Read idege 2 EGO OGBEGBE 7 Bible Online

2 EGO OGBEGBE 7 - idege bible

2 EGO OGBEGBE 7

¹Ụka ká iSolomọn raabwọ kpá lẹ, ila-à bwu uhye-ọgba ka ka rụ iya ịlẹ kị kịla lẹlẹ. Ahịgboo nya ijata ojiji nya Amkpaa myị Ube Ịgọgọ pwẹẹpwẹẹ.

²Angịkiliya a jẹ ju ka Ube nya Amkpaa myị ka, chajị nyọlẹ ka ahịgboo ọmyịrị-myịrị ọwẹ myị̀ ẹga wuu pwẹẹpwẹẹ.

³Ụka ká ala Isirẹlụ wuu yẹ ịla ọlẹ kọ chabwọ bwu uhye-ọgba bala ahịgboo ọlẹ kọ myị Ube nya Amkpaa pwẹẹpwẹẹ, ịwa wuu à hirikpẹẹ yahị kụrụ eji juwa gbịgba bala o-gwogbo ha Amkpaa yẹkẹẹ, “Amkpaa hiigu, ọháha o-gbu enyi-ka nyamwụ juwa gbe oyi myị oyi.”

⁴Ọọwa, iSolomọn Adịrahụ bala angịnyị wuu à kịla iya ha Amkpaa lẹlẹ.

⁵ISolomọn Adịrahụ ya ịna ụnọ iwo imiiye da ụnọ imiiye (22,000) bala ịkpịlọ ụnọ ohu da ụnọ iwo imiiye (120,000) kịla iya nya ọhọlawụlẹ. Ịịwẹ ọwa bala angịnyị à bwu chị ịgọgọ ju Ube nya Amkpaa lẹlẹ.

⁶Angịkiliya godayị rịrị ẹ-ẹga kị hunọ haa. Ala iLivayị kụ ẹga nyaa ịnyịnyị juwa mwu eje bala o-du ang ju eje lang ịlẹ kị́ iDevidi Adịrahụ họ nyọka kpa gwogbo ha Amkpaa. Ị juwa mwu eji yẹkẹẹ, “Ọháha o-gbu enyi-ka nyamwụ juwa gbe oyi myị oyi!” Angịkiliya godayị ụpa ọkịla jahị daa warị juwa chị ẹkụrwẹ. Ọọwa, angịkịla nya ala Isirẹlụ wuu à godayị rụwa lẹlẹ.

⁷ISolomọn chị ịgọgọ ju ẹpwarịrị nya ọdọda ọlịlahị nya Ube nya Amkpaa lẹ, ị kịla iya ọ-rụ ila bala iya nya ajẹ nya ang-ẹrụ tụ eyo nya iyo okiliya nya ọhọlawụlẹ ụ-ụwa lẹlẹ. Ọ họ ịnyị, chajị ogidi nya oje ọnyọmịla ọlẹ kọ họ-ọ́ lụmẹ nwụ nyọka kịla iya datị-datị ịwẹ wuu u-uhye nyamwụ ka.

⁸ISolomọn bala ala Isirẹlụ wuu la Ọhụhụ nya Adáa jịra ẹẹnụtụrụ irwiye gbẹgbịlẹ. Iru nya angịnyị bwam-bwale nya Isirẹlụ wuu wẹ ọhụhụ ọọwa. Ị wẹ bwu ẹga ọhwẹ̀ẹẹ lala ẹga Ọchịpwụrụ bwu nya ịHamatị lalẹẹ ẹ-ẹtẹ bala ọ̀bá nya ala Ijipiti lẹẹ e-edii.

⁹Ị lẹẹ chị ịgọgọ ju ogidi jịra ẹẹnụtụrụ irwiye gbẹgbịlẹ ene kịị la ọhụhụ jịra ẹẹnụtụrụ irwiye ịnyịnyị. Ẹnụtụrụ ọhaneku lẹ, ị la ọhụhụ nya otuku lẹlẹ.

¹⁰Ahị ọpyẹpyẹ ọọnamwụ kọ ri ẹnụtụrụ iwo imiiye kụrụ ịta nya ọya lẹ, iSolomọn à pẹhi angịnyị rụ ka ẹpwa nya ịlaa lẹlẹ. Ị rụ lọkẹkẹnị chajị nya ang ịnyịịla ịlẹ wuu ká Amkpaa họ ha iDevidi bala iSolomọn bala ala Isirẹlụ wuu.

¹¹ISolomọn nwụ Ube nya Amkpaa bala ẹpwa nya adịrahụ wuu kpá, chaa eju jaabwọ kọ la i-irya chajị nyaa.

¹²Ọọwa, Amkpaa-à chị ịlọmwụ ehe mẹjọọ lodu ọhẹ lẹ, ọ byoo yẹkẹẹ, “M̀ wo abwọ ọrịrị nyang lẹ, m̀ tị ye Ube Ịgọgọ ọlẹ kọ ka ri ẹga kị ka kịla iya ham lẹ.

¹³Ụka ọhẹ ka ji kam ka do enyi ka lee ọ-ka du ịyịrị kaka ri ang-ẹrụ nyanụ lee o-du ẹdụrụ nya ịdọlọ-dọlọ kaka jụụnụ anụ angịnyị nyam myị.

¹⁴Ó-rị ká angịlẹ kam wụrụ angịnyị nya ịlọm lụbwọ-lẹta-á raabwọ bala ọ-yẹ irya da, gu ahị gboo hi ang onyobyi ịlẹ kịị họ aalẹ, m̀ ka wo laa pwụ epwoohe, kam ka hịnyọhi ịhọbịrị nyaa bala ọ-họ ká ọpyị nyaa ka pyẹ pyọ́ọ̀ọ̀ myịmyị.

¹⁵M̀ ka ya ẹhị rịrị wẹ Ube Ịgọgọ ọlẹ nyọka ke ụrụ labwọ ọrịrị ọnyị myị ọnyị kị ka rị am̀,

¹⁶chajị m̀ chwọọ bala ọ-chị ịgọgọ jwoo kọ ka ri ẹga kị ka gbịgba ham pyịyọọ lẹ. M̀ ka kpẹhị rịrọọ ụka wuu.

¹⁷Ahụ tị lẹ, ó-ri ká myị ẹrụ ham kpẹẹkpẹẹ lala iDevidi adang, ká ju ihi nya ehile bala ọmẹjẹ nyam ịlẹ wuu kam ya dang e-eji

¹⁸aalẹ m̀ ka họ ká ẹchị-adịrahụ nyang ka yeji pyịyọọ, ká anyị-anyị nyang à ka hụ ụ-ụwa jaabwọ kam myị ọnụ ha iDevidi adang nyori anyị-anyị nyamwụ à ka ri adịrahụ nya Isirẹlụ pyịyọọ lẹ.

¹⁹Ọ́ tị ri kaahụ bala angịnyị nyang-ńg nyẹẹkpẹ dam, juwa bịrị ehile bala ọmẹjẹ ịlẹ wuu kam ya hang-ǹg wẹ, juwa kpụ eteji ha ijiga

²⁰aalẹ, m̀ ka kụnụ rụ hi ọpyị nyam ọlẹ kam ya hanụ-ụ̀ wẹ. M̀ ka nyẹẹkpẹ da Ube Ịgọgọ ọlẹ kam chị ịgọgọ ju-ù wẹ nyọka ri ẹga ọgbịgba ham. M̀ ka họ ká alẹpwụma ịkịla ka hwoo lala ang ọ-kpa chị ịpẹ kị ka hu ẹpẹpẹ jwoo.

²¹“Ube Ịgọgọ ọlẹ la ihi-ihi lụmẹ lẹẹlẹẹ kpá odu ịnyị-ị̄, ụka ọọwa, Ọng myị ọng kọ chịpwụrụ bwu am̀ ka chị abwigo bala ọ-yụbwọ ba ọnụ juwa towo yẹkẹẹ, ‘Anyị tị́ du ká Amkpaa họ ọpyị nya angịlẹ bala Ube Ịgọgọ ọlẹ ẹla ọlịịwẹ kpá-à wẹẹ?’

²²Ụka ọọwa, angịnyị ka wẹ yẹkẹẹ, ‘Ajị nyọlẹ kị nyẹẹkpẹ da Amkpaa Ohe Oluhye nya adaa igogo ọlẹ kọ gbaa kpehe bwu ọpyị nya Ijipiti ịnyị. Ị rụ kaka kpụ ijiga juwa kpụ eteji haa à du ká Amkpaa kpa akama ịwẹ warị chaa ọgụ lẹ.’ ”