angịnyị nyang ajị nyori ị họ ang onyobyi bang, kị tị yẹ irya da tịrẹkpẹ wẹ ẹga nyang, kị wụrụ ẹnyị nyang juwa raabwọ bịlẹng ọhịnyọhi am̀ u-Ube Ịgọgọ ọlẹ

²⁵aalẹ, aa wo pwụ epwoohe, ká hịnyọhi ọ-họ tịpyọ nya angịnyị nyang, ká kpaa tịrẹkpẹ nyà warị wẹ ọpyị ọlẹ ká ya haa bala adaa igogo anyị.

²⁶“Ụka ká angịnyị nyang á họ ang onyobyi bang, ká yaa akama bwula ọ-hịnyọ lenyi o-do haa, kị tị yẹ irya da, kị jahị da wẹ Ube Ịgọgọ ọlẹ juwa raabwọ hang

²⁷aalẹ, aa wo pwụ epwoohe. Chuchuu, ká hịnyọhi ọ-họ tịpyọ nya ala Isirẹlụ anchẹ nyang, ká mẹjaa kị ka họ ang ọnyịịla. Ọọwa lẹ, ká do enyi am̀ ọ-ọpyị nyang ọlẹ ká hu ha angịnyị nyang nya ang ọlala ọpyịyọọ mẹ, Amkpaa.

²⁸“Ó-ri ká uhi-í ji ọpyị lee ẹdụrụ-ụ́ nya ịdọlọdọlọ-ọ́ jụ angịnyị lee ẹdụrụ ọ-bịrị ang-ẹrụ kị wo apwụ gbụdụ-gbụdụ bala o-gbu wombooo lee ịyịrị bala ekpunjuju-ú nẹ ang-ẹrụ nyaa lee aluji nyaa-á warị kaka yaa dada lee ụma nya ẹdụrụ ọnyị myị ọnyị kọ jụ angịnyị,

²⁹aa wo abwọ ọrịrị nyaa. Ó-ri ká ala Isirẹlụ angịnyị nyang á raabwọ bịlẹng bwu ọkịlẹtụ nyaa u-uhye nya akama lee ọjụjụ nyaa jahị da wẹ Ube Ịgọgọ ọlẹ

³⁰aalẹ, aa wo abwọ ọrịrị nyaa pwụ ẹpwoohe ẹga ká kụ, ká hịnyọhi ọ-họ tịpyọ nyaa. Ahụ ụbwọng à jẹ irya ọlọkịlẹtụ nya ọngịnyị ehe lẹ. Aa ya ang ọlẹ kọ pwoku ọngọngọọng họọ.

³¹Ọọwa, angịnyị nyang a ka ju ihi nyang ụka wuu ọ-ọpyị ọlẹ ká ya ha adaa igogo anyị lẹlẹ.

³²“Angga ịlẹ kị ri alẹpwụ nya ala Isirẹlụ angịnyị nyang ka kà wo oja nya ụmụmẹ bala ọngịrị nyang, ị ka bwu ịpyị ịlụrụ warị kaka gbịgba hang, juwa raabwọ u-Ube Ịgọgọ ọlẹ myị.

³³Aa wo abwọ ọrịrị nyaa pwụ epwoohe ẹga ká kụ, ka họ ang ọlẹ kị bịlẹ bwu ẹga nyang, chajị ká alodehe ka jẹng bala o-ju ihi nyang jaabwọ ká ala Isirẹlụ angịnyị nyang wẹẹ họ. Ọọwa, ịwa-à tịtị ka jẹ ká Ube Ịgọgọ ọlẹ kam nwụ lẹẹ à ri ẹga kị ka gbịgba ha ẹnyị nyang lẹlẹ.

³⁴Ó-ri ká angịnyị nyang á kpehe kaka dẹwụ ẹ-ẹgẹgẹhẹ ọlẹ ká daa ẹrụ ka, kị raabwọ hang ahụ Amkpaa jahị da epweji ọlẹ ka chụ bala Ube Ịgọgọ ọlẹ kam nwụ hang

³⁵aalẹ, aa wo abwọ ọrịrị nyaa. Wo abwọ ọrịrị ọọwa bwu epwoohe ká ya ọkụrụ-kụrụ haa.

³⁶“Ọngọngọhẹ-ẹ́ ji kọọ họ ang onyobyi ka lẹ koo. Ọ́ tị ri ká angịnyị nyang á họ ang onyobyi bang, ká wụ ẹjẹ, ká ya iwe da ha aluji nyaa kpụ kị wẹ kaka kụrwaa, gyaa kpa rụ ka ọpyị ọkịla, ụwa-á lụrụ-ụ la lee o-ju chwẹẹ

³⁷aalẹ, aa wo abwọ ọrịrị nyaa. Ó-ri kị yẹ irya da ọ-ọpyị ọlẹ kị ji, kị juwa ya dodehe ịwa nyị họ tịpyọ lẹ,

³⁸kị jahị kpata wẹ ẹga nyang lọkịlẹtụ bala ugbodu okpukpuru nyaa wuu, kị raabwọ hang jahị da ọpyị ọlẹ ká ya ha adahị igogo anyị bala epweji ọlẹ ká chụ bala Ube Ịgọgọ ọlẹ kam nwụ lẹẹ nyọka gbịgba hang

³⁹aalẹ, aa ke ụrụ la abwọ ọrịrị bala ọbịlẹ-bịlẹ nyaa pwụ epwoohe ẹga ká kụ, ká daa ụbwọ.

⁴⁰“Ohe Oluhye nyam ee, aa wo abwọ ọrịrị ọnyị myị ọnyị kị rị hang ẹgẹlẹ.

⁴¹Amkpaa Ohe Oluhye ee, wuleji ká jụ wẹ Ube Ịgọgọ ẹga ká Akpa nya Iro ọlẹ kọ ri ang-ẹjẹẹ nya ọngịrị nyang rịrị ká kụ ẹpwa ụ-ụwa pyịyọọ mẹ. Aa wahị kụrụ angịkiliya nyang ẹ-ẹpwụ nya ụkụrwọ nyaa wuu, ká angịnyị ịkpẹẹkpẹẹ nyang ā chị ọkẹkẹnị chajị nya ọháha nyang ọlẹga nyaa.

⁴²Amkpaa Ohe Oluhye ee, ā pwa adịrahụ ọlẹ ká chụ kokoo. Aa kpịtịya nya ọháha o-gbu enyi-ka nyang ọlẹga nya iDevidi ọnchẹ nyang.”