Read idege 2 EGO OGBEGBE 8 Bible Online

2 EGO OGBEGBE 8 - idege bible

2 EGO OGBEGBE 8

¹ISolomọn nwụ Ube nya Amkpaa bala ẹpwa nya adịrahụ kpá ẹ-ẹpwụ nya ẹka iwo imiiye.

²Ọ ma epweji ịle ka iHiram Adịrahụ ya họọ nwụ. Ọọwa, ọ ya ala Isirẹlụ kụ ụwa lẹlẹ.

³ISolomọn dẹwụ kụrụ epweji nya ịHamatị-isoba.

⁴Ọ ya ị ma epweji nya ịTadịmọ olugbileji nwụ tụ epweji ịla ịHamatị ịlẹ kị ri ẹga ị-ya ang guru.

⁵Ọ ma epweji nya ịBẹtị-ịhọrọn Oluhye bala ịBẹtị-ịhọrọn Oleji nwụ, me egwalọ dagaga jwaa bala ọ-kpa ije họ ekpileku nya ogirigba ịlụwa.

⁶Ọ ma epweji nya ịBaalatị nwụ bala epweji ịkịla ịlẹ kọ ka ya ang guru bala epweji ịlẹ wuu kọ ka ya anyịrẹ bala ang ịrụnyẹ nyamwụ bwọ eji. Ọ nwụ ang myị ịlẹ kị ri irya nyamwụ nyọka nwụnwụ i-iJerusalẹm bala iLibanọn bala ẹ-ẹgẹgẹhẹ nya ọpyị nyamwụ wuu.

⁷Angịlẹ wuu kị ri ala Isirẹlụ ka, kị ri ala iHiiti bala ala Amọ bala ala iPerisi bala ala iHivi bala ala iJebusi, kị hị kụ iKenan wẹẹ

⁸ri anyị ịtụma nya alẹpwụma ịlẹ ká ala Isirẹlụ-ụ́ ta ayịreji gbanggbang ka. Angịlẹ wuu iSolomọn à yẹ juju nya anyịhị, gyaa kpa họ ụkụrwọ nya igwabwọ ha ịlọmwụ pyịyọọ daalẹ lẹ.

⁹ISolomọn Adịrahụ-ụ́ tị wu ọla Isirẹlụ ọhẹ-lọhẹ kpa họ ụkụrwọ nya igwabwọ ha ịlọmwụ lala ọnyọhị ka. Ala Isirẹlụ ọ go ri angịdẹwụ bala alegbeju nya angịdẹwụ bala alegbeju nya angị kụ ang ịrụnyẹ bala angị kụ ang ịrụnyẹ nyamwụ lẹ.

¹⁰ISolomọn chụ alegbeju angị ohu imiiye da angị iwo ịrụ (250) ịlẹ kị ka kpẹhị rịrị ụkụrwọ nya ẹpwang imeme datị-datị ịlẹ kọ kpa ụ-ụbwọ.

¹¹ISolomọn mwụ ahụ nyamwụ ọlẹ kọ ri ọnyị nya adịrahụ nya ala Ijipiti bwu Epweji nya iDevidi kele ka ẹpwa ọlẹ kọ nwụ họọ. Ang odudu kọ họ ịnyị ri ọ ya ahụ nyọwa nyị́ ka jẹ-ẹ̀ kụ e-Epweji nya iDevidi ka chajị Akpa nya Iro nyị rịrị ụ-ụwa lẹ, ụwa nyị lịgọgọ.

¹²ISolomọn kịla iya ọ-rụ ila ha Amkpaa u-uhye nya ogidi ọlẹ kọ me rịrị ị-ịlahị nya ọnụụkpa nya Ube nya Amkpaa.

¹³Ọọ kịla iya ẹnụ myị ẹnụ jaabwọ ka ehile ịlẹ ká iMosisi ya haa ya nyị kịla. Ịị kịla iya ịdatị-datị lụka nya Ẹnụtụrụ Ọhịnyọ Lụkụrwọ bala Ẹnụ nya Ọhụhụ nya Ọya Onyeewe bala lụka nya ọhụhụ ịta ịlẹ kịị la ẹkẹkẹẹka ịlẹ kị ri Ọhụhụ nya Ang Oriri Ọchịpwụrụ bala Ọhụhụ nya Ang-ẹrụ Ọwụrụ bala Ọhụhụ nya Adáa.

¹⁴ISolomọn ba ehile nya iDevidi adamwụ ịlẹ kọ da neeji jẹ ẹ-ẹpwụ nya ụkụrwọ ọlẹnụ myị ẹnụ ọgaga ha angịkiliya bala ala iLivayị ịlẹ ká ụkụrwọ nyaa ri ọ-ka mwu eje bala ọ-da angịkiliya ụbwọ. Ọ tịtị chụ angịgbeji ebwebweebwo jaabwọ kị ka gbe ọnang ọnyọnyọọnyị jaabwọ ká iDevidi ọngịnyị nya Ohe Oluhye da ehile ya nyị họ.

¹⁵Ị́ yẹgile hi ehile ọhẹ-lọhẹ ọlẹ ká iDevidi da chajị angịkiliya bala ala iLivayị bala ebe ị-ya ang guru ka.

¹⁶ISolomọn họ ụkụrwọ nyamwụ wuu cheju kpẹẹkpẹẹ bwu ụka kị da ọmwuji nya Ube nya Amkpaa gbee kaka ju ka ocheju nyamwụ.

¹⁷Ẹ-ẹkpẹ nya ọọwa, iSolomọn kele ka epweji nya Esiyọn-ịgẹbẹẹ bala Elatị kị kụ ọ-ọnụ nya Ihu Oletungkohyo ọ-ọpyị nya Ẹdọm.

¹⁸Ụka ọọwa, iHiram Adịrahụ ya agbọ nya enyi du alụkụrwọ nyamwụ ịlẹ kị jẹ-ẹ ju ụgbọ nya enyi yẹẹyẹẹ kịla iSolomọn. Ọọwa, ịwa bala alụkụrwọ nya iSolomọn a ju ụgbọ nya enyi ịwẹ kele ka ọpyị nya Ofii lẹ, ị kpa iku nya okpoko ịgọm ohu ine da iwo ịrụ (450) nyà bwu ụwa wẹ iSolomọn lẹlẹ.